Dahaka Dainai Abidadama be Lasi?

‘HARI inai negai, ta oi abidadama henia momokani diba, a?’ Reana oi kamonai lalohisihisi tauna ta be unai bamona ia henanadai. Eiava oiemu mauri dekenai gau ta oi lalo-hekwarahilaia neganai reana unai henanadai oi gwauraia.

Momokani, tanobada hegegemadai taunimanima ese orea idauidau bona taunimanima ma haida idia abidadama henia lasi. Nega momo, unai abidadama lasi karana be mai ena badina maorona. Taunimanima ta be momokani ia laloa politikol taudia be dagi idia tahua dainai idia gwauraia gwauhamatadia do idia hagugurua, a? Lagani 1990 ai, Germany dekenai, stiuden taudia 1,000 idia nanadaia neganai, idia davaria ena be idia ibounai amo 16.5 pesen idia laloa politikol taudia be tanobada ena hekwakwanai idia hamaoromaoroa diba, to idia daradara momokani taudia edia namba ese nega rua amo unai namba ia hanaia. Bona idia momo idia gwau politikol taudia edia diba bona ura hekwakwanai idauidau hamaoromaoroa totona idia abidadama henia lasi.

Niuspepa ta, Stuttgarter Nachrichten ai idia maumau, idia gwau: “Politikol taudia momo be sibona edia ura idia tahua guna bena, sedira, idia vouti taudia edia ura idia tahua.” Ma tano haida dekenai idia noho taudia ese unai hereva idia abia dae. Niuspepa ta, The European, ese tano ta ia herevalaia, ia gwau: “Matamata taudia ese mai badina namona dainai politikol taudia idia abidadama henia lasi idia bada taudia hegeregerena.” Ia gwau ‘idia vouti taudia ese nega momo politikol pati edia dagi idia kokia.’ Unai niuspepa be ma ia gwau: “Ta ese [unai tano dekenai idia noho] matamata taudia ia bamoa neganai, maoromaoro ia itaia diba idia be mai edia abidadama lasi bona idia laloa idia noho kava.” To, demokratik gavamani ta be gau momo do ia karaia diba lasi, bema taunimanima ese idia abidadama henia lasi. U.S. Presiden gunana John F. Kennedy be nega ta ia gwau: “Gavamani namona ena badina be taunimanima edia abidadama.”

Bisinesi oreadia abidadama henia karana ita laloa neganai, moni ena siahu be ia diho haraga dainai bona taga abia haraga karadia be anina idia havaraia lasi dainai, momo idia daradara. October 1997 ai, tanobada ena stock market be nega momo idia namo bena idia dika idia lao kava neganai, magasin ta be “abidadama lasi momokani bona nega haida abidadama lasi kava mamina” bona “abidadama lasi daihanai gorerena” ia herevalaia. Danu, ia gwau: “Abidadama be ia maragi ia lao dainai, [Asia tanona ta dekenai] gavamani . . . ia hadikaia diba.” Ena hereva dokona dekenai ia gwau: “Abidadama dainai tano edia moni ena siahu be do ia daekau.”

Tomadiho be abidadama ia havaraia lasi danu. Germany dekenai, tomadiho magasin ta, ladana Christ in der Gegenwart, ia gwau: “Taunimanima edia abidadama Dubu dekenai be ia maragi ia lao noho.” Lagani 1986 ia lao 1992 lalonai, Germany dekenai dubu idia abidadama henia sisina eiava idia abidadama henia bada taudia edia namba be 40 pesen amo ia diho ia lao 33 pesen. Momokani, guna idia gwauraia East Germany gabuna ai, unai namba be 20 pesen henunai ia diho. To, guna idia gwauraia West Germany gabuna ai, dubu idia abidadama henia sisina eiava idia abidadama henia lasi taudia edia namba be 56 pesen amo ia bada ia lao 66 pesen bona guna idia gwauraia East Germany gabuna ai ia bada ia lao 71 pesen.

