Mai Ura Namona ida Dirava Ena Mamoe Orea Umui Gunalaia
“Dirava ese umui ia henia mamoe orea do umui naridia. . . . mai emui ura namona . . . do umui karaia.”—1 PETERO 5:2.
1. Dahaka dainai ita laloa Keristen elda taudia be ‘mai edia ura namona ida Dirava ena mamoe taudia idia naridia’ be namo?
IEHOVA be mai ena ura namona ida iena taunimanima ia gunalaidia. (Salamo 23:1-4) “Mamoe naria tauna namona,” Iesu Keriso, be mai ena ura namona ida mamoe bamona taudia totona iena goevadae tanobada maurina ia henia. (Ioane 10:11-15) Unai dainai, aposetolo Petro ese Keristen elda taudia ia hagoadadia ‘mai edia ura namona ida Dirava ena mamoe orea idia gunalaia’ totona.—1 Petero 5:2.
2. Keristen elda edia mamoe naria gaukara dekenai dahaka henanadai ita laloa be namo?
2 Dirava ena hesiai taudia be mai edia ura namona ida gaukara idia karaia. (Salamo 110:3) To elda tauna, eiava Iesu henunai mamoe naria tauna, ena dagi abia totona, ura namona sibona be hegeregere lasi. Daidia idia hegeregere unai bamona mamoe naria gaukara idia karaia totona? Mamoe naria gaukara dekenai dahaka idia karaia? Edena dala ai idia karaia namonamo diba?
Ruma Bese Ia Naria
3 “Ekalesia ena gunalaia tauna ena dagi” ia do abia lasi neganai, namona be unai tauna ese Baibel taravatudia ia badinaia vadaeni. (1 Timoteo 3:1-7; Tito 1:5-9) Aposetolo Paulo ia gwau namona be elda tauna be “iena ruma taudia, adavana bona iena natuna do ia biagua namonamo. Iena natuna ese ia do idia kamonai henia bona matauraia.” Unai bamona ia vara ena badina namona ia noho, badina Paulo ia gwau: “Bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba?” (1 Timoteo 3:4, 5) Krete motumotu dekenai idia noho kongregesen lalodiai elda taudia ia hididia gwauraia neganai, Tito ia hamaoroa inai bamona taudia ia tahua: “Kerere ta lasi tauna bona ia be adavana tamona tauna. Iena natuna be Iesu do idia abidadama henia, idia be lebulebu lasi, bona edia tamana bona sinana do idia kamonai henia.” (Tito 1:6) Oibe, Keristen tauna ta ia hegeregere kongregesen mamoe taudia naria gaukara badana ia karaia totona idia tahua neganai, namona be unai tauna ese iena ruma bese ia naridia dalana idia laloa.
4. Hanaihanai Baibel stadi bona guriguri idia karaia sibona lasi, to edena dala ai Keristen tama bona sina be edia ruma besedia dekenai lalokau idia hahedinaraia?
4 Edia ruma bese idia naridia namo tataudia idia guriguri bona hanaihanai edia ruma bese ida Baibel idia stadilaia, to unai sibona lasi. Nega ibounai idia hegaegae edia lalokau taudia idia durudia totona. Natudia idia abia neganai, unai be natuna ia vara dinana amo ia hamatamaia. Dirava idia badinaia tama sina taudia idia diba Dirava ena dala idia badinaia namonamo neganai, edia natudia be dina iboudiai Keristen gaukara ena sediual dekenai do idia manada haraga. Keristen tamana be unai dekenai gaukara ia naria namo dalana ese ia hahedinaraia ia hegeregere o lasi elda dagina do ia abia totona.—Efeso 5:15, 16; Filipi 3:16.
