Dirava ese Tomadiho Daladia Ibounai Ia Abia Dae, Eiava?
DIRAVA ese taunimanima ia karaia neganai, edia lalona dekenai, lauma gaudia laloa urana ia atoa—idia ura gau ta idia tomadiho henia. Tomadiho karana be ia vara kava lasi. Matamana amo ia be taunimanima ena mauri ena kahana ta.
To madi, taunimanima ese tomadiho daladia idauidau idia havaraia, bona idia dainai taunimanima be mai lalo-tamona bona mai moale famili ta ai idia halaoa lasi. To, rara bada idia bubua tuaridia be tomadiho ena ladana ai idia do vara noho. Unai dainai inai mai anina bada henanadai ia vara: Tau ta ese Dirava ia tomadiho henia dalana be mai anina bada, eiava?
Idaunegai Tomadiho Daladia Kereredia
Idaunegai, Middle East dekenai idia noho besedia be haheitalai namona, edia kara amo unai henanadai ena haere do ita abia. Momo ese dirava ta ladana Bala idia tomadiho henia. Idia ese Bala ena turana hahinedia hegeregere Asera idia tomadiho henia danu. Asera tomadiho henia karana lalonai, helaga auna idia gaukaralaia, ia ese matabodaga karana ia laulaulaia. Unai gabu dekenai tano idia geia Akioleji taudia ese kopina kavakava kaivakuku hahinedia momo idia davaria. The Encyclopedia of Religion ia gwau, unai kaivakuku be “hahine diravadia bona edia tauanina idia hahedinaraia bona edia rata idia abia isi” bona “reana idia ese . . . Asera idia laulaulaia.” Ia hedinarai goevagoeva nega momo sihari kava karadia amo Bala idia tomadiho henia.
Unai dainai, ia be hoa gauna lasi, Bala tomadihona lalonai kara bodaga idia karaia danu. (Numera 25:1-3) Kanana tauna, Sekema, ese rami-hebou kekenina Daina ia hadikaia. Ena be unai bamona kara ia karaia, to idia laloa iena bese lalonai ia be tau namo hereana. (Genese 34:1, 2, 19) Varavara taudia ida mahuta hebou karana, tatau be tatau ida mahuta hebou karana, bona animal ida mahuta hebou karana be bada herea. (Levitiko 18:6, 22-24, 27) English gado herevana “sodomy,” anina be tatau be tatau ida idia mahuta hebou karana, be guna momokani ia noho siti ta ena ladana. (Genese 19:4, 5, 28) Ala-ala karana amo danu Bala idia tomadiho henia. Oibe, Bala tomadiho henia taudia ese edia natu mauridia be lahi dekenai idia negea vareai, boubou gauna bamona edia dirava dekediai! (Ieremia 19:5) Unai kara ibounai be edia tomadiho hahediba herevadia hegeregerena. Edena dala ai?
Dr. Merrill Unger ese ena buka ladana Archaeology and the Old Testament lalonai ia gwau: “Unai neganai, Near East gabuna ai, Kanana taudia edia gori sivaraidia dekenai idia gwauraia, dagedage, lebulebu, bona matabodaga karadia be dika rohoroho momokani. Kanana taudia edia dirava be kara maoromaoro idia badinaia lasi vaitani, unai dainai edia tomadiho taudia ese kara dika momokani idia karaia, bona kara bodaga momo idia karaia, hegeregere dubu helagana dekenai ariara hahine bona tatau idia noho, bona natudia idia bouboulaia.”
Dirava ese Kanana taudia edia tomadiho dalana ia abia dae, a? Lasi momokani. Ia ese Israela taudia ia hadibaia dala goevadaena ai ia do idia tomadiho henia. Ataiai ai torea gaudia ia herevalaia neganai, ia gwau: “Inai miro karadia ibounai be do umui karaia lasi, badina be umui emui vairana dekenai do lau lulua besedia be unai kara ibounai idia karaia dainai idia miro. Idia edia kara ese edia tano idia hamiroa. Unai dainai dika davana be unai tano dekenai lau henia noho. Vadaeni unai tano ese, ia dekenai noho taudia ia luludia, bona idia rakatania noho.”—Levitiko 18:24, 25.
Tomadiho Goevadaena Idia Hamiroa
Israela taudia momo ese Dirava ena lalohadai tomadiho goevadaena dekenai idia abia dae lasi. To, idia ese Bala tomadihona be edia tano lalonai idia karaia idia koua lasi. Nega daudau lasi murinai, Israela taudia be idia ura Iehova tomadiho henia dalana be Bala tomadiho henia dalana ida idia hatamonaia. Dirava ese unai bamona hatamonaia tomadihona ia abia dae, a? King Manase ia lohia negana lalonai ia vara gauna mani oi laloa. Ia ese Bala ena boubou patapata ia haginidia, sibona ena natuna merona ia bouboulaia, bona babalau bona meamea karadia ia karaia. “Unai kaivakuku ia karaia gauna ena ladana be Asera, bona Dubu Helaga lalonai ia haginia. Dubu be unai, Lohiabada . . . ia gwau, ‘Inai Dubu lalonai, . . . lau ese egu Ladana do lau atoa, ela bona hanaihanai.’ ”—2 King Taudia 21:3-7.
Manase henunai idia noho taudia ese edia king ena kara idia tohotohoa. Manase “ese ia hakaudia kerere dainai, Iuda taudia ese dika bada idia karaia. Bona Lohiabada ese Israela taudia edia vairanai ia lulua besedia edia dika, be Iuda taudia edia dika ese idia hanaia.” (2 King Taudia 21:9) Manase ese Dirava ena peroveta taudia ese idia gwauraia loulou sisibana ia kamonaia lasi, to ena ala-ala karadia amo Ierusalema be kerere lasi taudia edia rara amo ia hahonua. Ena be gabeai Manase ese ena kara ia haidaua, to iena natuna bona ena gabu ia abia tauna, King Amona, ese Bala tomadihona ia hamatamaia lou.—2 King Taudia 21:16, 19, 20.
Gabeai, ariara tatau be dubu helagana lalonai kara bodaga idia karaia. Dirava ese unai Bala tomadiho karana be edena bamona ia laloa? Mose amo ia hadibadia vadaeni, ia gwau: “Ariara hahine ena davana, o tau ta, ma tau ta danu idia sihari, ena davana be Lohiabada, emui Dirava ena ruma dekenai do umui mailaia lasi, emui gwauhamata davana karaia totona. Unai kara ruaosi be Lohiabada, emui Dirava ese ia badu henia noho.”—Deuteronomi 23:17, 18.
Manase ena tubuna merona, King Iosaia, ese dubu helagana amo Bala tomadiho karadia bodagadia ia kokia bona ia hagoevaia. (2 King Taudia 23:6, 7) To Bala tomadihona ia haorea momokani diba lasi. King Iosaia ia mase bena daudau lasi murinai, Iehova ena dubu helagana lalonai kaivakuku tomadiho henia karana ia matamaia lou. (Esekiela 8:3, 5-17) Unai dainai Iehova ese Babulonia ena king ia gaukaralaia Ierusalema bona ena dubu helagana ia hadikaia. Unai guna ia vara momokani sivaraina ese ia hahedinaraia momokani, Dirava ese tomadiho daladia haida ia abia dae lasi. Iseda nega lalonai be edena bamona?