Iehova, ‘Kara Dika Ia Gwauatao’ Diravana

“Lohiabada e, oi be mai oiemu bogahisihisi, bona kara dika oi gwauatao noho.”​—⁠SALAMO 86:⁠5.

1. King Davida ese dahaka metau ia huaia, bona ia lalohisihisi kudouna ia hanamoa dalana be dahaka?

IDAUNEGAI Israela ena King Davida be kerere dainai lalona ia hisihisi ena metau ia lalo-pararalaia. Ia gwau: “Egu kerere bada ese, egu kwarana idia koua vadaeni, abata ese taunimanima ia koua bamona. Egu kerere ena metau be bada herea, lau huaia diba lasi. Lau be lau manoka vadaeni, badina haida ese lau idia botaia patapata. Egu kudouna ia hisihisi noho, bona hisihisi dainai lau tai noho.” (Salamo 38:​4, 8) To Davida ese ena kudouna ena hisihisi hanamoa dalana ia davaria. Ia diba ena be Iehova ese kara dika ia inai henia, to kara dika tauna ia inai henia lasi​—⁠bema unai tauna ia helalo-kerehai momokani bona ena dala kererena ia rakatania. (Salamo 32:5; 103:⁠3) Davida ia abidadama momokani Iehova ia ura helalo-kerehai taudia dekenai hebogahisi ia hahedinaraia, ia gwau: “Lohiabada e, oi be mai oiemu bogahisihisi, bona kara dika oi gwauatao noho.”​—⁠Salamo 86:⁠5.

2, 3. (a) Kara dika ita karaia neganai, dahaka metau do ita huaia, bona dahaka dainai unai be dika lasi? (b) Bema iseda kerere ita lalohisihisilaia bada dainai iseda lalona ia hesiku, dahaka dika ia vara diba? (c) Baibel ese edena bamona ita ia hamaoroa Iehova ia ura dika ia gwauatao?

² Kara dika ita karaia neganai, reana ita danu be unai kara dainai lalohisihisi ena metau ita huaia noho. Unai bamona hemami be vaia taunimanima idia mamia gauna, ia be gau namona. Ita ia doria diba kara ta ita karaia iseda kerere hamaoromaoroa totona. To Keristani taudia haida edia lalona ena hisihisi be bada herea dainai edia goada ia haorea bamona. Edia kudouna ese idia ia samania, idia laloa Dirava ese edia dika ibounai do ia gwauatao lasi, herevana idia helalo-kerehai momokani. Taihu ta ese guna ia karaia kererena ia laloa lou neganai, ia gwau: “Oi laloa reana Iehova ese oi ia lalokau henia lasi neganai, emu hemami be do ia dika herea.” Ena be ia helalo-kerehai bona sisiba namona ia abia dae kongregesen ena elda taudia amo, to ia laloa noho ia hegeregere lasi Dirava ese ena dika ia gwauatao totona. Ia gwau: “Dina ta ta iboudiai Iehova lau noia egu dika ia gwauatao.” Bema kerere ena metau be iseda goada “ia haorea” bamona, reana Satani ese iseda lalona do ia veria toho kara namo tahua karana ita hadokoa, badina ita laloa ita hegeregere lasi Iehova hesiai henia totona.​—⁠2 Korinto 2:​5-7, 11.

³ To Iehova ena lalohadai unai bamona gaudia dekenai be idau vaitani! Iena Hereva ia gwau helalo-kerehai toana korikorina ita hahedinaraia neganai, Iehova ia ura, oibe, ia gini hegaegae iseda kerere gwauatao totona. (Aonega Herevadia 28:13) Bema oi laloa Iehova ese emu kerere do ia gwauatao lasi, reana durua gauna be do oi lalo-parara dahaka dainai bona edena dala ai dika ia gwauatao.

Dahaka Dainai Iehova be ‘Kara Dika Ia Gwauatao’?

