Gilead Sikuli ese Ena Klas Namba 100 Ia Siaia Lao

HARI inai negai tanobada hegegemadai Dirava ena Basileia harorolaia gaukarana lalonai, Watchtower Bible School of Gilead be gaukara badana ia karaia. Lagani 1943 ai Gilead Sikuli ese misinari taudia ia hadibaia matamaia negana amo, misinari taudia be tano 200 mai kahana dekenai idia gaukara vadaeni. March 2, 1996 ai, klas namba 100 ena haorea program idia karaia.

Stiuden taudia idia sikuli negana lalonai, Watchtower Educational Center Patterson, New York kahana ai, sinou ena dobu be mita rua ia hanaia diho. Edia klas haorea program ena dina lalonai danu sinou ia diho, be hoa gauna lasi. To, ena be sinou ia diho helai daiutuna be ia honu momokani, bona ma kamonai taudia be Patterson, Wallkill, bona Brooklyn ai idia kamonai​—⁠idia iboudiai be 2,878.

Theodore Jaracz, Hakaua Orea ena Hadibaia Komiti ena memba ta, be seamani tauna. Tano momo amo idia mai vadivadi taudia dekenai abia dae herevana ia henia murinai, iboudiai ia boiria idia gini bona ane namba 52 idia abia. Ane amo Iehova Hanamoa bukana amo ane “Iseda Tamana Ena Ladana” anena idia abia neganai, helai daiutuna be Iehova hanamoa amo idia hahonua. Unai ane bona seamani ena hereva, edukeisini be Iehova hanamoa totona ita gaukaralaia herevana, ese do idia kamonai program ena badina idia atoa.

Tau Badadia ese Baibel Ena Sisiba Idia Henia

Program ena kahana ginigunana ai lagani momo lalonai Iehova ena hesiai gaukara idia karaia taudia ese hereva kwadogidia klas haorea taudia dekenai idia henia. Richard Abrahamson, hedikwota dekenai ia gaukara bona iena ful-taim hesiai gaukarana be lagani 1940 ai ia matamaia tadikakana, ese klas taudia ia hagoadaia, ia gwau: “Emui Lalohadai Umui Hamaoromaoroa Noho.” Ia hamaorodia edia Keristani mauri lalonai edia lalohadai be nega haida lalonai idia hamaoromaoroa vadaeni, hua ima Gilead dekenai sikuli neganai danu. Dahaka dainai edia lalohadai idia hamaoromaoroa noho be namo?

Hereva henia tauna ese ia hahedinaraia namonamo Paulo ese Korinto Iharuana 13:11 dekenai ia gaukaralaia herevana ena anina “ese sisina sisina ia vara noho gauna ia hahedinaraia, hegeregere ta ia ura Iehova ese ia hamaoromaoroa noho, dala maragidia ai ia hamaoromaoroa, unai amo ia ese Iehova ena ura maragidia danu ia hagugurua diba.” Do idia siaia idau tanodia dekenai, klas taudia edia abidadama tohoa gaudia matamatadia do idia davaria. Gado matamata do idia dibaia, mauri dalana idauna do idia noholaia, bona teritori idauna dekenai do idia haroro. Edia misinari rumana lalonai bona kongregesen lalonai edia kara be idauidau taudia ida do idia gaukara. Bema Baibel ena hakaua herevadia be unai nega iboudiai lalonai do idia badinaia bona mai edia ura ida edia lalohadai idia hamaoromaoroa noho, aposetolo Paulo ia torea bamona do idia ‘moale noho.’

Program lalonai Hakaua Oreana ena memba taudia ima ese hereva idia henia, idia ta be John Barr bona iena hereva ena sinado be Korinto Ginigunana 4:9 amo ia abia. Kamonai taudia ia hamaoroa aneru bona taunimanima ese Keristani taudia idia raraia. Ia gwau: “Unai ia diba ese Keristani tauna ena mauri dalana ena anina ia habadaia, badina be hari ia diba dahaka ia hereva o dahaka ia karaia be mai anina bada idia raraia taudia, ita itaia lasi bona ita itaia diba taudia dekenai. Lau laloa umui lalokau tadikaka bona taihu, Gilead ena klas namba 100 taudia, ese unai umui laloatao be mai anina bada, tanobada ena kahana idauidau dekenai umui lao neganai.”

Tadikaka Barr ese stiuden taudia 48 ia hagoadaia, hereva momokani be mamoe bamona taudia idia hadibaia neganai, do idia laloatao “dika tauna ta ena lalona ia giroa dainai, Dirava ena aneru be unai bamona do idia moale.” (Luka 15:10) Ia ese Korinto Ginigunana 11:10 ia gwauraia bona ia hahedinaraia, ta ena lalohadai tiokratik daladia dekenai be mai ena anina ita itaia tadikaka bona taihu dekenai sibona lasi, to ita itaia lasi anerudia dekenai danu. Unai lalohadai badana laloatao neganai namo ia vara!

