Haheauka Kara Ena Huahua Habadaia Dalana
“Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana. Inai bamona karadia idia karaia taudia be taravatu ta ese ia koudia diba lasi.” —GALATIA 5:22, 23.
1. Haheauka dekenai, daidia edia haheitalai be hereadae, bona edena Bible siridia ese unai ia hamomokania?
HAHEAUKA karana dekenai, Iehova Dirava bona Iesu Keriso edia haheitalai be hereadae. Eden dekenai taunimanima ginigunadia idia gwau-edeede negana amo ia mai hari, Iehova ese unai haheauka karana ia hahedinaraia. (Isaia 42:14 oi itaia danu.) Heberu Revarevadia lalodiai, nega 9 ia gwau ia “badu haraga lasi.” (Esodo 34:6) Unai anina be ia haheauka. Bona Dirava ena Natuna ese haheauka bada ia hahedinaraia, badina ena be “idia hereva dika henia, to ia hereva dika henia lou lasi.” (1 Petero 2:23) To, bema ia ura neganai, Iesu ese ena guba Tamana ia noia diba “aneru orea 12, bona ma haida danu” ia siaia ia durua totona.—Mataio 26:53.
2. Bible lalonai, mai edia kara dika taudia ese haheauka idia hahedinaraia edia haheitalai be dahaka?
2 Danu, Bible lalonai mai edia kara dika taudia ese haheauka idia hahedinaraia edia haheitalai namodia idia noho. Hegeregere, tau badana Iakobo ena natuna, Iosef, ena mauri lalonai, kara ta dainai haheauka ia hahedinaraia. Potifara adavana ia ura idia sihari kava neganai, Iosef ese haheauka bada ia hahedinaraia! (Genese 39:7-9) Danu, Heberu memero hani edia haheauka karana be haheitalai namo herea, idia ura lasi Babulono pavapava ena aniani digara idia ania, badina Mose Taravatuna ese unai aniani ia taravatulaia.—Daniel 1:8-17.
3. Edena taudia edia kara idia namo, bona daidia edia hereva ese unai ia hamomokania?
3 Hari inai nega lalonai, haheauka karana idia hahedinaraia taudia idia noho, idia be Iehova ena Witness oreana taudia. New Catholic Encyclopedia bukana ese edia kara ia hanamoa, ia gwau “tanobada ena orea iboudiai amo edia orea lalonai taunimanima edia kara namonamo idia naria namonamo.” Philippines iunivesiti ena tisa tauna ta ia gwau “Witness taudia be hanaihanai Bible dekena amo idia diba gaudia idia badinaia.” Lagani 1989 lalonai, Warsaw dekenai Witness taudia edia hebouhebou ia herevalaia neganai, nius torea Polish tauna ta ia gwau: “Dina toi lalodiai taunimanima 55,000 ese kuku ta idia ania lasi! . . . Edia haheauka bada karana dainai idia lau laloa bada bona mai hoa bada ida idia lau moale henidia.”
Dirava Gari Henia bona Dika Inai Henia
4. Haheauka hahedinaraia totona, heduru gauna badana ta be dahaka?
4 Haheauka karana habadaia totona, heduru gauna badana ta be Dirava ita gari henia, unai anina be ita gari momokani iseda lalokau guba Tamana ita habadua garina. Mai iseda helaga ida Dirava ita gari henia be mai anina bada; unai ia hedinarai badina nega momo Bible ese ia gwauraia. Abraham be ena natuna Isako ia bouboulaia gwauraia neganai, Dirava ia gwau: “Oiemu imana mero dekenai oi atoa lasi, kara ta danu oi karaia lasi ia dekenai. Harihari lau diba vadaeni oi be Dirava oi kamonai henia momokani, badina be oiemu natuna korikori lau ura abia neganai oi dogoatao lasi.” (Genese 22:12) Unai nega lalonai reana idia lalo-hekwarahi bada, unai dainai, Abraham be Dirava ena hahegani hegeregerena ia ese ena imana ia abia isi neganai, ena lalokau natuna Isako do ia alaia totona, reana ena lalona ia biagua goadagoada bona ia haheauka bada. Oibe, bema Dirava garina ita gari, unai ese ita do ia durua haheauka karana ita hahedinaraia.
