Dirava ese Ia Hatubua—Oi Heduru A?

INAI mani oi laloa. Imea ta mai hairaina ai oi vareai. Unuseniai au namodia idauidau bona palaoapalaoa mai edia kala idauidau momo idia noho. Rei matamatana ena toana be namo herea, bona tano ia koua ela bona sinavai isena. Sinavai ranuna ia negarinegari. Oi hoalaia dainai imea naria tauna oi nanadaia, daika ese ia karaia. Mai ena lalo-manau ida ia gwau, Dirava ese gau iboudiai ia hatubudia.

Unai oi diba vadaeni. Emu ruma oi lou henia neganai emu magu ena toana dikana oi itaia​—tubutubu gaudia edia toana be namo lasi, momoru momo ia noho, bona koupakoupa be mai edia ranu​—bena imea naria tauna ena hereva oi laloa. Oi ura dikadika emu magu ena toana be unai imea ena toana bamona ai do ia lao. Unai dainai oi tui diho, Dirava oi noia ia ese palaoapalaoa mai hairaidia be emu magu ai do ia hatubudia. Bena dahaka ia vara? Gau ta lasi!

Lauma dalanai tubu dalana be edena bamona? Reana oi ura dikadika hahediba taudia matamatadia be Dirava ena hereva do idia badinaia eiava oi sibomu be lauma dalanai do oi goada oi lao. Bona reana Iehova oi noia goadagoada unai do ia havaraia, badina oi diba ia be mai ena siahu unai bamona do ia karaia. To ena be unai bamona oi ura, oi noinoi, bona oi abidadama, to unai mo sibona ese taunimanima be lauma dalanai do ia hatubudia, a?

Dirava ese Ia Hatubua

Reana oi laloa oiemu heduru taunimanima be lauma dalanai hatubua karana ai be anina lasi. Aposetolo Paulo ena hereva 1 Korinto 3:​5-7 ai ena anina be unai, a? Ia gwau: “Apolo be daika? Bona Paulo be daika? Ai be Dirava ena hesiai taudia sibona. . . . Aiemai gaukara dekena amo umui be Dirava dekenai umui abidadama henia. Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua. Hadoa tauna bona dairia tauna edia gaukara be herevana, badina Dirava sibona ese hadoa gauna ia hatubua.”

Paulo ena hereva be maoro; gau ta ia tubu neganai Dirava ita hanamoa be namo. Biru tauna ese tano ia hegaegaelaia, nadinadi ia hadodia, bona uhe ia naridia, to Dirava ena siahu dainai idia tubu. (Genese 1:​11, 12; 29) Vadaeni, Paulo ena hereva, “hadoa tauna bona dairia tauna edia gaukara be herevana,” anina be dahaka? Anina be herevana edena bamona ita ta ta ese taunimanima be hahediba taudia ai halaodia gaukarana ita karaia, to unai gaukara be anina lasi a?

‘Hadoa Tauna ena Gaukara be Herevana’

Mani inai oi laloa, unai revareva ai Paulo ese Keristen hesiai gaukarana ia herevalaia lasi, to taunimanima gavadia kava karana ia herevalaia, Iesu Keriso gavaia lasi karana unai. Korinto ai, haida ese Iehova ena hesiai taudia mai edia ladana bada, Paulo bona Apolo bona ma haida, be idia hanamodia bada. Ma haida ese ekalesia idia hapararaia; haida idia abidia isi, badina idia laloa edia Keristen tadikakadia idia hereadia.​—1 Korinto 4:​6-8; 2 Korinto 11:​4, 5, 13.

Unai dala ai taunimanima idia hanamodia be namo lasi. Unai be tauanina ena ura karana, bona mama bona heai ia havaradia. (1 Korinto 3:​3, 4) Paulo ese edia kara ena anina ia hahedinaraia, ia gwau: “Umui heai noho, heai noho. Lau laloa umui ta ta inai bamona umui hereva noho, umui gwau, ‘Lau be Paulo ena,’ ‘Lau be Apolo ena,’ ‘Lau be Petero ena,’ ‘Lau be Keriso ena.’ ”​—1 Korinto 1:​11, 12.

