“Orea Maragi E, Umui Gari Lasi”

“Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.”​—LUKA 12:32.

1. Dahaka dainai Iesu ia gwau: “Orea maragi e, umui gari lasi”?

“DIRAVA ena Basileia do umui tahua.” (Luka 12:31) Iesu ese ena hahediba taudia unai bamona ia hereva henidia neganai, ia ese Keristani taudia edia lalohadai be unai nega amo ema bona hari ia hakaudia herevana ta ia gwauraia unai. Dirava ena Basileia be iseda mauri lalonai ita tahua guna be namo. (Mataio 6:33) Luka ese ia torea sivaraina lalonai, Iesu ese hereva ma haida, edia lalona hagoadaia herevadia, be Keristani taudia edia orea ta dekenai ia gwauraia. Ia gwau: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.” (Luka 12:32) Mamoe Naria Tauna Namona, Iesu, ia diba ena hahediba taudia be nega vairai hekwakwanai do idia davaridia. To Dirava ena Basileia bema do idia tahua guna, do idia gari be anina lasi. Unai dainai, Iesu ena sisiba be hahegani aukana lasi. To ia be lalokau gwauhamatana namona, edia lalona hagoadaia gwauhamatana.

2. Orea maragi taudia be daidia, bona edia ahuna namona be dahaka?

² Iesu ese ena hahediba taudia ia hereva henia, ia gwauraidia “orea maragi.” Ia ese danu Iehova ese ‘Basileia do ia henidia’ taudia ia hereva henia unai. Unai orea be maragi, nega gabedia ai Iesu do idia abia dae taudia be hutuma bada herea. Ia lalodia bada, badina be idia be Dirava ese ia abia hidi, nega vairai pavapava ai do ia halaodia. Edia Tamana, Mamoe Naria Tauna Badana, Iehova, ese ia boiridia, guba ai edia ahuna do idia abia, Keriso ena Mesia Basileiana lalonai.

Orea Maragi

³ Vadaeni, daidia be hari orea maragina lalonai idia noho bona unai ahuna namona idia naria? Dirava ese ena lauma amo ia horoa taudia, Iesu Keriso murinai idia raka taudia unai. (Kara 2:​1-4) Aposetolo Ioane ese ia itadia, guba ai ane idia abia bona edia imana ai gitara idia dogoatao; ia gwau: “Lau itaia, Mamoe ena Natuna be Siona Ororo dekenai ia gini. Ia danu be taunimanima 144,000 idia gini, iena ladana, bona iena Tamana ena ladana be edia baguna dekenai Dirava ese ia torea. Inai taudia be hahine danu idia sihari lasi momokani. Idia be helaga bona goevagoeva. Idia ese Mamoe ena Natuna murinai idia raka, iena loaloa gabudia ibounai. Taunimanima ibounai edia huanai dekena amo Dirava ese idia ia hoia vadaeni. Bona idia be taunimanima ginigunadia Dirava bona Mamoe ena Natuna ese idia abia, edia. Koikoi hereva nega ta idia gwauraia lasi, idia be kerere lasi momokani.”​—Apokalupo 14:1, 4, 5.

4. Hari inai negai orea maragi taudia edia dagi tanobada ai be dahaka?

⁴ Pentekoste 33 C.E. amo, inai taunimanima, Dirava ese ena lauma amo ia horoa bona ia havaraia lou taudia, be Keriso ena hereva gwauraia hedinarai taudia tanobada ai. (2 Korinto 5:20) Hari inai negai, unai orea taudia oredia mo idia noho; idia be hesiai tauna mai ena kamonai bona mai ena kara maoromaoro oreana, bona idia gaukara hebou. (Mataio 24:45; Apokalupo 12:17) Lagani 1935 amo, “mamoe idaudia,” edia helaro be tanobada ai do idia noho Keristani taudia, ese idia bamodia. Hari idia milioni momo ese tanobada ibounai lalonai sivarai namona harorolaia gaukarana ai idia durudia.​—Ioane 10:16.