Hakaua Oreana ena memba ma ta, Gerrit Lösch, ia danu guna Gilead Sikuli ia lao tauna, ese Salamo 125:​1, 2; Sekaraia 2:​4, 5; bona Salamo 71:21 amo ia hahedinaraia Iehova ese ‘iena taunimanima ia koua hagegea.’ Ia ese edia mauri ena kahana kahana ibounai ia naria. Dirava ese unai bamona ita do ia naria hisihisi badana sibona lalonai, a? Hereva ia henia tauna ia haere, ia gwau: “Lasi, to Iehova be ‘lahi maguna hegeregerena’ ai ia lao vadaeni iena taunimanima dekenai. Tuari murinai laganina 1919 lalonai, lauma Israela taudia oredia idia ura bada Basileia ena sivarai namona tanobada ibounai dekenai do idia harorolaia. Idia be guba dekenai ia noho Ierusalema ena gwaukau taudia. Iehova be ia gwauhamata unai gwaukau taudia oreana do ia naria tanobada ena dokona lalonai. Unai dainai daika ese idia ia koua diba? Ta be lasi.” Unai ese idia bona idia ida Dirava ena ura idia karaia taudia edia lalona ia hagoadaia momokani!

Ulysses Glass, sikuli hadibaia oreana ena lagani bada memba ta, ese klas taudia ia hagoadaia ‘Iehova ena tanobada oreana lalonai edia niche idia karaia hagugurua.’ Niche ena anina be ta ese ena kara eiava diba hegeregerena ai ia hagugurua diba karana o gaukarana ta. Ia gwau: “Umui, misinari taudia ai umui lao gwauraia taudia, be emui niche umui davaria vadaeni Iehova ena Witness taudia edia tanobada ibounai oreana lalonai. To, ena be hari unai be mai anina bada, inai be emui misinari maurina ena matamana sibona.” Namona be idia hekwarahi mai ura bada ida edia diba idia gaukaralaia bona Iehova bona iena orea ese idia henia gaukara badana idia karaia namonamo totona.

Unai kahana ena hereva ginigabena be Wallace Liverance ese ia henia, ia be Gilead hadibaia oreana ena memba ta bona guna lagani 17 lalonai Bolivia dekenai ia gaukara tauna. Stiuden oreana ia henanadai henia: “Umui ese Dirava do umui tohoa, a?” Edena bamona do idia karaia diba? Israela taudia ese Dirava be dala kererena ai idia tohoa. (Deuteronomi 6:​16) Hereva henia tauna ia gwau: “Unai ese ia hahedinaraia, hereva dika eiava maumau amo eiava iena gaukara dalana ita abidadama henia lasi amo Dirava ita tohoa be maoro lasi.” Ia hagoadadia, ia gwau: “Oi idia siaia gabuna dekenai oi ginidae neganai unai kara oi dadaraia.” To Dirava tohoa dalana maorona be dahaka? Tadikaka Liverance ia hadibadia namonamo, ia gwau: “Ia be ena hereva ita abidadama henia, iena ura hegeregerena ita karaia, bena gau ibounai be iena imana dekenai ita rakatania.” Malaki 3:10 hegeregerena, Iehova ese iena taunimanima ia hagoadaia, ia gwau: “Lau do umui tohoa.” Ia gwauhamata edia gaudia ena kahana 10 be Dubu Helaga dekenai idia mailaia neganai, ia ese idia do ia hanamoa. Hereva henia tauna ia henanadai, ia gwau, “Oiemu misinari gaukarana be unai bamona oi laloa danu be namo, ani? Iehova ia ura oiemu gaukara lalonai do oi kwalimu dainai, namona be oi tohoa. Oiemu gaukara oi karaia noho. Iena ura hegeregerena oiemu mauri oi haidaua. Oi haheauka. Vadaeni oi ia hanamoa do oi itaia.” Unai be sisiba namona Iehova idia hesiai henia taudia iboudiai dekenai!

Ane murinai, program ia heau dalana idia haidaua bona hereva idia henia lasi to haida idia henanadai henia, momo be unai idia moalelaia.

Haroro amo Idia Abia Gau Namodia

Mark Noumair, Gilead oreana ena memba matamatana ta, ese stiuden taudia ia boiria sikuli neganai haroro gaukara amo idia davaria ekspiriens idia gwauraia totona. Idia hahedinaraia ita ese herevahereva ita hamatamaia guna be namo bona helai taudia dekenai do idia gaukaralaia diba dala namodia idia hahedinaraia danu.