5. Haheauka hahedinaraia totona, kara dika karadia ita inai henia ena anina be dahaka?
5 Iehova ita gari henia karana bona dika ita inai henia karana edia anina be tamona bamona. Hereva Lada-isidia 8:13 dekenai ia gwau: “Iehova ita gari henia ena anina be dika ita inai henia.” Unai hegeregerena, dika inai henia karana ese ita ia durua haheauka ita hahedinaraia totona. Nega momo, Bible ese ita ia hadibaia dika ita inai henia—oibe, ita ura henia lasi momokani—totona. (Salamo 97:10; Amos 5:14, 15; Roma 12:9) Nega momo dika karadia be ita idia hamoalea, iseda lalona idia veria dainai, unai karadia ita dadaraia totona ita inai henidia be gau badana. Dika karadia iboudiai ita inai henia neganai, unai ese ita ia durua iseda lalona ita hadaia haheauka ita hahedinaraia totona bona unai be ita ia naria.
Haheauka Karana be Aonega Dalana
6. Haheauka amo sibona eda namo tahua momo karana ita koua neganai, dahaka dainai unai be aonega dalana?
6 Haheauka hahedinaraia totona ita ia durua gau badana ma ta be inai: namona be ita lalo-parara haheauka ita hahedinaraia be aonega dalana. Namo do ita davaria totona, Iehova ese ita ia noia haheauka do ita hahedinaraia. (Isaia 48:17, 18 itaia danu.) Iena Hereva lalonai sisiba herevadia momo ese ita idia hadibaia sibona eda namo tahua momo karana koua totona, haheauka ita hahedinaraia be aonega dalana! Dirava ena taravatu idia idau lasi bona ita koudia diba lasi. Iena Hereva lalonai ia gwau: “Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia. Bema Lauma ena gau ia hadoa neganai ia be mauri hanaihanai do ia abia.” (Galatia 6:7, 8) Haheitalai ta be aniani bona inuinu dekenai. Taunimanima idia aniani bona idia inuinu momo dainai gorere momo idia abia. Taunimanima ta ese sibona ena ura ia tahua guna neganai, taunimanima do idia lalo-namo henia lasi. To unai sibona lasi, bema taunimanima ta ese sibona ena ura ia tahua guna, haida dekenai iena hebamo karana do ia hadikaia danu. To dika bada gauna be inai: bema haheauka ita hahedinaraia lasi, unai ese iseda guba Tamana dekenai ita hebamo karana ia hadikaia.
7. Hereva Lada-isidia bukana ena hereva badana be dahaka, bona edena Bible siridia ese unai idia hahedinaraia?
7 Unai dainai, namona be hanaihanai sibona dekenai ita gwau, bema lau sibona egu ura lau tahua guna, unai ese lau do ia durua lasi. Hereva Lada-isidia bukana lalonai, sibona ena lalona biagua karana ia herevalaia momo, bona ena hereva badana ese ia hahedinaraia sibona ena ura tahua guna karana ese namo do ia havaraia lasi, bona haheauka hahedinaraia be aonega dalana. (Hereva Lada-isidia 14:29; 16:32) Bona namona be oi diba, sibona ena laloa biagua karana ena anina be dika karadia ita dadaraia sibona lasi. Gau badana be oi sibona emu laloa oi biagua, eiava oi haheauka danu, badina iseda kara dika tauanina ena ura ita koua, kara maoromaoro ita karaia totona, be auka.
8. Dahaka sivarai ese ia hahedinaraia haheauka be aonega dalana?
8 Haheauka be aonega dalana ia hahedinaraia sivaraina ta be inai: Iehova ena Witness tauna ta be banika lalonai taunimanima ida laini dekenai ia gini neganai, tau ta ia mai bona tadikaka ena gabu ia abia bona ia vairanai ia gini. Ena be Witness tauna be ena lalona dekenai ia badu sisina, to ia haheauka. Unai kara ia vara dinana dekenai ia ese enjinia tauna dekenai do ia lao gwauraia, unai tau be Kingdom Hall ena palani do ia sainia totona. Bona oi laloa unai enjinia tauna be daika? Ia be banika lalonai tadikaka vairanai ia gini tauna! Unai enjinia tauna ia moale bona gaukara ena davana be davana korikori ena 10 pesen bamona sibona. Unai Witness tauna ia moale bada daba kahanai banika lalonai ia badu lasi to ia haheauka dainai!
9. Haroro gaukara dekenai, bema haida ese ita idia hereva dika henia neganai, aonega dalana be dahaka?
9 Ruma ta ruma ta dekenai ita lao neganai Dirava ena Basileia sivarai namona ita harorolaia totona, eiava dala dekenai ita gini neganai idia raka hanai taudia edia lalona ita veria toho sivarai idia kamonai henia totona, nega momo taunimanima ese ita idia hereva dika henia. Aonega dalana be dahaka? Hereva Lada-isidia 15:1 dekenai aonega herevana ta be inai: “Hereva manauna ese badu ia koua.” Anina be, ita haheauka be namo. Iehova ena Witness taudia sibona lasi to ma taunimanima haida ese danu idia davaria unai hereva be maoro. Hari, doketa taudia momo idia diba haheauka be mai ena siahu taunimanima edia gorere haida koua totona.
