Sekit Bona Distrik Naria Taudia—Harihari Gaudia
“Atai dekenai ia daekau lao neganai, abia mauri mai guia taudia momo ia danu ia abia lao. Bona harihari gaudia taunimanima dekenai ia henia.”—EFESO 4:8.
LAGANI 100 mai kahana idia lao vadaeni, Watch Tower ese gau matamatana ta ia gwauraia, ia gwau unai be “Gaukara Ena Kahana Ma Ta.” Unai be dahaka? Sekit bona distrik naria taudia edia gaukara idia hamatamaia unai. Inai magasin, September 1, 1894 ena, be ia gwau, unai nega amo ia lao, tadikaka goadadia ese Bible Student taudia edia orea do idia vadivadi henidia, ‘hereva momokani lalonai do idia hagoadadia totona.’
2 Aposetolo edia negai, Paulo bona Banaba bona unai bamona elda taudia ma haida ese Keristani kongregesen idia vadivadi henidia. Unai tatau mai edia kamonai ese kongregesen ‘edia abidadama idia hagoadaia’ gwauraia. (2 Korinto 10:8) Hari inai negai hahenamo ita davaria badina tatau tausen momo be unai gaukara idia karaia goevagoeva. Iehova ena Witness taudia edia Hakaua Oreana ese sekit bona distrik naria taudia edia dagi idia henidia vadaeni. Lagani ta ta amo sekit naria tauna ta ese kongregesen 20 bamona be nega rua ia hesiai henia; unai vadivadi ta ta ena daudau be pura tamona. Kongregesen edia faila ia sekea, tok haida ia henia, bona ia be Basileia ena pablisa taudia ida haroro gaukarana idia karaia hebou. Distrik naria tauna be sekit haida edia sekit hebouhebou edia seamani, sekit hebouhebou purana lalonai kongregesen ida haroro gaukarana ia karaia, bona Baibel ena hereva amo idia ia hagoadaia.
Sibodia Edia Namo Idia Tahua Lasi
3 Sekit naria taudia idia laolao loulou dainai, sibodia edia namo idia tahua lasi be gau badana. Nega momo, kongregesen ta amo ma ta dekenai idia lao be mai ena hekwarahi, to unai tatau bona edia adavadia be unai idia karaia mai edia moale ida. Sekit naria tauna ta ia gwau: “Egu adavana ese lau ia durua bada bona ia maumau lasi . . . Sibona ena namo ia dadaraia dainai, ita hanamoa bada be maoro.” Sekit naria taudia haida be kilomita 1,000 mai kahana idia laolao, kongregesen ta amo ela bona ma ta. Momo be mai edia motuka, to ma haida be PMV, baisikele, o hosi ai idia laolao, eiava idia raka. Sekit naria tauna ta Africa dekenai be kongregesen ta vadivadi henia totona sinavai ta ia raka hanaia neganai, ia ese iena pagana dekenai ena adavana ia huaia. Aposetolo Paulo be ena misinari gaukarana lalonai ia laolao neganai, ia ese siahu bona keru, hitolo bona ranu mase, mahuta lasi hanuaboidia, dika idauidau, bona dagedage bada ia haheaukalaia. ‘Iena lalona danu ia hekwarahi, ekalesia orea iboudiai dainai’—hari inai negai sekit naria taudia momo edia lalona idia hekwarahi hegeregerena.—2 Korinto 11:23-29.
4 Paulo ena bamona Timoteo hegeregerena, nega haida sekit bona distrik naria taudia bona edia adavadia be idia gorere. (1 Timoteo 5:23) Unai ese edia lalo-hekwarahi ia habadaia. Sekit naria tauna ta ena adavana ia gwau: “Gorere mamina lau abia neganai, nega ibounai tadikaka dekenai lau noho be auka. Unai be auka herea lau dekenai, hahine gorere ia ore vaitani negana be kahirakahira neganai. Pura iboudiai emai kohu ai udaia bena gabu idauna ai lao henia be auka. Nega momo, egu kara lau hadokoa bona Iehova lau guriguri henia, lau noia lau do ia hagoadaia, do lau haheauka noho totona.”