Unai edia lalohadai kererena ia koua totona, Paulo ia gwau: “Hadoa tauna bona dairia tauna edia gaukara be herevana.” Ma ia gwau gau badana be Iesu Keriso do idia abia dae edia Hahekau Tauna, bona kongregesen do ia tubu daekau neganai, Dirava do idia hanamoa badina be ia ese ia hatubua. Aposetolo bona elda taudia be kongregesen ena hesiai taudia mo. Idia ta idia abia isi eiava ta be sibona ia abia isi be kerere. (1 Korinto 3:​18-23) Vadaeni, Paulo ia gwau hadoa tauna bona dairia tauna be uhe hatubua Diravana ida ita hahegeregeredia neganai, idia be herevana.​—1 Korinto 3:7.

Dirava ida Idia Gaukara Hebou Taudia

Ena hereva amo Paulo ese iseda hadoa bona dairia gaukaradia edia anina ia hamaragia lasi. Ia ura lasi inai bamona do ita laloa, “Iena nega do ia ginidae neganai Dirava ese unai gau do ia hatubudia,” bena do ita naria ela bona ia ese do ia hatubua. Ia diba eda gaukara bona eda gaukara dalana be mai anina, gau edia tubu dalana ai.

Unai dainai Paulo ese Keristen taudia ia hagoadadia loulou, edia hesiai gaukarana do idia goadalaia bona edia hadibaia dalana do idia hanamoa. Timoteo ia sisiba henia, ia gwau: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo oi sibona mauri do oi davaria, bona oi idia kamonai taudia danu mauri do idia davaria.” (1 Timoteo 4:16) “Oi dekenai lau hereva goada henia, . . . Sivarai Namona do oi harorolaia goadagoada . . . Taunimanima edia lalona do oi hagoadaia, bona idia do oi hadibaia mai oiemu haheauka danu. . . . Dirava ena hesiai tauna ena dagi karadia ibounai do oi karaia namonamo.” (2 Timoteo 4:​1, 2, 5) Bema Timoteo ena hadoa bona dairia karadia ese hatubua gaukarana idia durua lasi, unai bamona ia hekwarahi be anina lasi, ani?

Paulo bona Apolo hegeregeredia, oi danu be Dirava ida oi gaukara hebou diba. (1 Korinto 3:9; 2 Korinto 4:1; 1 Timoteo 1:12) Bema unai bamona oi karaia, emu gaukara be mai anina bada. Biru tauna ia laloa lasi do ia hekwarahi lasi neganai Dirava ese ena uma gaudia be hoa dalanai do ia hatubudia. Lauma dalanai tubutubu dalana be idau, a? Lasi. “Biru tauna ese iena uma anina ia naria mai ena haheauka danu”; unai hegeregerena ita be hadoa bona dairia gaukarana ai do ita hekwarahi noho neganai, namona be Dirava do ita naria do ia hatubua totona.​—Iakobo 1:22; 2:26; 5:7.

Oi Heduru

Paulo ia gwau: “Dirava ese ta ta edia gaukara davana do ia henia, edia hekwarahi hegeregerena,” unai dainai namona be siboda eda gaukara do ita tohoa.​—1 Korinto 3:8.

Biru gaukarana ia diba momo tauna, Geoffrey Smith, be ia gwau: “Ta be biru tauna ai ia lao totona, diba hereana ia abia be anina lasi, to tubutubu gaudia ia ura henidia be mai anina.” Unai hegeregerena, Dirava ida do ita gaukara hebou totona, diba hereana ita abia be anina lasi, to namona be taunimanima ita ura henidia bona iseda lalona idia hegeregere Dirava ese ita do ia hagaukaraia.​—2 Korinto 2:​16, 17; 3:​4-6; Filipi 2:13.

Biru gaukarana idia diba momo taudia edia sisiba mani oi laloa. Ta ia gwau, biru gaukarana ia karaia matamata tauna ese unai gaukara ia manadalaia vadaeni tauna ena sisiba bema ia abia dae, “diba momo tauna ai do ia lao haraga diba.” Ma ia gwau: “Nega ibounai diba momo tauna ese gau matamatadia ia dibadia diba.” (The Encyclopedia of Gardening) Iehova ia ura oi do ia hadibaia, hadoa bona dairia gaukaradia do oi karadia namonamo totona; unai heduru do oi abia dae mai emu ura ida a? Herevana hari sibona unai gaukara oi karaia matamaia eiava oi manadalaia vadaeni, bema do oi abia dae, Dirava ida oi karaia gaukarana karaia dalana do oi hanamoa diba, bena do oi hegeregere ma haida do oi hadibadia.​—2 Timoteo 2:2.