Sibona Ena Ura Ia Tahua Lasi Lalokauna be Heduru Gauna
10, 11. Haheauka ita hahedinaraia totona, dahaka dainai lalokau ese ita ia durua momokani diba?
10 Korinto Ginigunana 13:4-8 dekenai Pauo ese lalokau ia herevalaia, bona ia hedinarai lalokau be mai ena siahu ita ia durua haheauka ita hahedinaraia totona. “Lalokau be ia dekenai ia kara dika tauna davana ia laloa lasi.” Davana ita henia lasi totona gau badana be ita haheauka. “Lalokau be kohu momo tauna ia mama henia lasi. Lalokau be ia heagi lasi, bona ia hekokoroku lasi.” Lalokau ese ita ia durua iseda lalohadai bona kudou ena mamina ita biagua totona, bena mama, heagi, eiava hekokoroku karadia do ita koua diba. Lalokau dainai unai bamona ita karaia lasi, to ita ia durua ita manau bona ita hekokoroku lasi, Iesu bamona.—Mataio 11:28-30.
11 Paulo ma ia gwau lalokau be “haida hadikaia ia ura lasi.” Nega ibounai ita kara maoromaoro totona haheauka ita hahedinaraia be gau badana. Lalokau ese ita ia durua mataganigani karana, bona ‘ita sibona eda ura mo ita tahua karana’ ita koua totona. Lalokau be “ia badu haraga lasi.” Taunimanima edia kara eiava hereva dainai ita badu haraga be auka lasi! To lalokau ese ita do ia durua ita haheauka totona, bena iseda hereva ta eiava iseda kara ta dainai do ita hemarai lasi. Haida idia kara dika henia neganai, lalokau ese “edia dika ia laloatao noho lasi.” Vaia edia kara taunimanima ese edia badu idia koua lasi to idia dogoatao noho. To lalokau ese ita do ia durua unai bamona lalohadai be iseda darana amo do ita kokia totona. Lalokau be “kara gagevagageva ia moalelaia lasi.” Kara gagevagageva ita moalelaia lasi totona, haheauka ita hahedinaraia be gau badana, hegeregere, buka dikadia ita duahia lasi bona laulau dikadia do ita raraia lasi, eiava televisen dekenai idia halasia kara bodaga karadia do ita raraia lasi. Danu, lalokau be “gaukara bona metau ibounai ia goadalaia.” Kara ibounai, hekwakwanai eiava ita idia hametaua gaudia ibounai hanaia totona, bona iseda lalona idia goada totona, bona dika davana do ita henia lou lasi totona, eiava Iehova ena hesiai gaukara do ita rakatania lasi totona, haheauka ita hahedinaraia be gau badana.
12. Iehova Dirava bona Iesu Keriso edia heduru ita dekenai ita moalelaia be edena dala ai ita hahedinaraia diba?
12 Bema iseda guba Tamana ita lalokau henia momokani, bona iena kara namo hereadia ita lalodia bada bona iena heduru ita dekenai ita moalelaia, nega ibounai ia ita hamoalea totona haheauka do ita hahedinaraia. Danu, bema iseda Lohiabada bona Biaguna, Iesu Keriso, ita lalokau henia momokani bona iena kara ita dekenai ita moalelaia, ita ese iena hahegani do ita badinaia, ia gwau: ‘Satauro ita abia isi, bona iena murinai ita mai.’ (Mareko 8:34) Unai ita karaia totona gau badana be haheauka ita hahedinaraia. Iseda Keristen tadikaka bona taihu ita lalokau henidia neganai, ita ura lasi ita sibona eda ura tahua karana ta amo idia ita hadikaia.
Abidadama bona Manau be Heduru Gaudia
13. Dahaka dainai abidadama ese ita ia durua diba haheauka ita hahedinaraia totona?
13 Haheauka hahedinaraia totona, ita ia durua gauna badana ma ta be Dirava bona ia gwauraia gwauhamata herevadia dekenai ita abidadama. Abidadama karana ese ita do ia durua Iehova ita tabekau henia totona, bena do ita naria ia ese kara ibounai be nega korikori dekenai do ia hamaoromaorodia totona. Aposetolo Paulo be unai bamona ia hereva badina Roma 12:19 dekenai, ia gwau: “Lauegu lalokau taudia e, dika ena davana do umui karaia lasi . . . Badina be Buka Helaga ia gwau, ‘Lohiabada ia gwau, “Dika ena davana be lau sibona ese do lau karaia.” ’ ” Unai hegeregerena, manau ese ita ia durua diba. Bema ita be manau taudia, bema tau ta ese ita dekenai dika ta ia karaia eiava bema ita laloa unai bamona ia karaia, do ita badu haraga lasi. Dika davana do ita henia lou lasi, to ita haheauka bona ita ura Iehova ese kara ta do ia karaia unai dika hamaoromaoroa totona.—Salamo 37:1, 8 itaia danu.
