Basileia Haroro Ripoti

Russia ai “Ranu Mase Taudia” Durua Gaukarana

IESU ia gwau: “Kara maoromaoro hitolona idia hitolo bona ranu masena idia ranu mase taudia be idia moale, badina be edia bogana do idia kunu.” (Mataio 5:6, NW) Inai ekspiriens ese idia hahedinaraia, edena dala ai Iehova ena Witness taudia ese lauma dalanai idia ranu mase taudia idia durua noho Russia dekenai, guna lagani 70 ma haida lalonai tomadiho idia taravatulaia tanona unai.

▪ Hahine ta ladana Valentina be mai ena Baibel henanadai bona lagani momo lalodiai edia haere ia davaria lasi. Ia laloa henanadai ta be: ‘Iesu be daika ia guriguri henia?’ Ia laloa Iesu be ia ataiai ia noho tauna ta ia guriguri henia bona Ena ladana be daika, ia laloa momo.

Ia be Russian Otodoks Dubu dekenai ia lao. To unai dubu dekenai ena henanadai edia haere ia davaria lasi. Ia moale lasi, bona Protestan dubu dekenai ia lao, to unuseniai danu haere ia davaria lasi. Badina ia diba lasi edeseniai do ia lao, Valentina ese Baibel ia duahia matamaia, bona ia sibona haere ia tahua noho​—to ia davaria lasi. Ia ese heduru totona ia guriguri.

Nega sisina murinai, Iehova ena Witness taudia ese ena iduara dekenai idia pidipidi. Baibel amo idia hahedinaraia Dirava ena ladana be Iehova. Hari ia diba Iesu be daika ia guriguri henia! Ia ese Witness taudia ida Baibel stadi ia hamatamaia. Nega momo hanuaboi ibounai Watch Tower Society ese ia halasia bukadia ia duahia bona Baibel siridia ia itaia. Nega daudau lasi murinai Valentina ia diba ia ese hereva momokani ia davaria vadaeni. Hua toi lalodiai ia ese haroro gaukara ia hamatamaia, bona hua toi unai murinai, ia ese bapatiso ia abia. Mai guriguri ida hereva momokani ia tahua ese anina ia havaraia.

▪ Witness ta be basi amo ia lao gabu daudau dekenai ia haroro totona. Basi dekenai idia heau neganai, hahine matamata dekenai Baibel ena gwauhamata ia herevalaia, to unai hahine matamata ia ura lasi kamonai. Hua rua murinai, unai Witness be nega iharuana unai gabu dekenai ia lao pablik tok ia henia totona. Hereva ia henia murinai, ia ese vadivadi tauna ta dekenai ia lao bona ia nanadaia: “Ta ese oi dekenai Baibel ena sivarai namona ia herevalaia vadaeni, a?” Unai tauna ia haere, “Io, oi ese.” Witness ia laloa unai tauna ese ia hevaseha henia. To unai tau matamatana ia gwau, hua rua gunanai, basi dekenai ia heau neganai, unai Witness bona hahine matamatana edia herevahereva ia kamonai. “Lau ura ma hereva haida lau diba, to oi ese basi amo oi diho, bona lau laloa Iehova ena Witness ta do lau itaia lou lasi. To egu gaukara gabuna ai tau ta lau davaria bona ia ese Witness taudia ida Baibel ia stadilaia. Bona hari iniseniai lau noho!”

Unai tau bona ena adavana be Baibel stadi idia hamatamaia. Nega sisina murinai ia itaia ena gaukara be Baibel ena hakaua hereva hegeregerena lasi. Ia ura Dirava vairanai lalona namona ia abia dainai, ena gaukara ia haidaua. Hari ia ese nega namodia ibounai Dirava ena Basileia be ma haida dekenai ia harorolaia. Iena adavana danu ese iena stadi ia goadalaia noho.

Russia ena teritori bada hereana ai, Iehova ena Witness taudia idia moale, badina idia danu be kudou-maoro taudia iboudiai dekenai idia gwau diba: “ ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.”—Apokalupo 22:17.