Taunimanima Ma Haida Dekenai Sivarai Namona Harorolaia

EGU noho tanona dekenai idia noho taudia lau laloa neganai, lau lalo-parara taunimanima momo ese niuspepa edia hereva sibona amo Iehova ena Witness taudia idia diba. Lau laloa, namona be lau davaridia, unai amo idia be Iehova ena Witness taudia bona edia abidadama herevadia idia dibaia diba. To edena dala ai heduru lau henia diba? Lauegu adavana be Keristani elda tauna ta, bona ia ese lau dekenai aonega hakaua herevadia bona sisiba ia henia.

January 8, 1995, Awake! magasin ena hereva ladana ”Hagoadaia Hereva Namona Idia Henia Magasin” dekenai lalohadai namona ai davaria. Witness hahine ta ena gaukara ia herevalaia, ia gwau: ”Witness taudia ma haida ese edia ruma dekenai idia haboua Awake! magasin gunadia amo magasin haida ia gogoa. Bena ia laloa hereva haida do idia ura henia oreadia ia vadivadi henia.”

Lauegu adavana ese lau ia durua dainai, lau be magasin handred haida lau gogoa. Idia amo do lau davaria toho taudia totona idia hegeregere herevadia idauidau lau abia hidi.

Telefon bukana bona gavamani ena opesi dekenai taunimanima idia itaia diba lista idauidau lau gaukaralaia, bona hospital, matamata taudia edia noho gabudia, bona buruka taudia edia noho gabudia edia lista lau karaia. Ma danu lau ese mase taudia idia guria taudia, sikuli gunalaia taudia, doketa taudia, dibura naria taudia bona kota naria taudia edia lista lau karaia. Kekero muramura bona drag manadalaia taudia edia orea gunalaia taudia, tanobada ena ranu bona hodahoda idia laloa momo taudia, edia tauanina ia dika vadaeni taudia, tuari ese edia mauri ia hadikaia taudia, bona aniani edia namo idia tahua taudia edia oreadia idia noho lauegu lista dekenai. Lau be taunimanima edia namo, hesiai gaukaradia (social services), bona ruma bese maurina hanamoa oreadia lau reaia lasi.

Dahaka Do Lau Hereva?

Vadivadi lau karaia neganai, egu kara ginigunana be idia lau hamaoroa lau be daika. Bena lau hamaorodia lauegu vadivadi ena lata be miniti haida sibona.

Gaukara biaguna vairanai lau gini neganai, lau gwau: ”Lau be Iehova ena Witness hahinena ta. To, lau mai lasi tomadiho kikilaia totona, taunimanima idia gaukara noho neganai reana unai be maoro lasi.” Nega momo unai ese edia gari ia koua. Bena, ia totona lauegu hereva lau haidaua, lau gwau: “Lau mai ena badina be rua. Ginigunana be, lau ura oiemu opesi dekenai umui karaia gaukarana dainai oi lau hanamoa. Bema ta be iena nega bona iena goada ia henia taunimanima ia durua totona, namo lasi unai gaukara ita laloa maragi. Emui gaukara dainai, umui lau tanikiu henia.” Nega momo unai bamona lau hereva henia tau eiava hahine be ia hoa.

Reana unai murinai idia ura idia diba egu vadivadi ena badina iharuana be dahaka. Inai bamona lau hereva noho: “Lau mai ena badina iharuana be inai: Aiemai Awake! magasin, tanobada hegegemadai idia halasia magasin amo, hereva haida lau abia hidi bona idia be oiemu gaukara bona gaukara dekenai oi davaria hekwakwanai idia herevalaidia. Lau laloa oi ura oi diba edena bamona tanobada hegegemadai idia halasia magasin ta be inai hekwakwanai ia herevalaidia. Lau ura inai magasin haida oi dekenai lau rakatania.” Nega momo lau idia hamaoroa lauegu gaukara idia laloa bada.

Hoa Bona Moale Anina Ia Havaraia

Unai bamona lau hereva neganai, momo be lau idia kamonai henia; taunimanima 17 amo tamona sibona be lau egu hereva ia dadaraia. Lau abia ekspiriens momo dainai lau hoa bona lau moale.

Hegeregere, nega hani lau tohoa bona lau naria mai egu haheauka ida murinai, distrik sikuli inspekta lau hedavari henia. Unai tauna be ia bisi bada herea. To, mai moale ida nega sisina lau danu ia kiki. Lau lao gwauraia neganai, ia gwau: “Oiemu hekwarahi lau laloa bada, bona oiemu magasin do lau duahia namonamo.”

Ma nega ta, distrik kota dekenai hahemaoro tauna badana lau hedavari henia. Iena opesi lau vareai neganai, iena gaukara pepadia amo mai badu ida iena matana ia abia isi.

Mai badu ida ia gwau: “Inai opesi be Tuesday dabai sibona ia kehoa, bena unai neganai lau hereva diba.”

Lau haere haraga, lau gwau: “Nega namona lasi ai lau mai dainai lau sori bada herea. Momokani, mai moale ida ma nega ta ai do lau mai lou. To egu hereva be oi totona.”

Hari unai hahemaoro tauna ia ura lauegu hereva ia diba. Mai manau ida ia henanadai lauegu ura be dahaka. Ia lau hamaoroa lou Tuesday dekenai do lau giroa mai.

Lau hoa badina be lau ia hamaoroa: “Mani emu kara, oi helai. Oiemu ura be dahaka?”

Unai murinai ai herevahereva namonamo, bona ena sori herevana ia gwauraia, badina be hereva lau hamatamaia neganai, ia bisi bada herea dainai, badu toana ia hahedinaraia.

Nega sisina murinai unai hahemaoro tauna ia nanadaia, ia gwau: “Oi diba dahaka lau ura henia Iehova ena Witness taudia dekenai, a? Edia kara be hakaua herevadia namodia latanai idia haginia, bona hanaihanai idia badinadia. Hitler be gau momo ia gaukaralaia, to Witness taudia be tuari dekenai idia vareai lasi.”

Ai ruaosi be opesi ta ai vareai neganai, seketere taudia be ai idia diba vadaeni. Bena seketere badana ia gwau: “Presiden be nega ta lasi taunimanima ia abia dae.”

Mai manau ida lau haere, “To ai do ia abia dae, badina ai be Iehova ena Witness taudia. Ai be noinoi taudia lasi, bona aiemai vadivadi ena lata be miniti toi sibona.” Lauegu lalona dekenai lau guriguri goadagoada, lau gwau, “Iehova e, mani emai gaukara oi hanamoa!”

Ai ia laloa lasi dalanai ia haere, “Vadaeni, do lau tohoa.” Ia raka oho. Miniti rua murinai, lau dekenai ia be daudau momokani, ia giroa mai bona presiden be ia murinai ia raka. Ia hereva lasi, to ai ia hakaua iena opesi dekenai, ma daiutu rua ai hanaia.

Ai herevahereva matamaia neganai, ena kara be ia manau ia lao. Ai be Awake! magasin haida ai hahedinaraia neganai, idia ia abia dae mai moale ida. Ai be Iehova ai tanikiu henia bada badina dala ia kehoa aiemai gaukara ena anina ai herevalaia namonamo totona.

Unai sivarai momo lau laloa lou neganai, lau be aposetolo Petero ena hereva lau laloa bada, ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:​34, 35) Dirava ena ura be gabu idauidau, gado idauidau eiava mauri idauidau taudia ese ena ura tanobada bona taunimanima totona do idia diba.​—⁠Ta ese ia siaia sivaraina.