Daidia Edia Guriguri Ia Haere Henia?

IEHOVA be guriguri ena haere ia henia Diravana. Iena Hereva, Bible, lalonai ia gwau ia be “guriguri ia Kamonai Henia Tauna.” (Salamo 65:2) Ia ura guriguri edia haere ia henia. To daidia edia guriguri ia haere henia?

Dirava ia ura ia idia hamoalea taudia edia guriguri ia haere henia. Idia be salamo tauna bamona, Dirava idia laloa bada, ia gwau: “Egu Dirava e, hegeregerena dia hahinena ese sinavai ranudia ia ura henia bamona, lauegu lalona be oi dekenai ia ura henia. Lauegu lalona ia ranu mase Dirava dekenai, Mauri Diravana unai.” (Salamo 42:​1, 2) To, dahaka hamomokania hereva ia noho unai amo ita diba Iehova be ia dekenai idia tomadiho momokani taudia edia guriguri ia haere henia?

Dirava ese Guriguri Ia Haere Henia Hamomokania Karana

Bible lalonai, sivarai momo idia hamomokania Iehova be abidadama dekenai ia idia hesiai henia taudia edia guriguri ia haere henidia. Haheitalai ta be Iuda ena King Iehosafat be hahemauri totona ia guriguri neganai, Dirava ese iena guriguri ia haere henia bona kwalimu dalana ia kehoa Iehosafat ena inai taudia idia ala-ala heheni totona. (2 Sisiga 20:​1-26) King Hesekia be unai hegeregerena tuari orea badana ia tuari henia gwauraia neganai, ia be manau dekenai Dirava ena heduru totona ia noinoi. Hesekia be Iehova ena hahemauri dalana ia itaia badina Iehova ena aneru be hanuaboi tamona lalonai Asuria taudia 185,000 ia hamasedia.​—Isaia 37:​14-20, 36-38.

Badina be dahaka Dirava be unai guriguri ia haere henidia? Unai sivarai rua lalonai, unai king rua idia noinoi neganai idia laloa bema unai tuari dekenai idia kwalimu lasi unai ese Iehova ena ladana do ia hadikaia. (2 Sisiga 20:​6-9; Isaia 37:​17-20) Idia ura lasi taunimanima vairanai iena ladana ia dika. The International Standard Bible Encyclopedia bukana ia gwau: “Guriguri ena badina be noinoi tauna ena namo totona sibona lasi, to Dirava ena ladana hanamoa totona.” Unai dainai, Iehova ena abidadama hesiai taudia idia diba momokani “iena ladana dainai” do ia durudia. Bible ena sivarai ese idia hahedinaraia gunaguna ia ese guriguri ia haere henidia, unai dainai Dirava ena taunimanima idia diba momokani ia be edia guriguri ia kamonai henidia.​—Salamo 91:​14, 15; 106:8; Hereva Lada-isidia 18:10.

Herevana kara ta ese Iehova ena ladana ia hadikaia diba o lasi, to Dirava sibona ia gwau ia ese guriguri haida do ia haere henidia o lasi. Reana badina namodia haida dainai ia be guriguri haida ia haere henidia lasi. Bema ita laloa iseda guriguri ia kamonai henia lasi, namona be ena badina ita laloa.

Guriguri Haida Ia Haere Henidia Lasi Ena Badina

Nega ta Iehova be Israel taudia ia hamaorodia: “Ena be guriguri momo do umui gwauraia, to do lau kamonai lasi.” Ena badina ia gwauraia, ia gwau: “Emui imana be rara amo idia honu.” (Isaia 1:15) Bema tau ta be Iehova ena taravatu ia badinaia lasi Iehova ese do ia kamonai henia lasi, ani? Bible ena aonega hereva ta ese haere ia hahedinaraia goevagoeva, ia gwau: “Taravatu kamonai henia karana dekenai iena taiana ia koua tauna​—iena guriguri danu be gau dikana.”​—Hereva Lada-isidia 28:9.

Guriguri haida edia haere be lasi ena badina ma ta Bible ese ia gwauraia, ia gwau: “Dirava umui noia neganai, emui ura gauna umui davaria lasi, badina be mai laloa kerere danu umui noia. Emui laloa be unai gauna do umui abia, bona do umui gaukaralaia emui tauanina edia ura dikadia totona.” (Iakobo 4:3) Oibe, Iehova be edia ura dikadia dainai taunimanima ese idia karaia guriguridia edia haere ia henia lasi. Namona be ita laloatao danu taunimanima be Dirava idia hamaoroa diba lasi dahaka ia karaia totona. Edena bamona iseda guriguri do ia haere henia dalana Ia Gwauraia Tauna be Ia sibona.

