Lagani 1914 Ura Taudia—Dahaka Dainai mai Anina Bada?

“Aiemai magasin idia duahia taudia idia diba idia hanai laganidia haida lalodiai, unai Nega Dikana do ia vara ai naria, bona unai neganai gau dikadia momo do idia vara; bona ai diba lagani 1914, October ena nega sisina murinai do ia vara haraga mai ena siahu bada.”—The Watch Tower and Herald of Christ’s Presence, May 15, 1911 amo.

LAGANI 1879 amo unai magasin, The Watch Tower and Herald of Christ’s Presence (hari unai magasin idia gwauraia Gima Kohorona Iehova Ena Basileia Ia Harorolaia) lalonai be nega momo idia gwau Bible ena peroveta herevadia ese lagani 1914 idia gwauraia lagani badana. Unai lagani ia mai kahirakahira neganai, unai magasin idia duahia taudia idia hadibaia lou “nega dikadia” be kahirakahira do idia davaria.

Keristen taudia ese unai sivarai be gabu ibounai dekenai idia halasia noho, edia hadibaia herevana be “nega 7” bona “idau bese edia nega”, Bible dekena amo, idia gwauraia hedinarai.a Idia lalo-parara unai nega ena daudau be lagani 2,520​—gunaguna David ena basileia siahuna Ierusalem dekenai ia ore neganai unai nega ia matamaia bona lagani 1914 October ena hua dekenai ia doko.b​—Daniel 4:​16, 17; Luka 21:​24.

Lagani 1914, October 2 ai, unai negai Watch Tower Bible and Tract Society ena presiden, Charles Taze Russell, be gari lasi danu, ia gwau: “Idau Bese Edia Nega be ia doko; pavapava taudia edia dina idia ore vadaeni.” Iena hereva be momokani! Lagani 1914, October ena hua lalonai, tanobada ia hamarerea gau badana ta be guba dekenai ia vara, taunimanima ese edia matana dekenai unai kara idia itaia lasi. “Davida ena king dagina” do ia abia hanaihanai Tauna, Iesu Keriso, be taunimanima ibounai ia lohiaia hamatamaia unai.​—Luka 1:​32, 33; Apokalupo 11:15.

‘To,’ reana inai bamona oi henanadai, ‘bema Keriso be lagani 1914 lalonai ia lohia hamatamaia, dahaka dainai kara dika be ia bada ia lao tanobada dekenai?’ Badina taunimanima idia itaia diba lasi inai tauna, Satana, ia noho. Ia lao ela bona 1914 ai Satana be guba dekenai ia do vareai noho diba. To lagani 1914 lalonai Dirava ena Basileia haginia karana ese unai ia haidaua. “Guba dekenai tuari ia vara.” (Apokalupo 12:7) Satana bona ena demoni be tuari lalonai idia kwalimu lasi bona tanobada dekenai idia negedia diho, unai neganai taunimanima be dika bada idia davaria. Bible ia gwau: “To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”​—Apokalupo 12:12.

Keristen taudia ginigunadia edia nega lalonai, Iesu ia gwau Pavapava dagina do ia abia bona iena giroa mai bona ia noho be unai toa ese do ia hahedinaraia. Ia idia henanadai henia, idia gwau: “Mani oi hamaoroa ai dekenai, oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?” Iena haere be dahaka? “Badina be bese ta ese ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere.”​—Mataio 24:​3, 7, 8.

Lagani 1914 tuarina ese hitolo bada ia havaraia, badina aniani havaraia dalana be lagani hani mai kahana lalonai idia hadikaia. ‘Tanobada ibounai dekenai tano mareremarere’ be edena bamona? Lagani 1914 ia lao vadaeni bona murinai laganidia 10 lalodiai tano mareremarere dikadia 10 idia vara, bona taunimanima 350,000 bona ma haida idia hamasedia. (Maua itaia.) Momokani, lagani 1914 lalonai idia noho taudia be “hisihisi nega ena hamatamaia” mamina idia abia. Unai nega amo ema bona hari, unai hisihisi be idia do vara noho, hegeregere sibona idia vara tanobada hadikaia gaudia, bona aniani lasi negadia, bona tuari momo idia do vara noho.

