Nega Daudau Lasi, ta Do Ia Ogogami Lasi!

“UMUI gari lasi, hereva namona lau mailaia vadaeni, taunimanima ibounai idia moale totona.” (Luka 2:10) Iesu ia vara hanuaboina ai, aneru ese unai hereva namona be Betelehema kahirakahira dekenai idia noho mamoe naria taudia dekenai ia gwauraia neganai, idia hoa. Unai hereva hegeregerena, Iesu be tanobada ai ena hesiai gaukarana ia karaia neganai, “Sivarai Namona” ia herevalaia momo. Hari inai negai, iseda tauanina durua gaudia momo be moni amo ita abia negana lalonai, Iesu sivaraina namona ese ita edena bamona ia durua diba?

Iesu Keriso ese ‘Sivarai Namona ogogami taudia dekenai ia haroro henia.’ (Luka 4:18) Mataio 9:35 ia gwau: “Iesu be hanua badadia bona hanua maragidia dekenai ia loaloa, edia dubu lalonai ia hadibaia karaia, Basileia ena Sivarai Namona ia harorolaia.” Ia harorolaia sivaraina ese ogogami taudia ia hagoadaia bada. “Taunimanima momo Iesu ese ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Momokani, Iesu ia gwau: “Ogogami taudia be nega ibounai umui dekenai idia noho,” to namo lasi unai hereva dainai ita gwau ogogami do ia ore lasi. (Ioane 12:8) Herevana dahaka ese edia ogogami ia havaraia, to inai tanobada dikana ena nega ibounai lalonai ogogami taudia do idia noho. Dirava ena Hereva ese ogogami ia herevalaia, to ena dika sibona ia herevalaia lasi. Ogogami taudia ia durua, mauri ena lalo-hekwarahi do idia haheaukalaidia totona.

Ogogami Taudia Ia Durua

Tau ta ia gwau: “Bema ta ia diba ta ese ia laloa lasi eiava iena kara ia lalo-pararalaia lasi, maduna metauna, maduna iboudiai edia metau ia hanaia gauna, ia huaia unai.” To, ena be taunimanima momo be mai edia hebogahisi lasi, to sivarai namona ia noho ogogami taudia edia. Unai sivarai be mai anina hari inai negai bona gabeai danu.

Madi, taunimanima momo ese ogogami taudia durua karana idia laloa lasi. The World Book Encyclopedia ia gwau, taunimanima haida idia laloa “taunimanima idia kara helulu do idia mauri totona bona . . . idia herea taudia ese siahu bona kohu momo idia abia.” Unai lalohadai, Darwin ena hereva ese ia havaraia lalohadaina, idia abia dae taudia, be reana idia laloa ogogami taudia be lahedo taudia eiava moni negea kava negea kava taudia. To, leiba taudia bona ma haida, ena be pei maragina mo idia abia, to idia momo idia gaukara goada herea, edia ruma bese ubua totona.

Tano momo lalonai ogogami taudia be momo. Unai dainai, haida ese idia gwauraidia dika lasi, idia gwau lasi idia be hegeregere lasi. To, unai bamona tanodia ai, taunimanima haida be mai edia kohu momo ida idia noho, ogogami taudia bogaraginai. Ruma badadia mai edia dava bada kohudia momo be taunimanima momo idia noholaia hebou rumadia dikadia badinai idia gini. Pei badana idia abia taudia ese edia motuka, dava bada gaudia, be dala ai idia taria lalonai, ogogami taudia bona gaukara lasi taudia momo be unai dala ai idia raka. Unai bamona tanodia lalonai, ogogami taudia ese edia noho dikana idia lalohisihisilaia. The World Book Encyclopedia ia gwau: ‘Ogogami taudia ese hisihisi idia ania, badina be edia aniani be hegeregere lasi, edia ruma be dika, gorere neganai idia abia heduruna be hegeregere lasi, bona edia noho idia lalo-hekwarahilaia dainai danu. Gaukara namodia idia davaria diba lasi bona idia dogoatao diba lasi, unai dainai sibodia idia matauraia diba lasi bona idia hemarai.’ Vadaeni, ogogami herea taudia haida ese edia noho be edena bamona idia haheaukalaia? Iesu sivaraina namona ena anina haheauka dekenai be dahaka?

