Iehova Ena Ura Idia Karaia
Kekeni Maragina ta Ia Hereva mai Ena Gari Lasi
LAGANI 1000 B.C.E. murinai, lagani momo herea lalodiai Israela bona Suria idia badu heheni. Nega momo idia tuari heheni, unai dainai lagani toi lalodiai idia tuari lasi neganai, unai kara sivaraina idia torea.—1 King Taudia 22:1.
Unai negadiai Suria tuari oreadia, idia haida be mai edia tuari taudia handred haida, ese taunimanima idia hagaridia. Unai tuari taudia ese Israela taudia idia tuari henia bona edia kohu idia abia, taunimanima idia abia oho bona idia momo be igui hesiai taudia ai idia halaoa—memero kekeni danu.
Tuari ta lalonai, “kekeni maragina ta” be ena famili, Dirava idia gari henia taudia, edia amo idia kokia mai edia hebogahisi lasi ida. (2 King Taudia 5:2) Idia laohaia Suria dekenai, bona ia idia doria, ia diba lasi taudia bona reana ia gari henia taudia—dina, hua, hisiu, au, tubutubu gaudia, bona nadi danu idia tomadiho henia taudia—bogaragidiai ia noho. Idia edia kara be idau, ena famili bona ena turadia, Dirava korikori tamona, Iehova, idia tomadiho henia taudia, edia kara hegeregerena lasi! To, unai noho idauna gabuna ai danu, unai kekeni ese Iehova ena tomadiho ia laloa bada, bona ena kara amo unai ia hahedinaraia mai ena gari lasi. Unai dainai, ia ese Suria pavapavana ena tuari biaguna badana ena mauri ia haidaua. Ia karaia dalana do ita tahua.
Ena Lalona Ia Goada Dainai Ia Hereva
Baibel ese unai kekeni maragina ena ladana ia hatoa lasi. Ia be Namana, King Benehadada Iharuana ena tuari biaguna badana goadana, ena adavana ena hesiai kekenina ai ia lao. (2 King Taudia 5:1) Ena be Namana idia matauraia bada, to ia be mai ena gorere dikana, lepera gorerena.
Kekeni ena hemataurai karana dainai, reana Namana ena adavana ese hereva hehunina ia hamaoroa. Reana ia ese kekeni ia nanadaia, ia gwau, ‘Israela lalonai lepera taudia be edena bamona idia durua?’ Israela kekenina ia hemarai lasi, to mai ena goada ida ia hereva, ia gwau: “Bema lauegu biaguna ese Samaria dekenai ia noho peroveta tauna dekenai ia lao neganai, iena lepera gorere do ia ore.”—2 King Taudia 5:3.
Hahine ese kekeni ena hereva ia dadaraia lasi, hegeregere idia be kekeni ena lalohadai kavakavana sibona. Lasi, to ta ese King Benehadada ia hamaorolaia, bena ia ese Namana bona ma haida ia siaia lao Samaria dekenai, unai peroveta tauna tahua totona. Unai laolao ena daudau be kilomita 150.—2 King Taudia 5:4, 5.
Namana Ena Gorere Hanamoa Karana
Namana bona ena hesiai taudia be King Iehorama dekenai idia lao, bona Benehadada ena revareva, Namana sivaraina ia gwauraia revarevana, bona harihari monina bada idia laohaia. King Iehorama, boromakau natuna tomadiho henia tauna, ese ia hahedinaraia lasi Dirava ena peroveta tauna ia abidadama henia, hesiai kekenina ese ia karaia bamona, to unai ita hoalaia lasi. Ia laloa Namana ia mai, heai hamatamaia totona. Dirava ena peroveta tauna Elisaia ese Iehorama ena gari ia diba neganai, karaharaga hereva ia siaia lao, king ia noia Namana do ia siaia iena ruma dekenai.—2 King Taudia 5:6-8.
Namana be Elisaia ena ruma ai ia ginidae neganai, peroveta tauna ese gwaukau tauna ta ia dekenai ia siaia lao, ia gwau: “Oi lao, Ioridane Sinavai lalonai do oi digu nega 7, vadaeni oiemu kopina be do ia namo lou, bona do oi goeva.” (2 King Taudia 5:9, 10) Namana ia badu dikadika. Ia laloa mai toana namona hoa karana badana ta do ia karaia dainai ia henanadai, ia gwau: “Damaseko sinavai Abana bona Parapara, ese Israela sinavai ibounai idia hereaia momokani, ani? Unai lauegu tano ena sinavai lalonai do lau digu lasi, a? Vadaeni unai neganai do lau goeva, a?” Namana be Elisaia ena ruma amo ia raka oho mai badu siahuna ida. To Namana ena hesiai taudia be ia ida idia herevahereva namonamo neganai, Elisaia ena hereva ia abia dae. Ioridane Sinavaina lalonai nega 7 ia digu murinai, “iena kopina be ia namo lou, mero maragina ena kopina hegeregere.”—2 King Taudia 5:11-14.
Elisaia dekenai ia lou lao neganai, Namana ia gwau: “Harihari lau diba tanobada ibounai lalonai Dirava ta be lasi, to Israela ena Dirava sibona.” Namana ia gwauhamata, ia gwau: “Harihari ia lao, lau ese boubou karadia do lau karaia neganai, dirava ta dekenai do lau henia lasi, to Lohiabada [“Iehova,” NW] sibona dekenai do lau henia.”—2 King Taudia 5:15-17.
Ita Idia Hadibaia
Bema hesiai kekenina maragina be mai ena gari lasi ia hereva lasi, Namana be peroveta tauna Elisaia dekenai do ia lao lasi. Hari inai negai, memero kekeni momo be unai kekeni bamona idia kara. Sikuli ai, Dirava ena hesiai lao henia idia ura lasi taudia bogaragidiai idia noho. To, idia abidadama henia herevadia idia gwauraia hedinarai. Idia haida be idia maragi momokani neganai idia karaia matamaia.
Australia ai ia noho kekenina ladana Alexandra, ena mauri laganidia be ima, mani oi laloa. Sikuli ia hamatamaia neganai, ena sinana ese ena tisa ia hamaoroa ia ura ia dekenai do ia lao, Iehova ena Witness taudia ese idia abidadama henia herevadia do ia gwauraia hedinarai totona. To Alexandra ena sinana ese ia vara gauna ia hoalaia. Tisa ia gwau: “Lau be umui abidadama henia herevadia momo lau diba vadaeni, bona sikuli dekenai Alexandra ese dahaka do ia karaia bona dahaka do ia karaia lasi danu be lau diba vadaeni.” Unai sikuli ai Witness memero o kekeni ma haida be lasi, unai dainai Alexandra ena sinana ia hoa. Tisa ese ia hamaoroa, ia gwau: “Alexandra ese ai ia hadibaia vadaeni.” Oibe, unai kekeni maragina be mai ena hemataurai ida ena tisa ida ia herevahereva vadaeni.
Unai bamona maragidia be mai edia gari lasi ida idia hereva. Unai amo edia kara be Salamo 148:12, 13 ena hereva hegeregerena: “Ulato bona uhau, buruka taudia, bona natuna maragidia danu, namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho. Iena hairaina be ataiai momokani, ia ese tanobada bona guba ia hereaia noho.”