14. Dahaka sivarai ese ia hahedinaraia, guna idia haheauka lasi taudia be gabeai haheauka idia hahedinaraia diba?
14 Ia badu haragaharaga tauna ta ena sivarai ese ia hahedinaraia, guna idia haheauka lasi taudia be gabeai haheauka idia dibaia diba. Nega ta ai, ia bona ena tamana be rege bada herea idia karaia dainai taunimanima be polisi idia boiridia mai, bena unai badu tauna ese polisi taudia toi ia hamorua bona idia mase rea bena murinai polisi haida idia mai bona idia dogoatao! To, murina negana lalonai, ia ese Iehova ena Witness taudia ia davaridia bona haheauka dekenai diba ia abia, unai be Dirava ena lauma helaga ena huahua ta. (Galatia 5:22, 23) Hari, unai sivarai ia vara ena lagani 30 murinai, unai tau be mai abidadama danu Iehova ena hesiai gaukara ia do karaia noho.
Haheauka Ruma Bese Lalonai
15, 16. (a) Dahaka ese headava tauna do ia durua haheauka do ia hahedinaraia totona? (b) Edena negai haheauka hahedinaraia be gau badana, bona dahaka sivarai ese unai ia hamomokania? (c) Dahaka dainai headava hahinena ese haheauka ia hahedinaraia be namo?
15 Ruma bese lalonai haheauka ita hahedinaraia be gau badana. Tau ese ena adavana ia lalokau henia ia sibona ia lalokau henia hegeregerena totona, iena lalohadai, iena hereva, bona iena kara ia biagua namonamo be gau badana. (Efeso 5:28, 29) Oibe, tatau ese aposetolo Petro ena hereva 1 Petero 3:7 dekenai idia badinaia totona, haheauka idia hahedinaraia be gau badana, ia gwau: “Tatau e, umui danu, emui adavana danu umui noho hebou ena dala do umui laloa namonamo.” Bema ena adavana be Witness hahine lasi, Witness tauna be haheauka ia hahedinaraia be gau badana.
16 Haheitalai ta be inai: Elda ta ena adavana be Witness hahine lasi bona ia be badu momo hahinena. To, ena tau be ia dekenai ia haheauka, bona unai kara dainai tau ese ena tauanina dekenai namo bada ia davaria. Unai dainai ena doketa ia gwau: “John, oi vara negana amo oi be haheauka bada tauna eiava oiemu tomadiho be mai ena siahu bada.” Oibe, iseda tomadiho be mai ena siahu bada, badina “Dirava ese gari laumana ita dekenai ia henia lasi, to siahu bona lalokau bona aonega laumana ita dekenai ia henia vadaeni,” unai dainai ita ese haheauka ita hahedinaraia diba. (2 Timoteo 1:7) Ma danu, hahine ese ena tau ia kamonai henia totona haheauka ia hahedinaraia be namo, bona bema ena tau be Witness tauna lasi, haheauka ia hahedinaraia be gau badana.—1 Petero 3:1-4.
17. Dahaka dainai haheauka be gau badana tama sina bona natudia edia hebamo karana dekenai?
17 Edia hetura heheni karana dekenai tama sina bona edia natudia ese haheauka idia hahedinarai heheni be gau badana danu. Edia natudia be haheauka idia diba totona, tama bona sina be haheitalai namodia idia hahedinaraia be gau badana. Bona natudia be dala idauidau dekenai sisiba idia henidia neganai, namona be mai manau ida bona mai lalokau ida do idia karaia; unai idia karaia totona haheauka idia hahedinaraia be gau badana. (Efeso 6:4; Kolose 3:21) Ma danu, bema natudia be edia tama bona sina idia lalokau henidia momokani, idia ese edia hereva do idia badinaia, bona unai idia karaia totona haheauka idia hahedinaraia be gau badana.—Efeso 6:1-3; 1 Ioane 5:3 itaia danu.