Taunimanima be Dirava dekenai kudou goevana amo, ura namona amo, bona Dirava ese ia gwauraia dalana amo​—Keriso Iesu unai, idia guriguri henia neganai, haere do ia henia momokani. (Ioane 14:​6, 14) To unai bamona idia guriguri taudia be nega haida idia laloa edia guriguri ia kamonai henia lasi. Badina be dahaka Dirava be iena hesiai taudia edia guriguri haida ia haere henia haraga lasi?

Iehova ia diba edena nega be maoro guriguri ia haere henia totona. Ena be mero ta be baisikeli totona ia noinoi, to reana tamana ese do ia henia lasi ela bona unai mero ena lagani ia hegeregere ia be unai baisikeli ia taria namonamo totona. Dirava idia lalokau henia taudia edia guriguri haida be reana unai bamona. Ia diba dahaka idia abia be namo, bona nega korikori ai ia henidia.

To, Iehova ena hesiai taudia ese idia noinoilaia gaudia haida sibona idia abia. Idia goevadae lasi dainai, reana idia ura abia gaudia haida be namo idia mailaia lasi. Edia lalokau guba Tamana ese gau dikana idia do ia henia lasi, badina Iehova be “harihari gaudia namodia momokani ibounai” ia Henia Tauna. (Iakobo 1:17) Unai hegeregerena, bema Dirava ia laloa unai gau idia abia lasi be namo idia do ia henia lasi. (2 Korinto 12:​7-10 itaia danu.) Iena ura bona taunimanima dekenai iena ura hegeregerena idia karaia guriguridia ia haere henidia.​—1 Ioane 5:​14, 15.

Iesu Ena “Noinoi Ia Abia Dae”

Iesu Keriso be guriguri karaia tauna. (Mataio 6:​9-13; Ioane 17:​1-26) Ia diba momokani iena guba Tamana be iena guriguri do ia kamonai henia bona guriguri do ia haere henia. Iesu be nega ta ia gwau: “Egu Tamana e, . . . lau diba oi be nega ibounai oi kamonai henia lau.” (Ioane 11:​41, 42) To kahirakahira ia mase neganai, toana be Iesu ia lalohisihisi, a? Badina inai bamona ia boiboi, ia gwau: “Egu Dirava e, Egu Dirava e, dahaka dainai lau oi rakatania?”​—Mataio 27:46.

Iesu be unai hereva ia gwauraia neganai, ia be iena mase ena peroveta herevana ta ia hagugurua. (Salamo 22:1) Dala maragina ta dekenai, reana Iesu ena hereva ena anina be inai: Iehova ese ena naria karana ia kokia bona iena Natuna be hisihisi bona hemarai masena ia abia dalana ia koua lasi Iesu ena abidadama ia hedinarai momokani totona. Iesu ena tanobada maurina ena dina ginigabena ai idia vara gaudia ese idia hahedinaraia Dirava be iena guriguri ia kamonai henia.

Idia dogoatao hanuaboina ai, Iesu be Getesemane umana lalonai ia guriguri. Nega toi ia noinoi: “Egu Tamana e, bema mai dala, inai kapusi lau dekena amo do oi kokia.” (Mataio 26:​39, 42, 44) Iesu be tanobada abidadama taudia totona iena mauri ia bouboulaia karana dekenai ia daradara lasi. To ia laloa momo gauna be inai: Ia ese ia lalokau henia momokani Tamana ena ladana ia hadikaia diba bema Dirava ladana hadikaia tauna bamona hisihisi auna dekenai ia mase. Iehova be Iesu ena guriguri ia kamonai henia, a?

Lagani momo murinai, aposetolo Paulo ia torea, ia gwau: “Ia be tanobada dekenai ia noho neganai Iesu ese Dirava ia guriguri henia mai taitai bona mai matana ranu danu. Ia noinoi badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura ia noia lasi, bona ia be Dirava henunai ia manau noho dainai.” (Heberu 5:7; Luka 22:​42, 44) Oibe, ia mase hanuaboina dekenai, hisihisi bada ia mamia dainai, Dirava ese Iesu ena “noinoi ia abia dae.” To edena dala amo?

Iehova be aneru ta ia siaia “[Iesu] dekenai goada henia totona.” (Luka 22:43) Unai bamona goada ia abia dainai, Iesu be ia haheauka diba ela bona hisihisi auna dekenai ia mase. Bena, Iehova ese ia hamaoroa au dekenai do ia mase neganai unai ese Dirava ena ladana do ia hadikaia lasi, to unai ese iena ladana do ia abia isi momokani. Momokani, Iesu be hisihisi auna dekenai ia mase dainai, Iuda taudia edia dala ia kehoa, idia be guna Taravatu henunai idia noho dainai, unai Taravatu ese ia hamasedia, to hari idia be hahemauri dalana idia abia diba.​—Galatia 3:​11-13.