5. Keristen tamana be edena dala ai iena natudia ia hadibaia diba “[Iehova] ena hadibaia hereva” dekenai?
5 Iena ruma bese ia naria neganai, gaukara ia laloa namonamo Keristen tamana ese Paulo ena sisiba ia badinaia, ia gwau: “Emui natuna do umui habadua lasi, to [Iehova] ena hadibaia hereva idia dekenai do umui hadibaia.” (Efeso 6:4) Hanaihanai ruma bese ida tama ese Baibel stadi idia karaia neganai, adavana bona natudia nega tamona ai, be nega namona lalokau sisiba ia hereva henidia totona. Unai dala amo natudia dekenai “hadibaia hereva,” eiava lalohadai hamaoromaoroa sisiba, idia henia. Unai neganai edia ‘darana hadibaia’ kara idia karaia, bena unai natuna be Iehova ena lalohadai do ia diba. (Deuteronomi 4:9; 6:6, 7; Hereva Lada-isidia 3:11; 22:6) Lauma gaudia idia herevalaia hebou neganai turana bamona idia helai hebou, natudia idia hereva neganai hebogahisi tamana ese ia kamonai henidia namonamo. Durua henanadaidia amo natudia ia veridia idia laloa momo gaudia bona edia lalohadai idia gwauraia hedinarai momokani totona. Tamana ia diba natudia edia lalohadai haida ia diba lasi. Momokani, Hereva Lada-isidia 18:13 ia gwau: “Tau ta do ia kamonai lasi neganai bema ia haere, unai be ena kavakava bona ena hemarai.” Hari inai negai, tama sina momo idia diba idia matamata neganai idia davaria hekwarahi bona edia natudia ese idia davaria hekwarahi be idia idau. Unai dainai, tamana be hekwakwanai ena hereva bona sivarai ibounai do ia kamonai guna, bena gabeai do ia hereva edena dala ai do idia hanamoa.—Iakobo 1:19 itaia danu.
6. Iena ruma bese ia durua neganai, dahaka dainai ia namo Keristen tamana ese Dirava ena Hereva ia tahua?
6 Natudia edia hekwakwanai, idia laloa momo gaudia bona edia lalohadai, idia diba murinai, dahaka do ia vara? Ruma bese ia naria namonamo tamana ese Baibel ena hereva ia tahua, badina “inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.” Dirava ena lauma helaga dainai idia torea Baibel hakaua hereva namodia do idia badinaia dalana iena natudia dekenai ia hadibaia. Unai dala ai, unai matamata taudia be “hegeregere momokani, vadaeni kara namodia ibounai do [idia] karaia diba mai kwalimu danu.”—2 Timoteo 3:16, 17; Salamo 78:1-4.
7. Namona be Keristen tamadia be edena bamona haheitalai namona idia karaia guriguri karana dekenai?
7 Dirava idia badinaia matamata taudia be edia sikuli taudia amo hekwarahi momo idia abia. Unai dainai Keristen tamadia be edena dala ai edia natudia edia gari idia koua diba? Dala ta be hanaihanai idia ida idia guriguri bona idia totona idia guriguri. Unai matamata taudia be hetoho negadia idia davaria neganai, sedira edia tama sina bamona do idia karaia bona Dirava dekenai do idia tabekau. Lagani 13 kekenina ta be bapatiso amo iena gwauhamata Dirava dekenai ia do hamomokania lasi neganai idia henanadai henia, ia gwau sikuli turadia amo hevaseha bona gwau henia herevadia momo ia davaria. Baibel ena hereva dainai rara be ia helaga bona ia matauraia karana ia gwauraia neganai, ma kekeni haida ese idia botaia bona ia dekenai idia kanudi. (Kara 15:28, 29) Dika davana ia henidia, a? Lasi. Ia gwau: “Lau be Iehova dekenai lau guriguri lau badu lasi totona. Danu, lau laloatao lauegu tama sina ese ruma bese stadi lalonai lau idia hadibaia dika negadia ai ita haheauka be namo.”—2 Timoteo 2:24.
8. Natuna lasi elda tauna be edena dala ai iena ruma bese taudia ia naridia namo?
8 Natuna lasi elda tauna be sedira lauma dalana ai bona tauanina dalana ai iena ruma bese taudia ia naridia. Unai be iena adavana bona reana iena ruma lalonai ia naridia Keristen varavara. (1 Timoteo 5:8) Ena ruma bese ia naria namo dalana ta be unai, bona kongregesen elda ena dagi ia abia totona unai bamona ia karaia be namo. Unai dainai, ekalesia gunalaia taudia be kongregesen lalonai edia maduna dekenai edena bamona idia laloa?
“Mai Goada Danu” Ia Naridia
9 Keristen gunadia edia nega lalonai, aposetolo Paulo be Dirava ena ruma bese, unai be Keristen kongregesen, lalonai ruma bese taudia ia naridia Keriso ena hakaua karana henunai. (Efeso 3:2, 7; 4:15) Ma danu, Paulo be Roma dekenai iena abidadama tadikakadia ia sisiba henidia, ia gwau: “Unai dainai Dirava ese ita ia henia hegeregerena, inai diba ita gaukaralaia be namo. Bema tau ta ena diba be haroro, Dirava ena sivarai do ia gwauraia, iena abidadama hegeregerena. Bema tau ta ena diba be taunimanima durua, vadaeni do ia durua. Bema iena diba be hadibaia, vadaeni do ia hadibaia. Bema iena diba be taunimanima edia lalona do ia hagoadaia, vadaeni do ia karaia namonamo. Bema gau ta ita henia haida dekenai, do ita henia mai moale danu. Daika ese gaukara ia naria, be iena gaukara do ia karaia mai goada danu. Bogahisihisi tauna be do ia bogahisihisi henia mai ena lalo namo danu.”—Roma 12:6-8.