Mani inai oi laloa guna: Ta ena aonega lasi karadia ese ena ogogami idia habadaia diba. Haida edia sivarai mani oi laloa. Valdecir ia gwau, ena be ena adavana bona ena natuna maragidia edia aniani be maragi herea, to ena moni be kara kereredia lalonai ia haorea kava. Ia gwau: “Ena be moni gaukarana lau karaia, to lau be moni lasi, to nega ibounai laki tiketi idauidau be egu poketi ai idia noho.” Milton ia inuinu momo bona kuku momo ia ania dainai, ena bisinesi mai ena gaukara taudia 23 ia haboioa. Ia gwau: “Hanuaboi momo lalonai ariara ai lau noho, egu ruma dekenai lau lao diba lasi, bona egu kara dainai egu ruma bese ese hisihisi bada idia ania.”

João danu ese kara kereredia ai ena pei ia haorea kava. Ia gwau: “Hanuaboi momo lalonai emai ruma dekenai lau noho lasi. Egu pei ia hegeregere lasi ia amo egu kara kereredia bona egu lebulebu karadia edia davana do lau karaia. Emai noho ia dika herea ia lao, bona egu adavana ia ura do ai parara.” Ena hekwakwanai be ena moni be hegeregere lasi bona ena headava ia dika, to unai sibona lasi. Ia gwau: “Lau ese hekwakwanai lau havaradia egu varavara bona egu dekena taudia dekenai, bona egu gaukara gabuna ai danu. Unai dainai, nega momo lau be moni gaukarana lasi.” Júlio ese drag ia ania loulou. To, ia gwau: “Egu pei ia hegeregere lasi drag do lau hoia, unai dainai drag hoihoilaia gaukarana lau karaia bena ma ta amo egu drag lau hoia lasi.”

José bona ena tadikaka 7 idia tubu daekau lalonai, edia famili idia ogogami dainai, ia ura gau haida do ia abia sibona ena. Memero haida ia bamoa bena taunimanima edia kohu ia dadia matamaia; ia laloa unai kara amo ena noho ena dika do ia habadaia diba lasi. Mero ma ta be mai ena helaro lasi dainai, raskol oreana ta ladana Headbangers lalonai ia vareai. Ia gwau: “Ai momo be ogogami herea, unai dainai kohu ai hamakohia bona taunimanima ai hadikaia negadiai, emai lalona idia hegeregere sisina.”

To, hari inai negai unai tatau bona edia famili idia ogogami herea lasi bona edia noho dainai idia badu lasi. Hari idia be mai edia heduru bona mai edia helaro. Badina be dahaka? Badina be Iesu ese ia harorolaia sivaraina namona idia tahua. Baibel ena sisiba idia badinaia bona idia ida idia lalo-tamona taudia ida idia hebou, Iehova ena Witness taudia edia kongregesen lalodiai. Bona mai anina bada herevadia kohu momo bona ogogami dekenai be idia dibaia.

Heduru, Ogogami Haheaukalaia Totona

Gau ginigunana be, idia diba bema Baibel ena taravatu idia badinaia, ogogami ena dika idia hamaragia diba. Baibel ese lebulebu, inuinu kekero, laki gadara, bona drag ania kava karadia ia taravatua. (1 Korinto 6:​9, 10) Unai bamona karadia edia davana be bada. Idia ese kohu momo tauna idia haogogamia diba bona ogogami tauna ena ogogami idia habadaia diba. Bema ta ese unai kara kereredia bona idia bamona karadia ma haida ia rakatania, unai amo ena ruma bese ena noho do ia hanamoa bada; moni ai do idia dabu lasi, guna idia dabu bamona.

Gau iharuana be, idia davaria gau haida ese kohu momo idia hereaia. Dirava ena lauma ese inai lalohadai maorona ia havaraia: “Aonega ese oi ia gimaia noho diba, moni ese oi ia gimaia noho diba hegeregerena. To aonega ese moni ia hereaia noho, badina aonega ese aonega tauna ia hamauria noho.” (Hadibaia Tauna 7:12) Oibe, moni ese ita ia durua. To Baibel amo ita abia aonegana bona Baibel amo Dirava ena palani dibaia karana ese ita idia durua bada herea. Momokani, reana aonega lasi tauna ese ena moni momo ia hekwarahilaia, ma ta ese ena ogogami ia hekwarahilaia hegeregerena. Baibel torea tauna ta be mai ena aonega ida ia guriguri, ia gwau: “Ogogami o kohu momo lau dekenai do oi henia lasi. To egu hitolo hegeregerena sibona, aniani lau dekenai do oi henia. Badina bema egu aniani bona kohu momo idia noho neganai, sedira lau be inai bamona do lau gwau garina, ‘Lohiabada be daika?’ O sedira bema lau ogogami neganai do lau henaoa, bona egu Dirava ena ladana do lau hahemaraia garina.”​—Aonega Herevadia 30:​8, 9.