5. Orea maragi taudia oredia edia lalohadai be edena bamona, bona dahaka dainai idia gari lasi be namo?

⁵ Inai orea maragi taudia tanobada ai idia do noho edia lalohadai be edena bamona? Idia diba ‘ta ese do ia hamarerea diba lasi Basileiana’ do idia abia, unai dainai Dirava ena gaukara idia karaia mai edia hemataurai bona mai edia gari ida. (Heberu 12:28) Mai edia manau ida idia diba edia ahuna be hereadae, moale bada ia havaraia gauna. “Nadi namo herea ta,” Iesu ese Basileia ia herevalaia neganai ia gwauraia gauna, idia davaria vadaeni. (Mataio 13:46) Hisihisi badana ia hure mai noho lalonai, Dirava ese ia horoa taudia be idia gini auka, mai edia gari lasi. Herevana dahaka be Iehova ena ‘Dina Badana bona namo hereana mai garina’ ai do ia vara taunimanima dekenai, to idia be nega vaira garina idia gari lasi. (Kara 2:19-21) Unai idia gari henia ena anina be dahaka?

Edia Momo Ia Diho

⁶ Vanegai laganidia lalonai, orea maragi taudia tanobada ai idia do noho edia momo ia diho. Lagani 1994 ena Memorial ripotina ese unai ia hahedinaraia. Tanobada hegegemadai, Iehova ena orea taudia edia kongregesen 75,000 bamona lalonai, taunimanima 8,617 sibodia mo ese paraoa idia ania bona uaina idia inua, unai amo idia hahedinaraia idia be orena taudia. (Mataio 26:​26-30) To, idia hebou taudia iboudiai edia momo be 12,288,917. Horoa Keristani taudia ese unai idia hoalaia lasi. Iehova ia gwau taunimanima 144,000 mo be orea maragi ai do idia lao, bona Pentekoste 33 C.E. amo ia gogodia matamaia. Hari orea maragi taudia edia namba be kahirakahira ia guguru neganai, boiridia negana be kahirakahira ia ore be maoro. Toana be unai taunimanima, Dirava ese dala idauna amo ia hanamoa taudia, gogodia karana badana be lagani 1935 ai ia ore. To, Baibel ia gwau dokona negana lalonai mamoe idaudia do idia momo idia lao, idia be “taunimanima momo herea . . . , duahia diba lasi. Idia be bese idauidau, iduhu idauidau, kopina idauidau, bona gado idauidau.” Lagani 1935 amo ema bona hari, Iehova ese unai hutuma bada herea gogodia gaukarana badana ia karaia; edia helaro be tanobada paradaisona ai mauri hanaihanai do idia abia.​—Apokalupo 7:9; 14:​15, 16; Salamo 37:29.

6, 7. (a) Dahaka dainai hari inai negai orea maragi taudia tanobada ai idia do noho be momo lasi? (b) Taunimanima ta ta ese edia helaro be edena bamona idia laloa be namo?

⁷ Orea maragi taudia momo tanobada ai idia do noho edia mauri laganidia hari be 70, eiava 80, eiava 90 mai kahana. Haida edia lagani be 100. Idia iboudiai, herevana edia lagani be hida, idia diba guba ena toreisi lou amo gabeai Iesu Keriso ida do idia noho bona ena Basileia hereadaena lalonai ia ida do idia lohia hebou. Taunimanima hutuma bada herea be tanobada ai do idia noho bona King Keriso ese do ia lohiadia. Vadaeni, idia ta ta ese Iehova be ia idia lalokau henia taudia ia henia gwauraia gaudia idia moalelaia be namo. Unai helaro ruaosi amo ta ita abia hidi diba lasi. Iehova ese unai ia gwauraia hidi ita ta ta eda. Orea ruaosi ese edia helaro, nega vairai do idia noho namo helarona, idia moalelaia diba, herevana idia be guba Basileiana lalonai do idia noho eiava unai Basileia ena siahu henunai do idia noho tanobada paradaisona lalonai.​—Ioane 6:​44, 65; Efeso 1:​17, 18.

8. Taunimanima 144,000 makaia gaukarana hari be edena bamona, bona do ia ore neganai, dahaka do ia vara?

⁸ Orea maragi, ia lalonai be taunimanima 144,000, be “Dirava ena Israela momokani”; Dirava ena palani lalonai Israela gunana ena gabu ia abia. (Galatia 6:16) Unai dainai, orena taudia be unai lauma besena orena, tanobada ai idia do noho. Maka idia abia noho, Dirava ese do ia abidia dae vaitani totona. Mata hanai lalonai aposetolo Ioane ese unai ia itaia, bona ia gwau: “Ma aneru ta lau itaia, dina ia daekau kahana dekena amo ia daekau mai, ia ese Mauri Diravana ena koua toana badana ia dogoatao noho. Ia ese unai aneru 4 ia boiboi henidia badabada. Unai aneru 4 be Dirava ese siahu ia henidia vadaeni, tanobada bona davara do idia hadikaia totona. Unai aneru ia gwau, ‘Tanobada bona davara bona au do umui hadikaia lasi, ela bona iseda Dirava ena hesiai taudia edia baguna dekenai Dirava ena maka do ita atoa.’ Vadaeni lau kamonai, Dirava ena maka idia abia taudia edia momo be 144,000. Idia be [lauma] Israela bese taudia, edia iduhu 12 dekena amo.” (Apokalupo 7:2-4) Toana be lauma Israela taudia makaia gaukarana ena dokona be kahirakahira; unai ese ia hahedinaraia nega daudau lasi hoa gaudia haida do idia vara. Gau ta be inai: Hisihisi badana be kahirakahira; unai neganai lai hani do idia kehoa, tanobada do idia hadikaia ore totona.​—Apokalupo 7:14.

