Lau Laloa Bada Gauna be Iehova Lau Hamoalea

THEODOROS NEROS ESE IA SIVARAILAIA

Egu dibura daiutuna ena iduara ia kehoa, bona opesa ta ia boiboi, ia gwau: “Daika be Neros?” Lau gwau unai be lau neganai, lau ia oda henia: “Oi toreisi. Oi do ai hamasea.” Unai ia vara lagani 1952 ai, ami kamepa ta Corinth, Greece dekenai. Dahaka dainai idia ura lau idia hamasea? Edia kara ena anina do lau gwauraia hedinarai lasi neganai, egu mauri do lau kikilaia sisina guna.

LAGANI 1925 bamona ai, Bible Student taudia (unai neganai Iehova ena Witness taudia edia ladana) ese egu tamana idia vadivadi henia. Nega daudau lasi murinai, ia be Iehova ena Witness tauna ta ai ia lao bona ia abia dae gaudia ia harorolaia ena tadikaka bona taihu 8 dekenai, bona idia iboudiai be Baibel ena hereva momokani idia abia dae. Iena tamana bona ena sinana ese idia abia dae danu. Unai murinai, ia headava, bona lagani 1929 ai, Agrinio, Greece dekenai, lau vara.

Unai be nega dikana Greece lalonai! Guna, General Metaxas ena lohia negana aukana ia vara. Bena, lagani 1939 ai, Tanobada Ibounai Tuarina Iharuana ia matamaia, bona nega daudau lasi murinai, Nazi taudia be unai tano idia abia. Gorere bona hitolo be bada herea. Mase taudia edia tauanina idia gudu bona uilibaro maragidia amo idia kokia bona huaia lao. Tanobada ena dika ia hedinarai goevagoeva, bona Dirava ena Basileia ia mai be namo ia hedinarai goevagoeva danu.

Hesiai Gaukara Maurina

August 20, 1942 ai, Thessalonica hanuana murimurinai aiemai grup ia hebou neganai, emai kongregesen naria tauna be Britain ena tuari peleini dekenai ia poinia, idia be hanua dekenai bomu idia negea, bona ia gwau dika ai davaria lasi badina Baibel ena hahegani hegeregerena ‘aiemai guriguri hebou kara ai hadokoa lasi.’ (Heberu 10:25) Unai neganai, davara ena kone dekenai ai hebou bona bapatiso abia totona idia mai taudia huanai lau gini. Ranu ai rakatania neganai, laini ta dekenai ai gini, bona aiemai Keristani tadikaka bona taihu be ane ta idia abia, unai ane dekenai ai karaia karana idia hanamoa. Unai dina do lau laloaboio lasi!

Unai nega sisina murinai, lau bona mero ma ta be ruma-ta-ruma-ta haroro gaukarana ai karaia noho neganai, pulisi ese ai idia dogoatao bona pulisi steiseni dekenai ai idia abia lao. Idia ura idia hahedinaraia idia laloa ai be Komiunis taudia bona aiemai haroro gaukara be taravatu, unai dainai ai idia botaia bona ai idia hamaoroa: “Umui kavakava taudia, Iehova be Stalin hegeregerena!”

Greece tano taudia idia tuari heheni, bona Komiunis taudia idia inai henia bada. Kerukeru, aiemai imana idia kwatua, raskol taudia bamona, bona aiemai ruma vairadiai ai raka lao. To unai hetoho sibodia lasi, ma haida do lau abia.

Sikuli Lalonai Abidadama Idia Tohoa

Lagani 1944 ena matamana ai, lau do sikuli noho bona Nazi taudia idia do noho Thessalonica lalonai. Dina ta sikuli lalonai, Greek Otodoks pris, tomadiho hadibaia totona ia be aiemai profesa tauna, ese lau ia hamaoroa unai dina lalonai ai stadilaia gaudia dekenai egu diba do ia tohoa. Idia noho natudia ma haida idia gwau: “Ia be Otodoks Keristani merona lasi.”

Profesa tauna ia gwau: “Ia be dahaka?”

Lau haere, lau gwau: “Lau be Iehova ena Witness merona ta.”

Ia boiboi “oi be mamoe huanai ia noho sisia dikana” lalonai lau ia dogoatao bona egu vairana ia pataia.