4. Iehova be dahaka ia diba, bona unai dainai ia ese ita ia kara henia dalana be edena bamona?

⁴ Baibel ia gwau: “Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni. Tamana taudia be edia natuna dekenai idia bogahisihisi noho. Inai bamona danu Lohiabada ese, ia dekenai idia gari taudia ia bogahisihisi henidia noho.” Dahaka dainai Iehova be hebogahisi ia hahedinaraia? Murina sirina ese ia haerelaia, ia gwau: “Dirava [“be iseda oromana,” NW] ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:​12-​14) Oibe, Iehova ia laloaboio lasi ita be kahu sibona, bona ita goevadae lasi dainai ita manoka. Inai hereva “iseda oromana” ia diba dainai ita laloa lou Baibel ia gwau Iehova be uro karaia tauna bamona bona ita be ia karaia urona bamona.a (Ieremia 18:​2-6) Uro karaia tauna be raro amo ia karaia urona ia dogoatao namonamo, edia manoka ia diba vadaeni dainai. Danu, Iehova, Uro Karaia Tauna Badana, ese ita ia kara henia ita kara dika taudia iseda manoka hegeregerena.​—⁠2 Korinto 4:⁠7 itaia.

5. Roma bukana ese kara dika ena siahu iseda goevadae lasi tauanina dekenai be edena bamona ia herevalaia?

⁵ Iehova ia diba kara dika ena siahu be bada. Baibel ia gwau kara dika ena siahu ese taunimanima ia dogoatao auka. Kara dika ena siahu be edena bamona? Baibel buka Roma lalonai, aposetolo Paulo ese inai bamona ia gwauraia: Ita be “kara dika ena siahu henunai” ita noho, tuari taudia be opesa ta henunai hegeregerena (Roma 3:⁠9); pavapava ta bamona “kara dika be mai ena siahu” (Roma 5:​21); iseda “lalona dekenai” ia noho (Roma 7:​17, 20); ena “taravatu” ia gaukara noho iseda lalona ai, iseda dala ia biagua toho. (Roma 7:​23, 25) Iseda goevadae lasi tauanina ia dogoatao kara dika siahuna ita dadaraia be tuari aukana bamona!​—⁠Roma 7:​21, 24.

6. Iehova ena lalohadai be dahaka edia kudouna amo idia sori bona Iehova ena hebogahisi idia tahua taudia dekenai?

⁶ Unai dainai, iseda hebogahisi Diravana ia diba kamonai karana goevadaena ita karaia diba lasi, herevana mai iseda kudouna ibounai ida ita ura ita karaia. (1 King Taudia 8:​46) Ia be mai ena lalokau ida ita ia hamaoroa iena hebogahisi, tamana ta ena bamona, ita tahua bona iseda kudouna amo ita sori bada herea neganai, iseda dika do ia gwauatao. Salamo torea tauna Davida ia gwau: “Unai dainai Dirava e, lau ese sibona do lau atoa diho, bona oiemu vairana dekenai do lau manau. Inai bamona kara be lauegu boubou gauna oi dekenai. Lau diba momokani, Dirava e, bema tau ta be iena kara dika dainai ia lalohisihisi momokani, bona manau momokani neganai, oi ese ia do oi negea diba lasi.” (Salamo 51:17) Iehova ese ena kudouna ia hamanaua bona ena kerere ia lalohisihisilaia tauna do ia negea lasi, eiava do ia lulua lasi. Unai ese Iehova ena kara dika gwauatao urana ia hahedinaraia namonamo!

7. Dahaka dainai ita laloa diba lasi Dirava ena hebogahisi be do ita abia kava sibona?

⁷ Unai ena anina be Dirava ena hebogahisi ita abia kava sibona, bona hanaihanai ekskius ita karaia, ita gwau ita be goevadae lasi dainai kara dika ita karaia, a? Lasi! Iehova ena hemami sibona ese ia hakaua lasi. Iena hebogahisi be mai ena hetoana. Kudou-auka taudia, mai edia ura ida kara dika rohoroho idia karaia bona idia helalo-kerehai lasi taudia unai, edia dika do ia gwauatao lasi. (Heberu 10:​26-​31) To, ia itaia ta ese ena kudouna ia hamanaua bona ia lalohisihisi neganai, ia ura ena dika ia “gwauatao.” (Aonega Herevadia 17:⁠3) Namona be Baibel lalonai Dirava ena dika gwauatao vaitani karana idia gwauraia herevadia haida ita laloa.

