Iehova ese Ia Hanamoa Bada Herea

“KEKENI e, namo do oi davaria, badina Lohiabada be oi danu ia noho, bona oi ia hanamoa bada herea vadaeni.” Unai hanamoa hereva be idau momokani! Gwauraia tauna be aneru Gabriela. Ia ese mai ena manau kudouna kekeni matamatana ia hereva henia​—Maria, tau ta ladana Heli ena natuna kekeni. Lagani be 3 B.C.E., bona gabu be Nasareta siti.​—Luka 1:​26-28.

Maria be kapenta tauna Iosepa do ia adavaia. Iuda bese edia taravatu bona edia sene karadia hegeregeredia, ia be Iosepa ena maoheni kekenina dainai idia gwauraia ena adavana. (Mataio 1:18) Maria bamona, Iosepa be dagi bada lasi tauna. Unai dainai, badina be dahaka aneru ese Maria ia hanamoa ia be hahenamo bada ia abia hegeregerena?

Ena Hahenamo Badana

Gabriela be ma ia gwau: “Maria e, oi gari lasi, badina be oi dekenai Dirava ia moale vadaeni. Oi be do oi rogorogo, mero ta do oi abia, ena ladana do oi hatoa Iesu. Ia be do ia tau bada herea momokani, ia be Dirava Ataiai Momokani ena Natuna do idia gwauraia, Lohiabada Dirava ese ena tamana Davida ena king dagina do ia henia. Bona ia be Iakobo ena bese edia king do ia lao ela bona hanaihanai. Ena basileia be do ia doko lasi.”​—Luka 1:​29-33.

Ia hoa bona ia daradara, bena Maria ia henanadai, ia gwau: “Lau be tau lau diba lasi, inai be edena bamona do ia vara?” Gabriela ia haere, ia gwau: “Lauma Helaga be oi dekenai do ia diho, bona Dirava ena siahu oi dekenai do ia atoa. Vadaeni, oi dekena amo do ia vara, inai mero helagana be Dirava ena Natuna do idia gwauraia.” Daradara ibounai ia kokia totona, aneru be ma ia gwau: “Ma oi laloa, oiemu varavara hahine Elisabeta. Ia be buruka neganai ia rogorogo vadaeni. Ibounai idia gwau ia be natuna ia havaraia diba lasi, to iena hua namba 6 be inai. Badina be Dirava ese gau ibounai ia karaia diba.”​—Luka 1:​34-37.

Maria be maoromaoro unai hesiai gaukara namona ia abia dae. Mai ura bada ida to manau dekenai ia haere, ia gwau: “Lau be Lohiabada ena hesiai hahine. Oiemu hereva hegeregerena lau dekenai do ia vara, be namo.” Unai murinai, Gabriela ese ia rakatania. Maria be haraga herea ia lao Iudea ena ororo gabuna ai siti ta dekenai. Hahelaga tauna Sekaria bona iena adavana Elisabeta edia ruma dekenai ia ginidae neganai, ia davaria idia vara gaudia be aneru ese ia gwauraia hegeregerena. Maria ena kudou ia moale bada! Ena udu bibinadia amo Iehova hanamoa herevadia ia gwauraidia.​—Luka 1:​38-55.

Iosepa Ena Adavana ai Ia Lao

Rami-hebou kekenina ta amo Iesu ena tanobada tauanina do ia vara, badina idaunegai unai idia perovetalaia. (Isaia 7:14; Mataio 1:​22, 23) To dahaka dainai maoheni rami-hebou kekenina amo do ia vara be namo? Unai dala amo, taravatu gwaumaorona hegeregerena, heubu tamana ta ese Pavapava David ena terona ia abia dagina be natuna ia henia diba. Iosepa bona Maria be Iuda bese taudia bona Pavapava David be edia sene tauna. Unai dainai, dala rua dekenai Iesu be mai ena maoro pavapava dagina ia abia totona. (Mataio 1:​2-16; Luka 3:​23-33) Unai badina dainai aneru be gabeai Iosepa ia hamaoroa, ena be Maria ia rogorogo to ia naria lasi be namo bona ena adavana korikorina totona ia abia.​—Mataio 1:​19-25.a