Sibona dekenai lau laloa, ‘Edena bamona mamoe ta be sisia dikana ia koria diba?’

Dina haida murinai, ai 350 bamona be dina tubua aniani totona aniani patana dekenai ai helai. Sikuli naria tauna ia gwau: “Neros ese iseda aniani do ia hanamoa.” Lau ese idia gwauraia ‘Iseda Tamana’ gurigurina lau gwauraia lou, Iesu ese ia murinai idia raka taudia dekenai ia hadibaia gurigurina, Mataio 6:​9-​13 ia noho herevana unai. Sikuli naria tauna ia moale lasi, unai dainai ena helai gabuna amo mai badu ida lau ia nanadaia: “Badina be dahaka unai guriguri oi karaia unai bamona?”

Lau gwau: “Badina be lau be Iehova ena Witness merona ta dainai.” Unai neganai ia danu be lau ia dogoatao bona egu vairana ia pataia. Gabeai, unai dina tamona lalonai, tisa tauna ma ta be ena ofesi lalonai lau ia boiria bona lau ia hamaoroa: “Namo herea, Neros, oi abia dae gaudia oi dogoatao noho, bona oi rakatania lasi.” Unai hanuaboi ai, egu tamana be aposetolo Paulo ena hereva amo lau ia hagoadaia: “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.”​—⁠2 Timoteo 3:​12.

Sikuli lau haorea neganai, moni gaukara abia hidi negana ia ginidae. Greece tano taudia idia tuari heheni dainai, Keristani gini siri karana do lau badinaia eiava lasi hahetoho negana ia vara. (Isaia 2:4; Mataio 26:52) Gabeai, lagani 1952 ena matamaia negana ai, unai be nega dikana Greece ena histori lalonai, tuari lalonai do lau vareai lasi dainai, idia gwau ena davana be lagani 20 lalonai dibura dekenai do lau noho.

Egu Keristani Gini Siri Karana Idia Tohoa

Mesolóngion bona Corinth edia ami kamepa edia dibura dekenai lau noho neganai, dala ia kehoa ami taudia badadia dekenai lau hahedinaraia dahaka dainai egu lalona, Baibel amo lau hadibaia lalona unai, ese lau ia koua bona politik ia durua tuari tauna ta ai lau lao diba lasi. Lau gwau: “Lau be Iesu Keriso ena tuari tauna vadaeni.” Timoteo Iharuana 2:⁠3 lau gaukaralaia. Lau idia doria lau laloa lou totona, to lau gwau lau abia hidi kava lasi, to lau laloa namonamo guna bona Dirava dekenai egu mauri lau gwauhamatalaia dainai lau karaia.

Unai dainai, lau idia doria gaukara aukana lau karaia, bona dina 20 lalodiai dina ta aniani lau abia bena dina ta aniani lau abia lasi. Egu daiutu ena semensi foloa dekenai lau mahuta, ena lata be mita rua bona ena lababa be mita tamona. Bona unai daiutu lalonai be Witness taudia ma rua! Unai Corinth kamepa lalonai lau noho negana ai, lauegu daiutu amo lau idia boiria lau idia hamasea totona.

Hamasea gabuna dekenai ai raka neganai, opesa ta ia henanadai, “Hereva ta do oi gwauraia lasi, a?”

Lau haere: “Lasi.”

“Oiemu ruma bese taudia dekenai revareva ta do oi torea lasi, a?”

Ma nega ta lau gwau: “Lasi. Idia diba vadaeni iniseniai reana lau do umui hamasea.”

Ariara gabuna dekenai ai ginidae bona lau idia oda henia haba badinai lau gini. Opesa ese tuari taudia ia hamaoroa lasi lau idia pidia, to inai oda ia henia: “Ia umui abia lao lou ruma lalonai.” Idia koikoi, idia ura egu abidadama idia tohoa.

