Lalokau ese Mama Kererena Ia Halusia
“Lalokau be ia mama lasi.”—1 KORINTO 13:4, NW.
LALOKAU be Keristani dalana maorona ena toana ta. Iesu Keriso ia gwau: “Taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Lauma helaga ese Paulo ia hasiahua dainai, Keristani taudia edia lalokau ena anina ia gwauraia. Iena hereva ta be inai: “Lalokau be ia mama lasi.”—1 Korinto 13:4, NW.
2 Paulo ese unai hereva ia torea neganai, mama kererena ia gwauraia unai. Bema lasi, unai kongregesen ia hamaoroa diba lasi: “Dirava ena mama namona hegeregerena, lau ese umui totona lau mama.” (2 Korinto 11:2) “Dirava ena mama namona hegeregerena” ia mama, badina be taunimanima haida ese kongregesen idia hakererea dainai. Unai dainai, lauma ese ia hakaua hegeregerena, Paulo ese Keristani taudia Korinto dekenai ia tore henidia lou bona sisiba momo ia henidia mai ena lalokau ida.—2 Korinto 11:3-5.
Mama, Keristani Taudia Bogaragidiai
3 Korinto taudia ia tore henidia revarevana ginigunana lalonai, Paulo ese hekwakwanai ta ia sisibalaia, unai hekwakwanai dainai idia lalo-tamona lasi. Tatau haida idia abia isi, ‘idia hekokoroku, bona tau ta idia abia dae, to tau ma ta idia negea.’ Unai dainai kongregesen taudia idia parara, haida idia gwau: “Lau be Paulo ena,” “Lau be Apolo ena,” “Lau be Petero ena.” (1 Korinto 1:12; 4:6) Lauma helaga ese Paulo ia hakaua hegeregerena, unai hekwakwanai ena badina ia gwauraia. Korinto taudia be tauanina abidadama henia taudia hegeregeredia idia kara, “Lauma abia vadaeni taudia” hegeregeredia lasi. Unai dainai, Paulo ia gwau: “Umui be tauanina ena ura kara umui do karaia noho. Oibe, mama bona heai be umui emui huanai idia do noho. Idia do noho dainai, umui hedinaraia umui be tauanina umui abidadama henia noho, emui kara be tanobada taudia edia kara sibona.”—1 Korinto 3:1-3.
4 Paulo ese Korinto taudia ia durua, kongregesen taudia ta ta edia aonega bona edia diba idia laloa maoromaoro totona. Ia henanadai, ia gwau: “Egu turana e, edena bamona oi be hekokoroku momo? Oi davaria gaudia ibounai be Dirava ese oi dekenai ia henia vadaeni, ani? Oibe, Dirava ese inai gau oi dekenai ia henia, harihari gaudia bamona. Unai dainai, badina dahaka oi hekokoroku, inai gau sibona oiemu goada dekena amo oi abia bamona?” (1 Korinto 4:7) Korinto Ginigunana karoa 12 lalonai, Paulo ia gwau kongregesen taudia be tauanina ta ena kahana idauidau—imana, matana, bona taiana—hegeregeredia. Ia gwau Dirava ese tauanina ena kahana idauidau ia karaia, do idia naria heheni totona. Paulo be ma ia gwau: “Kahana ta do idia hanamoa neganai, kahana ibounai ia danu do idia moale nega tamona.” (1 Korinto 12:26) Dirava ena hesiai taudia iboudiai hari inai negai ese unai hereva do idia badinaia be namo. Ta be Dirava ena hesiai lao henia karana ai ia abia dagina o ia kwalimulaia karadia dainai, do ita mama henia lasi, to ia ida do ita moale hebou be namo.