Kaisara Augusto ese taravatu ta ia karaia, ia gwau takisi totona edia ladana do idia torea, unai dainai Iosepa bona Maria be Betelehem dekenai idia lao. Unuseniai ia noho neganai, Maria ena vara guna natuna ia havaraia. Mamoe naria taudia idia mai beibi idia itaia totona, bona ena Tamana, Iehova, idia hanamoa. Mose ena Taravatu hegeregerena, sibona ia hagoevaia dina 40 negana murinai, Maria ia lao Ierusalem dubuna ai, ena kara dika dainai maino karaia boubouna ta ia henia totona. (Levitiko 12:​1-8; Luka 2:​22-24) Oibe, ia vara neganai ia goevadae lasi, bona kara dika ena hemarai ia abia dainai, namona be maino karaia bouboudia amo ena kerere ia koudia.​—Salamo 51:5.

Maria bona Iosepa be dubu ai idia noho dainai, buruka tauna Simeona bona buruka peroveta hahinena Ana be hahenamo idia abia badina Dirava ena Natuna idia itaia. Maria be taunimanima edia matadia ia veria momo lasi. (Luka 2:​25-38) Gabeai, aonega taudia be ia dekenai lasi to Iesu dekenai idia goru diho.​—Mataio 2:​1-12.

Aigupito ai idia heau lao bona unuseniai idia noho ela bona kara dika tauna Heroda ia mase murinai, bena Iesu ena tamana bona sinana idia giroa bona Nasareta hanua maragina dekenai idia noho. (Mataio 2:​13-23; Luka 2:39) Unuseniai Iosepa bona Maria be Iesu idia naria Dirava badinaia ruma besena ena dala ai.

Maria Ena Natudia Ma Haida Idia Noho

Gabeai, Maria bona Iosepa be Iesu ena tadidia bona taihudia idia havaradia. Iesu ia haroro lalonai ena hanua Nasareta ai ia lao neganai, ia maragi neganai ena turadia be ia idia diba. Idia henanadai, idia gwau, “Inai be kamuta tauna ena natuna lasi, a? Ena sinana ena ladana be Maria, ani? Ena tadina be Iakobo bona Iose, bona Simona bona Iuda, ani? Ena taihuna be ita dekenai idia noho, ani?” (Mataio 13:​55, 56) Nasareta taudia be Iosepa bona Maria edia ruma bese taudia korikoridia idia herevalaidia, unai be Maria ena natudia memero bona kekeni, bona idia laloa idia be Iesu ena tadidia bona taihudia.

Unai tadidia bona taihudia be Iesu ena kasin lasi. Bona idia be iena hahediba taudia lasi, eiava lauma dalana ai idia be ena tadikaka bona taihu lasi, badina Ioane 2:12 be unai orea rua edia idau ia hahedinaraia, ia gwau: “Iesu mai ena sinana danu, bona ena tadina bona ena diba tahua taudia danu, idia diho lasi Kaperanauma dekenai.” Lagani momo muridiai Ierusalem lalonai, aposetolo Paulo ese Kefa, eiava Petero, ia itaia, bona ia gwau: “Aposetolo haida be lau itaia lasi, Iakobo, Lohiabada ena tadina sibona lau itaia.” (Galatia 1:19) Ma danu, inai hereva Iosepa be “Maria danu nega tamona idia mahuta lasi, ela bona ena natuna ia abia” ese ia hahedinaraia Iesu ena heubu tamana be gabeai Maria ida ia mahuta hebou bona ia be ena natudia ma haida edia tamana. (Mataio 1:25) Unai hegeregerena, Luka 2:7 ese Iesu ia gwauraia Maria ena “vara guna” natuna merona.

Dirava Ia Gari Henia Sinana Ta

Ia be Dirava ia gari henia sinana ta dainai, Maria be Iosepa ida ia gaukara hebou, kara maoromaoro dalana ai ena natudia ia hadibadia totona. (Hereva Lada-isidia 22:6) Ita diba Revareva Helagadia ia stadilaidia goadagoada badina Elisabeta ia hanamoa neganai ena hereva dekenai lauma gaudia ia gwauraidia momo. Unai neganai Iesu ena sinana be Hana ena ane amo hereva haida ia gwauraia bona ia hedinarai salamo herevadia, histori bona peroveta toretoredia, bona Mose ese ia toredia buka ia diba. (Genese 30:13; 1 Samuel 2:​1-10; Hereva Lada-isidia 31:28; Malaki 3:12; Luka 1:​46-55) Maria ese peroveta kara bona herevadia ia lalodia tao, ena kudouna dekenai ia lalodia bada, bona ena darana ai ia lalodia loulou. Unai dainai ia hegeregere momokani ia heduru mero matamatana Iesu ia hadibaia totona.​—Luka 2:​19, 33.

