Emu Abidadama Gwauraia Hedinarai Hahemauri Abia Totona
“Heduru totona Iehova ena ladana idia boiboilaia taudia ibounai be mauri do idia davaria.”—ROMA 10:13, NW.
BAIBEL histori ese ‘Iehova ena dina’ haida ia herevalaia. Noa ena nega ai ia vara Abata, Sodoma bona Gomora hadikaia ore negana, bona Ierusalema hadikaia negadia, 607 B.C.E. ai bona 70 C.E. ai, be Iehova ena gari havaraia dina badadia. Unai dina lalodiai, Iehova ese ia idia gwau-edeede henia taudia ia hahemaoro henia. (Malaki 4:5; Luka 21:22) Unai dina lalodiai, momo be edia gwau-edeede kara dika dainai idia mase. To haida idia roho mauri. Iehova ese hadibaia herevadia ia henia guna; kara dika taudia ia hamaoroa idia dekenai dika do ia vara bona kudou-namo taudia dekenai dala ia kehoa hahemauri idia abia totona.
2 Lagani 70 C.E. ai, Ierusalema idia hadikaia ore negana, be unai hereva ia haheitalaia namonamo. Ioela ese unai nega, lagani 900 murinai do ia vara negana, ia perovetalaia, ia gwau: “Lau ese unai dina do ia mai ena toadia, be guba bona tanobada dekenai do lau atoa. Tanobada dekenai be tuari do idia vara, bona taunimanima momo edia rarana do ia bubua. Lahi bona kwalahu bada danu, be tanobada dekenai do idia vara. Dina be do ia dibura, bona hua be do ia kakakaka lao, rara ena toana bamona. Bema inai bamona toa umui itaia neganai, do umui diba Lohiabada ena dina be kahirakahira. Unai dina badana dekenai, taunimanima ibounai do idia gari bada herea.” Ta ese unai bamona gari havaraia negana amo ia roho mauri diba, a? Ioela be lauma helaga ena siahu amo inai ia torea, ia gwau: “To durua totona Lohiabada idia noia taudia ibounai, ese mauri do idia davaria. Lau Lohiabada lau herevalaia guna vadaeni, lau gwau, ‘Ierusalema dekenai noho taudia haida, be do idia heau mauri. Lau ese lau abia hidi taudia ibounai, be do idia mauri.’ ”—Ioela 2:30-32.
2, 3. (a) Pentekoste ai, edena peroveta herevana ena sisiba idia gwauraia? (b) Pentekoste 33 C.E. amo, Iehova ena ladana boiboilaia ena anina be dahaka?
3 Pentekoste 33 C.E. ai, aposetolo Petero ese Iuda taudia bona Iuda tomadiho idia abia dae taudia Ierusalema dekenai ia hereva henia. Ia ese Ioela ena peroveta herevana ia gwauraia, bona ia hahedinaraia idia kamonai taudia ese ena guguru negana do idia itaia edia nega ai. Ia gwau: “Lau ese hoa gaudia do lau hedinaraia guba dekenai, bona toa gaudia tanobada dekenai: Rara bona lahi bona kwalahu. Dina be dohore ia dibura, bona hua be dohore ia kakakaka, rara bamona. Inai bamona toa idia vara neganai do umui diba, Lohiabada ena Dina Badana bona namo hereana be do ia kahirakahira vadaeni. Unai Dina be mai garina momokani. Bona Lohiabada ena ladana dekenai do idia boiboi taudia ibounai be mauri do idia davaria.” (Kara 2:16-21) Petero ena hereva idia kamonai henia hutuma ibounai be Mose ena Taravatu henunai idia noho, unai dainai Iehova ena ladana idia diba vadaeni. Petero ia hahedinaraia unai nega amo, Iehova ena ladana boiboilaia karana ena anina be kara ma haida do idia karaia. Do idia karaia karana badana be Iesu ena ladana ai do idia bapatiso, ia be taunimanima ese idia hamasea bena ia toreisi lou bona doko diba lasi maurina ia abia tauna.—Kara 2:37, 38.
