Hisihisi Do Ia Ore A?
SARAJEVO ai, maketi ta ai, bomu ta ia pou murinai, toana be dika herea; Rwanda ai ala-ala be bada; Somalia ai hitolo mase memerodia bona kekenidia ese aniani idia noilaia. Los Angeles ai tano ia laga murinai taunimanima ese edia kohu, idia dika vadaeni gaudia, idia itadia mai edia lalohisihisi ida; Bangladesh ai abata ese taunimanima ia hadikadia. Dina dina iboudiai unai bamona hisihisidia edia laulau be TV ai eiava magasin bona niuspepa ai ita itadia.
Taunimanima ese hisihisi idia ania dainai, madi, haida ese Dirava idia abidadama henia lasi, guna idia abidadama henia bamona. United States ai Iuda tomadiho oreana taudia idia gwau: “Dika ia noho dainai, taunimanima idia abidadama be auka.” Nazi dibura rumadia, Auschwitz hegeregerena, ai idia mase taudia bona Hiroshima ai bomu ia pou neganai idia mase taudia be idia herevalaidia. Ma idia gwau: “Kara maoromaoro Diravana mai ena siahu bada ese kerere lasi taudia hutuma edia mase ia koua lasi dainai, tomadiho taudia edia lalodia idia hekwarahi bona idia daradara bada.”
Madi, hisihisi sivaraidia be nega ibounai idia halasidia ese taunimanima edia lalodia ia ha-aukadia diba. Bema edia turadia bona varavaradia be hisihisi idia ania lasi, idia momo ese hisi-ania taudia idia lalodia lasi.
To, iseda lalokau taudia ita hebogahisi henidia diba ese ia hahedinaraia ita ia karaia Diravana be hebogahisi Diravana. Baibel ia gwau Dirava ese taunimanima ia karaia ‘ena toana bona ena laulau hegeregerena.’ (Genese 1:26, 27) To taunimanima edia tauanina be Dirava ena hegeregerena lasi, badina be Iesu Keriso ia gwau, “Dirava be lauma,” bona “lauma be tauanina lasi bona turiana lasi.” (Ioane 4:24; Luka 24:39) Dirava ese ita ia karaia sibona ena laulau hegeregerena, anina be ita be iena kara ita tohotohodia diba. Taunimanima ese vaia hisi-ania taudia idia hebogahisi henidia, unai dainai ita diba ia karadia Diravana, Iehova, ese hisi-ania taudia ia hebogahisi henidia.—Luka 11:13 itaia.
Dirava ese ena hebogahisi ia hahedinaraia dalana ta be, Baibel amo hisihisi ena badina be taunimanima ia hadibalaidia. Baibel ese ia hahedinaraia goevagoeva Dirava ese taunimanima ia karaia mauri do ia moalelaia totona, hisihisi do ia ania totona lasi. (Genese 2:7-9) Ia hahedinaraia danu taunimanima ginigunadia be sibodia edia kara, Dirava ena lohia dalana maorona dadaraia karana, dainai hisihisi idia ania.—Deuteronomi 32:4, 5; Roma 5:12.
Ena be unai bamona idia karaia, to Dirava ese hisi-ania taudia ia hebogahisi henidia. Ena gwauhamata be hisihisi do ia haorea. “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. . . . Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 21:3, 4; ma danu Isaia 25:8; 65:17-25; Roma 8:19-21 itadia.
Inai gwauhamata namodia ese idia hamomokania Dirava ese taunimanima edia hisihisi ia laloa bona ena lalona ia hadaia do ia haorea. To dahaka ese hisihisi ia hamatamaia, bona dahaka dainai Dirava ese ia koua lasi ema bona hari?
[Picture Credit Line on page 3]
Kevin Frayer/Sipa Press