Iehova ese Dika Ia Gwauatao Vaitani, A?

⁸ Ia helalo-kerehai tauna King Davida ia gwau: “Unai neganai lauegu kara dika, be oi dekenai lau gwauraia hedinarai. Lauegu kerere lau hunia lasi. Lau gwau, ‘Lauegu kerere, be Lohiabada ena vairanai do lau gwauraia hedinarai,’ vadaeni oi ese lauegu kara dika oi gwauatao.” (Salamo 32:⁠5) Heberu herevana, unuseniai idia hahanaia “gwauatao,” ena anina ma haida be “abia isi,” o “huaia.” Unai siri lalonai ena anina be ‘lalona ena hisihisi, kara dika, bona kara kerere abia oho.’ Unai dainai Iehova ese Davida ena kara dika ia abia isi bona ia huaia oho bamona. (Levitiko 16:​20-​22 itaia.) Momokani, unai ese Davida ena lalohisihisi ia hamaragia. (Salamo 32:⁠3 itaia.) Ita abia dae momokani diba, Dirava ese Iesu ena mauri davalaia boubouna idia abidadama henia bona unai amo edia dika gwauatao totona Ia idia tahua taudia edia kara dika do ia gwauatao. (Mataio 20:28; Isaia 53:12 itaia.) Iehova ese edia kara dika ia abia isi bona ia huaia lao taudia be edia kerere gunadia lalohisihisilaia ena metau idia huaia noho lasi.

⁹ Iesu ese abitorehai bona henitorehai taudia edia kara amo Iehova ena gwauatao karana ia haheitalaia. Hegeregere, Iesu ia gwau namona be ita guriguri, ita gwau: “Aiemai dika [“abitorehai,” NW] mani oi gwauatao.” (Mataio 6:​12) Unai dainai Iesu ese iseda “dika” be “abitorehai” hegeregerena ia gwauraia. (Luka 11:⁠4, NW) Ita kara dika neganai, Iehova dekenai ita be abitorehai taudia. Greek herevana ta iniseniai idia hahanaia “gwauatao,” ena anina ma ta be “abitorehai ia rakatania, o ia negea, badina ia noia lasi dainai.” Iehova ese iseda dika ia gwauatao neganai, iseda abitorehai ia gwauatao bona unai kerere be iseda akaun dekenai ia noho lasi bamona. Unai dainai helalo-kerehai kara dika taudia edia lalona ia goada diba. Iehova ese ia gwauatao vadaeni abitorehai ena davana be do ia noia lasi!​—⁠Salamo 32:​1, 2, NW; Mataio 18:​23-​35.

¹⁰ Kara 3:​19 ai, Baibel ese Dirava ena dika gwauatao karana ia hahegeregerea ma kara ta ida, ia gwau: “Inai dainai umui emui lalona umui giroa, bona Dirava ese emui kara dika do ia kokia.” Unai hereva “kokia” idia hahanaia Greek herevana ta amo, bona unai hereva ena anina ma haida be “idia dahua oho, kokia oho, koua, eiava hadikaia.” Diba bada taudia haida idia gwau, ia be hegeregere ta ese ia torea gauna ia kokia. To edena bamona unai idia karaia diba? Idaunegai, inka idia karaia lahi ena guma, glu, bona ranu amo. Tau ta be unai bamona inka ia gaukaralaia maoromaoro murinai, ia paripari dabua amo ena toretore ia dahua oho diba.

