Kohu ese Oi Idia Hamoalea Diba, A?
King Solomona be moni ena anina ia diba. Ia gwau: “Aria ena aniani ese tau ena lalona ia hanamoa, bona uaina ese ia hamoalea noho, to moni ese gau ibounai ia havaraia noho.” (Hadibaia Tauna 10:19) Emu turadia danu oi aniani be moale gauna, to paraoa eiava uaina oi abia totona, namona be oi be mai emu moni. Moni amo tauanina gaudia ita abia dainai, ia “ese gau ibounai ia havaraia noho.”
ENA be Solomona be taga bada herea tauna, ia diba kohu be mai edia hetoana. Ia diba kohu tahua momo maurina ese moale ena iduara ia kehoa lasi. Ia gwau: “Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho. Bona kohu momo ia ura henia noho tauna ese iena kohu do ia habadaia, to ena bada be hegeregere lasi ia dekenai.”—Hadibaia Tauna 5:10.
Edena bamona bema taga tauna ese kohu momo ma haida ia abia. Solomona ia gwau: “Oiemu kohu bona moni be bada neganai, taunimanima momo dekenai aniani do oi henia.” (Hadibaia Tauna 5:11) Tau ta ena “kohu bona moni” idia bada idia lao neganai, hesiai taudia momo do ia abia idia naria totona. Kohu hanamoa taudia, naria taudia, hesiai gaukara taudia, sekuriti taudia, bona ma haida—ibounai edia gaukara davana do ia henia. Unai karaia totona, moni ma haida ia abia be namo.
Unai be mai ena anina ta ena moale dekenai. Xenophon, histori ia torea Greek tauna, lagani 400 B.C.E. murinai ia noho tauna, ese guna ia ogogami to gabeai ia taga tauna ena hereva ia torea, ia gwau:
“Momokani oi laloa, . . . kohu momo lau abia neganai, mai moale bada ida lau noho, a?” Ma ia gwau: “Oi be oi diba lasi, egu aniani, egu inuinu bona egu mahuta amo lau abia moalena ese guna lau ogogami negana lalonai inai gaudia amo lau abia moalena ia hanaia lasi, lasi momokani. Kohu momo lau davaria amo lau abia gauna tamona be lau ese gau momo lau naria, haida dekenai gau momo lau henia, bona lau hekwarahi hari lau abia kohu momo lau naria totona, guna unai bamona lau hekwarahi lasi. Badina hari, hesiai taudia momo be lau amo aniani idia abia, bona momo idia ura inua gaudia, bona momo idia ura dabua, bona ma haida idia ura doketa; bona ta be lau dekenai ia mai ia gwau uda sisia ese mamoe ia aladia, o boromakau ta be hagahaga dekenai ia moru bona ia mase, o ia gwau boromakau be gorere dikana idia davaria. Vadaeni, unai dainai toana be . . . hari hekwakwanai momo lau davaria kohu momo lau abia dainai, to guna lau be kohu momo lasi neganai unai bamona ia vara lasi.”
Taunimanima be kohu momo idia tahua ena badina ma ta be Iesu Keriso ese ia herevalaia, ia gwau “kohu edia koikoi siahuna” ese ia veridia kerere. (Mataio 13:22, NW) Kohu ese taunimanima idia koidia badina idia tahua goadagoada kohuna lalonai, idia tahua mamina namona o moale do idia davaria lasi. Idia laloa kohu sisina ese ia karaia diba lasi gauna be kohu momo ese do ia karaia diba. Unai dainai nega ibounai kohu momo ma haida idia tahua noho.
Moni Lalokau Henia Karana ese Moale Ia Havaraia Lasi
Taga tauna be ena kohu ia laloa momo dainai, hanuaboi ai ena mahuta ia moalelaia lasi. Solomona ia gwau: “Gaukara tauna ena bogana do ia kunu, o do ia hitolo, to iena mahuta be do ia namo. To kohu momo tauna ena gau momo dainai ia laloa hekwarahi, bona ia mahuta namonamo lasi.”—Hadibaia Tauna 5:12.
To edia kohu idia haboioa garina dainai idia lalo-hekwarahi neganai, edia mahuta sibona idia haboioa lasi. Iena kohu ia mataganiganilaia tauna ia herevalaia neganai, Solomona ia gwau: ‘Iena mauri dina ibounai be lalohisihisi, bona lalo-hekwarahi, bona gorere, bona badu lalonai ia haorea noho.’ (Hadibaia Tauna 5:17) Iena kohu amo moale ia davaria lasi, to ia be mai ‘lalo-hekwarahi’ danu ia aniani, hegeregere ia badu badina aniani ia hoia totona moni ia negea. Unai bamona lalohadai kererena ese ia hagorerea diba. Bona gorere ese lalohisihisi bada ia havaraia, badina iena kohu momo haboua dalana ia koua.
