Daika Ita Gwauhamata Henia?

“Lohiabada ena oda hereva ibounai do ai karaia, bona do ai kamonai henia.”​—ESODO 24:7.

1, 2. (a) Taunimanima haida be dahaka dahaka idia laloa bada bona idia badinaia? (b) Tomadiho taudia sibodia mo be unai bamona idia karaia, a?

FEBRUARY 1945 lalonai, Japan ena Zero tuari peleini taria taudia edia Yatabe Oreana be daiutu ta lalonai idia haboudia, bena pepa be idia ta ta idia henidia, edia lalohadai do idia torea totona; do idia hahedinaraia edia lalona idia hegeregere kamikaze tuari oreana lalonai do idia vareai eiava lasi. Ofesa ta, unai neganai idia bogaragidiai ia noho, be gabeai ia gwau: “Lau laloa egu bese edia hekwarahi bada neganai sibogu egu mauri do lau negea be namo . . . unai dainai lau gwau egu lalona ia hegeregere.” Bena Ohka peleini taria dalana idia hadibalaia, unai peleini be edia inai taudia edia tuari sisima ta dekenai do ia taria lao, bena hadikaia totona do ia bampaia neganai, do ia mase. To ena tano bona ena pavapava dainai unai bamona do ia mase dalana ia do karaia lasi neganai, tuari ia doko. Japan be tuari lalonai ia lusi neganai, unai ese ena abidadama iena pavapava dekenai be ia haorea.

² Guna, Japan taudia momo ese edia pavapava idia tomadiho henia, badina be idia laloa ia be mauri diravana ta. Tano idaudia ai, taunimanima milioni momo ese Maria, eiava Buddha, eiava dirava idaudia be edia laulau amo idia tomadiho henidia. TV haroro taudia edia lalo-ani herevadia dainai haida ese edia moni momo idia henidia; unai be idia tomadiho henidia bamona. Tuari murinai, Japan taudia ese gau matamatana idia tahua, edia mauri be ia do idia henia. Idia haida ese moni gaukara idia abia hidi. Tanobada hegegemadai, taunimanima momo ese taga idia tahua mai edia goada ibounai ida. Memero kekeni ese miusik karaia taudia idia laloa bada bona edia kara idia tohotohoa. Taunimanima momo be sibodia idia tomadiho henia bamona; sibodia edia ura gaudia idia tahua goadagoada. (Filipi 3:19; 2 Timoteo 3:2) To unai gau o unai taunimanima be unai bamona idia laloa bada be maoro, a?

3. Edena bamona ia hedinarai taunimanima idia laloa bada gaudia haida be anina lasi?

³ Kaivakuku be taunimanima ese “idia sibona edia imana dekenai idia karaia gaudia” mo. (Salamo 115:4) Idia tomadiho henidia taudia be unai idia lalo-pararalaia neganai, edia lalona idia hisihisi. Haroro taudia badadia edia kerere idia hahedinaraidia negadiai, lalo-momokani taudia edia lalona idia hisihisi. Vanegai, bisinesi momo idia dika dainai gaukara taudia idia hasakia neganai, edia lalona idia metau momokani. Moni idia tomadiho henia taudia ese dika bada idia davaria, badina be bisinesi amo moni momo abia totona idia abiatorehai monina do idia haloua dalana be lasi. (Mataio 6:​24) Rok miusik taudia badadia idia mase o edia ladana idia maragi idia lao neganai, guna idia tomadiho henidia taudia be idia noho kava. Bona sibodia hamoalea dalana idia rakalaia taudia momo ese huahua iditadia idia gogoa.​—Galatia 6:7.

4. Dahaka dainai taunimanima ese anina lasi gaudia idia badinaia momokani?

⁴ Dahaka dainai taunimanima ese unai anina lasi gaudia idia badinaia goadagoada? Unai be Satani Diabolo ese ia biagua tanobadana ena lauma dainai. (Efeso 2:​2, 3) Unai lauma ena siahu be dala idauidau ai ia hedinarai. Reana taunimanima ta be ena tubuna edia kastom ese idia biagua. Eiava, ia maragi neganai idia hadibaia bona idia hasikulia daladia ese ena lalohadai idia biagua. Haida be edia bosi edia lalo-ani dainai moni gaukarana idia goadalaia dikadika bona unai amo sibodia edia mauri idia hadikaia. Tanobada ena lalohadai ese momo ia hakererea dainai, moni bona kohu idia ura henia bada, bona sibodia edia ura idia tahua goadagoada. Idia laloa namonamo lasi unai gau do idia tahudia goadagoada be namo eiava lasi.