Gabeai, lau idia siaia Makrónisos motumotu dekenai, bona unuseniai egu buka iboudiai lau dogoatao diba lasi, egu Baibel sibona. Witness taudia 13 idia atoa ruma maragina lalonai, idia noho raskol taudia kahirakahira 500 amo ai noho siri. To, hunia dalana amo, buka bona magasin haida ai abia. Hegeregere, dina ta lau be loukoúmia (momo idia ura henia loli ta) mauana ta lau abia. Maua idia sekea taudia idia ura dikadika unai loukoúmia idia ania dainai, henunai idia hunia Gima Kohorona idia itaia lasi. Witness tadikaka ta ia gwau: “Unai ami taudia be loukoúmia idia ania, to ai be Gima Kohorona ai ‘ania!’ ”

Unai negai idia halasia bukana matamatana What Has Religion Done for Mankind? ai abia bona dibura dekenai ia noho Witness tauna ta, English gado ia diba tadikaka ta, ese ia hahanaia. Danu, hunia dalana ai hebou ai karaia bona Gima Kohorona ai stadilaia hebou. Ai laloa dibura be sikuli ta bamona, dala ia noho lauma dalanai goada ai abia totona. Momokani, ai moale badina ai diba aiemai gini goada karana ese Iehova ia hamoalea.

Lau noho dibura rumana ginigabena be Týrintha, Pelopónnisos ena ist kahana dekenai. Unuseniai Baibel stadi lau karaia dibura tauna ma ta ida neganai, gadi tauna ta be ai ia raraia. Lagani momo murinai lau hoa bada herea, badina Thessalonica dekenai unai gadi tauna lau davaria lou! Unai neganai ia be Witness tauna. Gabeai ena natuna ta idia siaia dibura dekenai, gadi gaukara ia karaia totona lasi, to idia hadiburaia. Dibura lalonai ia noho ena badina be dibura lalonai lau noho ena badina hegeregerena.

Dibura Murinai Gaukara Lau Hamatamaia Lou

Lagani 20 dibura dekenai lau noho lasi to lagani toi sibona. Lau idia ruhaia murinai, lau laloa do lau noho Athens dekenai. To, nega daudau lasi murinai lau gorere, pleurisy lau abia bona ia dainai lau giroa Thessalonica dekenai. Hua rua lau hekure egu mahuta patana latanai. Gabeai kekeni mai hairaina lau davaria, ena ladana be Koula, bona December 1959 ai headava. Lagani 1962 lalonai ia ese painia gaukarana, Iehova ena Witness taudia idia gwauraia ful-taim haroro gaukarana unai, ia hamatamaia. Lagani toi murinai lau be ia danu painia gaukara lau karaia matamaia diba.

January 1965 ai, ai idia abia hidi sekit naria gaukara do ai karaia, bona kongregesen haida ai vadivadi henia, lauma dalanai idia ai hagoadaia totona. Unai lagani ena siahu negana ai, Vienna, Austria dekenai, ai lao aiemai distrik hebouhebou badana ginigunana dekenai. Ia be Greece lalonai ai karaia hebouheboudia bamona lasi, badina unuseniai hunia dalanai hebou ai karaia uda dekenai, aiemai gaukara idia taravatua dainai. Lagani 1965 ia ore neganai, ai idia boiria Iehova ena Witness taudia edia brens opesi Athens dekenai ai gaukara totona. To, lauegu varavara taudia haida idia gorere dainai, lagani 1967 ai, Thessalonica dekenai ai giroa lao.

Aiemai ruma bese maduna ai huaia neganai, ai bisi bada aiemai haroro gaukara lalonai danu. Nega ta egu kasin Kostas ida lau herevahereva neganai, Dirava ena orea ena hairai, lalokau, lalo-tamona, bona Dirava kamonai henia karana lau gwauraia hedinarai. Ia gwau: “Bema Dirava ia noho unai gaudia do idia namo herea.” Ia lau boiria Dirava ia noho eiava lasi ai stadilaia hebou totona, bona stadi ia abia dae. Lau gwau August 1969 ai Iehova ena Witness taudia edia intenesenel hebouhebou Nuremberg, Germany dekenai, do ai lao. Ai ia nanadaia bema ai ia bamoa diba, bona ena turana Alekos, ai danu Baibel ia stadilaia tauna, ia ura ia danu ia lao.

Nuremberg hebouhebouna be namo herea momokani! Steidiam bada hereana ta, guna, Hitler ena tuari ia kwalimu negadia ia moalelaia gabuna lalonai idia karaia. Idia mai taudia edia namba be 150,000 ia hanaia, bona Iehova ena lauma ese idia vara gaudia ibounai ia hakaua. Nega daudau lasi murinai, Kostas bona Alekos idia bapatiso. Hari idia ruaosi be Keristani elda taudia, bona edia ruma bese taudia be Witness taudia danu.