5 Ena be sekit bona distrik naria taudia bona edia adavadia be nega haida idia gorere o hekwarahi idaudia idia davaria, to edia hesiai gaukarana idia moalelaia bona sibona ena namo ia dadaraia lalokauna idia hahedinaraia. Dagedage o tuari negadiai, idia ura lauma dalanai heduru idia henia noho dainai, idia haida ese edia mauri be kahirakahira idia haboioa. Kongregesen idia vadivadi henidia neganai, edia lalohadai be Paulo ena hegeregerena; ia ese Tesalonika ena Keristani taudia ia hamaoroa, ia gwau: “Umui emui huanai ai be manau, iena natuna ia ubua hahine bamona. Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho.”—1 Tesalonika 2:7, 8.
6 Elda taudia oredia Keristani oreana lalonai hegeregerena, sekit bona distrik naria taudia be “haroro bona hahediba gaukaradia idia goadalaia.” Unai bamona elda taudia iboudiai do ita “matauraia bada” be namo. (1 Timoteo 5:17, NW) Bema ‘edia mauri dalana ita laloa lou, bona edia abidadama kara hegeregerena ita badinaia,’ unai amo namo do ita davaria diba.—Heberu 13:7.
7 Sekit bona distrik naria taudia haida edia kara ena anina ma haida dekenai be dahaka? Iehova ena Witness tauna ta ia gwau: “Tadikaka P—— ese egu mauri ia hanamoa bada! Lagani 1960 amo ela, ia be sekit naria tauna ta Mexico ai. Egu mero maragi neganai, iena vadivadi negadia lau naria mai egu ura bona mai egu moale ida. Egu mauri laganidia be 10 neganai, lau ia hamaoroa, ia gwau, ‘Oi danu be sekit naria tauna ai do oi lao.’ Lau be mero badana neganai lau hekwarahi dainai, nega momo ia lau tahua, badina be nega ibounai aonega herevadia ia gwauraia. Mamoe oreana naria gaukarana ia laloa guna! Hari lau danu be sekit naria tauna ta, bona ia hegeregerena, memero kekeni lau durua bona lau hagoadaia, Dirava ena hesiai lao henia daladia do idia tahua totona. Ena be Tadikaka P—— ia buruka neganai kudou gorerena dainai ia hekwarahi, to nega ibounai hagoadaia herevadia ia gwauraia. Dina tamona ia do noho ela bona February 1995 lalonai ia mase neganai, ia be lau ida dina tamona hebouhebouna ta ai lao, bona ia ese tadikaka ta, ruma edia palani karaia gaukarana ia diba momo tauna, ena lalona ia ania, gau namodia do ia tahua. Bena maoromaoro unai tadikaka ese aplikeisini pepana ia siaia, Betele dekenai do ia gaukara totona.”
Idia Lalodia Bada
8 Sekit bona distrik naria taudia bona elda taudia oredia, Dirava ese ena hariharibada hegeregerena hesiai gaukaradia ia henidia taudia, be idia gwauraia “harihari gaudia.” Iehova ena gwaukau tauna bona ekalesia ena Kwarana, Iesu, ese unai lauma dalana dekenai idia goada taudia be ita ia henia, ita do idia hagoadaia ela bona ita ta ta ibounai be lo taudia ai do ita lao. (Efeso 4:8-15) Harihari gaudia iboudiai dainai tanikiu herevadia ita gwauraia be maoro. Unai be mai anina bada bema harihari gauna ta ese ita ia hagoadaia Iehova do ita hesiai henia noho totona. Vadaeni, edena bamona do ita hahedinaraia sekit bona distrik naria taudia edia gaukara ita laloa bada? Edena dala amo do ita hahedinaraia ‘unai kara bamona idia karaia taudia ita matauraia’?—Filipi 2:29.