Gau ihatoina be, idia davaria bema ta ese Iesu ia harorolaia sivaraina namona hegeregerena ia noho, do ia laloa lasi iboudiai ese ia idia rakatania. Sivarai namona be Dirava ena Basileia herevana. Baibel ese ia gwauraia “Basileia ena Sivarai Namona,” bona hari inai negai tanobada hegegemadai idia harorolaia. (Mataio 24:14) Iesu ia gwau bema unai Basileia ita helarolaia, heduru do ita abia. Ia gwau: “To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:33) Dirava ese dava bada motukadia bona rumadia ia gwauhamatalaia lasi. Iesu ese aniani bona dabua ia herevalaia. (Mataio 6:31) Hari inai negai taunimanima milioni milioni idia hamomokania diba Iesu ena gwauhamata be momokani. Bema ta ese Basileia ia tahua guna, herevana ia ogogami herea, to Dirava ese ia rakatania vaitani lasi.

Gau ihahanina be, idia davaria Dirava ena Basileia ia tahua guna tauna ese ena ogogami dainai ia badu lasi. Oibe, ogogami tauna ia hekwarahi. To bema Dirava ena hesiai ia lao henia, ia ia karaia Diravana ese ia tura henia. Baibel ese Dirava inai bamona ia gwauraia: “Ia ese hisihisi ia abia noho tauna, dekena amo ia raka siri lasi, to ia laloa noho, bona ia dekenai ia taitai neganai, durua ia henia noho.” (Salamo 22:24) Inai danu, ogogami tauna ese heduru ia abia, mauri ena lalo-hekwarahi ia haheaukalaidia totona. Keristani taudia edia hebamo namona ia moalelaia bona Iehova ena palani, ia hahedinaraia vadaeni gauna, ia diba bona ia abidadama henia. Unai gau edia namo ese “golo ena namo idia hereaia. Golo namona momokani idia hereaia.”​—Salamo 19:10.

Gabeai, Ogogami be Lasi!

Gau ginigabena be, sivarai namona idia abia dae taudia idia diba Iehova Dirava ena palani be iena Basileia amo ogogami do ia haorea vaitani. Baibel ena gwauhamata be inai: “Gau lasi taudia, be Dirava ese ia laloaboio lasi. Ogogami taudia edia abidadama, be abidadama kava lasi. Edia abidadama ena anina, be do ia boio ore lasi, to gabeai do ia vara.” (Salamo 9:18) Basileia be gavamani korikorina ta; Dirava ese guba lalonai ia haginia bona Iesu Keriso be ena Lohia ai ia halaoa. Nega daudau lasi, unai Basileia ese tanobada gavamanidia edia gabu do ia abia bena taunimanima do ia lohiaia. (Daniela 2:44) Bena, King dagina ia abia tauna, Iesu, ese “manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.”​—Salamo 72:​13, 14.

Mika 4:​3, 4 ese unai nega ia herevalaia, ia gwau: “Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi. Siahu Ibounai Lohiabada ese inai bamona ia gwauhamata vadaeni.” Inai siri ese daidia ia herevalaia? Dirava ena Basileia idia badinaia taudia iboudiai. Unai Basileia ese taunimanima idia hadikaia gaudia iboudiai​—gorere bona hisihisi danu​—do ia kokia. “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.” (Isaia 25:8; 33:24) Tanobada do ia idau vaitani! Bona mani oi laloa, inai gwauhamata ita abia dae diba, badina be Dirava ese ena lauma amo ia havaradia. Ia gwau: “Dirava ena taudia be do idia laloa hekwarahi lasi, bona mai hadikaia gauna ta lasi do idia noho.”​—Isaia 32:18.

Bema ta ese Dirava ena Basileia ia abidadama henia, ogogami dainai ia abia hemaraina ia negea diba. Keristani tauna ogogamina ia diba Dirava ena matana ai ia be mai anina bada, mai ena kohu momo Keristani tauna hegeregerena. Dirava ese idia ruaosi be maka tamona amo ia lalokau henia, bona edia helaro be tamona. Idia ruaosi ese nega vaira idia naria noho mai edia ura ida; unai nega lalonai Dirava ena Basileia siahuna henunai ogogami be lasi. Nega namo hereana unai! Unai neganai, ta do ia ogogami lasi!

[Picture on page 5]

Ta ese ena moni be laki gadara ai, kuku ania karana ai, inuinu momo karana ai, drag ania kava karana ai, eiava lebulebu karadia ai, ia haorea kava ena namo be dahaka?

[Picture on page 7]

Iehova Dirava ese ena Basileia amo ogogami ena hekwakwanai do ia haoredia