Anina Haboua Aria ese Dirava Idia Hamoalea, A?

AU HUAHUA mai edia bonana namona, uma aniani namo hereadia, bona idia kwatua hebou koni momo herea be idia haboua ese laulau namona ia havaraia. England tanona ibounai, anina haboua negana ai, unai aniani ese dubu idia heraheralaia. Europe ai, gabu momo hegeregerena, anina haboua negana ena matamana bona dokona ai aria momo idia karaia.

Biru gaukara amo idia mauri taudia be uma aniani dainai idia tanikiu bada. Momokani, Dirava ese idaunegai Israela besena ia hagania, lagani ta ta anina haboua negana lalonai aria toi do idia karaia. Siahu negana ia matamaia neganai, Hatubua Lasi Paraoa Ariana lalonai, Israela taudia ese idia utua bali ena anina ginigunana, idia kwatua hebou gauna, Dirava dekenai idia henia. Siahu negana ia kahirakahira neganai, Pura Edia Aria (eiava Pentekoste) lalonai, idia gogoa uiti ginigunana amo idia karaia beredi idia bouboulaia. Siahu negana ia ore murinai, Uma Ena Anina Haboua Haorea Ariana idia karaia, unai be Israela taudia edia biru laganina ena dokona. (Esodo 23:​14-​17) Unai aria be Dirava idia “tomadiho henia dinadia” bona moale negadia.​—Levitiko 23:2; Deuteronomi 16:⁠16.

To hari inai negai idia karaia anina haboua ariadia be edena bamona? Idia ese Dirava idia hamoalea, a?

Dirava Koikoi Tomadiho Henia Taudia Edia Kara

England, Cornwall ai, Anglikan dubu ena pris tauna ta ese taunimanima idia karaia anina haboua ariana bona ia lalonai edia inuinu kekero karana ia lalo-hekwarahilaia dainai, lagani 1843 ai ia ese idaunegai anina haboua ena kastom ta ia hamatamaia lou. Ia ese idia utua uiti ena anina ginigunana sisina ia abia bona ena dubu ai communion lalonai do idia gaukaralaia beredi ia karaia. Unai ia karaia neganai, ia ese Lammas ariana ia hamatamaia lou​—haida idia gwau unai “Keristani” ariana be idaunegai Celt taudia edia dirava, Lugh, tomadiho henia karana amo ia mai.a Unai dainai, Anglikan taudia ese hari idia karaia anina haboua ariana be dirava koikoi tomadiho henia karana amo ia mai.

To anina haboua negana ena dokona ai idia karaia aria ma haida be edena bamona? Encyclopædia Britannica ia gwau unai aria momo be “koni [anina ena] lauma eiava koni sinana idia abidadama henia” amo idia vara. Gabu haida dekenai biru taudia idia laloa idia kwatua hebou koni anina ginigabena lalonai be lauma ta ia noho. Lauma idia lulua totona, idia ese koni anina be tano dekenai idia botaia loulou. Gabu ma haida ai koni ena rauna haida amo “koni doli” idia karaia, bona “laki” idia abia totona idia naria namonamo ela bona vaira lagani ena hadoa negana. Bena idia ese unai koni anina be tano dekenai idia hadoa lou, edia helaro be ia ese anina matamatana do ia hanamoa.

Gori haida ese anina haboua negana be Babulonia taudia edia dirava Tammuz, ia be natuna havaraia dirava hahinena Ishtar ena bamoa tauna, idia tomadiho henia karana ida idia hatamonaia. Aniani ava ena anina magena idia utua be Tammuz be ia do buruka lasi neganai ia mase hegeregerena. Gori ma haida ese anina haboua negana be taunimanima idia bouboulaia karana ida idia hatamonaia​—Iehova Dirava ese ia inai henia karana ta.​—Levitiko 20:2; Ieremia 7:​30, 31.

Dirava Ena Lalohadai be Dahaka?