9 Sekit naria tauna ena vadivadi negana do idia gwauraia hedinarai neganai, palani do ita karaia matamaia diba, unai pura lalonai kongregesen ena gaukara do ita goadalaia. Reana iena vadivadi negana lalonai hora ma haida lalonai haroro gaukarana do ita durua diba. Reana unai hua lalonai heduru painia gaukarana do ita karaia diba. Momokani, do ita ura sekit naria tauna ena sisiba herevadia do ita badinaia, iseda haroro gaukarana hanamoa totona. Unai bamona kara dainai namo do ita davaria, bona ia be do ia diba ena vadivadi ese anina ia havaraia. Oibe, sekit naria taudia ese kongregesen idia vadivadi henia ita do idia hagoadaia totona, to ita ese lauma dalanai idia do ita hagoadaia danu be namo. Nega haida Paulo ia ura haida ese ena lalona do idia hagoadaia, bona nega momo Keristani taudia ia noia ia dainai do idia guriguri. (Kara 28:15; Roma 15:30-32; 2 Korinto 1:11; Kolose 4:2, 3; 1 Tesalonika 5:25) Unai hegeregerena, hari inai negai sekit bona distrik naria taudia dainai do ita guriguri bona edia lalona do ita hagoadaia be namo.
10 Sekit naria tauna bona ena adavana ita hamaoroa vadaeni edia vadivadi ita laloa bada, a? Iena sisiba namona dainai ita tanikiu henia, a? Iena hereva, haroro gaukarana sisibalaia herevadia, ese iseda moale haroro gaukarana lalonai idia habadaia neganai, ia ita hamaoroa, a? Bema unai bamona ita kara, ia ese ena gaukara do ia moalelaia. (Heberu 13:17) Sekit naria tauna ta Spain dekenai be ia gwau, ia bona ena adavana ese tanikiu hereva pepadia, kongregesen idia vadivadi henidia murinai idia abia gaudia, be idia laloa bada. Ia gwau: “Unai kadi ai dogoatao, bona emai lalona idia metau neganai, idia ai duahia lou. Emai lalona idia hagoadaia momokani.”
11 Momokani, sekit o distrik naria tauna ena adavana ese hahenamo herevadia amo namo ia davaria. Sibona ena ura gaudia momo ia negea, unai gaukara lalonai ena adavana do ia durua totona. Hahine be vaia idia ura sibodia edia ruma do idia noholaia bona edia natudia do idia havaraia, to unai taihu mai edia kamonai ese unai ura idia hagugurua lasi. Iepeta ena natuna kekenina be Iehova ena hesiai taudia ta; do ia headava bena ena natuna do ia havaraia dalana be ia ese ia rakatania, iena tamana ese ia gwauraia gwauhamatana dainai. (Gunalaia Taudia 11:30-39) Iena kara be edena bamona idia laloa? Gunalaia Taudia 11:40 ia gwau: “Lagani ta ta ibounai, Israela kekeni ese dina 4 lalonai, edia gabu idia rakatania, bona Iepeta, Gileada tauna, ena natuna kekeni totona idia taitai.” Bema sekit bona distrik naria taudia edia adavadia ita hamaoroa ita lalokau henidia bona edia kara ita laloa bada, unai be namo herea!