5 Momokani, unai herevalaia be haraga to karaia be auka. Baibel torea tauna Iamesi ese ita ia hamaoroa, “hegahusi” be taunimanima iboudiai lalodiai ia noho, badina be idia be mai edia kara dika. (Iamesi 4:5, NW) Ia mase tauna ginigunana be ia mase, badina be Kaino be ena mama kererena ese ia halusia. Pilistia taudia ese Isako idia dagedage henia, badina be idia mama henia, iena taga ia bada ia lao dainai. Rahela ese ena kakana ia mama henia, natuna momo ia havaraia dainai. Iakobo ena natuna ese edia tadina Iosepa idia mama henia, hahenamo ia abia dainai. Toana be Miriama ese ena nakimi, Israela lasi hahinena, ia mama henia. Mama dainai, Kora, Datana, bona Abirama ese Mose bona Arona idia gwau-edeede henia. King Saulo ese Davida ia mama henia, tuari lalonai ia kwalimu dainai. Bona mama dainai Iesu ena hahediba taudia idia hepapahuahu loulou daika be herea. Momokani, taunimanima iboudiai idia goevadae lasi dainai, idia be mai edia “hegahusi” dikana.—Genese 4:4-8; 26:14; 30:1; 37:11; Numera 12:1, 2; 16:1-3; Salamo 106:16; 1 Samuela 18:7-9; Mataio 20:21, 24; Mareko 9:33, 34; Luka 22:24.
Kongregesen Lalonai
6 Namona be Keristani taudia iboudiai idia naria namonamo, mama kererena garina. Anina be elda oreadia danu, Dirava ena taunimanima naridia totona idia abia hidi taudia unai. Bema elda ta ena lalona ia manau, elda ma haida do ia hereaia toho lasi. To, bema gaukara haheaua o pablik haroro karaia karadia dekenai elda ta ena diba be bada herea, elda oredia ese unai do idia moalelaia, badina be idia laloa unai be hahenamo ta kongregesen dekenai. (Roma 12:15, 16) Reana tadikaka ta be ia goada ia lao noho bona ena mauri lalonai Dirava ena lauma ena huahua ia hahedinaraia. Elda taudia ese ena kara edia toana idia tahua neganai, namona be idia naria namonamo; namo lasi iena kerere maragina idia habadaia bena unai dainai idia gwau ia be hegeregere lasi hesiai tauna o elda ai do ia lao. Unai ese ia hahedinaraia idia be mai edia lalokau lasi bona idia laloa maoromaoro lasi.
7 Bema ta be tiokratik gaukarana idia henia o lauma hahenamona ta ia abia, namona be kongregesen taudia oredia idia naria namonamo, do idia mama henia garina. Hegeregere, reana Keristani heboudia dekenai taihu ta mai ena diba momo be haheitalai lalodiai idia gaukaralaia momo. Reana taihu ma haida be unai dainai idia mama. Filipi ena kongregesen lalonai, reana unai bamona hekwakwanaina be Euodia bona Sunutuke padadiai ia vara. Reana unai bamona hahinedia hari inai negai be elda taudia ese idia hagoadaia mai edia hebogahisi ida be namo, do idia lalo-manau bona Lohiabada lalonai do idia “laloa tamona” totona.—Filipi 2:2, 3; 4:2, 3.
8 Kongregesen lalonai hari inai negai dagi idia henia tauna ena kerere gunana ta be reana Keristani tauna ta ia diba. (Iamesi 3:2) Mama dainai, reana ia ura unai do ia gwauraia hedinarai, do ia gwau unai tau ese unai dagi ia abia be kerere. Unai be lalokau dalana lasi, badina be lalokau ese “kara dika momo ia koudia.” (1 Petero 4:8, NW) Mama herevadia ese kongregesen ta ena maino idia hadikaia diba. Hahediba tauna Iamesi ia gwau: “To umui emui lalona dekenai, bema mama, bona umui sibona habadaia kara idia noho neganai, emui aonega be momokani lasi. Unai be aonega koikoi, bona do umui heagilaia lasi, Dirava ena hereva momokani do umui hadikaia garina. Unai bamona aonega be Dirava dekena amo ia diho mai lasi. Ia be tanobada gauna sibona, tauanina sibona gauna, bona Satani dekena amo ia mai.”—Iamesi 3:14, 15.
