Aneru ese Oi Idia Durua Diba Dalana

DIRAVA ena Hereva ese ia hamomokania aneru idia noho. Ia hahedinaraia unai lauma anerudia be milioni momo. Iehova Dirava ena hesiai tauna Daniela ese matahanai ta lalonai guba dekenai idia noho gaudia ia itaia, ia gwau: “[Idia tausen tausen] ese unai Tau ena hesiai gaukara idia karaia, bona milioni momo ese iena vairana dekenai idia gini.”​—Daniela 7:​10.

Daniela ena hereva ese ia hahedinaraia aneru idia noho, to unai sibona lasi. Ia hahedinaraia danu, aneru ese Dirava idia hesiai henia. Idia be ena hesiai taudia. Unai hegeregerena, salamo torea tauna ia gwau: “Lohiabada ena aneru ibounai e, umui be mai emui goada badana. Umui ese Lohiabada ena hereva umui badinaia noho, bona emui taiana umui kehoa noho Lohiabada ena hereva dekenai. Lohiabada ena ladana do umui hanamoa bada. Lohiabada ena hesiai taudia, guba dekenai umui noho, bona Lohiabada ena ura umui karaia noho. Umui ese Lohiabada ena ladana do umui abia isi.”​—Salamo 103:20, 21.

Danu, Baibel ese ia gwauraia hedinarai aneru be tanobada dekenai taunimanima bamona idia vara lasi. Iehova ese tanobada ia do havaraia lasi neganai, aneru ia havaradia guba dekenai. Dirava ese ‘tanobada ena kona nadi ia atoa neganai, guba ena aneru ibounai be mai moale danu idia boiboi.’​—Iobu 38:​4-7.

Aneru be lauma​—matana amo idia ita itaia diba lasi bona idia be mai edia siahu bona aonega. Baibel lalonai, Heberu herevana mal·ʼakhʹ bona Greek herevana agʹge·los amo lauma idia herevalaia neganai, unai hereva idia hahanaia “aneru.” Baibel lalonai unai hereva be kahirakahira nega 400 idia hedinarai. Idia ruaosi edia anina be “hereva gwauraia tauna.”

Aneru ida Idia Hedavari

Momokani aneru be hereva gwauraia taudia. Reana aneru Gabriela be Maria dekenai ia hedinarai sivaraina oi diba. Maria ia hadibaia ena be ia be rami-hebou kekenina, to natuna mero do ia abia bona ena ladana do idia atoa Iesu. (Luka 1:​26-​33) Danu, uda dekenai idia noho mamoe naria taudia dekenai aneru ta ia hedinarai. Ia gwau: “Hari, inai dina, Davida ena hanua dekenai, umui emui Hamauria Tauna ia vara vadaeni, Keriso Lohiabada unai.” (Luka 2:8-11) Unai hegeregerena, aneru ese Hagara, Aberahamo, Lota, Iakobo, Mose, Gideona, Iesu, bona Baibel ia herevalaia taudia ma haida dekenai hereva idia gwauraia.​—Genese 16:​7-​12; 18:​1-5, 10; 19:​1-3; 32:​24-​30; Esodo 3:​1, 2; Gunalaia Taudia 6:​11-​22; Luka 22:​39-​43; Heberu 13:2.

Namona be ita itaia unai aneru ese idia gwauraia herevadia iboudiai be mai anina Dirava ena ura ia guguru lalonai, reana unai taunimanima edia ura dekenai lasi. Aneru be Dirava ena gwaukau taudia, ena ura hegeregerena bona ia gwauraia negana ai idia hedinarai. Taunimanima ese idia boiridia lasi.

Heduru Totona Aneru Ita Noidia be Namo, A?

Lalohisihisi negadiai, heduru totona aneru ita noidia be maoro, a? Bema ia maoro, ita ura ita ia durua namonamo diba aneruna ta ena ladana ita diba. Unai dainai, idia hoihoilaia buka haida ese aneru momo edia ladana, edia dagi, bona edia gaukara listana idia hahedinaraia. Buka ta ese ia gwauraia “aneru badadia ten,” “Western tanodia dekenai idia diba namonamo aneru” edia lista ia hahedinaraia. Unai lista ida sisiba idia henia, idia gwau namona be oiemu matana oi koua, metairametaira unai aneru ena ladana oi gwauraia loulou, oi laga badabada, oi hahodi metairametaira, bona “oi hegaegae idia ida oi hedavari totona.”

To Baibel be idau, ia ese Dirava idia badinaia aneru rua sibona edia ladana, Mikaela bona Gabriela, ia gwauraia. (Daniela 12:1; Luka 1:​26) Reana unai ladadia idia noho, badina unai amo ita diba aneru ta ta be lauma idauna ta mai ena ladana, siahu ta sibona lasi.

Namona be ita diba aneru haida idia ura lasi taunimanima dekenai edia ladana idia hahedinaraia. Iakobo ese aneru ta ena ladana ia nanadaia neganai, unai aneru ese ia gwauraia lasi. (Genese 32:29) Iosua ese ia dekenai ia hedinarai aneruna ia diba totona ia nanadaia neganai, unai aneru ia gwau sibona ia be ‘Iehova ena tuari oreana gunalaia’ tauna. (Iosua 5:​14) Samson ena tama sina ese aneru ta ena ladana idia nanadaia neganai, ia gwau: “Badina dahaka lauegu ladana umui ura diba? Ia be hoa gauna ta.” (Gunalaia Taudia 13:​17, 18) Baibel be aneru edia ladadia ena lista ia hahedinaraia lasi bona unai ese ita ia durua, aneru ita abidia isi kava lasi bona ita tomadiho henidia lasi. Bona do ita itaia, Baibel ese ita ia hadibaia lasi aneru ita boiridia totona.