To, lagani 1914 lalonai, Dirava ena Basileia ia gini bona unai sivarai be namo herea badina unai Basileia ese hari tanobada be dika amo do ia hamauria. Edena bamona? Ia ese tomadiho koikoi ibounai, koikoi gavamani dikadia ibounai, bona Satana ena kara dika siahuna ibounai do ia haorea momokani. (Daniel 2:44; Roma 16:20; Apokalupo 11:18; 18:​4-8, 24) Ma danu, ia ese tanobada matamatana do ia havaraia bona unuseniai “kara maoromaoro sibona do ia noho.”​—2 Petero 3:13.

Tanobada Ibounai Tuarina Ginigunana ia ore murinai, Bible Student taudia namodia, hari edia ladana be Iehova ena Witness taudia, ese Iesu ena Pavapava ena toana kahana ma ta ena anina idia dekenai idia moalelaia. Iesu Keriso ia peroveta, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”​—Mataio 24:14.

Lagani 1919 ai Iehova ena Witness taudia edia orea be ia maragi, to unai nega amo “Basileia ena Sivarai Namona” idia do harorolaia noho. Unai dainai, taunimanima milion momo be tano 200 bona ma haida dekenai idia gogodia unai Basileia ena henunai idia noho totona! Unai Basileia ese tuari, hitolo, taravatu utua kara dika idauidau bona dagedage idauidau do ia haorea diba. Ia ese gorere idauidau bona mase do ia haorea danu!​—Salamo 46:9; 72:​7, 12-14, 16; Hereva Lada-isidia 2:​21, 22; Apokalupo 21:​3, 4.

Lagani 1914 ena uru taudia iboudiai idia do mase ore lasi neganai, Basileia harorolaia gaukarana do ia ore. Iesu ia gwau: “Badina be unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi. Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai unai nega do ia hakwadogia.”​—Mataio 24:​21, 22.

Namo lasi lagani 1914 lalonai ena uru taudia edia kara kerere oi tohotohoa. Hari idia vara gau dikadia be do idia noho hanaihanai lasi. Vaira neganai gau haida do idia idau momokani. To aonega karana idia hahedinaraia taudia be mauri namona do idia davaria.

Peroveta tauna ena hereva umui kamonai henia, ia gwau: “Umui tanobada taudia mai emui manau ida, Iehova umui tahua . . . Kara maoromaoro umui tahua, lalo-manau umui tahua. Reana Iehova ena badu dinana dekenai do umui hehuni diba.” (Sefania 2:3) Edena bamona unai sisiba be iseda mauri lalonai do ita gaukaralaia diba? Murinai sivarai ese unai henanadai do idia haerelaia.

[Footnotes]

[Chart on page 7]

Tano Mareremarere Lagani 1914 Murina Laganidia 10 Lalonai

Dina: Gabuna: Idia Mase:

January 13, 1915 Avezzano, Italy 32,600

January 21, 1917 Bali, Indonesia 15,000

February 13, 1918 Kwangtung Province, China 10,000

October 11, 1918 Puerto Rico (west kahanai) 116

January 3, 1920 Veracruz, Mexico 648

September 7, 1920 Reggio di Calabria, Italy 1,400

December 16, 1920 Ningsia Province, China 200,000

March 24, 1923 Szechwan Province, China 5,000

May 26, 1923 Iran (north east kahanai) 2,200

September 1, 1923 Tokyo-Yokohama, Japan 99,300

“Significant Earthquakes of the World” amo Terra Non Firma bukana lalonai, James M. Gere bona Haresh C. Shah ese idia torea.