Basileia Haroro Ripoti
Haroro Gaukara be Ruma ai Bona Sikuli ai Anina Ia Havaraia
KERISTANI taudia edia mauri dalana ta be ma haida idia kara namo henidia, bona karana badana be idia ida Dirava ena Basileia sivaraina namona idia herevalaia. Aonega Herevadia 3:27 ia gwau: “Bema dika ese taunimanima namodia ia hadikaia, bona bema oi be mai oiemu dala do oi durudia neganai, oiemu durua do oi koua lasi.” Argentina ai, lagani ihatoina haisikuli dekenai ia sikuli Witness merona ta be ia ura Basileia sivaraina namona be ena sikuli turana ta ida ia herevalaia. Unai ia karaia amo anina bada ia vara.
Dina ta unai Witness merona ese ena turana ia hamaoroa, tomadiho iboudiai be namo lasi. Unai tauhau ia hereva ia gwau, ia be gau dikana ta ia karaia lasi neganai, Witness merona ia gwau: “Bona Dirava dainai kara ta oi karaia lasi danu.” Unai hereva dainai unai mero ia laloa momo. Gabeai Witness merona ese ia hahedinaraia hari nega be dina dokodia bona bema ta be Dirava ena lalo-namo ia ura abia, namona be Baibel ena diba maoromaorona ia abia bona ia badinaia. Ena turana ese iena hereva ia abia dae. To Baibel ia stadilaia totona, ena ruma bese ese gwau-maoro do idia henia, a? Ma gau haida ia laloa totona, Witness merona ese ia hamaoroa mani Mauri Hanaihanai Paradaiso Lalonai bukana do ia duahia.
Nega ia lao, bena ena turana be sikuli ia rakatania. Lagani ta mai kahana lalonai ia sivaraina ta ia kamonai lasi. Bena dina ta Witness merona be ena turana ese ia rini henia neganai ia hoa, ia gwau Baibel ena peroveta herevadia idia guguru noho be ia itaia. Maoromaoro Witness merona ese ia ida Baibel stadilaia dalana ia karaia.
Ena turana gunana ena ruma dekenai ia lao neganai, ia davaria ena turana ena tamana bona sinana be edia natuna ese dahaka ia karaia noho idia laloa momo. Ena turana ena tadina danu be ia laloa ena kakana be ia kava ia lao. Unai dainai, edia tama sina ese mero maragina idia hamaoroa stadi gabena lalonai ia helai danu. Stadi murinai, unai mero be mai ena matana ranu ida ena tamana bona sinana ia hamaorodia ena kakana be ia kava lasi; unai neganai, ena sinana ia gwau: “Hari egu hekwakwanai be tamona lasi, to rua!”
Unai murinai, ia sibona be stadi gabena ai ia helai bena ia hamomokania memero be idia kava lasi. Gabeai ia bona ena adavana ese Baibel do idia stadilaia dalana idia karaia. Daudau lasi murinai ruma bese ibounai be Kingdom Hall dekenai kongregesen heboudia idia lao henia. Gabeai, edia tubuna danu be Baibel idia stadilaia matamaia bona hebou idia lao henia. Unai nega lalonai, mero badana be ia bapatiso. Ia headava, bona ia bona ena adavana be pablisa namodia.
Unai sibona lasi, to unai Witness merona be nega idauidau ai haroro karana amo ena sikuli turadia rua bona idia ta ena sinana bona taihuna ia durudia Baibel idia stadilaia matamaia totona. Taunimanima ibounai 11, be Baibel ena hereva momokanina idia dibaia badina be Witness merona ese ena sikuli turadia ia kara namo henidia. Moale bada herea ia havaraia! Momokani, ‘Edia Dirava be Iehova, ena bese taudia be idia moale’!—Salamo 144:15.