Dirava Ia Henia Heduru Gaudia Ita Gaukaralaidia
18-20. Lauma dalanai edena heduru gaudia toi do ita gaukaralaidia bena kara haida do ita habadaia, haeauka ita hahedinaraia totona?
18 Dirava garina ita gari, sibona eda ura tahua lasi lalokau karana, abidadama, dika karadia inai henia bona haheauka karadia dekenai do ita tubu totona, Iehova Dirava ese ita ia henia heduru gaudia iboudiai ita gaukaralaidia be gau badana. Haheauka hahedinaraia totona, lauma dalanai ita idia durua gaudia toi do ita tahua. Gau ginigunana be ita guriguri. Namo lasi ita bisi momo dainai ita be nega lasi ita guriguri totona. Oibe, namona be ita ura “nega ibounai do [ita] guriguri,” bona “guriguri do [ita] goadalaia nega ibounai.” (1 Tesalonika 5:17; Roma 12:12) Iseda haheauka habadaia totona namona be ita gurigurilaia. To, nega haida haheauka ita hahedinaraia lasi neganai, namona be mai iseda helalo-kerehai ida iseda guba Tamana ita noia iseda kerere ia gwauatao totona.
19 Haheauka ita hahedinaraia totona, ita ia durua gauna iharuana be Dirava ena Hereva amo heduru ita tahua, bona buka o magasin edia heduru herevadia ita tahua, badina idia ese ita idia durua Bible siri edia anina ita diba totona bona ita badinaia totona. Unai be iseda helaga hesiai gaukarana ta, to ita laloaboio haraga diba! Namona be haheauka ita hahedinaraia, bona nega ibounai namona be ita sibona ita hadibaia Bible ita duahia bona “hesiai tauna mai ena kamonai bona mai ena kara maoromaoro” oreana ese ita ia henia buka bona magasin ita duahidia be gau badana, tanobada ena buka bona magasin ita duahia be gau badana lasi; unai dainai, unai gaudia ita duahidia guna be gau badana. (Mataio 24:45-47) Taunimanima edia hereva ta be maoro, idia gwau iseda mauri lalonai gau iboudiai ita karaia diba lasi to gau haida sibona. Lauma dalanai ita be tatau bona hahine goadadia, a? Bema ita diba lauma dalanai ita goada be gau badana, ita ese haheauka do ita hahedinaraia, unai anina be hebou totona do ita hegaegae eiava ia mai Gima Kohorona matamatana do ita duahia totona, televisen do ita koua.
20 Gau ihatoina be kongregesen heboudia bona hebouhebou badadia ita lalodia bada. Ita laloa unai hebou iboudiai dekenai ita lao be gau badana, a? Unai hebou totona ita hegaegae, a? Bona ita lao neganai, bema mai dalana, ita haere, a? Bema iseda hebou karana ita laloa bada, unai ese ita do ia durua, bena herevana dahaka do ia vara, ita be nega ibounai haheauka do ita hahedinaraia diba.
21. Lauma helaga ena huahua, haheauka unai, ita habadaia neganai, dahaka hahenamo ita davaria diba?
21 Bema nega ibounai ita goada karaia haheauka ita hahedinaraia totona, dahaka hahenamo do ita davaria diba? Gau ta be sibona ena ura tahua karana ia havaraia huahua dikadia do ita davaria lasi. Do ita hemarai lasi, bona iseda lalona ena mamina do ia namo. Hekwakwanai momo do ita davaria lasi bona mauri ia lao henia dalana dekenai do ita raka noho. Danu, taunimanima dekenai kara namo momokani do ita karaia diba. Bona namo bada gauna be ita ese Hereva Lada-isidia 27:11 ena hereva do ita badinaia, ia gwau: “Lauegu natuna e, oi aonega karaia, bona lauegu kudouna oi hamoalea, unai amo lau ia gwau henia tauna lau haere henia diba.” Bona ita davaria hahenamo iboudiai amo, iseda lalokau guba Tamana, Iehova, ena kudouna ita hamoalea be hahenamo badana momokani!
Inai Oi Laloatao, A?
◻ Dirava gari henia karana ese edena bamona ita ia durua haheauka ita hahedinaraia totona?
◻ Dahaka dainai lalokau ese ita ia durua haheauka ita hahedinaraia totona?
◻ Ruma bese taudia edia hetura heheni karana dekenai haheauka ese edena bamona ia durudia?
◻ Haheauka karana hahedinaraia totona, dahaka gaudia do ita gaukaralaidia be gau badana?
[Picture on page 15]
Iosef ese hedibagani ia davaria neganai ia haheauka
[Picture on page 17]
Natuna sisiba henia mai manau bona mai lalokau ida totona, haheauka be gau badana