4. Keristani taudia ese edena sivarai idia gwauraia hedinarai?
4 Pentekoste murinai, Keristani taudia ese ia toreisi lou vadaeni tauna Iesu ena sivarai idia harorolaia. (1 Korinto 1:23) Idia hahedinaraia taunimanima be lauma dalanai Iehova ena natudia bona “Dirava ena Israela” matamata ena kahana ta ai do idia lao diba, bona unai lauma besena be Iehova ena kara namodia do idia gwauraia hedinarai. (Galatia 6:16; 1 Petero 2:9) Edia abidadama idia dogoatao ela bona idia mase taudia be doko diba lasi maurina do idia abia bona Iesu ida do idia noho ena guba Basileiana dekenai. (Mataio 24:13; Roma 8:15, 16; 1 Korinto 15:50-54) Danu, unai Keristani taudia ese Iehova ena dina badana mai garina ena mai negana do idia gwauraia hedinarai. Iuda taudia idia hamaoroa hisihisi badana do ia vara idia dekenai, bona unai nega ese guna Ierusalema dekenai bona unai Iuda taudia dekenai idia vara gaudia ibounai edia dika do ia hereaia. To, haida do idia roho mauri. Daidia? Iehova ena ladana idia boiboilaia taudia.
“Nega Ena Dokona Ai”
5. Hari inai negai, edena gaudia be peroveta herevadia idia hagugurua?
5 Dala momo ai, unai nega lalonai idia vara gaudia be hari ita itaia gaudia idia laulaulaia. Lagani 1914 amo, taunimanima be nega idauna ta ai idia noho, Baibel ese ia gwauraia “dokona negana,” “tanobada dokona,” bona “nega ena dokona ai.” (Daniela 12:1, 4; Mataio 24:3-8; 2 Timoteo 3:1-5, 13) Lagani 1900 murinai, ela bona hari, tuari dikadia, dagedage dika herea, bona taunimanima edia noho bona edia mauri hadikaia karadia ese Baibel ena peroveta herevadia idia hagugurua. Unai gaudia ibounai be Iesu ese ia perovetalaia toana ena kahana ta, bona idia hahedinaraia taunimanima be kahirakahira Iehova ena gari havaraia dinana ginigabena do idia itaia. Bena, “hisihisi bada herea” ena hagugurua tuarina, Aramagedono, do ia vara. “Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.”—Mataio 24:21; Apokalupo 16:16.
6. (a) Iehova ese dahaka kara ia karaia manau taudia ia hamauria totona? (b) Paulo ena sisiba, roho mauri dalana davaria totona, be edeseniai ita davaria?
6 Unai hadikaia dinana ia mai kahirakahira noho lalonai, Iehova ese kara ta ia karaia, manau taudia be hahemauri idia abia totona. Inai “dokona negana” lalonai, Dirava ese ena lauma Israela taudia ginigabedia ia haboua. Bena lagani 1935 murinai, ena tanobada hesiai taudia ia hakaua ‘hutuma bada herea’ taudia idia tahua totona, “idia be bese idauidau, iduhu idauidau, kopina idauidau, bona gado idauidau” amo. Unai taudia edia oreana be hisihisi badana amo do ia roho mauri. (Apokalupo 7:9, 14) To idia ta ta be edena bamona edia hahemauri do idia hamomokania? Aposetolo Paulo ese unai henanadai ia haerelaia. Roma karoa 10 ai, roho mauri dalana ia sisibalaia—unai sisiba be mai anina bada iena nega ai bona iseda nega ai danu.
Hahemauri Ena Guriguri
7 Paulo be Roma bukana ia torea neganai, Iehova ese Israela besena ia negea vadaeni. To danu, aposetolo tauna ese inai ia hamomokania: “Egu lalona ibounai ia ura, bona egu noinoi Dirava dekenai danu, be Israela taudia ese mauri do idia davaria.” Iena ura be Iuda taudia haida be diba maoromaoro Dirava ena ura dekenai do idia abia, bona unai amo hahemauri do idia abia. (Roma 10:1, 2) Danu, Iehova ena ura be abidadama tanobada taudia ibounai be hahemauri idia abia. Ioane 3:16 ese unai ia hahedinaraia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Iesu ena mauri davalaia boubouna ese unai hahemauri badana ena dala ia kehoa. Noa ena nega bona hahemaoro henia negadia ma haida hegeregerena, Iehova ese hari ‘sivarai namona’ harorolaia gaukarana, hahemauri dalana hahedinaraia gaukarana unai, ia hamatamaia.—Mareko 13:10, 19, 20.
