Sikuli ai Diba Ia Abia Tauna
“LAUEGU varavara taudia e, Dirava ese umui ia boiria dalana mani umui laloa. Unai neganai umui momo lasi be mai aonega, inai tanobada ena aonega bamona. Bona umui momo lasi be mai siahu, inai tanobada ena siahu bamona. Umui momo lasi danu be lohia taudia.” (1 Korinto 1:26) Unai hereva ese ia hahedinaraia bamona, tanobada ena aonega ita tahua momo eiava tanobada ena gaukara eiava dagi badana ta ita abia neganai dika ita davaria diba. Unai bamona karana ese hereva momokani abia dae dalana ia koua diba.—Hereva Lada-isidia 16:5; Mareko 10:25.
To, Paulo ena nega lalonai tauanina dalanai idia aonega taudia haida ese hereva momokani idia abia dae, bona unai taudia ta be Paulo. Sikuli dekenai diba bada ia abia bona lada bada ruma bese amo ia mai, Paulo be haroro goadagoada tauna ta. Ia hahedinaraia inai tanobada dekenai ena be haida edia diba be bada, to bema edia kudou be namo neganai idia ese Iehova ena hesiai gaukara idia karaia diba. Idia ese edia diba idauidau idia gaukaralaia diba Iehova ena hesiai gaukara dekenai.—Luka 16:9.
Ia Be Taso Tauna
Paulo be Taso dekenai ia vara, gabeai ia gwau unai “gabu be mai ena ladana.” (Kara 21:39) Reana unuseniai gado haida ia diba—ta be Greek gado—unai gado be mai anina bada ena misinari gaukara dekenai. Taso dekenai ia noho neganai Paulo ese Iuda taudia edia mauri dalana bona Idau Bese taudia edia mauri dalana ia dibaia, bona lagani haida murinai bese haida dekenai aposetolo gaukara ia karaia neganai unai diba ia gaukaralaia. Ia diba edena bamona hereva momokani ia gwauraia hedinarai diba idia lalo-pararalaia totona. (1 Korinto 9:21) Ena haheitalai namona ta Kara karoa 17 ai mani ita laloa, Atena taudia ia haroro henidia neganai. Unuseniai, mai aonega ida Atena taudia edia tomadiho herevadia bona edia toretore tauna ena hereva ta ia gwauraia hereva momokani ia gwauraia hedinarai neganai.
Roma Taudia Edia Dagi Ia Abia
Paulo be tanobada ena anina bada gauna ma ta ia abia. Ia be Roma taudia edia dagi ia abia, bona unai ia gaukaralaia sivarai namona habadaia totona. Filipi dekenai ia bona ia idia bamoa taudia be idia botaia bena kota idia karaia lasi to dibura rumana dekenai idia atodia. Roma ena dagi ia abia tauna dekenai unai bamona idia karaia neganai unai be kerere, bona Paulo ese tau badadia dekenai unai kara ia gwauraia hedinarai neganai, idia ese gwaumaoro idia henia unai hanua ai do ia noho kongregesen taudia do ia haroro henidia totona bena murinai do ia lao ena haroro gabuna ta dekenai.—Kara 16:37-40.
Gabeai, Gavana Festo vairanai ia hedinarai, bena Paulo ese ena Roma dagina ia gaukaralaia Kaisara dekenai ia noinoi ena kota do ia karaia totona. Roma ena Lohia Badana vairanai hereva momokani ia gwauraia hedinarai namonamo unai.—Kara 25:11, 12; Filipi 1:7.
Paulo be dala idauidau ai diba ia abia bona gabeai unai diba ia gaukaralaidia momo. Reana ena tamana ese palai rumadia karaia dalana ia hadibaia. Unai gaukara ia diba dainai, ena moni ia hegeregere lasi neganai, ia gaukara diba sibona ia naria totona. (Kara 18:1-3) Ia ese tomadiho ena diba bada ia abia danu. Ia tubu daekau neganai ia be “Farisea tauna, bona Farisea tauna ena natuna.” (Kara 23:6) Oibe, Gamaliel ese Paulo ia hadibaia namonamo. Gamaliel be Iuda taudia edia hadibaia tauna badana ta. (Kara 22:3) Unai diba ia abia gauna be hegeregere hari iunivesiti sikuli bada dekenai diba bada idia abia bamona, unai ese ia hahedinaraia iena ruma bese be lada bada taudia.
Dala Maorona Abia Hidi
Paulo ia tubu daekau dalana bona idia hadibaia dalana ese ia hahedinaraia Iuda tomadiho dekenai dagi bada ia abia diba. Reana Iuda tomadiho ena tau badana ta ai ia lao diba. To, ia ese Iesu be Mesia ia abia dae neganai, iena mauri lalonai ia tahua noho gaudia idia idau. Filipi taudia ia tore henidia neganai, guna iena tanobada gau namodia haida ia gwauraia hedinarai, ia gwau: “To inai guna lau idia hanamoa gaudia be harihari Keriso dainai lau gwau idia be dika. Oibe, inai gaudia sibona lasi, to gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani. Ia dainai gau ibounai lau negea vadaeni. Lau laloa idia be momoru, Keriso do lau abia momokani totona.”—Filipi 3:7, 8.
Unai diba bada ia abia tauna be ena tanobada aonegana dekenai dahaka bema karaia diba ia laloa lasi; bona ena “aonega bada” ia gaukaralaia lasi haida ia hahoaia totona. (Kara 26:24; 1 Korinto 2:1-4) To, Iehova Dirava dekenai ia abidadama momokani, iena helaro gunadia dekenai, ia gwau: “Lauegu kara gunadia lau laloaboio, bona vaira neganai gaudia do lau goadalaia. Unai dainai heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.” (Filipi 3:13, 14) Paulo ese lauma gaudia ia laloa bada.
To danu, Paulo be Iehova ena hesiai gaukara dekenai guna ia diba gaudia ia gaukaralaidia. Ia ese Iuda taudia ia herevalaidia neganai, ia gwau, “Lau diba idia ese Dirava ena hesiai gaukara idia ura karaia namonamo.” Edia kara ia diba dainai unai bamona ia hereva. (Roma 10:2) Farisea taudia edia kara guna ia karaia neganai ia be mai ena goada danu Dirava bona Bible ia ura henia bada. Paulo be Keristen tauna ta ai ia lao neganai, mai ena goada danu ena diba hereva momokani dekenai ia habadaia momokani, bona guna ia diba gaudia be dala maorona ai ia gaukaralaidia diba. Hegeregere, Heberu bukana dekenai ia ese ena diba bada ia gaukaralaia, ia ese Israel taudia edia sivarai gunadia bona edia tomadiho kara dubu amo ia torea bona ia hahedinaraia Keristen ena tomadiho ese unai kara gunana ia hereaia.
Hari inai negai danu tauanina dalanai idia aonega taudia be sivarai namona idia kamonai henia noho. Mai edia diba idauidau bona aonega idauidau taudia, bona gau haida dekenai mai edia diba momo taudia momo be hereva momokani idia abia dae bona edia diba gunadia idia gaukaralaia Iehova ena hesiai gaukara lalonai. Bona, ena be edia diba be idauidau, to Keristen taudia idia laloaboio lasi, edia diba lauma gaudia dekenai be mai edia anina bada. Unai gaudia be “gau namodia” badina idia amo mauri hanaihanai do ita abia diba.—Filipi 1:10.