Basileia Haroro Ripoti

Dirava Ena Hereva Ena Hagoevaia Siahuna

RIPOTI idia gwau drag ania karana idia manadalaia taudia momo be unai kara hadokoa kliniki amo idia raka lasi murinai, drag idia ania lou. To kliniki ese idia karaia diba lasi gauna be Dirava ena Hereva ese ia karaia diba. (Heberu 4:12) Momo be Dirava ena Hereva bona lauma helaga ese ia durudia drag ania karana idia rakatania bona inai sisiba idia badinaia diba: “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava ena vairanai do ita noho namonamo, mai goeva bona mai gari danu.”​—⁠2 Korinto 7:⁠1.

Myanmar amo ia mai ekspiriens ta ese unai ia hamomokania. Lagani momo lalodiai drag ania karana ia hekwarahilaia tauna ia gwau: “Lau be tauhau neganai drag ania karana lau manadalaia. Nega momo lau hekwarahi lau rakatania totona, to lau hegeregere lasi. Egu drag ania karana lau durua totona, lau henaohenao. Unai dainai, lagani 1988 ai, lau idia siaia dibura dekenai bona lagani tamona lau noho.

“Dibura amo lau raka lasi murinai, egu turadia gunadia danu lau hebamo. Daudau lasi murinai, drag lau ania lou. Lau sibona egu tauanina lau hadikaia karana dainai, egu famili taudia ese lau idia dadaraia. Danu, egu gwau-edeede karana dainai egu noho gabuna taudia be lau idia gari henia, bona lau idia hereva henia lasi.

“Bena dina ta lau reaia diba gauna ta ia vara​—⁠drag goada herea lau ania dainai lau gorere bada. Lau idia siaia giroa lao dibura dekenai, inai neganai lagani toi lau noho. Ena be dibura maurina be ia auka momokani, to lau roho mauri.

“Dibura amo lau giroa lao ruma neganai, egu famili taudia lau noidia egu kara kerere gunadia idia gwauatao totona. Mai lalokau danu lau idia abia dae lou, to egu turadia ese lau idia veria bona egu kara gunadia lau karaia lou.

“Vadaeni, egu tubuna hahine ese pasto ia hamaoroa namona be Baibel sikuli ta dekenai lau lao. Pasto ia abia dae. To, lau do hamatamaia lasi neganai, egu lalana, ia be Iehova ena Witness hahinena ta, ia gwau bema lau ura Baibel lau dibaia momokani, namona be Witness taudia danu lau stadi.

“Kingdom Hall dekenai lau lao bona ia ura lau danu Baibel do ia stadi tauna lau hedavari henia. Momo ese mai moale danu lau idia hedavari henia bona egu mamina be lau idia abia dae momokani.

“Baibel lau stadilaia bona Keristani hebou dekenai lau lao matamaia murinai, Dirava kahirakahira dekenai lao karana ese drag ura henia karana ena gabu ia abia. Lagani ta murinai, egu mauri lau gwauhamatalaia Iehova Dirava dekenai, bona ranu bapatiso amo unai lau hahedinaraia.

“Vanegai, ruma-ta-ruma-ta haroro gaukara lalonai, egu drag ania turana gunana ta lau davaria. Egu mauri lau haidaua momokani ia hoalaia bada. Unai ese dala ia kehoa lau haroro henia totona, bona ia dekenai Basileia ena helaro lau kikilaia diba.

“Hari, lau ese mauri ena badina bona ena anina momokani lau davaria vadaeni. Dirava ena heduru bona ena Hereva ena sisiba dainai lau tanikiu bada, hari lau be ma haida lau durudia diba, edia mauri ia hadikaia drag ania karana idia rakatania totona.”