8. Paulo ena kara hegeregerena, Keristani taudia momokanidia be daidia idia lalo-namo henia hari, bona edena dala ai unai idia hahedinaraia?
8 Paulo ese Iuda taudia bona Iuda Lasi taudia dekenai ena lalo-namo ia hahedinaraia totona, dala ia noho neganai ia haroro henidia. “Iuda taudia bona Helene taudia” edia lalona ia veria. Efeso elda taudia ia hamaoroa, ia gwau: “Umui diba vadaeni umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai. Iuda taudia bona Helene taudia danu dekenai lau sisiba henia goada edia lalona do idia giroa Dirava dekenai, bona Lohiabada Iesu do idia abidadama henia.” (Kara 18:4; 20:20, 21) Unai hegeregerena, hari Iehova ena Witness taudia ese edia haroro gaukara lalonai idia hekwarahi bada, sibodia idia gwauraia Keristani taudia dekenai sibona lasi, to “tanobada ena kahana ibounai” idia noho besedia dekenai idia haroro danu.—Kara 1:8; 18:5.
“Abidadama Ena Hereva” Gwauraia Hedinarai
9 Hahemauri abia totona, abidadama dekenai ta ia haheauka be gau badana. Paulo ese Deuteronomi 30:14 ena hereva ia gwauraia, ia gwau: “ ‘Dirava ena hereva be oi dekenai, oiemu uduna dekenai, bona oiemu kudouna dekenai ia noho.’ Abidadama ena hereva be inai, ai ese ai harorolaia gauna.” (Roma 10:8) Unai “abidadama ena hereva” ita harorolaia lalonai, iseda kudouna dekenai ia diho momokani. Paulo dekenai unai ia vara, bona ena hereva ma haida ese ita idia hagoadaia, ia bamona iseda abidadama be ma haida dekenai do ita herevalaia: “Bema oiemu uduna dekenai Iesu oi gwauraia ia be Lohiabada, bona bema oiemu kudouna dekenai oi hamomokania Dirava ese mase dekena amo Iesu ia hatorea isi, vadaeni do oi mauri.” (Roma 10:9) Bapatiso oi abia negana ai unai oi gwauraia hedinarai, to namona be oi gwauraia hedinarai noho, hereva momokani ena gau namodia ibounai oi harorolaia goadagoada be namo. Unai hereva momokani ena hereva badadia be, iseda Lohiabada Iehova ena ladana; iseda Mesia King, bona Mauri Davalaia Tauna, Lohiabada Iesu Keriso; bona Basileia ena gwauhamata badadia.
10 “Abidadama ena hereva” idia abia dae lasi bona idia badinaia lasi taudia be hahemauri do idia abia lasi, badina aposetolo tauna ia gwau: “Iseda kudouna ena abidadama dekena amo Dirava ena vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria. Badina Buka Helaga ia gwau: ‘Ia dekenai idia abidadama henia taudia ibounai be hemarai do idia davaria lasi.’ ” (Roma 10:10, 11) Namona be unai “abidadama ena hereva” ita diba namonamo bona iseda kudouna dekenai ita ubua noho, bena do ita ura ma haida dekenai ita gwauraia hedinarai. Iesu ese ita ia hamaoroa: “Bema tau ta lau dainai ia hemarai, o lauegu hereva dainai ia hemarai, inai Dirava ura lasi bona kara dika taunimanima edia vairanai, Taunimanima ena Natuna danu be unai tau dekenai do ia hemarai, iena giroa mai neganai, iena Tamana ena siahu, mai aneru helagadia danu.”—Mareko 8:38.