9. Hutuma bada taudia idia momo idia lao be orea maragi taudia ese edena bamona idia laloa?

⁹ Dirava ese ia gogodia vadaeni taudia hutuma bada herea be milioni momo. Unai ese orena taudia edia lalona ia hamoalea bada! Ena be orea maragi taudia edia momo ia diho noho, to idia ese hutuma bada herea taudia haida, Dirava vairanai idia hegeregere taudia, idia hadibadia bona idia hahegaegaedia vadaeni, Dirava ena orea tanobada ai, ia bada ia lao oreana, lalonai maduna do idia huaia totona. (Isaia 61:5) Iesu ia hereva hegeregerena, taunimanima haida be hisihisi badana lalona amo do idia roho mauri.​—Mataio 24:22.

“Umui Gari Lasi”

¹⁰ Satani bona ena lauma dikadia be Iesu ese ia negea diho vadaeni tanobada kahirakahira dekenai. Satani bona ena orea badana be gau ta ese ia veridia noho, Iehova ena orea taudia do idia tuari henia totona. Baibel ese unai ia perovetalaia, ia gwau Goga, Magoga tanona tauna, ese do ia tuari henidia. Diabolo ese daidia do ia tuari henia bada? Taudia be orea maragi taudia oredia, Dirava ena lauma Israelana, “tano ena huanai momokani idia noho” namonamo taudia, ani? (Esekiela 38:​1-12) Oibe, to horoa taudia oredia mai edia kamonai, bona idia bamodia mai edia kamonai taudia, mamoe idaudia unai, ese do idia itaia, Satana ese do ia tuari henidia dainai, Iehova Dirava ese kara badana ta do ia karaia ena orea taudia durua totona, bena unai ese Iehova ena ‘dina badana, taunimanima idia gari’ henia dinana, do ia hamatamaia. (Ioela 2:31) Hari inai negai, hesiai tauna mai ena kamonai bona mai ena kara maoromaoro ese taunimanima hamauria gaukarana ta idia karaia​—Iehova do ia karaia gaukarana idauna idia hadibaia. (Malaki 4:5; 1 Timoteo 4:16) Iehova ena Basileia sivaraina namona harorolaia karana amo unai hesiai gaukarana oi durua noho, a? Mai emu boga auka ida Basileia sivaraina do oi harorolaia noho mai emu gari lasi, a?

11. Dahaka dainai hari inai negai ita boga auka be gau badana?

¹¹ Tanobada ai hari idia vara gaudia dainai, namona be orea maragi taudia be Iesu ena hereva idia dekenai be do idia badinaia; ia gwau: “Orea maragi e, umui gari lasi”! Iehova ena palani hegeregerena hari inai negai idia vara gaudia dainai, namona be unai bamona do idia boga auka. Orea maragi taudia ta ta iboudiai idia diba namona be do idia haheauka ela bona dokona. (Luka 21:19) Iesu Keriso, orea maragi taudia edia Lohiabada bona edia Biaguna, be ia haheauka bona Dirava ia badinaia ela bona tanobada ai ia mase; unai hegeregerena, namona be orena taudia ta ta iboudiai danu do idia haheauka noho bona Dirava do idia badinaia noho.​—Heberu 12:​1, 2.