10, 11. (a) Kara 3:19 ai, inai hereva ‘do ia kokia’ ita laloa neganai, edena kara ta ita laloa? (b) Edena dala ai unai ese Iehova ena kerere gwauatao vaitani karana ia haheitalaia?

¹¹ Unai ese Iehova ena kerere gwauatao vaitani karana ia laulaulaia goevagoeva. Iseda kara dika ia gwauatao neganai, ia be hegeregere ia paripari dabua ia abia bona ia dahua oho. Unai kara dika ena davana be dohore ia noia garina ita gari lasi, badina Baibel ese Iehova ena hebogahisi karana hereana ta ia hahedinaraia: Kerere ia gwauatao neganai, unai kerere ia laloaboio!

“Edia Kerere Do Lau Laloa Lou Lasi”

12. Baibel ia gwau Iehova ese iseda kara kerere ia laloaboio neganai, ena anina be idia ia laloatao diba lasi, a? Bona dahaka dainai unai bamona oi haere?

¹² Peroveta tauna Ieremia amo, Iehova ese gwauhamata matamatana idia abia taudia ia gwauraia, bona ia gwauhamata: “Edia kara dika do lau gwauatao, bona edia kerere do lau laloa lou lasi.” (Ieremia 31:34) Unai hereva ena anina be Iehova ese kerere ta ia gwauatao neganai unai kerere ia laloatao diba lasi, a? Unai ia karaia diba lasi. Baibel ese taunimanima momo edia kara dika idauidau, Iehova ia gwauatao kara dikadia, ia herevalaia, Davida ena danu. (2 Samuela 11:​1-​17; 12:​1-​13) Ita itaia Iehova ese idia karaia kerere ia diba bona ita danu ita diba be namo. Edia kara dika, edia helalo-kerehai karana bona Dirava ese edia kerere ia gwauatao sivaraidia be idia do noho iseda namo totona. (Roma 15:⁠4) Baibel ia gwau Iehova ese helalo-kerehai taudia edia kara dika ia “laloa lou lasi” neganai, ena anina be dahaka?

13. (a) Heberu herevana ta idia hahanaia “do lau laloa lou,” ena anina ma haida be dahaka? (b) Iehova ia gwau, “Edia kerere do lau laloa lou lasi” neganai, dahaka ia hadibaia ita dekenai?

¹³ Heberu herevana idia hahanaia “do lau laloa lou” ena anina be guna idia vara gaudia ia laloatao sibona lasi. Theological Wordbook of the Old Testament ia gwau ena “anina ma ta be kara maorona karaia.” Unai dala ai, kara dika “laloa lou” ena anina be kara dika taudia dekenai kara ta do ia karaia. Peroveta tauna Hosea ese gwau-edeede Israela taudia ia herevalaia, ia gwau, “Dirava ese edia kara dika do ia laloatao” neganai, ena hereva ena anina be Iehova ese edia helalo-kerehai lasi karana dainai idia do ia panisia. Unai dainai, unai siri ena orena kahana ia gwau: “Edia kara dika edia davana do ia henia.” (Hosea 9:⁠9) To, Iehova ia gwau, “Edia kerere do lau laloa lou lasi” neganai, ita ia hadibaia ia helalo-kerehai tauna ena kara dika ia gwauatao murinai, vaira negana ta ai unai kara dika dainai do ia panisia lasi. (Esekiela 18:​21, 22) Unai dainai ia laloa lou lasi ena anina be, unai kara dika do ia gwauraia loulou lasi ita ia gwau henia o ia panisia loulou totona. Unai amo Iehova ese kara namo hereana ta ia haheitalaia, ma haida ita kara henia neganai ita tohotohoa totona. Hepapahuahu idia vara neganai, namona be kerere gunadia, oi gwau oi gwauatao vadaeni gaudia, oi gwauraia lou lasi be namo.

Kerere Dainai Idia Vara Gaudia be Edena Bamona?