Emu Ruma Bese Lalonai
9 Headava momo be mama kererena dainai idia dika. Ena adavana ia abidadama henia lasi tauna ese ia lalokau henia lasi. (1 Korinto 13:7) Reana ta ese ena adavana ena mama ena mamina ia abia lasi. Reana hahine ta ia mama, badina be ena adavana ese hahine ta o haneulato ta ia hereva henia dainai. Eiava reana tau ta ia mama, badina be ena adavana ese ena varavara ogogamina ta naria gaukarana dekenai hora momo ia haorea dainai. Reana unai bamona taudia be edia mama idia hemarailaia dainai, idia gwauraia hedinarai lasi, to dala idaudia amo idia hahedinaraia, unai amo unai hekwakwanai idia habadaia. To ta ia mama neganai, namona be ia ese ena adavana be ena mama ia hamaorolaia mai ena momokani ida. Bena ena adavana ese ena lalokau ia dekenai be ia hamaorolaia lou be namo, ena lalona hakerua totona. (Efeso 5:28, 29) Mama koua totona, namona be ruaosi be mama havaraia karadia amo idia raka siri. Nega haida, reana namona be Keristani elda tauna ese ena adavana ia hadibaia, Dirava ena mamoe oreana naria tauna ena maduna huaia totona, ia be nega sisina dala maorona ai hahine ta o haneulato ta do ia hereva henia. (Isaia 32:2) To, momokani, namona be elda tauna ia naria namonamo, ena adavana be mai badina do ia mama garina. Namona be ena nega ia haria namonamo, bena hora haida lalodiai sibona ena headava ia hagoadaia.—1 Timoteo 3:5; 5:1, 2.
10 Namona be tama sina ese edia natudia idia durua, mama kererena ena anina idia lalo-pararalaia totona. Nega momo natu be idia heai bena idia heatu, badina be idia mama dainai. Idia ta ta edia ura be idauidau dainai, edia tamadia bona sinadia ese iboudiai be dala tamona amo idia kara henidia be hegeregere lasi. Inai danu, namona be natu idia diba idia ta ta edia goada bona edia manoka be idauidau. Bema edia tamadia bona sinadia ese ta idia hagoadaia loulou ma ta hegeregerena do ia kwalimu totona, reana ta do ia mama bona ma ta do ia hekokoroku. Unai dainai, namona be edia natudia idia hadibaia, do idia kara helulu lasi, to edia goada be Baibel ese ia gwauraia haheitalaidia amo do idia hahetohoa be namo. Baibel ia gwau: “Ita hekokoroku lasi, ita ta ta ita habadua lasi, bona ita ta ta dekenai . . . ita mama henia lasi.” To, “ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.” (Galatia 5:26; 6:4) Gau badana be Keristani taudia be edia natudia ida Baibel idia stadilaia loulou, bona Dirava ena Hereva lalonai idia hedinarai haheitalaidia namodia bona dikadia idia hadibalaidia goevagoeva.—2 Timoteo 3:15.
Mama Idia Halusia Taudia
11 Inai tanobada gunalaia taudia ese siahu idia ura henia bada, to Mose be idia hegeregeredia lasi; “tanobada taudia ibounai edia huanai ia sibona be manau herea.” (Numera 12:3) Mose ese Israela taudia gunalaidia madunana ia hesikulaia neganai, Iehova ese Iena lauma be Israela taudia ma 70 latadiai ia atoa, unai amo ia hasiahudia, Mose do idia durua totona. Unai tatau rua be peroveta taudia bamona idia kara neganai, Iosua ia laloa unai be Mose ena gunalaia dagina hadikaia karana. Ia ura Mose ese do ia hadokodia, to Mose ia haere mai ena manau ida, ia gwau: “Lau dainai oi mama, a? Lohiabada ena orea taudia ibounai do idia peroveta, bona Lohiabada ese iena Lauma be ibounai edia latanai bema ia atoa be namo, ani?” (Numera 11:29) Oibe, ma haida ese dagi namodia idia abia neganai, Mose ia moale. Ia mama henidia lasi, badina be ia ura lasi ia sibona mo be hairai do ia abia.
12 Lalokau ese mama kererena ia halusia dalana be Ionatana, Israela Pavapavana Saulo ena natuna, ese ia haheitalaia namo herea. Ionatana be ena tamana ena gabunai do ia lohia tauna, to Iehova ese Davida, Iese ena natuna, ia abia hidi vadaeni, Saulo murinai do ia pavapava. Ionatana dekenai ia vara gauna bema ma haida dekenai ia vara, idia momo ese Davida idia mama henia. To Ionatana ese Davida ia lalokau henia dainai, mama ese ia biagua lasi. Gabeai, Davida ese Ionatana ena mase sivaraina ia kamonai neganai, ia gwau: “Lauegu [kakana] Ionatana e, lauegu lalona ia hisihisi bada herea oi dainai. Oi ese lau dekenai oi laloa namo, oi ese lau oi lalokau henia bada. Oiemu lalokau lau dekenai, be hahine dekenai lalokau henia ia hereaia.”—2 Samuela 1:26.