Reana unai kara dainai oi ese aposetolo Paulo ia torea hereva ta oi laloa: “To kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese . . . mai lalohisihisi momo danu, edia mauri idia hadikaia ore vadaeni.” (1 Timoteo 6:9, 10) Moni idia tahua lalonai, taunimanima be ma haida idia koidia, idia hereva koikoi, idia henaohenao, ariara karadia idia karaia, bona idia ala-ala danu. Unai ia karaia tauna be lalona, tauanina, bona lauma dalanai hisihisi ia davaria, badina ia hekwarahi bada kohu ia abia bona ia dogoatao noho totona. Toana be unai dala be moale ia havaraia, a? Lasi vaitani!
Ita Dekenai Idia Noho Gaudia be Idia Hegeregere
Solomona ese lalohadai maorona ma haida kohu dekenai ia herevalaia danu. Ia gwau: “Tau ese sinana ena bogana dekena amo ia mai neganai ia be kopina kavakava, bona inai tanobada ia rakatania neganai danu do ia kopina kavakava. Tau ena hekwarahi ibounai be anina lasi, badina gau ta iena imana dekenai ia abia lao diba lasi. To inai dala tamona lau itaia, ia be namo bona hegeregere: Dirava ese mauri dina momo lasi taunimanima dekenai ia henia. To tau ta be do ia aniani, do ia inuinu, bona iena gaukara dekena amo ia abia gaudia do ia moalelaia, badina iena ahuna korikori be unai.”—Hadibaia Tauna 5:15, 18.
Unai hereva ese ia hahedinaraia reana do ita mauri lasi negana totona kohu ita haboua karana ese moale do ia havaraia lasi. Iseda gaukara goada ena anina dainai iseda mamina ia namo bona ita moale be namo. Aposetolo Paulo ese unai bamona hereva hegeregerena ia gwauraia, Timoteo dekenai ia torea revarevana lalonai, ia gwau: “Badina be gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.”—1 Timoteo 6:7, 8; ma danu Luka 12:16-21 itaia.
Moale Davaria Ena Ki
Solomona be mai ena kohu momo bona Dirava ese ia henia aonega badana. To ia ese moale be aonega ida ia hakapua, moni danu lasi. Ia gwau: “Aonega ia davaria tauna be mai moale danu. Ia ese lalona kehoa ia davaria vadaeni. Badina be aonega ena namo ese, siliva ena namo ia hereaia, bona aonega ena davana ese, golo ena davana ia hereaia. Aonega ena davana ese, davana bada herahera nadi edia davana ia hereaia, bona oi ura henia gaudia ibounai edia huanai, ta ese aonega ia hereaia diba lasi. Mauri daudau be aonega dekena amo do oi abia. Kohu momo bona mataurai danu, be aonega dekena amo do oi davaria. Aonega ese oiemu mauri do ia hanamoa, bona aonega dainai, oiemu mauri be mai maino danu do oi noho. Aonega idia davaria taudia be idia moale, bona aonega ese mauri namona, idia dekenai do ia henia.”—Aonega Herevadia 3:13-18.
Badina be dahaka aonega be kohu ia hanaia? Solomona ia gwau: “Aonega ese oi ia gimaia noho diba, moni ese oi ia gimaia noho diba hegeregerena. To aonega ese moni ia hereaia noho, badina aonega ese aonega tauna ia hamauria noho.” (Hadibaia Tauna 7:12) Ena be moni ese taunimanima ia naria, ia abia tauna ese ia gaukaralaia diba ena ura gaudia ia hoia totona, to aonega ese tau ta ia naria diba iena mauri ia hadikaia gauna ia dadaraia totona. Aonega momokani ese tau ta be mase haraga amo do ia gimaia sibona lasi, to ena badina be Dirava gari henia karana maorona dainai, ia ese mauri hanaihanai dekenai ta do ia hakaua lao.
Badina be dahaka Dirava ese ia henia aonegana be moale ia havaraia? Badina moale korikorina be Iehova Dirava sibona amo do ia mai diba. Idia vara gaudia ese idia hamomokania moale korikorina be Atai Herea Diravana kamonai henia karana sibona amo ia mai diba. Ia noho hanaihanai moale ita davaria totona, Dirava vairanai ladana namona ita abia be namo. (Mataio 5:3-10) Baibel stadi amo ita dibaia gaudia ita badinaia neganai, ita be ‘Dirava amo ia mai aonega’ do ita habadaia. (Iamesi 3:17) Unai ese ita dekenai kohu ese ia henia diba lasi moalena do ia henia.
[Pictures on page 4, 5]
King Solomona be tau ta ia hamoalea dalana ia diba. Oi diba, a?