Dirava be idaunegai Israela ia kara henia dalana ese ia hahedinaraia goevagoeva Iehova, Havaraia Tauna bona mauri ena Badina, ia ura ena tomadiho taudia ese ia sibona idia badinaia. (Salamo 36:9; Nahumu 1:2) Peroveta tauna Esekiela ena negai, Iehova ena matana ai Tammuz idia taitailaia karana be ‘kara dika rohorohona.’ Unai, bona ma tomadiho kara koikoidia haida dainai, Dirava ese unai tomadiho taudia koikoidia edia guriguri ia kamonai lasi.​—Esekiela 8:​6, 13, 14, 18.

Mani unai gaudia be Iehova Dirava ese Israela taudia ia hagania gaudia, anina haboua negana ai do idia karaia gaudia ida, oi hahegeregerea. Uma Ena Anina Haboua Haorea Ariana lalonai, Israela taudia ese guriguri hebouna idia karaia, matamata bona buruka, taga bona ogogami taudia be unai nega totona idia haginia ruma, au namodia edia raurau amo idia hahairaia ruma maragidia, lalonai idia noho. Idia dekenai unai be moale bada negana, to unai be Dirava ese edia tubudia be Aigupito amo ia hamauridia karana idia laloatao negana danu.​—Levitiko 23:​40-​43.

Israela taudia edia aria negadiai, Iehova, Dirava korikorina tamona, dekenai boubou gaudia idia henia. (Deuteronomi 8:​10-​20) To guna ai torea lalohadaina, uiti o koni lalonai mauri gauna ta ia noho lalohadaina, be maoro lasi, badina Baibel ese ia hahedinaraia uma ena anina, hegeregere idia kwatua hebou uiti, be mai ena soul lasi.b Bona Baibel ia hahedinaraia goevagoeva kaivakuku idia mauri lasi, idia hereva, idia itaia, bona idia kamonai diba lasi, bonana idia kamonai lasi, hemami idia mamia lasi, bona edia tomadiho taudia idia durua diba lasi.​—Salamo 115:​5-8; Roma 1:​23-​25.

Hari inai negai Keristani taudia be Dirava ese idaunegai Israela taudia ida ia karaia Taravatu kontrakana henunai lasi. Momokani, Dirava ese ia kokia, “satauro dekenai ia ikoko karaia.” (Kolose 2:​13, 14) Iehova ena hesiai taudia hari inai negai be “Keriso ena taravatu” idia badinaia bona Dirava ia henia gaudia ibounai dainai idia tanikiu bada.​—Galatia 6:2.

Aposetolo Paulo ese ia hahedinaraia goevagoeva Iuda taudia edia aria “edia anina be bada lasi,” ma ia gwau, “anina korikori gauna be Keriso sibona.” (Kolose 2:16, 17) Unai dainai, Keristani taudia korikoridia ese Baibel ena lalohadai idia abia dae, ia gwau: “Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi. . . . Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui ania diba lasi.” (1 Korinto 10:20, 21) Ma danu, Keristani taudia idia badinaia sisibana be inai, “miro gaudia ibounai dekena amo do umui raka siri.” Oiemu gabu dekenai idia karaia anina haboua ariadia ese dirava koikoi tomadiho henia karadia idia hahedinaraia, a? Bema oibe, Keristani taudia korikoridia be Dirava hahisia karana idia dadaraia diba bema tomadiho karadia mirodia lalonai idia vareai lasi.​—2 Korinto 6:17.

Ia abia gaudia ia laloa bada natuna be ena tamana amo harihari gauna ia abia neganai, daika ia tanikiu henia? Ia diba lasi tauna eiava ena tamana? Dirava idia tomadiho henia taudia be dina ta ta mai edia kudouna ibounai ida idia guriguri, unai amo Iehova, edia guba Tamana, ena hariharibada dainai idia tanikiu henia.​—2 Korinto 6:​18; 1 Tesalonika 5:⁠17, 18.

[Footnotes]