¹⁴ Iehova be ia gini hegaegae kara dika gwauatao totona, to ena anina be ia helalo-kerehai tauna ese ena kara kerere dainai idia vara gaudia ibounai do ia reaia, a? Lasi momokani. Kara dika ita karaia neganai anina dikana do ita davaria. Paulo ia gwau: “Bema tau ta aniani uhena ia hadoa, vadaeni unai bamona aniani sibona be do ia abia.” (Galatia 6:⁠7) Reana iseda kara dika dainai dika o hekwakwanai idauidau do ita davaria, to Iehova ese iseda kerere ia gwauatao murinai, ia ese ita ia hadikaia karana ta ia karaia lasi. Hekwakwanai idia vara neganai, namo lasi Keristani tauna ta ia laloa, ‘Reana Iehova be egu kerere gunadia dainai lau ia panisia.’ (Iamesi 1:​13 itaia.) To, Iehova ese iseda kara kerere dainai idia vara dika ibounai amo ita ia gimaia lasi. Headava hadokoa, rogorogo kava, sihari kava karadia amo idia vara daihanai goreredia, ma haida edia abidadama bona hemataurai oi haboioa​—⁠unai hekwakwanai ibounai be iseda kara dika dainai idia vara diba gaudia, bona Iehova ese ita eda amo ia koua lasi. Ita laloatao Iehova ese Davida ena kara dika Bataseba ida bona Uria dekenai ia gwauatao, to unai murinai, unai kerere dainai idia vara gau dikadia be Davida ena amo ia koua lasi.​—⁠2 Samuela 12:​9-​14.

15, 16. Levitiko 6:​1-7 ia herevalaia taravatuna be edena dala ai kara dika tauna bona ia kara dika henia tauna ia durua?

¹⁵ Reana iseda kara dika dainai gau ma haida idia vara diba danu. Hegeregere, Levitiko karoa 6 ai ia noho sivaraina mani oi laloa. Unuseniai Mose ena Taravatu ese kara dika badana ta ia gwauraia, hegeregere Israela tauna ese Israela tauna ma ta ena kohu ia henaoa, doria karana ta o koikoi karana ta amo ia abia. Bena unai kara dika tauna ia gwau ia karaia lasi, bona ena kara ia hunia sibona lasi to ia gwauhamata koikoi. Hamomokania gaudia be lasi. To gabeai, unai kara dika tauna ena lalona ese ia samania bona ena kara dika ia gwauraia hedinarai. Iehova be iena kerere ia gwauatao diba totona, gau toi ia karaia be namo: ia abia gaudia ibounai ia henia lou, fain davana be ma 20 pesen ia henia, bona kara koikoi boubouna ta, nanigosi tau, do ia henia. Bena taravatu ia gwau: “Hahelagaia tauna ese unai boubou do ia henia, unai tau ena kara dika ena davana karaia totona, bona lau Lohiabada ese unai tau ena kara dika do lau gwauatao.”​—⁠Levitiko 6:​1-7; Mataio 5:​23, 24 itaia.

¹⁶ Unai taravatu be Dirava ena hebogahisi amo ia henia gauna. Iena kohu ia abia lou tauna ia durua bona ia moale unai kerere tauna be ena kara dikana ia gwauraia hedinarai. To nega tamona ai, unai taravatu ese kerere tauna ia durua ena lalona ia hisihisi dainai ena kara dika ia gwauraia bona ia hamaoromaoroa. Momokani, bema unai ia karaia lasi, Dirava ese ena kerere do ia gwauatao lasi.

17. Iseda kara kerere ese ma haida ia hahisia neganai, Iehova ia ura dahaka ita karaia?

¹⁷ Ena be ita be Mose ena Taravatu henunai lasi, to ia ese Iehova ena laloa dalana, bona iena lalohadai gwauatao karana dekenai danu, be ita dekenai ia hahedinaraia. (Kolose 2:​13, 14) Iseda kara kerere ese ma haida ia hahisia eiava ia hadikaia neganai, Iehova ia moale bema iseda goada hegeregerena unai ‘kerere ita hamaoromaoroa’ toho. (2 Korinto 7:​11) Unai ena anina be iseda kerere ita gwauraia hedinarai, ita gwau ita kerere, bona ita kara dika henia tauna dekenai sori herevana ita henia. Bena Iesu ena boubou dainai Iehova ita noia diba, bona lalona goevana ena hemami namona do ita abia badina ita diba iseda kerere ia gwauatao.​—⁠Heberu 10:​21, 22.

