Basileia Haroro Ripoti

India Dekenai Edia Diari Idia Halasia

INDIA dekenai mai edia moale Witness taudia 11,524 ese Basileia ena sivarai namona idia harorolaia. (Mataio 24:14) Lagani 1991 ena hesiai laganina lalonai idia bapatiso taudia 1,066 be Basileia harorolaia taudia, ma haida dekenai edia diari idia halasia. Idia ibounai idia moale bada badina taunimanima 28,866 be Keriso ena mase ena Memorial ariana idia lao henia!

◻ Taunimanima momo be Basileia ena helaro idia kamonai nega ginigunana be haroro nega idaudia bona dala idaudia ai. Hegeregere, Witness ta be iena gaukara turadia dekenai Basileia ia herevalaia, idia danu be kapenta taudia. Gaukara turana ta ia kamonai bona iena ruma bese bona turadia dekenai iena diari ia halasia. Mai moale ida unai taudia be ma haida dekenai Basileia sivarai namo hereana idia gwauraia. Murinai, ai kamonai sivarai idia hahedinaraia, lagani haida sibona lalonai, ‘taunimanima 30 bona ma haida be hereva momokani idia abia dae.’ Edia diari idia halasia dainai Iehova ese unai tadikaka bona lauma dalanai iena tadikaka matamatadia ia hanamodia.

◻ Ma kongregesen ta dekenai sikuli dekenai ena sikuli turadia be dala idaudia ai ia haroro henidia neganai tadikaka matamatana ta ese iena diari ia halasia. Idia haida be Basileia helarona idia ura idia kamonai, bona nega momo Bible be idia dekenai ia gwauraia ela bona hanuaboi maloki ia lao vadaeni. Idia ta, Katolik tauna ta, be hereva momokani totona ia gini goada, bona pris tauna ia gwau bema Witness taudia ia bamodia noho dika do ia davaria. To unai sikuli merona ia diba Witness taudia dekenai Bible ena hereva momokani ia abia, bona ia be diba ia abia noho. Nega ia lao murinai bapatiso ia abia bona hari ia be hesiai tauna ta kongregesen lalonai. Ia be hereva momokani ena diari namo hereana ese ia havaraia helarona ia moalelaia!​—Roma 12:12.

◻ Unai Witness merona ia kamonai henia tauna ma ta be sikuli taudia idia diba momo sikuli merona ta, ia laloa Dirava ia noho lasi, ia ese idia laloa Dirava ia noho taudia ia hevaseha henidia, to dina ta edia herevahereva ia kamonai henia bona henanadai momo ia henia. Ia hoa badina iena henanadai ena haere maorodia ia abia, bena ia lalo-parara Bible be Dirava ena Hereva. Bible dekenai iena diba ia habadaia bona gabeai bapatiso ia abia. Iena tamana, Hindu tauna, ese ia inai henia ela bona ruma ena amo ia lulua. To, unai mero matamatana be hereva momokani totona ia gini goada dainai davana namona ia abia, badina iena boga tamona tadikaka rua bona iena turadia rua ese hereva momokani idia abia dae bona bapatiso idia abia. Hari, iena tadikaka ta be India ena branch opesi dekenai hesiai gaukara ia karaia.

◻ Sikuli memero kekeni edia orea ia gunalaia merona ta be unai Witness mero ida idia karaia herevahereva ia kamonai. Ia be kuku ia ania hanaihanai bona ia inuinu momo. Nega ta, Witness ena amo hereva momokani idia abia sikuli turadia rua ia ura ia botaia. Idia be hereva momokani idia abia dae dainai, idia ura lasi koledi ena maumau karana ta ai idia vareai, bona memero kekeni edia orea ia gunalaia merona ese memero kekeni ia hagoadaia rara idia henia totona, to idia be rara idia henia lasi danu. Hari, unai mero matamatana ia moale badina ia be Iehova ena Witness dainai diari ia halasia.

◻ Iena diari ia halasia sikuli merona ginigunana be nega idaudia ai bona dala idaudia ai ia haroro henidia dainai ia ese iena sikuli turadia 15 ia durudia idia gwauhamata karaia bona bapatiso idia abia.

Moale bada gauna be unai tano bada hereana dekenai taunimanima momo be Bible ese ia gwauraia Dirava be tanobada matamatana do ia havaraia helarona idia abia dae, bona idia be tanobada hegegemadai tadikaka ida idia gaukara hebou, Iehova Dirava ese unai orea taudia ia haboudia iena Basileia henunai do idia mauri hanaihanai totona.