Abidadama be ia maragi ia lao politik, bisinesi, bona tomadiho​—⁠tanobada oromana ena kahana badadia toi​—⁠dekenai sibona lasi. Ma haheitalai ta be taravatu abia isi karana. Taravatu reaia daladia, taravatu gaukaralaia maoromaoro hekwakwanaidia, bona kota haida edia hahemaoro karana idia daradaralaia dainai, taunimanima edia abidadama be ia manoka ia lao. Time magasin ena hereva hegeregerena, “taunimanima bona pulisi taudia be idia lalo-hekwarahi ela bona taravatu oromana idia abidadama henia lasi, badina unai oromana ese taravatu idia utua taudia dikadia idia ruhaia loulou dainai.” Taunimanima ese pulisi taudia idia samania badina idia kara gageva bona idia dagedage, unai dainai taunimanima edia abidadama pulisi taudia dekenai be ia maragi ia lao danu.

Intenesenel politikol karadia ita laloa neganai, maino idia herevalaia herevadia idia utua bona tuari hadokoa herevana idia badinaia lasi dainai, abidadama lasi karana be ia bada ia lao. Bill Richardson, U.S. ena gwaukau tauna United Nations dekenai, ese Middle East dekenai maino idia havaraia diba lasi ena badina badana ia hahedinaraia goevagoeva, ia gwau: “Abidadama be lasi.”

Taunimanima edia dina ta ta maurina ita laloa neganai danu, ita itaia idia momo be edia varavara bona edia turadia, nega momo hekwakwanai idia vara neganai idia amo hebogahisi bona heduru idia tahua taudia, idia abidadama henia lasi. Ia be Heberu peroveta tauna Mika ese ia gwauraia bamona: “Oiemu badibadinai ia noho tauna do oi abidadama henia lasi. Oiemu turana ena hereva do oi hamomokania lasi. Oiemu adavana dekenai oi hereva gauna danu be do oi naria namonamo.”​—⁠Mika 7:⁠5.

Hari Inai Nega Ena Toana

Vanegai, Germany ena psychologist tauna Arthur Fischer ena hereva idia torea, ia gwau: “Taunimanima edia abidadama tanobada ena oromana dekenai bona sibona edia vaira negana dekenai be dala ibounai dekenai ia maragi ia lao momokani. Matamata taudia be idia laloa tanobada ena orea idauidau ese idia durudia diba lasi. Politikol, tomadiho, eiava ma orea ta dekenai edia abidadama be ia ore vadaeni.” Ita hoa lasi, sociologist tauna Ulrich Beck ese idia noho daudau gavamani oreadia, taunimanima edia orea badadia, bona diba momo taudia “daradaralaia mauri dalana,” ia herevalaia.

Unai bamona mauri dalana lalonai, taunimanima be gunalaia siahuna ibounai amo idia siri bona idia dadaraia, bona sibona edia ura idia badinaia, ma haida edia sisiba eiava hakaua herevadia idia kamonai henia lasi. Taunimanima haida ese idia abidadama henia diba lasi taudia idia kara henia neganai, edia kara ibounai idia laloa kerere eiava edia namo idia laloa lasi momokani. Unai bamona lalohadai ese kara dikadia ia havaraia, Baibel ese ia herevalaia bamona: “Nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea.” (2 Timoteo 3:​1-5; Aonega Herevadia 18:⁠1) Momokani, abidadama lasi karana be hari inai nega ena toana, ia be “nega ena dokona” ena toana.

Abidadama lasi, bona ataiai ai herevalaia taudia amo ia honu tanobadana lalonai, mauri ita moalelaia momokani diba lasi. To ita abia dae diba do ia idau, a? Hari inai nega ena abidadama lasi hekwakwanaina ita hanaia diba, a? Bema oibe, edena bamona bona edena negai?