11. Namona be sivarai namona harorolaia gaukara ena bada be edena bamona, bona dahaka dainai?
11 Peroveta tauna Daniela ia gwauraia hegeregerena, inai nega dokona ai, “Dirava ena aonega taudia be do idia diaridiari namo herea, dina bamona,” badina Basileia harorolaia gaukarana be tanobada ena daudau gabudia dekenai danu idia karaia. “Dala maoromaoro be taunimanima momo dekenai idia hadibaia” bona diba momokanina be hari ia bada herea, badina Iehova ese nega dokona perovetalaia herevadia edia anina ia hadiaria noho. (Daniela 12:3, 4) Unai be hahemauri sivaraina, bona hereva momokani bona kara maoromaoro idia lalokau henia taudia dekenai, unai be edia roho mauri dalana.
12 Aposetolo Paulo be ma ia gwau: “Inai be tanobada bese ibounai totona, badina be Iuda tauna be idau lasi, bona Iuda lasi tauna danu idau lasi. Badina Dirava be taunimanima ibounai edia Lohiabada, bona ia dekenai idia noinoi taudia dekenai iena hanamoa ia henia.” (Roma 10:12) Namona be hari inai negai, tanobada hegegemadai ‘sivarai namona’ ita harorolaia—bese idauidau ibounai dekenai, bona do ita karaia ela bona tanobada ena dokona momokani. Apokalupo 14:6 ia herevalaia aneru ese guba dekenai ia roho lao noho, bona ita dekenai maduna ia henia, ‘noho hanaihanai Sivarai Namona do ita gwauraia hedinarai. Taunimanima ibounai dekenai ita gwauraia, bese ibounai, iduhu ibounai, gado ibounai bona kopina idauidau ibounai taudia’ dekenai. Unai sivarai ese idia kamonaia taudia be edena bamona do ia durua?
Iehova Ena Ladana Boiboilaia
13 Paulo ese Ioela 2:32 ena hereva ia gwauraia, ia gwau: “Heduru totona Iehova ena ladana idia boiboilaia taudia ibounai be mauri do idia davaria.” (Roma 10:13, NW) Unai hereva ai abia hidi Iehova ena Witness taudia edia siri badana lagani 1998 totona be maoro! Hari, ita noho kava lasi to Iehova ita abidadama henia, iena ladana ita abia isi bona ena ura hereadaena ita gwauraia hedinarai karana ena anina be bada herea! Aposetolo taudia edia nega ai hegeregerena, hari inai tanobada dikana ena dina gabedia ai, inai hereva ai boiboilaia: “Inai nega noho gagevagageva taudia dekena amo umui heau mauri.” (Kara 2:40) Unai hereva be kibi ta ena regena bamona, tanobada ena Dirava gari henia taudia ibounai ia boiria, Iehova do idia noia hahemauri ia henia idia dekenai bona idia harorolaia sivarai namona idia kamonai henia taudia dekenai danu.—1 Timoteo 4:16.
14 Iehova ena dina badana be inai tanobada dekenai ia vara neganai, dahaka do ia vara? Momo ese hahemauri abia totona Iehova do idia tahua lasi. Taunimanima momo be “ororo bona nadi badadia dekenai do idia boiboi, do idia gwau, ‘Umui ese aiemai latanai do umui moru diho, ai do umui hunia, helai gabuna badana dekenai ia helai Diravana ena vairana do ai itaia garina. Ai do umui hunia, Mamoe ena Natuna ena badu ese ai do ia abia garina!’ ” (Apokalupo 6:15, 16) Tanobada ena ororo bamona oreadia do idia abidadama henia. To, namona be Nadi Badana, Iehova Dirava, idia abidadama henia! (Deuteronomi 32:3, 4) King Davida ese ia herevalaia, ia gwau: “Lohiabada be egu Nadi Badana. Ia be egu magu, bona egu hamauria Tauna.” Iehova be “ita ia hamauria Nadi Badana.” (Salamo 18:2; 95:1) Iena ladana be “kohoro goadana,” bona unai “kohoro” sibona ena goada be ia hegeregere ia mai nega dikana lalonai ita ia naria totona. (Aonega Herevadia 18:10) Unai dainai, gau badana be idia mauri noho tanobada taudia bilioni 6 bamona amo ita durua diba taudia ibounai ita durua bona ita hadibaia, bena mai edia abidadama bona momokani ida Iehova ena ladana do idia boiboilaia.