12. Iesu hegeregerena, Paulo ese horoa Keristani taudia edena bamona ia hamaoroa do idia gari lasi?

¹² Namona be horoa taudia iboudiai do idia laloa, aposetolo Paulo ia laloa hegeregerena. Mani inai oi laloa: Iesu ia gwau do idia gari lasi be namo, bona unai hereva hegeregerena unai horoa tauna Paulo ese toreisi lou herevana ia harorolaia. Ia gwau: “Iesu Keriso do oi laloatao noho, ia be Davida ena bese tauna, mase dekena amo ia toreisi lou. Inai bamona lau gwauraia, Sivarai Namona lau harorolaia neganai. Sivarai Namona lau harorolaia dainai, hisihisi lau abia noho, bona dibura tauna bamona auri dekena amo lau idia guia. To Dirava ena hereva idia guia diba lasi. Unai dainai, hisihisi ibounai lalonai lau haheauka, Dirava ese ia abia hidi vadaeni taudia do lau durua totona. Badina be lau ura idia danu ese Keriso Iesu ia mailaia hamauria namona do idia davaria. Inai hamauria ena hairaina be do ia noho ela bona hanaihanai. Inai hereva be momokani: ‘Bema ia danu ita mase, vadaeni ia danu do ita mauri. Bema ita haheauka, bona ita gini goada noho, ita be ia danu do ita lohia taudia. To bema ita ese ia ita negea, ia danu ese ita do ia negea. Bema iseda gwauhamata ia dekenai ita badinaia lasi, iena gwauhamata ita dekenai do ia badinaia noho, badina be iena gwauhamata hereva ia senisia diba lasi, lasi momokani.’ ”​—2 Timoteo 2:​8-13.

13. Orea maragi taudia be dahaka idia diba momokani, bona unai dainai dahaka idia karaia?

¹³ Aposetolo Paulo hegeregerena, orea maragi taudia oredia, Dirava ese ia horoa taudia unai, edia lalona be hegeregere, Dirava ena hereva mai siahuna Baibel lalonai be do idia harorolaia neganai hisihisi do idia haheaukalaia. Edia abidadama be mai ena ramuna dobudia; idia diba bema Dirava do idia badinaia ela bona mase, ena gwauhamata hegeregerena do ia hamauridia bona “kwalimu ahuna, mauri,” do ia henidia. (Apokalupo 2:10) Do idia mase neganai, karaharaga do idia toreisi lou bona do idia senisi; Keriso dekenai do ia hakapudia, ia ida do idia lohia hebou totona. Edia kara maoromaoro amo tanobada idia halusia vadaeni dainai, idia kwalimu momokani!​—1 Ioane 5:​3, 4.

Helaro Idauna

¹⁴ Orea maragi taudia edia toreisi lou helarona be ia idau. Edena dala ai? Dalana ta be inai: Do idia toreisi lou guna, to ‘kara maoromaoro taudia bona kara maoromaoro lasi taudia’ edia toreisi lou be gabeai. (Kara 24:15) Keriso ena toreisi lou sibona mo ese edia ia hereaia, 1 Korinto 15:​20, 23 ese ia hahedinaraia hegeregerena; ia gwau: “Keriso be Dirava ese mase dekena amo ia hatorea isi. Unai ia karaia dainai, Keriso ese mase lalonai idia mahuta noho taudia edia toreisi lou ia hamomokania vadaeni. Toreisi lou taudia be ia ese idia ia gunalaia. To ta ta edia nega, edia nega dekenai mauri do idia abia. Keriso ia toreisi lou guna, unai murinai, ia giroa mai neganai, Keriso idia badinaia taudia ibounai danu do idia toreisi lou.” Orea maragi taudia be mai edia haheauka bona mai edia abidadama, Iesu ena hegeregerena, unai dainai idia diba do idia mase neganai dahaka do idia abia. Unai be mai anina bada hari inai negai, badina be lagani 1918 ai Lohiabada korikorina be ena dubu helagana dekenai ia mai.​—Malaki 3:1.

14, 15. Edena dala ai orea maragi taudia edia toreisi lou helarona be ia idau?

¹⁵ Paulo ese badina ma ta ia gwauraia, unai dainai danu ita laloa edia toreisi lou be idau. Korinto Ginigunana 15:​51-53 ai ia gwau: “Umui kamonai. Hunia hereva umui lau hamaoroa inai: Ita ibounai do ita mase lasi, to Dirava ese ita ibounai do ia senisia, do ita idau. Inai be karaharaga momokani do ia vara, matana hakapua haraga ena nega bamona, dokona kibina do idia hiriria neganai. . . . Badina be do ia bodaga diba gauna ese bodaga diba lasi gauna bamona do ia halaoa. Bona do ia mase diba gauna ese mase diba lasi gauna do ia halaoa.” Unai hereva be mai anina orea maragi taudia dekenai, Keriso ia lou mai murinai idia mase taudia unai. Mase lalonai do idia mahuta negana be lasi, to ‘karaharaga, matana hakapua haraga ena nega bamona’ doko diba lasi maurina do idia abia.