Geoffrey Smith ia gwau, bema gaukara ia karaia matamaia tauna ese hereva do ia kamonai bona diba do ia tahua, “hekwakwanai badadia do ia readia.” Iehova ena sisiba be ena Hereva bona ena orea amo bema ita kamonai henia, gaukara be iena dala ai do ita karaia; hereva idauidau heailaidia urana idia ura taudia ida do ita heai kava lasi.​—Hereva Lada-isidia 17:14; Kolose 4:6; 2 Timoteo 2:​23-26.

The Encyclopedia of Gardening ena sisiba be inai: ‘Tano oi do geia lasi neganai, dahaka dahaka do oi karaia be oi lalohadailaia namonamo guna.’ Vadaeni, emu Keristen hesiai gaukarana amo dahaka anina oi havaraia gwauraia bona edena bamona do oi havaraia be oi lalohadailaia namonamo guna lasi bona oi gurigurilaia guna lasi, a? Gaukara oi do hamatamaia lasi neganai, emu gaukara ena anina oi laloa namonamo. Oi laloa, edena bamona taudia bona dahaka hekwakwanai do oi davaridia reana, bena oi hegaegae unai bamona taudia do oi hereva henidia bona unai hekwakwanai do oi hanaidia totona. Unai dala amo ‘momo herea do oi veria mauri totona, taunimanima idauidau ibounai edia mauri dalana dekenai do oi lao’ neganai.​—1 Korinto 9:​19-23.

“Oi Hesiku Lasi”

Dirava ida ita gaukara hebou karana namona bema ita laloa bada, do ita hesikulaia lasi, to iseda maduna do ita huaia. “Dabai emu uhe oi hadoa, bona adorahi ai danu oi hesiku lasi; badina be oi diba lasi inai do ia namo eiava unai do ia namo, eiava ruaosi do idia namo.” (Kohelete 11:6) Iehova sibona ese anina ia havaraia diba; gau tamona, bema ita hadohado goadagoada lasi, anina do ita geia lasi.​—Kohelete 11:4.

Bema ta ese tano ia geia sisina bona uhe haida ia hadodia mo, imea ena toana do ia namo lasi. Unai hegeregerena, ta ese Keristen hesiai gaukarana ai buka bona magasin ia hariharilaidia mo be hegeregere lasi. Ita be Dirava ida gaukara hebou taudia dainai, namona be iena Basileia ena sivarai namona ita harorolaia goadagoada bona namonamo, lalo-maoro taudia tahudia totona. (Kara 13:48) Paulo ena hereva 2 Korinto 9:6 ai oi laloatao: “Uhe momo lasi ia hadoa tauna be anina momo lasi do ia geia, to uhe momo do ia hadoa tauna be anina momo do ia geia.”

Biru taudia namodia hegeregeredia, tano namona ai ita hadohado. To, ena be ta be tano namona ai ia hadohado, to ena gaukara ia doko lasi unai. Geoffrey Smith ia gwau: ‘Ta ia hadohado vadaeni murinai ia laga-ani diba lasi.’ Oibe, uhe do idia tubu totona, namona be dairidia bona naridia gaukarana ai do ia hekwarahi.​—Hereva Lada-isidia 6:​10, 11 itaia.

Reana ta be nega daudau Keristen hesiai gaukarana ai do ia gaukara goada, to toana be anina ia havaraia lasi. Bena karaharaga, ia laloa lasi neganai, anina namona ia vara. Geoffrey Smith ia gwau: “Biru tauna be nega daudau do ia hekwarahi, bena nega kwadogi lalonai ena imea ena hairai do ia bada herea dainai, ena tano geia bona ava ragaia gaukaradia do ia lalodiaboio, bona ena lalo-hekwarahi danu.” Bema emu lalona be hegeregere tano do oi geia, uhe do oi hadoa, ava do oi ragaia, bona uhe do oi dairia, vadaeni nega ta oi danu do oi moale bada diba, lalo-maoro tauna ta ese hereva momokani do ia abia dae neganai.​—Hereva Lada-isidia 20:4.

Paulo bona Apolo idia diba, Basileia harorolaia gaukarana idia karaia dainai Keristen kongregesen lalonai ladana bada idia abia lasi. Ena be idia diba Dirava ese hadohado gauna ia hatubua, to idia hadoa bona idia dairia mai edia momokani ida. Namona be ita ese edia kara do ita tohotohoa bona eda lalona do idia hegeregere Dirava ese ita do ia hagaukaraia, bena ‘iseda gaukara dekena amo ma haida ese Dirava do idia abidadama henia.’​—1 Korinto 3:​5, 6.

[Picture on page 23]

Dirava ese gau iboudiai ia hatubudia—to biru tauna ia heduru