Haheitalai Hereadaedia
13 Mama maorona danu biagua karana ia haheitalaia Tauna hereadaena be Iehova. Ena mama ia biagua goevagoeva. Dirava be mai ena siahu ida ena mama ia hahedinaraia negadia iboudiai, unai be iena lalokau, iena hahemaoro goevagoeva, bona iena aonega hegeregeredia ia karaia.—Isaia 42:13, 14.
14 Mama biagua karana ia haheitalaia tauna hereadaena iharuana be Dirava ena Natuna lalokauna, Iesu Keriso. “Ena be ia be Dirava ena oromana hegeregerena ai ia noho, to ia laloa lasi dagi do ia dadia, ia be Dirava ida do ia hegeregere totona.” (Filipi 2:6, NW) Aneru ta ena kara be idau vaitani; dagi badana ia tahua dainai, ia be Satani Diabolo ai ia lao! “Babulonia ena king” hegeregerena, Satani ese Iehova ia mama henia, ia ura ia be sibona dirava ta ai do ia halaoa, ‘Siahu Ibounai Diravana hegeregerena ai do ia lao’ totona. (Isaia 14:4, 14; 2 Korinto 4:4) Satani ese danu Iesu ia dibagania, ‘ia dekenai ia tomadiho’ totona. (Mataio 4:9) To Iesu ese Iehova ena lohia siahuna ia matauraia noho mai ena manau ida; gau ta lasi ese unai dala amo ia veria siri diba. Iesu be Satani ena amo ia idau vaitani; “ia ese sibona ena ura dainai, iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia. Oibe, Keriso ese iena hairai ia laloa lasi, to ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.” Iesu ese ena Tamana ena lohia dalana ena maoro ia hamomokania bona Diabolo ena dala, hekokoroku bona mama dalana, ia dadaraia vaitani. Iesu ena kamonai dainai, “Dirava ese . . . ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia. Bona Iesu ena ladana hanamoa totona ibounai be dohore idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.”—Filipi 2:7-11.
Emu Mama Koua Dalana
15 Keristani taudia be Dirava bona Keriso hegeregeredia lasi, madi idia goevadae lasi. Idia be mai edia kara dika dainai, nega haida mama dikana dainai idia kara. Bema iseda orea tauna ta ese kerere maragina ia karaia o ita laloa ia karaia, namo lasi mama dainai ia ita gwauraia dika. Unai dainai, namona be inai hereva, lauma helaga ese ia havaraia herevana, be do ita laloa: “Do oi kara maoromaoro auka herea lasi, bona aonega do oi tahua auka herea lasi, oi sibona do oi alaia garina. Oi sibona do oi alaia ena namo be dahaka?”—Hadibaia Tauna 7:16.
16 The Watch Tower, March 15, 1911 ena, ese mama ia herevalaia, ia gwau: “Lohiabada ena palani ita goadalaia bada bona ia dainai ita mama bada be namo, to namona be ita diba momokani unai be ta sibona ena gau lasi; bona namona be ita laloa, ita be ‘haida edia kara tahua kava taudia’ eiava. Inai danu ita laloa be namo: Elda taudia ese unai gau do idia tahua be namo eiava, bona do ita hamaorolaidia be namo eiava. Namona be ita ibounai be Lohiabada ena palani bona Lohiabada ena gaukara dainai ita mama, to namona be ita naria namonamo danu, unai mama ia idita garina . . . anina be, namona be ita diba momokani, unai be ma ta ita mama henia dainai lasi, to ia bona hanamoa bada dalana dainai ita mama dainai.”—1 Petero 4:15.