Gwauhamata Besena Ta

⁵ Lagani 3,500 mai kahana idia lao vadaeni, Israela besena ese unai ibounai ia hereaia Diravana, siahu ibounai Diravana, Iehova, idia davaria, bena Sinai tanona gagaena dekenai idia gwauhamata henia, idia gwau ia do idia badinaia.

6. Dirava ena ladana ena anina Israela taudia dekenai be dahaka?

⁶ Dahaka dainai Israela taudia be unai bamona idia kara? Igui hesiai gaukarana be Aigupito ai idia karaia noho lalonai, Iehova ese Mose ia siaia do ia ruhadia nege totona. Mose ese ia nanadaia edena bamona do ia gwauraia hedinarai idia dekenai, bena Dirava be sibona ia gwauraia hedinaraia, ia gwau: “LAU INAI LAU NOHO.” Bena Mose ia oda henia Israela taudia do ia hamaoroa, do ia gwau: “LAU NOHO ese ia siaia lau umui dekenai.” (Esodo 3:​13, 14) Unai hereva ese ia hahedinaraia Iehova be ena palani hagugurudia Diravana ai do ia lao. Israela taudia edia tubudia idia diba lasi dalana ai do ia hahedinaraia ia be gwauhamata hamomokanidia Diravana.​—Esodo 6:​2, 3.

7, 8. Israela taudia ese dahaka idia itaia dainai idia diba Iehova do idia tomadiho henia be namo?

⁷ Aigupito tanona bona Aigupito taudia be Hisihisi 10 amo ia hahisia neganai, Israela taudia ese unai idia itaia. (Salamo 78:​44-51) Bena idia iboudiai, reana milioni toi mai kahana, be hanuaboi tamona lalonai edia kohu idia abia hegaegae bena Gosena tanona amo idia raka lasi; hoa karana badana unai. (Esodo 12:​37, 38) Bena, Davara Kakakaka ai, Iehova ese ia hahedinaraia ia be “tuari tauna”; davara ia hapararaia Israela taudia do idia raka hanai totona, bena gabeai ia haloua Aigupito taudia hamaloaia mase totona. Unai dainai, “Aigupito taudia dekenai Lohiabada ese edena bamona ia karaia, be Israela taudia ese idia itaia, vadaeni idia gari Lohiabada dekenai, idia abidadama henia Lohiabada dekenai.”​—Esodo 14:31; 15:3; Salamo 136:​10-15.

⁸ To Israela taudia idia kara, hegeregere Dirava ena ladana ena anina hahedinaraia gaudia be lasi bamona. Idia hitolo bona idia ranu mase dainai, Iehova bona ena gwaukau tauna Mose idia maumau henia. Bena Iehova ese manu ia siaidia, mana ia hadihoa, bona Meriba ai ranu be nadi amo ia halasia. (Esodo 16:​2-5, 12-15, 31; 17:​2-7) Ia ese danu Amaleka tuari taudia amo ia hamauridia. (Esodo 17:​8-13) Iehova ese gabeai Mose ia hamaoroa herevana be Israela taudia ese idia hakoikoia diba lasi; ia gwau: “Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga. Taunimanima momo herea dekenai lau bogahisihisi henia noho, bona kara dika, bona kara kerere idauidau lau gwauatao noho.” (Esodo 34:​6, 7) Momokani, Iehova ese ia hamomokania ia do idia tomadiho henia be namo.

9. Dahaka dainai Iehova ese dala ia kehoa Israela taudia be edia gwauhamata, iena hesiai do idia lao henia gwauhamatana, do idia gwauraia hedinarai, bona idia be be edena bamona idia haere?

⁹ Ena be Iehova ese Israela taudia ia biagua be maoro badina be Aigupito amo ia hoidia dainai, to ia be hebogahisi Diravana dainai, ia ese dala ia kehoa idia edia, sibodia edia ura hegeregerena do idia gwau idia ura iena hesiai do idia lao henia. (Deuteronomi 7:​7, 8; 30:​15-20) Ia ese danu taravatu ia henidia, ia be idia ida idia karaia kontrakana ena badina unai. (Esodo 19:​3-8; 20:1–23:33) Mose ese ia hamaorolaidia neganai, Israela taudia idia gwau: “Lohiabada ena oda hereva ibounai do ai karaia, bona do ai kamonai henia.” (Esodo 24:​3-7) Sibodia edia ura hegeregerena, unai bese ibounai ese Siahu Ibounai Lohiabadana Iehova idia gwauhamata henia.

