Duahia Taudia Edia Henanadai

Galatia 6:8 ia gwau: “Bema tauanina ena ura ia hadoa neganai, ia ese mase do ia abia. Bema Lauma ena gau ia hadoa neganai, ia ese mauri hanaihanai do ia abia.” Dahaka “Lauma” ia herevalaia, bona mauri be edena bamona ita abia diba?

Heberu gado bona Greek gado herevadia, Motu gado ai idia hahegeregerea neganai inai hereva “lauma” idia torea, edia anina be idauidau; edia anina haida be inai: (1) Dirava ena gaukara siahuna, (2) taunimanima eiava animal edia mauri siahuna, (3) taunimanima ena lalona ia doria siahuna, bona (4) lauma tauna, eiava aneru. Galatia 6:8 ese ia gwauraia gauna be gau ginigunana​—Dirava ena gaukara siahuna unai.

Paulo ese ia herevalaia gauna do ita diba totona, mani Galatia 3:2 oi itaia; inai hereva “Lauma” be Galatia bukana lalonai ia torea gabuna ginigunana be unai. Paulo ese Keristani taudia ia nanadaia, ia gwau: “Dirava ena Lauma Helaga edena bamona umui abia? Taravatu umui badinaia dainai, o Sivarai Namona umui kamonai henia bona abia dae dainai?” Bena, Galatia 3:5 lalonai ia herevalaia lou, hoa karadia ia herevalaia neganai. Unai dainai, ia gwauraia ‘laumana’ be lauma helaga, Dirava ena gaukara siahuna unai.

Unai murinai, Galatia 5:16 ai, Paulo ese lauma bona tauanina edia idau ia hahedinaraia. Ia gwau: “Lauegu hereva ena anina be inai: Lauma Helaga ese emui mauri dala ia hakaua be namo, vadaeni tauanina ena ura dikadia do umui karaia lasi.” Bena Galatia 5:​19-23 ai, ia ese “tauanina ena kara” bona ‘Lauma Helaga ese ia havaraia karadia’ ia gwauraia bona edia idau ia hahedinaraia.

Unai dainai, Galatia 6:8 ese ia gwauraia tauna, “tauanina ena ura ia hadoa” tauna, ese ena tauanina ena ura dikadia ia koua lasi, to “tauanina ena kara” ia karaia. Reana unai kara ena anina dikana do ia abia, bona bema ena kara ia haidaua lasi, Dirava ena Basileia lalonai eiava henunai mauri do ia abia lasi.​—1 Korinto 6:​9, 10.

Ita be gwauhamata Keristani taudia, unai dainai namona be ita ura ‘Dirava ena Lauma ena gau do ita hadoa.’ Unai ena anina be, iseda mauri lalonai dala do ita kehoa, lauma helaga be ia lalonai do ia gaukara, ita do ia durua, iena huahua do ita havaraia totona. Iseda lalona ita hadaia dahaka do ita duahia eiava edena televisen program do ita itadia neganai, namona be unai ita laloa. Kongregesen ena hebou ai ita hakala namonamo negadiai, bona elda taudia, Dirava ena lauma ese ia abia hidi taudia, edia sisiba ita badinaia toho negadiai, lauma ena gau ita hadoa unai.​—Kara 20:28.

Galatia 6:8 ena dokonai ia gwauhamata, bema lauma ena gau ita hadoa, ita be mai eda dala ‘mauri hanaihanai do ita abia.’ Oibe, Keriso ena boubou, mauri davalaia gauna, dainai, Dirava ese lauma helaga gaukaralaia karadia amo doko diba lasi maurina be taunimanima do ia henia.​—Mataio 19:29; 25:46; Ioane 3:​14-16; Roma 2:​6, 7; Efeso 1:7.