17 Ita Keristani taudia be hekokoroku bona mama amo edena bamona ita raka siri diba? Namona be dala ita karaia, Dirava ena lauma helaga be iseda mauri lalodiai do ia aru mai totona. Namona be Dirava ita noia, ena lauma be ita do ia henia bona ita do ia durua, ena huahua namodia do ita hahedinaraia totona. (Luka 11:13) Namona be Keristani heboudia ita lao henidia; unai hebou be guriguri amo idia kehodia bona Dirava ena lauma bona ena hahenamo be idia latadiai. Inai danu, namona be Baibel ita stadilaia, Dirava ena lauma ese ia havaraia gauna unai. (2 Timoteo 3:16) Bona Basileia harorolaia gaukarana, Iehova ena lauma helaga ena siahu amo idia karaia gaukarana, be ita danu ita karaia be namo. (Kara 1:8) Dirava ena lauma helaga ena siahu namona abia dae dalana ma ta be, bema iseda Keristani oreana taudia be hisihisi badana ta dainai idia lalohisihisi bada, ita durudia. (Isaia 57:15; 1 Ioane 3:15-17) Bema unai Keristani karadia iboudiai ita goadalaia, unai ese mama karadia dikadia amo ita do ia naria, badina be Dirava ena Hereva ia gwau: “Lauma Helaga ese emui mauri dala ia hakaua be namo, vadaeni tauanina ena ura dikadia do umui karaia lasi.”—Galatia 5:16.
18 Dirava ena lauma helaga ena huahua edia lista ai, ginigunana be lalokau. (Galatia 5:22, 23) Bema ita kara mai eda lalokau ida, unai ese ita do ia durua, hari inai negai iseda ura dikadia do ita koua totona. To nega vaira be edena bamona? Iehova ena hesiai taudia milioni momo edia helaro be inai: Do ia mai tanobada Paradaisona ai do idia noho; unuseniai Keriso ese do ia hanamodia ela bona idia be taunimanima goevadaedia ai do idia lao. Unai tanobada matamatana ai, iboudiai do idia lalokau heheni, bona mama kererena ese ta do ia halusia lasi, badina be “Dirava ese . . . ia karadia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia.”—Roma 8:21.
Inai Do Oi Laloa Namonamo
◻ Paulo ese dahaka hereva hegeregerena ia gwauraia, haida edia mama haorea totona?
◻ Mama ese kongregesen ena maino be edena bamona ia hadikaia diba?
◻ Tama sina ese edia natudia edena bamona idia hadibaia diba, mama do idia koua totona?
◻ Mama karadia dikadia amo edena bamona ita raka siri diba?
[Study Questions]
1, 2. (a) Iesu ese lalokau edena bamona ia herevalaia iena hahediba taudia dekenai? (b) Ta ia lalokau neganai, ia mama diba danu a, bona dahaka dainai unai bamona oi haere?
3. Dahaka dainai Keristani taudia Korinto dekenai be idia mama heheni?
4. Dahaka hereva hegeregerena amo Paulo ese ena tadikaka ia durudia do idia laloa heheni maoromaoro totona, bona unai ese ita be dahaka ia hadibaia?
5. Iamesi 4:5 dekenai dahaka ia hahedinaraia, bona Buka Helaga ese unai hereva be edena bamona ia hamomokania goevagoeva?
6. Elda taudia ese mama be edena bamona idia biagua diba?
7. Bema tiokratik gaukarana ta be Keristani tauna ta idia henia neganai, dahaka hekwakwanai ia vara diba?
8. Mama dainai dahaka kara dikadia idia vara diba?
9. Headava taudia ese sibodia edia mama edena bamona idia biagua diba?
10. Tama sina ese edia natudia edena bamona idia durua diba, mama do idia koua totona?
11. Edena dala ai Mose ese mama biagua dalana ia haheitalaia namo herea?
12. Dahaka dainai Ionatana ia mama lasi?
13. Mama biagua karana ai, daika be haheitalai namo hereana, bona badina be dahaka?
14. Iesu ena kara be edena bamona ia idau, Satani ena hegeregerena lasi?
15. Dahaka dainai iseda mama ita koua be namo?
16. The Watch Tower magasin gunana ta lalonai mama be edena bamona idia sisibalaia namonamo?
17. Mama karadia dikadia amo edena bamona ita raka siri diba?
18. Dahaka dainai mama kererena koua karana do ita hekwarahilaia lasi ela bona hanaihanai?
[Picture on page 16]
Mama ese kongregesen ta ena maino do ia hadikaia lasi be namo
[Picture on page 17]
Tama sina ese edia natudia idia hadibaia diba, mama do idia koua totona