Ia Ita Laloa Bada Dainai Ita Gwauhamata Henia

¹⁰ Hari inai negai danu, namona be gau iboudiai ia havaraia Diravana, Iehova, do ita tomadiho henia. (Malaki 3:6; Mataio 22:37; Apokalupo 4:11) To, namona be do ita gwauhamata henia, lalohadai kava o miniti tamona lalonai ita abia mamina dainai lasi, o iseda tamadia sinadia o ma haida ese ita idia doria dainai lasi. Namona be Iehova do ita gwauhamata henia, badina be iena kara sivaraina ita diba maoromaoro bona ita dainai ia karaia karadia ita laloa bada dainai. (Roma 10:2; Kolose 1:​9, 10; 1 Timoteo 2:4) Iehova ese dala ia kehoa Israela taudia edia, edia gwauhamata do idia gwauraia; unai hegeregerena, dala ia kehoa ita eda, siboda eda mauri do ita gwauhamatalaia ia dekenai, bona unai gwauhamata be taunimanima vairanai do ita hahedinaraia.​—1 Petero 3:21.

11. Baibel ita stadilaia dainai ita diba Iehova be edena bamona?

¹¹ Baibel ita stadilaia noho lalonai Dirava ita dibaia. Iena Hereva ese ita ia durua, ena kara namodia, ia karaia gaudia lalodiai idia hedinarai karadia, ita lalo-pararalaia totona. (Salamo 19:​1-4) Iena Hereva amo ita diba ia be ita daradaralaia Toi Tamona Diravana lasi. Tuari lalonai ia lusi lasi; unai dainai ena dagi badana ia rakatania lasi. (Esodo 15:11; 1 Korinto 8:​5, 6; Apokalupo 11:​17, 18) Ena gwauhamata ia hamomokanidia vadaeni dainai, iena ladana mai hairaina, Iehova, ena anina ita laloa. Ia be Palani Karaia Diravana Badana. (Genese 2:​4; Salamo 83:18; Isaia 46:​9-11) Baibel ita stadilaia dainai, ita diba goevagoeva Dirava ita abidadama henia be namo.​—Deuteronomi 7:9; Salamo 19:​7, 9; 111:7.

12. (a) Dahaka dainai Iehova ita ura henia? (b) Haida edia sivarai Baibel lalonai idia torea ese ita edena bamona idia ha-uraia Iehova ena hesiai do ita lao henia totona? (c) Oi ese Iehova ena hesiai lao henia karana be edena bamona oi laloa?

¹² Iehova ita ura henia badina badana be ia be mai ena lalokau. Baibel ese ia hahedinaraia ia ese taunimanima ia kara henia mai ena lalokau bona mai ena hebogahisi ida bona edia dika ia gwauatao. Iobu be ena lalo-maoromaoro ai ia haheauka murinai Iehova ese ia hanamoa dalana be mani oi laloa. Unai ese ia hahedinaraia Iehova “be mai ena bogahisihisi, bona iena hariharibada be bada herea.” (Iamesi 5:11; Iobu 42:​12-17) Davida ia heudahanai bona tau ta ia hamasea murinai Iehova ese ia kara henia dalana be mani oi laloa. Oibe, Iehova ena lalona ia hegeregere, kara dika tauna be ia vairanai ‘do ia manau’ neganai, ena kara dika badadia danu do ia gwauatao. (Salamo 51:​3-11, 17) Iehova ese Taso tauna Saulo ia kara henia dalana mani oi laloa; matamana ai unai tau ese Dirava ena orea taudia ia dagedage henia goadagoada. Inai sivarai ese idia hahedinaraia Dirava be mai ena hebogahisi, bona ena lalona ia hegeregere momokani helalo-kerehai taudia edia dika do ia gwauatao. (1 Korinto 15:9; 1 Timoteo 1:​15, 16) Paulo ia laloa bema unai lalokau Diravana ena hesiai do ia lao henia ia ese ena mauri do ia naria. (Roma 14:8) Oi danu be unai bamona oi laloa, a?

13. Dahaka lalokau karana badana, Iehova ena, ese lalo-maoromaoro taudia ia doria dainai, idia be gwauhamata amo ia dekenai sibodia idia henia?

