Kara Dika be Edena Bamona Oi Laloa?

“OI LALONAI kara dika be lasi, oi lalonai hisihisi be lasi; oi be siahu bada herea ena noho gabuna.” Mai ladana bada Hindu aonega tauna Vivekananda ese unai hereva ia gwauraia, Hindu buka helagana ta, Bhagavad Gita, ena kahana ta ia herevalaia neganai, Vedanta toretore ia gwauraia neganai, ia gwau: “Bema oi gwau oi be manoka bona kara dika tauna, unai be kerere badana.”a

To momokani taunimanima lalonai kara dika be lasi, a? Bona taunimanima ta ia vara neganai, dahaka ia abia hanai? Nikhilananda, Hindu hadibaia tauna ta, ia gwau ta ese “tauanina gaudia” sibona be “tama sina amo ia abia.” Ma kara haida be “mauri gunana ai ia karaia karadia” dainai idia vara. Vivekananda ia gwau, “oi ese oiemu nega vaira oi havaraia.” Hindu tomadihona lalonai, ita abia hanai kara dika herevana idia hadibaia lasi.

Kara dika ai ita vara lalohadaina be Zoroastria, Shinto, Confucian, bona Buddhist tomadiho lalodiai ita davaria lasi danu. Iuda bona Keristani tomadiho lalodiai, ena be idaunegai kara dika ita abia hanai lalohadaina idia hadibaia, to hari kara dika idia laloa dalana ia idau. Hari inai negai taunimanima momo idia laloa lasi idia be kara dika taudia.

Tomadiho ia hadibaia tauna Cornelius Plantinga, Jr. ia gwau: “Hari taunimanima ese nega momo mauri dalana ta idia gwauraia dika lasi; bona sibona edia mauri daladia idia gwauraia dika lasi momokani.” Unai be Kerisendom dubudia edia kerere danu, badina idia ese kara dika ena anina idia hamaragia. Duke University ena haroro tauna ia gwau: “Bema kara dika ena anina idia herevalaia oi ura kamonai, dubu dekenai oi lao be anina lasi.” Bona Plantinga ia gwau, dubu haida dekenai, taunimanima edia hekwakwanai idia herevalaia neganai sibona, idia gwau gau ta be kara dika.

Momokani, hari inai negai taunimanima idia hisihisilaia gaudia be momo. Dagedage karadia, raskol karadia, tuari, bese inai henia karadia, drag ania kava karadia, koikoi, ma haida hahisia karadia, bona natudia dagedage henia karadia be momo. Oibe, lagani 1900 murina laganidia idia gwauraia taunimanima edia rara bubua negana badana. Gorere, buruka, bona mase idia havaraia hisihisi oi laloa danu. Ita ibounai ita ura hari inai negai tanobada ai idia noho hekwakwanai badadia amo ita siri, ani?

Unai dainai, kara dika be edena bamona oi laloa? Kara dika ita abia hanai, a? Nega ta hisihisi bona hekwakwanai be do idia ore, a? Murinai ia noho herevana ese unai henanadai do ia herevalaia.

[Footnote]