Dina toi murinai, Iehova ese Iesu ia hatorea isi bona guba dekenai dagi badana ia henia dainai unai ese ia hahedinaraia ia be Dirava ladana ia hadikaia lasi. (Filipi 2:​7-11) Unai be dala namo hereana Iesu ena guriguri unai “kapusi” ia kokia ena haere ia abia totona! Iehova ese sibona ena dala amo unai guriguri ia haerelaia. Bona Iesu be hahenamo momo ia abia badina ia be iena guba Tamana ia hamaoroa: “Lauegu ura lasi, oiemu ura sibona.”​—Luka 22:42.

Iehova be Hari Inai Negai Guriguri Ia Haere Henia Dalana

Iesu bamona, hari inai negai Iehova idia ura hamoalea taudia be hanaihanai idia noinoi Dirava ena ura do ia vara be namo. Namona be idia abidadama Iehova be idia ia durudia dalana dekenai edia guriguri do ia haere henidia. ‘Edia noinoi bona edia lalohadai ibounai ia hereaia’ dalana dekenai do ia haere henidia.​—Efeso 3:20.

Keristen hahine matamatana ta be iena Witness lasi tamana bona sinana ida idia noho bona ia be unai siri ena hereva momokani ia mamia. Watch Tower Society be ia dekenai revareva ta idia siaia bona idia hamaoroa namona be mai guriguri danu ia laloa bema ia be misinari gaukara ia karaia diba eiava lasi. Ena be iena kudou dekenai ia ura ruma dekenai ia noho bona iena tamana sinana ia durudia idia be Keristen taudia ai do idia lao totona, ia be guriguri dekenai Dirava ia noia: “Oiemu ura be dahaka? Oi ura unai misinari gaukara lau karaia, herevana lauegu tamana sinana idia ura lasi, eiava oiemu ura be lauegu tamana sinana lau durudia bona idia danu lau noho?” Nega ibounai ia guriguri lalonai, iena lalona ena mamina ia gwau misinari gaukara do ia karaia. Ia be lalona ia hadaia unai be Iehova ena amo haere ia abia.

Dirava ese unai hahine ia hagoadaia iena lalohadai hegeregerena ia karaia totona. Ia be Awaji Motumotu, Japan, dekenai idia siaia neganai, iena tamana bona sinana idia hoa bona edia dagedage karana idia habadaia. To, iena lalona idia haidaua diba lasi dainai, sinana be Bible ia stadilaia hamatamaia badina ia ura ia diba ena natuna kekeni ena lalohadai ena badina be dahaka. Hua toi murinai, ena tamana bona sinana ese idia vadivadi henia. Idia itaia Iehova ena Witness taudia ma haida ese ia idia naria namo herea, unai dainai, ena tamana be mai moale danu ia hoa bona tau ta ia noho lasi neganai ia tai. Nega sisina murinai ia danu be Bible ia stadilaia hamatamaia. Nega ia lao murinai, unai hahine matamatana ena tamana bona sinana idia bapatiso bona abidadama dekenai Iehova idia hesiai henia hamatamaia. Iehova Dirava be dala bada hereana dekenai unai Keristen hahine ia hanamoa bada, ani?

Edia Guriguri Ena Haere Idia Abia

Inai magasin ena sivarai ginigunana dekenai ai gwauraia hahine ena hereva oi laloatao, a? Ia be iena guriguri ena haere abia mamina ia abia lasi. To, gabeai ia be mamina ia abia Dirava ese iena guriguri ia haere henia neganai. Unai hahine be iena guriguri ena hereva badadia ia torea. Dina ta iena noutbuk dekenai ia itaia lou bona ia lalo-parara Iehova be iena guriguri momo ia haere henia, ia sibona ia laloaboio vadaeni guriguridia edia haere ia henia danu! Unai dainai ia diba Dirava be ena namo ia tahua bona mai hebogahisi bada danu ia durua bada dalana dekenai iena guriguri ia haere henia.

Bema oi laloa emu guriguri ena haere oi abia lasi, oi sibona oi nanadaia: ‘Lau be Iehova, “Guriguri Ia Kamonai Henia Tauna,” danu turana karana lau karaia, a? Bema lasi, dala lau tahua ia lau diba totona bona iena gwauhamata hesiai tauna ai lau lao, a?’ Ia idia lalokau henia taudia bona iena ura idia karaia taudia edia guriguri ia kamonai henia. Idia be “guriguri [idia] goadalaia nega ibounai” bona Iesu bamona, Dirava ese edia noinoi “ia abia dae.” (Roma 12:12) Unai dainai, “emu kudouna ibounai” ena mamina be Iehova dekenai oi hadibaia bona iena ura oi karaia. (Salamo 62:8) Bena emu guriguri do ia kamonai henia.

Hari inai negai, taunimanima milion momo be edia gau badadia ta ta idia gurigurilaidia. Oibe, edia guriguri ia kamonai henia. Namona be ita itaia badina be dahaka ita diba edia guriguri be momokani do ia haere henia.