¹³ Iehova ese Israela taudia be edia igui hesiai gaukarana dikana amo ia hamauria, Aigupito ai idia karaia gaukarana unai, bona ia ese ita idia guia gaudia, kara dika bona mase, amo ita do ia hamauria dalana ia hegaegaelaia vadaeni​—dalana be Iesu Keriso ena boubou. (Ioane 3:16) Paulo ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:8) Inai lalokau dalana ese lalo-maoromaoro taudia ia ha-uraia dainai, idia be gwauhamata amo Iehova dekenai sibodia idia henia. “Keriso ena lalokau ese ai ia biagua noho, badina be hari ai diba momokani Tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni. Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.”​—2 Korinto 5:​14, 15; Roma 8:​35-39.

14. Bema Iehova ena kara sivaraidia ita diba, unai sibona dainai iseda mauri be ia dekenai do ita gwauhamatalaia, a? Mani oi herevalaia.

¹⁴ Iehova ena kara namodia bona taunimanima dekenai ia karaia karadia sivaraidia ita diba be namo, to unai sibona be hegeregere lasi. Namona be Iehova ena namo ena mamina be siboda eda mauri lalonai do ita abia. Abia dalana be inai: Iena Hereva be eda mauri lalonai do ita badinaia bena do ita itaia anina namona ia havaraia. (Isaia 48:17) Namona be mamina ita abia Iehova ese inai tanobada dikana, Satani ese ia lohiaia gauna, ena miro amo ita ia hamauria. (1 Korinto 6:11 itaia.) Kara maoromaoro karaia totona ita hekwarahi noho lalonai, Iehova dekenai tabekau karana ita manadalaia, bona ita davaria ia be mauri Diravana, ‘guriguri kamonai Diravana.’ (Salamo 62:8; 65:2) Nega daudau lasi mamina ita abia ia be kahirakahira momokani bona iseda lalona edia mamina ita hamaorolaia diba. Iehova lalokau henia mamina namona be ita lalonai ia tubu. Unai dainai iseda mauri be ia dekenai do ita gwauhamatalaia.

15. Guna moni gaukara sibona ia laloa bada bona ia badinaia tauna ta, be dahaka ese ia ha-uraia dainai Iehova ena hesiai ia lao henia?

¹⁵ Momo ese unai lalokau Diravana, Iehova, idia dibaia, bena edia mauri idia gwauhamatalaidia ia dekenai, idia gwau iena hesiai do idia lao henia. Paoa gaukaralaia tauna ta mani oi laloa. Ena bisinesi ia heau namo herea lalonai, nega haida ia be dabai ia gaukara matamaia bena ia gaukara ela bona hanuaboi momokani; kerukeru dabai 5 okaloka ai ena ruma ia lou henia, hora tamona ia laga ani, bena ma ia lao, gaukara ma ta ia karaia. Gabeai ia gwau unai neganai ena gaukara sibona mo ia laloa bada. Ena adavana ese Baibel ia stadilaia matamaia neganai, ia danu ese. Ia gwau: “Guna lau diba diravadia iboudiai idia ura edia hesiai do ai lao henia; ai idia hanamoa lasi. To Iehova ese ena Natuna tamona sibona ia vara be ia siaia tanobada dekenai.” (1 Ioane 4:​10, 19) Hua 10 idia do ore lasi neganai, hari tau ese sibona ena mauri Iehova dekenai ia gwauhamatalaia, bena mauri Diravana ena hesiai ia lao henia mai ena goada ibounai ida. Ful-taim hesiai gaukarana ia karaia matamaia bona heduru ai idia dabu bada gabuna ia lao. Aposetolo hegeregeredia, ia ese ‘gau ibounai ia rakatania, vadaeni Iesu ena murina dekenai ia raka.’ (Mataio 19:27) Hua rua murinai, ia bona ena adavana idia boiria, unai tano ena Watch Tower Bible and Tract Society ena brens ai do idia gaukara, unai amo paoa gaukarana ai do ia heduru. Ema bona hari ia be lagani 20 mai kahana brens ai ia gaukara; ia ura henia bada gaukarana ia karaia noho​—ia sibona dainai lasi​—to Iehova dainai ia karaia.

Emu Gwauhamata be Taunimanima Vairanai Do Oi Hahedinaraia

¹⁶ Baibel be nega taina daudau lalonai idia stadilaia murinai, taunimanima matamatadia bona badadia ese Iehova bona idia dainai ia karaia karadia idia laloa bada. Unai dainai idia be sibodia Dirava do idia henia be namo. Reana oi danu be unai bamona do oi karaia be namo. Edena bamona oi be gwauhamata amo sibomu do oi henia Iehova dekenai? Diba maoromaoro be Baibel amo oi abia murinai, unai diba hegeregerena Iehova bona Iesu do oi abidadama henia be namo. (Ioane 17:3) Emu lalona do oi giroa bona emu kara dika dalana gunana do oi rakatania. (Kara 3:19) Bena guriguri lalonai Iehova do oi gwauhamata henia mai emu hemataurai ida. Unai guriguri herevana do oi laloatao, badina be unai amo oi ese Iehova be dala matamatana ai do oi badinaia.