16, 17. Edia toreisi lou helarona hegeregerena, horoa Keristani taudia hari inai negai ese dahaka hahenamo hereadaena idia abia?

¹⁶ Unai ita diba dainai, aposetolo Ioane ena hereva Apokalupo 14:​12, 13 ai ena anina ita lalo-pararalaia diba. Ia gwau: “Inai bamona ia vara neganai, Dirava ena bese taudia do idia gini goada be namo. Dirava ena bese taudia be inai: Dirava ena taravatu idia badinaia, bona Iesu idia abidadama henia mai momokani danu. Vadaeni gado ta, guba dekena amo lau kamonai, ia gwau, ‘Inai hereva do oi torea: Harihari ia lao, Lohiabada idia abidadama henia noho neganai idia mase taudia be do idia moale.’ Ma Lauma Helaga danu ia hereva, ia gwau, ‘Oibe, idia ese edia gaukara mai hekwarahi dekena amo do idia laga-ani, bona idia be do idia laga-ani kava lasi. Badina be edia kara namodia ena sivarai, be idia danu nega tamona do ia lao noho.’ ”

¹⁷ Orea maragi taudia oredia ese davana idau hereana do idia abia, ani? Do idia mase murinai, karaharaga do idia toreisi lou. Hoa dalanai do idia senisi, lauma gabuna ai edia gaukara do idia karaia matama neganai! Hari inai negai orea maragi taudia be unai hairai idia abia bona Baibel ena peroveta herevadia badadia edia anina momo idia vara vadaeni, unai dainai oredia ‘do idia gari lasi’ be namo. Edia boga auka ese hutuma bada herea ia hagoadaia. Orea maragi taudia hegeregerena, namona be idia danu do idia gari lasi, Dirava ese tanobada ai do ia vara hisihisina badana amo do ia hamauridia negana do idia naria noho lalonai.

18, 19. (a) Dahaka dainai hari inai negai taunimanima do idia kara haraga be namo? (b) Dahaka dainai horoa taudia bona mamoe idaudia be idia gari lasi be namo?

¹⁸ Orea maragi taudia edia kara herevalaia karana ese idia bona hutuma bada herea taudia ia durua, Dirava korikori do idia gari henia noho totona. Iena hahemaoro horana ia ginidae vadaeni, bona ena hebogahisi negana orena be mai anina bada. Nega kwadogi sibona ia noho, ia lalonai taunimanima ma haida ese Dirava do idia gari henia matama. To ita be Dirava ena palani do ia moru garina ita gari lasi. Momokani, ena anina do ia vara!

¹⁹ Gado badadia guba ai idia kamonai vadaeni, idia gwau: “Tanobada biagua siahuna be iseda Lohiabada bona iena Keriso idia abia vadaeni. Bona Lohiabada ese tanobada do ia biagua momokani, ela bona hanaihanai.” (Apokalupo 11:15) Momokani, Mamoe Naria Tauna Badana, Iehova, ese ena mamoe iboudiai be ‘kara maoromaoro daladia dekenai ia hakaua,’ iena ladana dainai. (Salamo 23:3) Orea maragi taudia ia hakaua goevagoeva, edia davana be guba ai do idia abia totona. Bona ia ese hutuma bada herea be hisihisi badana lalona amo do ia hamauria, ena Basileia mai hairaina ese do ia biagua tanobadana ai, Keriso Iesu ena lohia siahuna henunai, mauri hanaihanai do idia abia totona. Vadaeni, ena be Iesu ese ena hereva be orea maragi taudia dekenai ia gwauraia, to Dirava ena hesiai taudia iboudiai tanobada dekenai ese ena hereva do idia kamonai henia be namo; ia gwau: “Umui gari lasi.”

Oi Gwauraia Hedinarai Diba A?

◻ Dahaka dainai ita diba orea maragi taudia oredia edia momo do ia diho be maoro?

◻ Horoa taudia oredia hari inai negai be edena bamona?

◻ Ena be Goga, Magoga tanona tauna, ese ia tuari henidia gwauraia, to dahaka dainai Keristani taudia idia gari lasi be namo?

◻ Dahaka dainai 144,000 taudia edia toreisi lou helarona be idau, hari inai negai?

3. Dahaka mata hanai namo hereana lalonai Ioane ese orea maragi taudia ia itaia?

10. (a) Nega daudau lasi daidia ese Iehova ena orea taudia do idia tuari henia, bona unai dainai dahaka do ia vara? (b) Dahaka henanadai be ita ta ta ibounai idia henia?