Ia kamonai hahinena ta ida stadi lau hamatamaia. Iena adavana ia gwau ia ura aiemai tomadiho ena badina ia tahua, bena daudau lasi murinai lau ia hamaoroa Mr. Sakkos, Greek Otodoks tomadiho stadilaia tauna ta, ia boiria do ai herevahereva totona. Unai hahine ena adavana ia ura henanadai haida ia henia ai ruaosi dekenai. Mr. Sakkos be pris ta ida ia mai. Ai vadivadi henia tauna ena hamatamaia herevana be inai: “Gau ginigunana be, lau ura Mr. Sakkos be henanadai toi do ia haerelaia.”

Ia ese emai herevahereva lalonai ai gaukaralaia Baibel ia abia isi, bena ia gwau, “Henanadai ginigunana be inai: Inai Baibel be Baibel momokanina, eiava ia be Witness taudia edia Baibel sibona?” Mr. Sakkos ia gwau ia be Baibel momokanina, bona ia gwau Iehova ena Witness taudia be “Baibel idia ura henia taudia.”

Bena, unai tau ia gwau, “Henanadai iharuana be inai: Iehova ena Witness taudia edia kara be goeva, eiava?” Momokani, ia ura ia diba ena hahine be edena bamona taudia ia bamoa matamaia. Unai tomadiho stadilaia tauna ia gwau idia be kara goeva taudia momokanidia.

Ma unai tauna ia gwau, “Henanadai ihatoina be inai: Iehova ena Witness taudia be edia gaukara totona davana idia abia, a?” Tomadiho stadilaia tauna ia haere, ia gwau: “Lasi.”

Unai tauna ena hereva dokona be, “Haere lau abia bona egu lalona lau hadaia vadaeni.” Unai murinai Baibel ia stadilaia noho bona nega daudau lasi murinai ia bapatiso bona Iehova ena Witness tauna ai ia lao.

Davana Namo Herea Maurina

January 1976 ai, lau be sekit naria gaukara lau hamatamaia lou. Lagani 6 murinai, lau ese haroro gaukara dalana matamatana Greece dekenai lau naria diba​—⁠unai be dala dekenai ai karaia haroro gaukarana. Bena October 1991 ai, lau bona egu adavana be spesel painia gaukara ai hamatamaia. Hua haida murinai, operesen badana lau abia egu kudouna dekenai, bona lau moale bada herea badina hari ia namo. Hari lau gorere momo lasi, bona ful-taim haroro gaukara lau hamatamaia lou diba. Lau be Thessalonica kongregesen ta ena elda tauna, bona Hospital Liaison Committee gaukarana lau karaia danu, operesen idia abia taudia ai durua totona.

Egu mauri lau laloa lou neganai, lau diba egu guba Tamana hamoalea karana ese lau ia hamoalea bada. Lau moale bada herea badina iena boiboi namona lau abia dae: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aonega Herevadia 27:⁠11) Tanobada hegegemadai Iehova ena orea lalonai idia vareai kudou namo taudia edia namba ia bada daekau ese egu kudouna ia hamoalea. Baibel ena hereva momokani amo taunimanima ruhaia gaukarana karaia bona unai amo kara maoromaoro tanobada matamatana dekenai mauri hanaihanai helarona hahedinaraia gaukarana lau karaia diba be hahenamo badana lau dekenai!​—⁠Ioane 8:⁠32; 2 Petero 3:​13.

Ai ura Iehova idia hesiai henia taudia matamatadia be hanaihanai ai hagoadaia ful-taim haroro gaukara idia tahua bona edia nega bona edia goada idia henia Ia dekenai. Momokani, Iehova abidadama henia bona iena kudouna hamoalea karana be tau ta ena mauri lalonai do ia davaria hahenamo hereadaena!​—⁠Aonega Herevadia 3:⁠5; Hadibaia Tauna 12:⁠1.

[Picture on page 21]

(Laurina kahana ia lao idibana kahana)

Lagani 1965 ai, Betele aniani nadua gabuna dekenai lau gaukara

Lagani 1970 ai, aiemai haroro gaukara idia taravatua negana ai, hereva ta lau henia

Lagani 1959 ai, egu adavana ida

[Picture on page 23]

Egu adavana Koula ida