Idia hadibaia namonamo lagani 12 merona Iesu ese ia hahedinaraia Revareva Helagadia ia diba momo, bona dubu ena aonega taudia be unai dekenai idia hoa. Paseka negana ai ena tamana sinana amo ia parara dainai, iena sinana ia gwau: “Egu natuna e, dahaka dainai inai bamona oi karaia ai dekenai? Lau bona emu tamana be mai tai danu oi ai tahua noho.” Iesu ia haere, ia gwau: “Dahaka dainai lau umui tahua? Umui diba lasi egu Tamana ena ruma be lauegu noho ruma, a?” Ena haere ena anina ia diba lasi, to Maria be unai hereva ia laloatao. Nasareta ai ia giroa neganai, Iesu “ia tubu daekau noho mai aonega danu, Dirava bona taunimanima ese idia ura henia.”​—Luka 2:​42-52.

Maria be Iesu Ena Hahediba Hahinena Ta

Maria be gabeai Iesu ena hahediba hahine namona ta ai ia lao be maoro momokani! Ia manau bona ena be Dirava ese hesiai gaukara idauna ta ia henia, to ia ura lasi ma haida ese idia gwauraia bada. Maria be Revareva Helagadia ia diba. Bema oi tahudia, do oi davaria idia gwau lasi ia be mai ena halo, idia gwau lasi terona dekenai “sinana-hahine pavapavana” bamona ia helai bona Keriso ena hairai ese ia ia hadiaria. To do oi davaria, idia sivarailaia momo lasi, ena ladana idia gwauraia momo lasi.​—Mataio 13:​53-56; Ioane 2:12.

Iesu be iena hahediba taudia ia koudia Maria tomadiho henia karana idia karaia garina. Nega ta ia hereva neganai, “hahine ta taunimanima hutuma edia huanai . . . ia hereva badabada, ia gwau, ‘Oi ia havaraia bona oi dekenai rata ia henia hahine be mai moale bada.’ To Iesu ia gwau, ‘Gau badana momokani be inai, Dirava ena hereva idia kamonaia bona idia badinaia taudia be idia moale bada.’ ” (Luka 11:​27, 28) Headava aria ta dekenai, Iesu ese Maria ia hadibaia, ia gwau: “Hahine e, lau dekenai be dahaka oi karaia? Lauegu nega be dohore.” (Ioane 2:4) Idia hahanaia Baibel ma haida idia gwau: “Unai gaukara be lau dekenai oi rakatania.” (Weymouth) “Lau oi hamaoroa toho lasi.” (An American Translation) Oibe, Iesu ese iena sinana ia matauraia, to ia matauraia lasi ia be dagi badana hahinena hegeregerena.

Hahenamo Ela Bona Hanaihanai

Maria ese hahenamo bada ia moalelaidia! Iesu ia havaraia. Bena unai mero ia ubua bona ia hadibaia. Gabeai, abidadama ia hahedinaraia, Keriso ena hahediba hahine ta bona lauma dalana ai iena taihuna ai ia lao. Revareva Helagadia ese Maria idia gwauraia nega ginigabena ai, ita itaia ia be Ierusalem ena atai daiutuna ta ai ia noho. Unuseniai ia noho Iesu ena aposetolo taudia ida, ena natudia memero ma haida ida, bona abidadama hahine haida ida​—idia iboudiai ese Iehova idia tomadiho henia.​—Kara 1:​13, 14.

Nega ia lao murinai, Maria ia mase bona ena tauanina be kahu dekenai ia giroa. Horoa idia abia bona ena lalokau natuna murinai idia raka taudia ginigunadia ma haida hegeregeredia, mase dekenai ia mahuta ela bona Dirava ia ura negana ia mai, guba lalonai mase diba lasi lauma maurina dekenai ia hatorea isi totona. (1 Korinto 15:​44, 50; 2 Timoteo 4:8) Dirava ese “ia hanamoa bada herea” hahinena be hari Iehova Dirava bona Iesu Keriso ida ia noho dainai ena moale ia bada herea!

[Footnotes]

[Picture on page 31]

Maria be Dirava ese ia hanamoa bada badina ia be Iesu ena sinana ai ia lao