15 Unai hegeregerena, aposetolo Paulo ia henanadai, ia gwau: “To idia abidadama henia lasi taudia be edena bamona Lohiabada do idia noinoi henia diba?” (Roma 10:14) Reana taunimanima momo herea do ita durua diba “abidadama ena hereva” idia abia dae bena Iehova do idia noia, edia hahemauri abia totona. Abidadama be gau badana. Paulo be ma revareva ta lalonai ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:6) To, edena dala ai taunimanima milioni ma haida be Dirava do idia abidadama henia? Iena revareva Roma taudia dekenai, Paulo ia henanadai: “Iena Sivarai idia kamonai lasi taudia be edena bamona do idia abidadama diba?” (Roma 10:14) Iehova ese kamonai dalana ia kehoa idia totona, a? Oibe, ia kehoa! Paulo ena hereva oi kamonai henia: “Bona bema haroro tauna be lasi neganai, edena bamona do idia kamonai?”
16. Dirava ena ura hagugurua totona, dahaka dainai haroro taudia idia noho be gau badana?
16 Paulo ena hereva ese idia hahedinaraia goevagoeva, haroro taudia idia noho be gau badana. Iesu ia hahedinaraia do idia noho, ‘ela bona tanobada ena dokona.’ (Mataio 24:14; 28:18-20) Dirava ena ura be taunimanima ita durua Iehova ena ladana dekenai idia boiboi, do idia roho mauri totona, bona haroro gaukara be unai ura ia hagugurua dalana badana ta. Kerisendom lalonai danu, ena taunimanima momo herea ese Dirava ena ladana namona abia isi totona kara ta idia karaia lasi. Idia momo idia daradara, badina Toi Tamona hahediba herevana, ena anina idia gwauraia hedinarai diba lasi herevana unai, idia abia dae dainai, idia laloa Iehova bona Iesu bona lauma helaga be tamona. Danu, idia momo be Salamo 14:1 bona 53:1 ese idia herevalaia taudia: “Kavakava taudia ese, inai bamona idia laloa, idia gwau, ‘Dirava be ia noho lasi.’ ” Namona be idia diba Iehova be mauri Diravana, bona namona be ena ladana ena anina ibounai idia lalo-pararalaia bema idia ura haraga ia mai hisihisi badana amo do idia roho mauri.
Haroro Taudia Edia ‘Aena be Namo Herea Momokani’
17. (a) Dahaka dainai Paulo ese hanamoa lou peroveta herevana ia gwauraia be maoro? (b) Edia ‘aena be namo herea’ taudia be dahaka idia karaia?
17 Aposetolo Paulo ese mai anina bada henanadai ma ta ia henia: “Bona haida bema idia siaidia lasi, haroro taudia be edena bamona do idia haroro? Buka Helaga dekenai ia torea hegeregerena, ia gwau: ‘Sivarai Namona ena moale idia mailaia taudia edia aena, be namo herea momokani, ani.’ ” (Roma 10:15) Unuseniai, Paulo be Isaia 52:7 ena hereva ia gwauraia, unai be hanamoa lou peroveta herevana ena kahana ta, lagani 1919 amo ema bona hari ia vara gauna. Hari inai negai, ma nega ta, Iehova ese ena taunimanima ia siaia bona “sivarai namona idia mailaia noho, maino ena sivarai idia gwauraia noho. Kwalimu bona hamauria herevana danu idia gwauraia noho.” Mai edia kamonai ida, Dirava ia horoa “gimaia noho taudia” bona edia bamoa taudia be idia boiboi noho mai edia moale bada ida. (Isaia 52:7, 8) Hahemauri sivaraina idia harorolaia taudia be ruma ta ruma ta dekenai idia raka lao neganai, reana edia aena do idia hesiku, eiava do idia miro, to edia vairana be moale dainai idia diari! Idia diba Iehova ese idia dekenai gaukara ia henia, maino ena sivarai namona idia harorolaia bona idia lalohisihisi taudia idia durua Iehova ena ladana dekenai idia boiboi, hahemauri do idia abia totona.