18. Iehova be dika ia gwauatao neganai, reana dahaka matahakani do ia henia danu?

¹⁸ Lalokau tamana ta bamona, Iehova ese kerere do ia gwauatao neganai, matahakani do ia henia danu. (Aonega Herevadia 3:​11, 12) Ia helalo-kerehai Keristani tauna ese reana ena elda, hesiai, eiava painia dagina do ia haboioa. Reana do ia lalohisihisi badina ia laloa bada hahenamo idauidau ia haboioa bona unai nega lalonai do ia karaia diba lasi. To ita gwau lasi unai bamona matahakani ena anina be Iehova ese ia lalo-namo henia lasi eiava Iehova ese ena kerere ia gwauatao lasi. Danu, namona be ita laloatao, Iehova ena matahakani ese ia hamomokania ita ia lalokau henia. Ita abia dae bona ita badinaia neganai, namo do ita davaria bona mauri hanaihanai dekenai ita ia hakaua lao.​—⁠Heberu 12:​5-​11.

19, 20. (a) Bema kerere oi karaia, dahaka dainai oi laloa lasi oi be dika herea dainai Iehova ese oi ia hebogahisi henia diba lasi? (b) Murina herevana ese dahaka do ia herevalaia?

¹⁹ Ita diba ‘kara dika gwauatao’ Diravana ita hesiai henia dainai, ita moale bada! Iehova ese iseda kara dika bona kerere sibona ia itaia lasi. (Salamo 130:​3, 4) Iseda kudouna lalonai idia noho gaudia ia diba. Bema oiemu hemami be kerere gunadia dainai emu lalona ia hisihisi bada, do oi laloa lasi oi be dika herea dainai Iehova ese oi do ia hebogahisi henia lasi. Herevana dahaka kerere oi karaia, bema oi helalo-kerehai momokani, unai kerere oi hamaoromaoroa toho, bona Iehova oi noia Iesu ia bubua rarana amo emu kerere ia gwauatao totona, do oi diba momokani 1 Ioane 1:9 ena hereva be mai anina oi dekenai: “Bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria ore momokani.”

²⁰ Baibel ese ita ia hagoadaia ita kara heheni neganai Iehova ena kerere gwauatao karana ita tohotohoa. To, bema ta ese ita ia kara dika henia, Dirava ia ura iseda dika gwauatao bona laloaboio karadia edia bada be edena bamona? Murina herevana ese unai do ia herevalaia.

[Footnotes]

Edena Bamona Do Oi Haere?

◻ Dahaka dainai Iehova be ‘kara dika ia gwauatao’ Diravana?

◻ Baibel ese Iehova ena dika gwauatao vaitani karana be edena bamona ia herevalaia?

◻ Iehova ese dika ia gwauatao neganai, edena dala ai ia laloaboio?

◻ Iseda kara kerere amo ma haida ita hahisia neganai, Iehova ena ura be dahaka ita karaia?

8. Iehova ese iseda dika ia gwauatao neganai, dahaka ia karaia bamona, bona unai dainai iseda hemami be edena bamona?

9. Iesu ena hereva, ‘Aiemai abitorehai mani oi gwauatao’ ena anina be dahaka?

14. Dahaka dainai do ita laloa lasi kerere gwauatao karana ena anina be ia helalo-kerehai tauna be ena kerere dainai idia vara dika ibounai do ia reaia?

[Picture on page 12]

Iseda kara kerere ese ma haida ia hahisia neganai, Iehova ena ura be hanamoa dalana ita tahua