Dirava Ena Basileia Ena Anina Taunimanima Momo Dekenai

IESU KERISO ese nega momo Dirava ena Basileia ia herevalaia. Unai hereva dekenai idau negai sivaraina ia tahua tauna, H. G. Wells, ia torea, ia gwau: “Kara idauna be inai: Iesu ese Guba Basileia ena hahediba herevana ia gwauraia bada, to Keristen dubu edia naria taudia kahirakahira iboudiai ese unai hahediba herevana idia gwauraia momo lasi. Guba Basileia ena hahediba herevana be Iesu ena hadibaia hereva badana, Keristen dubu naria taudia be idia gwauraia bada lasi herevana unai, bona ia be hahediba hereva idau momokanina; ia be taunimanima edia lalona ia veria bada bona edia lalohadai ia haidaua momokani.”

Dahaka dainai dubu edia naria taudia momo be Dirava ena Basileia idia gwauraia momo lasi? Reana Basileia ena anina idia daradaralaia dainai. Idia gwauraidia lalohadai idauidau be dahaka?

Edia Lalohadai Basileia Dekenai

Taunimanima haida idia gwau Katolik Dubu be Dirava ena Basileia. Lagani 325 C.E. ai, Nicaea Kaunsolo hebouna lalonai, bisop taudia ese Pavapava Constantine be edia kwarana tauna ai idia halaoa murinai, unai dubu naria taudia be politik lalonai idia vareai, bona taunimanima idia hadibaia Basileia ia mai vadaeni. Encyclopædia Britannica bukana ia gwau Augustine (354-430 C.E.) ena lalohadai hegeregerena, “dubu idia haginia neganai anina be inai tanobada dekenai Dirava ena Basileia ia matamaia vadaeni” bona “dubu lalonai idia karaia karadia dekenai ia hedinarai.”

Taunimanima ma haida idia laloa Dirava ena Basileia be taunimanima edia kara dekena amo ia vara. Unai encyclopedia bukana ia gwau: “Protestant dubudia ta ta iboudiai . . . be haraga herea gabu idauidau ta ta edia dubu badadia ai idia lao bona taunimanima idia biagua bona idia be” Dirava ena Basileia do ia mai bona “dokona negana naria karana idia koua toho.” H. G. Wells ia torea, ia gwau: “Taunimanima be edia lalohadai gunana idia haidaua, guna edia mauri lalodiai idia be Dirava ena Basileia bona dekena taudia lalokau henia karana idia laloa bada, to murinai idia be France bona England, Helaga Gabu Russia, Spain, Prussia basileiadia idia laloa bada . . . Unai neganai Europe taudia dekenai idia be mauri diravadia bamona.”

Hari inai nega lalonai danu, idia gwau Basileia be taunimanima ese idia havaraia gauna ta. Encyclopædia Britannica bukana ia gwau: “Momo idia laloa taunimanima edia hekwarahi bona edia kara amo dala idia kehoa diba dina gabediai taunimanima be tauanina goevadae idia abia totona, bona idia gwau ‘helaro’ bona ‘naria’ karana amo do ia vara lasi to taunimanima ese do idia havaraia.” “Idia gwau Dirava ena Basileia ia lohia dalana be idia ese taunimanima idia lohiadia dalana unai.”

Iuda taudia momo danu idia laloa Basileia be taunimanima edia gaukara amo do ia vara. Lagani 1937 ai, Columbus, Ohio, U.S.A. dekenai, Reform Iuda tomadihona ena hahediba (rabi) taudia edia hebou dekenai idia gwau: “Dirava ena basileia haginia totona, bona tadikaka ibounai oreana havaraia, kara maoromaoro, hereva momokani bona maino inai tanobada dekenai havaraia totona, ai laloa tanobada taudia ibounai danu ai gaukara hebou be maoro. Unai do ia vara neganai ai be Mesia ia ura gauna do ai karaia.”

Taunimanima momo edia lalohadai be Dirava ena Basileia be taunimanima ta ta ena kudouna lalonai ia noho. Hegeregere, United States lalonai, lagani 1925 dekenai Southern Baptist Convention orea taudia idia gwau: “Dirava ena Basileia ena anina be Dirava ena pavapava karana be taunimanima ta ta iboudiai edia kudouna bona mauri lalonai ia noho, edia kara ibounai dekenai ia noho, bona orea iboudiai dekenai ia noho. . . . Taunimanima iboudiai edia lalohadai bona edia ura ibounai be Keriso ena lalohadai bona ura hegeregerena ai ia lao neganai, Dirava ena Basileia gaukara do ia guguru momokani.”

Vadaeni, ita gwau diba dubu be Dirava ena Basileia, a? Taunimanima ese unai Basileia do idia havaraia, a? Ia be iseda kudouna lalonai ia noho, a? Bona Dirava ena Basileia ena anina oi dekenai be dahaka?