10. Dirava ena mamoe taudia idia naria neganai, Paulo be edena bamona haheitalai namona ia karaia hari inai nega ena elda taudia dekenai?
10 Paulo ese Tesalonika taudia ia hamaorodia lou, ia gwau: “Ai ese umui ta ta ai durua, tamana ese iena natuna ia durudia hegeregerena. Ai ura umui emui noho be Dirava ena ura hegeregerena. Unai dainai aiemai hereva goada dekena amo emui laloa ai hagoadaia noho. Badina Dirava ese umui ia boiria vadaeni, iena Basileia bona iena hairaina do umui abia totona.” (1 Tesalonika 1:1; 2:11, 12) Unai sisiba be hebogahisi bona lalokau dalana ai ia henia dainai, Paulo ia torea diba, ia gwau: “Umui huanai ai be manau, iena natuna ia ubua hahine bamona. Umui ai lalokau henia bada dainai ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada.” (1 Tesalonika 2:7, 8) Paulo be tamana namona ena haheitalai ia karaia hegeregerena, abidadama ekalesia gunalaia taudia be kongregesen taudia iboudiai idia lalodia bada mai hebogahisi ida.
11. Elda taudia be edena dala ai idia hahedinaraia gaukara idia ura henia?
11 Iseda abidadama Keristen mamoe orea naria taudia be lalokau gunalaia gaukara idia karaia neganai, namona be idia hebogahisi bona idia karaia mai edia ura namona ida. Edia kara dalana ese gau momo ia hahedinaraia. Petro ese elda taudia ia sisiba henidia Dirava ena mamoe taudia be “maumau lasi” dekenai eiava “kohu do [idia] davaria totona” idia karaia lasi. (1 Petero 5:2) Unai hereva dekenai, diba tauna William Barclay be sisiba sisina ia henia, ia torea, ia gwau: “Ta ese dagi ia abia to hesiai gaukara ia karaia unai be maduna aukana bona dikana ta bamona, ia be hesiku ia havaraia gauna ta bamona, ia ura lasi metauna ta bamona. Sedira tau ta idia hamaoroa gaukara ta do ia karaia, bona ia karaia, to ia karaia dalana be mai badu dainai unai gaukara ibounai ia dika. . . . To [Petro] ia gwau ena be idia diba idia hegeregere momokani lasi gaukara idia karaia totona, to namona be Keristen iboudiai be mai edia ura namona ida, edia diba hegeregerena, unai hesiai gaukara idia karaia.”
Mai Edia Ura Namona Mamoe Naria Taudia
12 Danu, Petro ese ia hagoadadia, ia gwau: “Dirava ese umui ia henia mamoe orea do umui naridia. . . . mai emui ura namona . . . do umui karaia.” Keristen ekalesia gunalaia tauna ese mamoe ia naridia neganai, ia karaia mai ena ura namona ida, ia ura dainai, bona Mamoe Naria Tauna namona, Iesu Keriso, ena hakaua dalana henunai. Iniseniai unai hereva “mai emui ura namona” idia hahanaia ena anina be “iena ura dainai ia karaia.” Mai ena ura dainai hesiai karaia anina be Keristen mamoe naria tauna be Iehova, ‘iseda mamoe naria tauna bona iseda souli ia naria tauna,’ ena siahu henunai ia noho. (1 Petero 2:25) Keriso henunai Keristen mamoe naria tauna ta be mai ena ura namona ida tiokratik dalana ia matauraia. Ma haida be sisiba idia tahua neganai, unai bamona ia karaia badina Dirava ena Hereva, Baibel, dekenai ia hakaudia lao. Ena be iena hesiai gaukara dainai elda tauna be Baibel ena sisiba momo ia diba vadaeni, to ita gwau lasi ia be Baibel ena amo hekwakwanai ibounai hanaia dalana ia gwauraia haraga diba. Ena be henanadai ta ena haere ia diba, to sedira henanadai tauna ida Watch Tower Publications Index eiava unai bamona indeks bukadia haida do ia tahudia be aonega karana. Unai amo ia be dala rua dekenai ia hadibaia: Ia hahedinaraia edena dala ai heduru hereva ia davaria diba, bona manau dekenai ia hahedinaraia Iehova ia matauraia badina Dirava ena orea ese idia printaia herevadia dekenai ia hakaua lao.
