Basileia Haroro Ripoti

Cuba Dekenai ‘Iduara Badana Ia Kehoa Vadaeni Gaukara Dekenai’

APOSETOLO Paulo be Dirava ena Basileia ena sivarai namona ia harorolaia tauna badana. Nega namodia iboudiai ia gaukaralaia ma haida dekenai Havaraia Tauna ena gwauhamata, kamonai taudia ese mauri hanaihanai do idia abia herevana, ia harorolaia. Idaunegai Efeso ia vadivadi henia neganai, gau idauidau idia vara bona Paulo ia itaia idia dainai taunimanima momo ia durua dalana ia kehoa. Ia gwau: “To Efeso dekenai do lau noho . . . Badina be unai gabu dekenai iduara badana ia kehoa vadaeni, bona hari be gaukara badana bona mai anina ena nega namona.”—1 Korinto 16:8, 9.

Cuba dekenai Iehova ena Witness taudia ese gau matamatadia idia davaria danu. Ena be gavamani ese ia do rejista lasi, to Witness taudia ese edia tano taudia dekenai edia Baibel helarona idia gwauraia hedinarai diba. Vanegai, Cuba ena gavamani ia hahedinaraia ia ura dala ia kehoa, tomadiho orea idauidau do idia gaukara totona. Presiden Castro be taunimanima vairanai ia gwau Cuba ena gavamani bona Iehova ena Witness taudia edia tomadiho oreana edia gaukara hebou dalana ia namo ia lao bona unai ia moalelaia.

Unai kara matamatana ese ‘gaukara ena iduara badana ia kehoa’ Witness taudia dekenai. Haheitalai be vanegai Iehova ena Witness taudia ese Cuba dekenai opesi ta idia kehoa, unai tano dekenai edia haroro gaukarana idia naria totona. Witness taudia 65,000 mai kahana ese taunimanima idia durua Baibel idia stadilaia bona idia lalo-pararalaia totona. Idia ese Baibel herevalaia bukadia, hegeregere Gima Kohorona bona Noga! magasin idia gaukaralaia. Kara maoromaoro idia ura henia Cuba taudia momo ese Iehova ena Witness taudia ida Baibel idia stadilaia karana amo namo idia davaria noho.

Unai motumotu ena kahana ibounai ai, grup maragidia dekenai Witness taudia ese hanaihanai hebou idia karaia. Nega haida hebouhebou sisina bada idia moalelaia diba danu, unai negadiai taunimanima 150 bamona idia hebou. Idia ese Cuba ena gavamani ena siahu taudia ese idia henia gwaumaorona idia laloa bada, unai dainai edia lauma tadikaka bona taihu ida idia hebou diba, Dirava hanamoa totona ane idia abia, bona idia guriguri hebou.

Vanegai, pura toi Saturday bona Sunday ai, idia ese “Dirava Gari Henia” Distrik Hebouhebouna be nega 1,000 mai kahana idia karaia. Ripoti ta ia gwau “oda, kamonai karana, bona maino” be hebouhebou ibounai ai idia hedinarai. Unai dainai gavamani ena siahu taudia ese Witness taudia idia hanamoa.

Tanobada hegegemadai, Keristani taudia korikoridia idia hekwarahi Dirava ia henia hahegani, ena Basileia sivaraina namona harorolaia haheganina, idia hagugurua totona. To danu, idia ura gavamani ena siahu taudia ida idia gaukara hebou namonamo. (Tito 3:1) Iehova ena Witness taudia ese aposetolo Paulo ena hereva idia badinaia, ia gwau: “Lauegu sisiba ginigunana be, lau ura emui guriguri gaukara lalonai, taunimanima ibounai dainai do umui noinoi karaia. Umui guriguri, bona umui noinoi neganai, Dirava do umui tanikiu henia. King taudia totona, bona lohia taudia ibounai totona danu, Dirava dekenai do umui noinoi. Unai dekena amo, Dirava ita badinaia bona matauraia dainai, mai maino danu do ita noho namonamo.”—1 Timoteo 2:⁠1, 2.