17. (a) Dahaka dainai elda taudia ese henanadai be idia gwauhamata matamata taudia ida idia herevalaidia hebou? (b) Ta ia gwauhamata murinai, nega daudau lasi dahaka kara badana do ia karaia be namo, bona unai be dahaka totona?

¹⁷ Mose ese Israela taudia ia hamaoroa dahaka dahaka do idia karaia be namo, Iehova do idia gwauhamata henia diba totona; unai hegeregerena, Iehova ena Witness taudia edia kongregesen lalodiai elda taudia ese vanegai idia gwauhamata taudia idia durudia, edia kara ena anina idia tahua namonamo totona. Idia hegaegaelaia henanadaidia amo idia hamomokania idia be Baibel ena badina herevadia bona Iehova ena Witness tauna ena kara korikoridia be idia diba. Bena bapatiso amo edia gwauhamata be taunimanima vairanai idia gwauraia hedinaraia be namo. Ia gwauhamata matamata tauna ia ura bada ma haida do ia hadibaia inai dagi namona Iehova dekenai ia abia. (Ieremia 9:24 itaia.) Bapatiso be ranu lalonai ia abia be maoro, iena gwauhamata ena toana unai. Ta ese ranu lalonai ia hadihoa bena ia hatorea isi lou be toa ta; ia hahedinaraia ia ese ena mauri dalana gunana, sibona ena ura tahua dalana, be ia masetania, bena ia toreisi lou, mauri dalana matamatana, Dirava ena ura karaia dalana, do ia badinaia totona. Bapatiso be hahelagaia karana ta lasi, bona ia be Shinto karana ta ladana misogi hegeregerena lasi; idia laloa unai kara lalonai taunimanima be ranu amo idia hagoevaia.a Lasi, bapatiso amo ta ese ena gwauhamata, guriguri lalonai ia gwauraia vadaeni gwauhamatana, be taunimanima vairanai ia gwauraia hedinaraia.

18. Dahaka dainai ita diba momokani iseda gwauhamata be mai anina?

¹⁸ Bapatiso be mai ena hemataurai ida ia abia murinai, Dirava ena hesiai tauna matamatana ese unai do ia laloaboio diba lasi. Unai kara dainai do ia laloa lou, unai nega amo Iehova do ia badinaia ela bona hanaihanai. Unai kamikaze peleini taria tauna ese ena bese bona ena pavapava dainai ia karaia gwauhamatana be anina lasi; bapatiso tauna ena gwauhamata be unai hegeregerena lasi. Iehova dekenai ia karaia gwauhamatana ena anina do ia vara, badina be Ia be siahu ibounai Diravana, ia noho hanaihanai bona ena palani iboudiai ia hagugurua. Namona be Ia sibona mo do ita tomadiho henia mai eda goada ibounai ida.​—Isaia 55:​9-11.

19. Stadi herevana gabena lalonai dahaka do ita herevalaia?

¹⁹ To bapatiso gwauhamatana ena anina be unai sibona lasi. Hegeregere, dina ta ta lalonai ita karaia karadia lalonai, unai gwauhamata ena anina be dahaka? Stadi herevana gabena lalonai unai do ita herevalaia.

[Footnotes]

Inai Oi Laloatao A?

◻ Dahaka dainai tanobada taudia ese gau haida idia laloa bada bona idia badinaia murinai edia lalona idia hisihisi?

◻ Dahaka dainai Israela taudia ese Iehova idia gwauhamata henia, idia gwau ia do idia badinaia?

◻ Dahaka dainai Iehova ita gwauhamata henia, hari inai nega lalonai?

◻ Edena dala ai gwauhamata amo Dirava dekenai sibona ita henia?

◻ Ranu bapatisona ena anina be dahaka?

5. Lagani 3,500 mai kahana idia lao vadaeni, daidia ese Iehova idia gwauhamata henia?

10. Iehova ita gwauhamata henia ena badina maorona be dahaka?

16. Sibona ena mauri Dirava dekenai ia gwauhamatalaia gwauraia tauna ese dahaka do ia karaia guna be namo?

[Picture on page 10]

Sinai dekenai Israela be gwauhamata amo sibona ia henia Iehova dekenai