13. Elda taudia be sisiba namona idia henia totona dahaka idia karaia diba?
13 Bema hekwakwanai ia vara bona Society ena buka bona magasin dekenai unai hekwakwanai hamaoromaoroa herevana be lasi, elda be dahaka ia karaia diba? Sedira do ia lalo-parara totona ia guriguri, bona unai hekwakwanai hanaia totona Baibel ena taravatu do ia tahua. Sedira dala namona ta be heduru ia tahua tauna ia hamaoroa Iesu ena haheitalai namona ia laloa. Unai elda be sedira do ia henanadai diba, ia gwau: “Bema Hadibaia Tauna Badana, Iesu, be oiemu hekwakwanai ia davaria, oi laloa dahaka do ia karaia?” (1 Korinto 2:16) Unai bamona lalohadai dalana be reana henanadai tauna do ia durua dala maorona ia abia hidi totona. To bema elda tauna be sibona ena lalohadai ia gwauraia hegeregere ia be Baibel ena amo sisiba namona, unai be aonega lasi momokani! Namona be elda taudia be hekwakwanai aukadia do idia herevalaia hebou. Sedira elda edia orea ena hebou ta dekenai gau badadia do idia herevalaia diba. (Hereva Lada-isidia 11:14) Gabeai edia lalodia idia hadaia neganai idia iboudiai be hereva tamona idia karaia diba.—1 Korinto 1:10.
Manau be Gau Badana
14 Keristen elda tauna be ma haida ia hadibaia neganai, namona be manau ia hahedinaraia, ia sisiba henidia neganai unai be gau badana. Paulo ena sisiba be, “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina.” (Galatia 6:1) Unuseniai unai Greek herevana “hakaua lou” idia hahanaia neganai, ia gwauraia gauna be doketa ese ia makohi turia ta ia hamaoromaoroa. Dikseneri hereva ia haboudia tauna W. E. Vine ia gwau unai hereva ena anina be “lauma dalana ai idia goada taudia be kara dika ese ia abia tauna” idia hanamoa lou, badina “unai kara dika tauna be hegeregere lauma oreana ena kahana ia hakererea tauna ta.” Unai hereva idia hahanaia daladia ma haida be, “noho gabuna maoromaorona dekenai idia atoa lou; idia hamaoromaoroa.”
14, 15. ‘Ia diba lasi, to ia kerere’ Keristen tauna ta idia hakaua lou neganai, elda taudia be dahaka idia karaia be namo?
15 Ita ta ta ibounai eda lalohadai dalana ita hamaoromaoroa be auka, bona kerere tauna ena lalohadai hamaoromaoroa totona be auka danu. To manau dalana ai heduru idia henia neganai reana unai tauna ese do ia abia dae mai moale ida. Unai dainai, namona be Keristen elda taudia be Paulo ena sisiba idia badinaia, ia gwau: “Inai bamona karadia, dabua bamona do umui atoa: [hebogahisi], durua, manau, manada bona haheauka.” (Kolose 3:12) Bema ta idia hakaua lou be namo bona iena lalohadai be kerere, elda taudia be dahaka do idia karaia be namo? Namona be “laloa manau . . . do [idia] tahua.”—1 Timoteo 6:11.
Mamoe Ia Naria Neganai Ia Naria Namonamo
16 Paulo ena hereva Galatia 6:1 dekenai sisiba hereva ma haida idia noho. Ia ese lauma dalana ai idia goada tataudia ia hagoadadia, ia gwau: “Unai [kerere] tau do umui hakaua lou, mai manau danu. To oi naria namonamo, hedibagani ese oi danu do ia koia garina.” Bema unai sisiba idia badinaia lasi dika bada do ia havaraia diba! Anglican dubu gunalaia tauna ta be iena dubu taudia rua ida ia heudahanai ena sivarai dainai, London ena The Times magasin ia gwau unai be “gunaguna amo ia vara gauna: sisiba ia henia tauna, ia be tamana eiava tadikaka bamona, be kara dika ena hedibagani dekenai ia moru badina ia sisiba henidia taudia ese idia abidadama henia dainai.”
16, 17. Elda taudia be ma haida idia sisiba henidia neganai, dahaka gau dikadia dainai idia naria namonamo?