18 Herevana taunimanima edia lalona ai ‘Sivarai Namona kamonaia dekena amo abidadama ia vara’ eiava idia abia hidi unai sivarai do idia dadaraia, to Paulo ena hereva be momokani, ia gwau: “Sivarai Namona idia kamonai lasi, a? Lasi, idia kamonai vadaeni, Buka Helaga ia torea bamona, ia gwau: ‘Edia gadona ena sivarai, be tanobada ibounai dekenai idia gwauraia loaloa, bona edia hereva, be tanobada ena dokona momokani dekenai idia lao.’ ” (Roma 10:16-18) “Guba ese Dirava ena hairaina ia hedinaraia,” badina ia havaraia gaudia ese unai hairai idia hahedinaraia. Unai hegeregerena, iena Witness taudia tanobada ai be idia lao ‘nega namona ia ginidae vadaeni hereva do idia gwauraia totona. Lohiabada ese iena bese taudia do ia hamauria ena sivarai bona ia ese iena bese taudia idia dagedage henia taudia ia halusia momokani ena sivarai danu, do idia harorolaia. Lohiabada ese danu idia ia siaia, taitai taudia ibounai do idia durua bona hagoadaia totona.’—Salamo 19:1-4; Isaia 61:2.
19. Hari, “Iehova ena ladana idia boiboilaia taudia” ese dahaka do idia davaria?
19 Iehova ena dina badana mai garina ia mai kahirakahira noho. “Lohiabada ena dina be kahirakahira. Unai dina dekenai ia ese ita do ia hadikaia bada. Unai dina ese gari bada do ia havaraia.” (Ioela 1:15; 2:31) Iseda guriguri be, taunimanima momo herea be sivarai namona do idia kamonai henia bona Iehova ena orea dekenai do idia aru mai. (Isaia 60:8; Habakuku 2:3) Oi laloatao, Iehova ena dina ma haida idia vara neganai, kara dika taudia idia mase—Noa ena dina ai, Lota ena dina ai, bona hereva momokani idia negea besedia Israela bona Iuda edia dina ai danu. Harihari, hisihisi bada hereana ta, ma haida do ia hereaia gauna, be kahirakahira. Iehova ena lai gubana ese tanobada amo kara dika ibounai do ia daroa oho, dala do ia lailaia maino hanaihanai paradaisona totona. “Iehova ena ladana idia boiboilaia” abidadama taudia huanai do oi noho, a? Bema oi gwau io, namona be oi moale! Dirava ena gwauhamata be ia ese oi do ia hamauria.—Roma 10:13, NW.
Edena Bamona Do Oi Haere?
◻ Pentekoste 33 C.E. murinai, dahaka kara matamatadia idia gwauraia hedinarai?
◻ Keristani taudia be “abidadama ena hereva” dainai dahaka idia karaia be namo?
◻ ‘Iehova ena ladana boiboilaia’ ena anina be dahaka?
◻ Edena dala ai Basileia harorolaia taudia edia ‘aena be namo herea momokani’?
1. Baibel histori lalonai, edena bamona hadibaia herevadia ia halasia?
7. (a) Roma 10:1, 2 ese edena helaro ia hahedinaraia? (b) Dahaka dainai hari Iehova be ‘sivarai namona’ harorolaia gaukarana ia habadaia diba?
9. (a) Roma 10:8, 9 ese edena bamona abidadama ia hagoadaia? (b) Edena nega ai bona edena dala ai iseda abidadama ita gwauraia hedinarai be namo?
10. Roma 10:10, 11 ena hereva hegeregerena, “abidadama ena hereva” dekenai dahaka ita karaia?
12. Edena dala ai Roma 10:12 ena hereva be Apokalupo 14:6 ai aneru ena kara ia herevalaia herevana ita hatamonaia?
13. (a) Iseda siri badana lagani 1998 totona be dahaka? (b) Dahaka dainai unai siri badana be hari inai negai totona ia namo herea?
14. Hahemauri ita abia totona, edena Nadi ita abidadama henia be namo?
15. Roma 10:14 ese dahaka ia hahedinaraia abidadama dekenai?
18. Roma 10:16-18 ia gwau sivarai namona harorolaia gaukara amo ia vara gauna ginigabena be dahaka?
[Pictures on page 18]
Dirava ena taunimanima ese ena namo idia harorolaia Puerto Rico, Senegal, Peru, bona Papua New Guinea dekenai—oibe, tanobada ibounai lalonai idia karaia