‘Emui Ruma Lalonai Do Umui Abidia Dae’
12 Keristani laolao gaukara taudia be iseda ruma lalodiai bema ita abia dae, unai dala amo danu ita hahedinaraia ita lalokau henidia bona ita laloa bada. (Heberu 13:2) Aposetolo Ioane ese Gaio ia hanamoa, badina be edia misinari laolaona lalonai kongregesen idia vadivadi henia taudia ia abia dae dainai. Ioane ia gwau: “Lauegu lalokau tauna e, oi ese oiemu Keristani varavara taudia oi durua noho, be gaukara namo herea oi karaia. Oibe, oiemu kara be namo bada, badina idia be idau taudia oi dekenai. Idia ese iniseni idia noho ekalesia orea taudia idia hamaoroa vadaeni, oi ese idia oi durua noho, bona idia oi lalokau henia. Mani emu kara, idia ma do oi durua noho, vadaeni edia laolao dekenai do idia lao, Dirava ena ura dalana hegeregerena. Badina be Keriso ena ladana dainai edia hanua idia rakatania, bona edia laolao totona, durua kara ta Keristani lasi taudia dekena amo idia abia dae lasi. Ita Keristani taudia ese inai bamona taudia ita durua be namo. Badina unai dekena amo, Dirava ena hereva momokani durua totona do ita gaukara hebou namonamo.” (3 Ioane 5-8) Hari inai negai, Basileia harorolaia gaukarana ita durua diba dalana ta be, sekit bona distrik naria taudia bona edia adavadia be unai bamona ita abia dae. Momokani, namona be kongregesen ena elda taudia ese do idia hamomokania edia mahuta gabudia be hegeregere, to distrik naria tauna ta ia gwau: “Tadikaka dekenai ai karaia karadia edia bada be ai idia durua karadia edia bada ida ai hahegeregerea diba lasi. Ai ura lasi emai kara dainai unai bamona do idia laloa. Namona be emai lalona idia hegeregere, emai tadikaka, taga taudia bona ogogami taudia danu, edia heabidae karadia do ai abia dae.”
13 Heabidae taudia danu ese namo idia davaria diba. Jorge, guna ia be sekit naria tauna ta bona hari ia be Betele ai ia gaukara tauna, be ia gwau: “Egu famili lalonai, ai be vaia sekit naria taudia ai boiridia, ai dekenai do idia noho. Lau laloa unai vadivadi ese lau idia durua bada, to unai neganai unai lau lalo-pararalaia lasi. Lau be mero badana neganai, lauma dalanai lau manoka. Egu sinana ese unai ia lalo-hekwarahilaia, to lau ia durua dalana maorona ia diba lasi dainai, ia ese sekit naria tauna ia noia, lau do ia hereva henia. Matamanai ia ena amo lau raka siri, badina be lau do ia gwau henia garina lau gari dainai. To ena kara namo amo egu lalona ia veria. Lau ia boiria, Monday ta lau be ia ida do ai aniani hebou, bena egu lalona gaudia lau hamaorolaia, badina be lau laloa lau ia lalo-pararalaia. Ia kamonai namonamo. Bena ena sisiba herevadia ese anina idia havaraia, bona lauma dalanai lau goada lau lao matamaia.”
14 Sekit naria tauna ese taunimanima matamatadia bona badadia danu be lauma dalanai ia durudia toho. Unai dainai, namona be do ita hahedinaraia iena kara ita laloa bada. To, bema iena kerere maragidia dainai ia ita maumauraia, eiava ita gwau ia be sekit naria taudia gunadia ida ia hegeregere lasi, unai be edena bamona? Reana unai ese ena lalona do ia hamanokaia momokani. Paulo ese ena gaukara maumauraia herevadia ia kamonai neganai, unai ese ena lalona ia hagoadaia lasi. Toana be Keristani taudia haida Korinto dekenai ese ena toana bona ena haroro dalana idia gwauraia dika. Ia sibona ia gwau unai maumau taudia idia gwau: “Paulo ena revareva be mai metau bona mai siahu danu, to ia sibona ita dekenai ia ginidae, bona iena tauanina ita itaia neganai, ia be manoka bona iena hereva be mamina lasi.” (2 Korinto 10:10) To ita moale, badina be nega momo sekit bona distrik naria taudia ese mai edia lalokau ida idia moale henidia herevadia idia kamonai.
15 Sekit naria tauna ta Latin America dekenai be dina ibounai ta lalonai kopukopu dala maragidia dekenai ia raka, gavamani idia tuari henia taudia ese idia biagua gabuna dekenai iena lauma tadikakana bona taihuna taudia vadivadi henidia totona. Ia gwau: “Unai tadikaka idia hahedinaraia egu vadivadi idia laloa bada be lau itaia neganai, egu kudouna ia marere. Ena be idia lau lao henia be auka herea, bona dika bona hekwarahi idauidau lau davaria, to unai ibounai ena davana namona lau abia; gauna be tadikaka edia lalokau bona edia lalo-siahu.”