17 Namo lasi ita laloa Iehova ena taunimanima be unai hedibagani dekenai do idia moru diba lasi. Lagani momo lalonai tadikaka ese idia matauraia abidadama elda tauna ta be ia heudahanai badina headava taihu ta be sibona ia noho neganai mamoe naria vadivadi ia karaia. Ena be ia helalo-kerehai, to unai tadikaka ena dagi ibounai idia kokia. (1 Korinto 10:12) Unai dainai, ekalesia gunalaia tauna be mamoe naria vadivadi ia karaia neganai, edena dala ai ia karaia diba bena hedibagani dekenai do ia moru lasi? Edena dala ai sibodia idia noho diba, idia guriguri, bona Dirava ena Hereva bona Keristen buka bona magasin haida idia herevaherevalaidia hebou diba?
18. (a) Ruma bese kwarana dagi idia laloa dainai, edena dala ai unai ese elda taudia ia durudia diba edia ladana hadikaia daladia idia koua totona? (b) Taihu ta dekenai mamoe vadivadi idia karaia neganai edena bamona idia karaia diba?
18 Namona be elda taudia ese ruma bese kwarana ena dagi idia laloatao. (1 Korinto 11:3) Bema mero o kekeni ta be sisiba ia tahua, bema mai dalana namona be tama bona sina ida idia herevahereva hebou. Headava taihu be lauma dalana ai heduru ia tahua neganai, dala oi karaia iena adavana be vadivadi neganai ia danu ia noho diba, a? To bema unai umui karaia diba lasi eiava tau be Witness tauna lasi bona ia ese ia dagedage henia, edena bamona? Namona be headava lasi taihu ta dekenai mamoe naria vadivadi ta umui karaia dalana hegeregerena umui karaia. Aonega dalana be lauma dalana ai idia hegeregere tadikaka rua be nega tamona ai unai taihu idia vadivadi henia. Bema unai be hegeregere lasi, sedira nega namona ta idia abia hidi diba bena Kingdom Hall dekenai unai tadikaka rua be ia danu idia herevahereva hebou diba, namona be ma haida danu idia noho lasi daiutuna dekenai idia karaia. Ena be ma haida ese idia itaia lasi bona edia herevahereva idia kamonai diba lasi, to ma tadikaka bona taihu haida be Kingdom Hall dekenai idia noho dainai, sedira ma haida do idia hahekwakwanaidia lasi.—Filipi 1:9, 10.
19. Mai edia ura namona ida Dirava ena mamoe idia naria dainai dahaka gau namodia ia havaraia, bona daika ita hanamoa badina mai edia ura namona mamoe naria gaukara idia karaia taudia ita abia dainai?
19 Mai edia ura namona ida Dirava ena mamoe idia naria neganai namo do ia havaraia—lauma dalana ai ia goada, bona idia hakaua namo mamoe serina ai do ia lao. Aposetolo Paulo bamona, hari inai nega Keristen elda taudia be tadikaka idia lalodia bada. (2 Korinto 11:28) Hari inai nega dikana lalonai Dirava ena taunimanima hakaudia gaukara ena maduna be mai metau momokani. Unai dainai, ita moale bada badina elda gaukara idia karaia tadikakadia be gaukara namo herea idia karaia dainai. (1 Timoteo 5:17) Mai edia ura namona ida idia gaukara ‘harihari gaudia bamona tataudia’ ita abia be hahenamo ta, unai dainai guba dekenai, iseda lalokau, Mamoe Naria Tauna Badana, Iehova, ita hanamoa badina “gau namodia ibounai, bona harihari gaudia namodia momokani ibounai be Dirava dekena amo idia diho mai.”—Efeso 4:8; Iakobo 1:17.
Edena Bamona Do Oi Haere?
◻ Edena dala ai tau ta be dala namona ai iena ruma bese ia naria diba?
◻ Keristen elda taudia be ekalesia idia gunalaia neganai dahaka karadia idia hahedinaraia be namo?
◻ Sisiba idia henia neganai elda taudia be edena dala ai manau bona laloa manada idia hahedinaraia diba?
◻ Lauma dalana ai ta idia hakaua lou neganai dahaka heduru dainai unai idia karaia namonamo diba?
◻ Elda taudia be mamoe idia naria neganai dahaka idia karaia hedibagani idia abia lasi totona?
3. Dahaka dainai ita gwau diba Keristen tauna be iena ruma bese ia naria dalana ese ia hahedinaraia ia hegeregere o lasi kongregesen mamoe taudia ia naridia totona?
9. Namona be Keristen elda taudia be edena bamona edia hesiai gaukara maduna idia laloa?
12. Keristen elda taudia be edena dala ai idia hahedinaraia mai edia ura namona ida idia gaukara?
[Picture on page 18]
Keristen elda tauna be dala namona ai iena ruma bese taudia ia naridia be namo
[Picture on page 21]
Keristen mamoe naria gaukara be mai manau bona mai lalohadai maoromaoro ida idia karaia be namo