Edia sikuli neganai, unai Gilead klas taudia ese hahenamo ta idia abia badina Patterson Educational Center dekenai Brens Komiti memba taudia tano 42 amo be tereini dainai idia mai bona idia ida idia noho hebou. Idia momo be lagani gunadia ai Gilead idia lao taudia. Program lalonai, klas namba 3, 5, 51, bona 92 taudia bona Germany ena Gilead Extension Sikuli taudia idia henanadai henia. Edia hereva amo goada bada idia davaria!

Misinari taudia be idia siaia gabudia dekenai Iehova idia hanamoa taudia edia namba be haida amo ia daekau lao tausen tausen idia itaia neganai, edia mamina be edena bamona idia hahedinaraia. Andes Ororodia ai bona Amazon Sinavai ena matamana kahanai idia noho hanua ruma padadia be daudau herea dekenai, sivarai namona harorolaia gaukara idia karaia idia herevalaia. Misinari taudia be duahia diba lasi taudia idia haroro henia idia herevalaia. Edia hekwarahi gado matamatadia idia diba totona idia herevalaia bona hari sikuli idia haorea taudia be edena negai do idia hegeregere gado idauna ta, China hegeregerena gado ai do idia haroro bona hereva idia diba, idia herevalaia danu. Idia ese haroro herevana Spain gado bona China gado dekenai idia haheitalaia. Idia gwau misinari taudia be edia gaukara lalonai do idia kwalimu diba bema taunimanima edia gado idia diba sibona lasi to edia lalohadai idia diba danu. Ogogami tanodia edia mauri aukana idia herevalaia bona idia gwau: “Gau badana be misinari taudia idia lalo-parara nega momo unai ia vara badina taunimanima ma haida ese taunimanima ma haida idia kara henidia kerere. Misinari tauna do ia kwalimu bema iena lalohadai be Iesu ena bamona​—⁠naria tauna be lasi mamoe bamona taunimanima ia hebogahisi henia.”

Ane murinai program Hakaua Oreana ena memba ta, A. D. Schroeder, ese hereva ta ia henia. Gilead Sikuli be lagani 1943 lalonai idia matamaia neganai, ia be hadibaia tauna ginigunana ta, unai be hahenamo ta. Program ena dokona hegeregerena iena hereva ena sinado be “Tuari Oreadia Edia Dirava Bamona, Iehova Ita Hanamoa” ia herevalaia. Salamo 24 ia herevalaia namo herea bona kamonai taudia iboudiai dekenai ia hahedinaraia maoromaoro Iehova be Tuari Oreadia Edia Dirava ai ita hanamoa be hahenamo badana ta.

Kwalimu pepadia idia henia, bona ane murinai, Karl Klein, Hakaua Oreana tauna ta ese kudouna ibounai ida ia gwauraia gurigurina amo program ia hadokoa. Unai program be namo herea edia mauri lalonai idia badinaia bona lauma dalanai idia ia hagoadaia totona!

Sikuli haorea program murinai dinadia lalonai, klas namba 100 taudia 48 be idia siaia tanodia 17 ai idia lao matamaia. To edia hesiai gaukara be unai negana sibona lalonai idia matamaia lasi. Lagani momo lalodiai Keristani ful-taim hesiai gaukarana idia karaia vadaeni. Gilead idia matamaia neganai edia mauri laganidia edia averes be 33 bona ful-taim hesiai gaukara idia karaia laganidia edia averes be 12 ia hanaia. Guna idia haida be Watch Tower Society ena tanobada hegegemadai Betele besena taudia. Ma haida be loaloa naria gaukara idia karaia taudia. Stiuden taudia sisina momo be tano idauidau ai hesiai gaukara idaudia idia karaia vadaeni​—⁠Africa, Europe, South America, davara edia motumotu, bona edia tano lalonai gado idauidau idia herevalaia grup lalodiai. To hari idia be ma misinari taudia momo ida do idia gaukara hebou, idia be guna mai moale ida idia gwau, ‘Tanobada ena kahana idauidau idia ura ai gaukara gabuna dekenai do ai gaukara.’ Edia kudouna ida idia ura edia mauri idia gaukaralaia Iehova idia hanamoa totona.

[Box on page 27]

Klas Taudia:

Edia tano idauidau: 8

Idia lao henia tanodia idauidau: 17

Klas taudia iboudiai: 48

Edia lagani edia averes: 33.75

Lagani hida hereva momokani lalonai, edia averes: 17.31

Lagani hida ful-taim hesiai gaukara idia karaia, edia averes: 12.06

[Picture on page 26]

Watchtower Bible School of Gilead Ena Klas Namba 100

Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be lauri kahana amo ela bona idiba kahana.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.