16 Sekit naria tauna ta Africa dekenai ia gwau: “Tadikaka ese ai dekenai idia hahedinaraia lalokauna dainai, ai ese Tanzania tanona ai ura henia bada! Tadikaka idia hegaegae, aiemai amo diba do idia abia, bona edia ruma lalodiai ai idia abia dae mai edia moale ida.” Aposetolo edia nega lalonai, aposetolo Paulo bona Keristani taudia rua, Akwila bona ena adavana Prisikila, be idia lalokau heheni mai edia moale ida. Paulo ese ruaosi ia gwauraia, ia gwau: “Prisikila bona Akwila dekenai lauegu hanamoa hereva lau siaia inai. Idia be lau danu ai gaukara hebou taudia Keriso Iesu ena hesiai gaukara lalonai. Idia ese lau durua totona kahirakahira idia mase. Lau ese idia lau hanamoa bada, to lau sibona lasi, Iuda lasi ekalesia orea taudia ibounai danu.” (Roma 16:3, 4) Sekit bona distrik naria taudia bona edia adavadia ese Dirava idia tanikiu henia, badina be hari inai negai Akwila bona Prisikila hegeregerena taudia ese idia tura henidia, bona abia dae karadia bona hebamo henia daladia idia tahua goadagoada dainai.
Kongregesen Idia Hagoadadia
17 Iesu ia gwau: “Dirava ena gaukara badadia ese iena aonega idia hamomokania.” (Mataio 11:19) Aonega be sekit bona distrik naria taudia gaukaralaia dalana lalonai ia hedinarai, badina be unai amo Dirava ena bese taudia edia kongregesen ia hagoadadia. Paulo ena misinari laolaona iharuana lalonai, Sila ida, “Suria bona Kilikia tano [idia] raka hanaia, hanua ta ta lalonai edia ekalesia [idia] hagoadaia.” Kara bukana ia gwau: “Hanua ibounai idia raka hanaia neganai, aposetolo bona kwarana taudia Ierusalema dekenai edia leta ena sisiba idia henia, Keristani taudia dekenai. Idia hamaoroa, do idia kamonai henia noho. Vadaeni, ekalesia taudia edia abidadama ena goada ia bada daekau, bona dina ibounai edia hutuma be ia bada daekau lao.” (Kara 15:40, 41; 16:4, 5) Hari inai nega ena sekit bona distrik naria taudia be Baibel amo bona ‘hesiai tauna mai ena kamonai bona mai ena kara maoromaoro’ ena buka bona magasin amo, lauma gaudia dekenai diba idia abia, Keristani taudia iboudiai idia abia hegeregerena.—Mataio 24:45.
18 Oibe, namona be sekit bona distrik naria taudia be Iehova ena lauma aniani patana ai do idia aniani noho. Namona be Dirava ena orea ese ia badinaia daladia bona hakaua herevadia do idia diba namonamo, bena idia ese ma haida do idia hanamoa momokani diba. Haroro gaukarana goadalaia dalana be sibodia edia kara amo idia hahedinaraia, unai amo idia ese Keristani taudia ma haida idia durua diba, edia Keristani hesiai gaukarana do idia hanamoa totona. Unai elda taudia idia vadivadi neganai, Baibel amo idia gwauraia herevadia ese kongregesen taudia be lauma dalanai ia hagoadaia. Sekit bona distrik naria taudia ese idia durudia, Dirava ena Hereva ena sisiba do idia badinaia, tanobada hegegemadai Iehova ena orea taudia ida do idia gaukara hebou, bona Dirava ese “hesiai tauna mai ena kamonai” ena amo ia henidia lauma gaudia be do idia gaukaralaia; unai amo idia ese idia vadivadi henidia kongregesen idia hagoadaia.
19 Lagani 100 bamona idia lao vadaeni, Iehova ena orea ese sekit bona distrik naria taudia edia gaukara Bible Student taudia bogaragidiai idia hamatamaia neganai, inai magasin ia gwau: “Inai gaukara ena anina bona Lohiabada ena hakaua karadia ma haida do ita naria.” Iehova ena hakaua karana ia hedinarai goevagoeva vadaeni. Inai gaukara be ia ese ia hanamoa dainai, bona Hakaua Oreana ese ia naria lalonai, lagani momo lalodiai idia habadaia bona idia hanamoa. Unai dainai Iehova ena Witness taudia edia kongregesen tanobada ibounai dekenai edia abidadama ia goada ia lao bona dina iboudiai idia momo daekau noho. Unai ese ia hahedinaraia Iehova ese unai harihari gaudia bamona tataudia edia kara, sibodia edia namo dadaraia karana, ia hanamoa. To sekit bona distrik naria taudia ese edia gaukara be edena bamona do idia karaia diba, ena anina do idia havaraia totona? Dahaka dahaka idia tahua? Namo bada be edena bamona do idia havaraia diba?
Edena Bamona Do Oi Haere?
◻ Sekit bona distrik naria taudia edia gaukara haida be dahaka dahaka?
◻ Dahaka dainai sekit bona distrik naria taudia ese sibodia edia namo idia tahua lasi be namo?
◻ Edena bamona ita hahedinaraia diba sekit bona distrik naria taudia bona edia adavadia edia gaukara ita laloa bada?
◻ Sekit bona distrik naria taudia be dahaka idia karaia diba, kongregesen edia abidadama hagoadaia totona?
[Study Questions]
1. Lagani 1894 ai, dahaka gaukara matamatana be inai magasin lalonai idia gwauraia?
2. Sekit bona distrik naria taudia edia gaukara be dahaka dahaka?
3. Dahaka dainai sekit bona distrik naria taudia ese sibodia edia namo idia tahua lasi be namo?
4. Gorere edia anina be dahaka, sekit bona distrik naria taudia bona edia adavadia dekenai?
5. Ena be sekit bona distrik naria taudia bona edia adavadia be hekwarahi idauidau idia davaria, to edia lalohadai be edena bamona?
6, 7. Sekit bona distrik naria taudia, gaukara goadagoada taudia, ese tadikaka be edena bamona idia hagoadadia diba?
8. “Harihari gaudia,” Paulo ese Efeso karoa 4 lalonai ia gwauraia taudia, be daidia, bona idia ese kongregesen be edena bamona idia durua?
9. Edena dala amo ita hahedinaraia diba sekit naria taudia edia heduru ita laloa bada?
10. Edena bamona do ita kara be namo, sekit naria tauna ese ena gaukara do ia moalelaia totona?
11. Dahaka dainai sekit bona distrik naria taudia edia adavadia dekenai do ita hahedinaraia idia ita lalokau henia bona ita laloa bada be namo?
12, 13. (a) Baibel ese edena bamona ia hahedinaraia sekit bona distrik naria taudia bona edia adavadia do ita abia dae be namo? (b) Mani oi hahedinaraia unai bamona heabidae karadia ese heabidae taudia danu be edena bamona ia hanamodia.
14. Dahaka dainai namona be sekit bona distrik naria taudia do ita laloa bada bona idia do ita maumauraia lasi be namo?
15, 16. Sekit bona distrik naria taudia bona edia adavadia ese tadikaka edia lalokau bona edia lalo-siahu be edena bamona idia laloa?
17. Dahaka dainai ita gwau diba sekit bona distrik naria taudia gaukaralaia dalana lalonai aonega ia hedinarai, bona edena dala amo edia diba idia abia?
18. Sekit bona distrik naria taudia ese kongregesen be edena bamona idia hagoadadia?
19. Dahaka henanadai danu do ita lalodia be namo?
[Picture on page 10]
Sibodia edia namo idia dadaraia idia laolao loulou totona
[Picture on page 13]
Sekit bona distrik naria taudia bona edia adavadia be oi abia dae vadaeni, a?