Heduru Totona Dirava Ita Noia

Baibel ese guba dekenai idia vara gaudia, ita idia durua diba gaudia ibounai, ia hahedinaraia. Aposetolo Paulo ia gwau: “Buka Helaga ibounai be Dirava ena lauma amo ia vara bona ia be mai ena namo hadibaia totona . . . Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.” (2 Timoteo 3:16, 17, NW) Bema Dirava ia ura ita ese aneru momo edia ladana ita diba, ia ese ena Hereva, Baibel, lalonai idia do ia hahedinaraia. Bona bema Dirava ia ura guriguri amo aneru hereva henidia dalana ita ia hadibaia, unai diba be Baibel lalonai do ia hahedinaraia.

To, Iesu Keriso ese ita ia hadibaia, ia gwau: “Oi guriguri neganai oiemu ruma dekenai oi vareai, iduara oi koua, oiemu Tamana, hunia gabuna ia noho dekenai do oi guriguri henia. . . . Inai bamona do umui guriguri: ‘Aiemai Tamana e, guba dekenai oi noho, oiemu ladana do ai hahelagaia.’ ” (Mataio 6:6, 9) Baibel ena lalohadai be inai: Namona be heduru totona aneru ita noidia lasi bona idia ita guriguri henia lasi, to aneru ia Havaraia Tauna, Dirava sibona, ita guriguri henia. Ena ladana be hunia gauna lasi, bona unai ladana ita diba totona matahanai abia tauna ena heduru be anina lasi. Ena be haida ese Dirava ena ladana idia hunia toho, to Baibel lalonai, nega 7,000 bamona ia hedinarai. Hegeregere, salamo torea tauna ese guba Tamana ia herevalaia neganai, ia gwau: “Do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”​—Salamo 83:18.

Iehova be nega iboudiai ia kamonai bema dala maorona ai ia ita guriguri henia. Baibel ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”​—2 Sivarai 16:⁠9.

Aneru Bona Kara Maoromaoro Taravatudia

Ena be buka bona magasin momo idia hahedinaraia aneru ese taunimanima idia hahemaoro henia, to unai be momokani lasi. Ia maoro lasi, badina idia ese taunimanima hahemaoro henia siahuna idia abia lasi. Iehova be “taunimanima ibounai edia Kota Biaguna Badana,” ena be “kota henia ena siahu ibounai iena Natuna,” Iesu Keriso, dekenai ia henia vadaeni. (Heberu 12:23; Ioane 5:​22) To, ita kerere bema ita laloa aneru ese iseda mauri dalana idia laloa lasi. Iesu ia gwau: “Dika tauna ta ena lalona ia giroa dainai, Dirava ena aneru be unai bamona do idia moale.”​—Luka 15:10.

To, aneru idia gini kava lasi. Gunaguna, davana henia taudia bamona, idia ese Dirava ena hahemaoro karadia idia karaia. Hegeregere, Dirava ese Aigupito taudia ia hahemaoro henia neganai, aneru ia gaukaralaidia. Salamo 78:49 hegeregerena, “ia ese iena badu bona iena dagedage, be idia edia latanai ia bubua diho. Ia ese idia ia hisihisi henidia momokani. Iena mase havaraia aneru orea ta idia dekenai ia siaia.” Unai bamona danu, Baibel ia gwau hanuaboi ta lalonai aneru ta ese Asuria tuari taudia 185,000 ia hamasea.​—2 King Taudia 19:35.

Unai hegeregerena, vaira negana ai, Dirava ena kara maoromaoro taravatudia idia badinaia lasi karana amo, ma haida edia namo idia hadikaia taudia be aneru ese do idia hadikaia ore. Unai do ia vara Iesu be “iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”​—2 Tesalonika 1:7, 8.

Unai dala ai Baibel ese ia hahedinaraia Dirava idia badinaia anerudia be nega ibounai ena ura idia karaia bona ena kara maoromaoro taravatudia idia abia isi. Ia hedinarai goevagoeva, bema ita ura Dirava ena aneru ese ita do idia durua, namona be Dirava ena ura ita diba bona ita hekwarahi ita badinaia totona.

Taunimanima Idia Naria Anerudia

Aneru be taunimanima idia laloa bona idia naria, a? Aposetolo Paulo ia henanadai, ia gwau: “Aneru ibounai be Dirava ena hesiai gaukara laumadia, ani? Dirava ese idia ia siaia lao, mauri do idia abia taudia durua totona.” (Heberu 1:14) Ia hedinarai goevagoeva, Paulo ia gwauraia henanadai ena haere be, Oibe.

Heberu tatau matamatadia toi, Sataraka, Misaka, bona Abetenigo be Babulonia ena King Nebukanesa ese ia haginia golo kaivakukuna vairanai idia tui diho lasi dainai, idia hasiahua momokani lahina dekenai idia negea. To, lahi ese Dirava ena kamonai hesiai taudia ia hadikaia lasi. King be lahi dekenai ia raraia neganai, “tau 4” ia itaia, bona ia gwau “tau namba 4 ena toana be dirava ena natuna ta bamona.” (Daniela 3:​25) Lagani haida murinai, Daniela ena kamonai karana dainai, laiona edia guri lalonai idia negea. Ia danu be dika ia davaria lasi bona ia gwau: “Dirava ese iena aneru ia siaia mai, laiona edia uduna ia koua.”​—Daniela 6:⁠22.

Aposetolo taudia edia negai, Keriso murinai idia raka taudia edia kongregesen idia haginia neganai, aneru idia hedinarai lou, dibura amo aposetolo taudia idia ruhaia. (Kara 5:​17-​24; 12:​6-​12) Bona Paulo be davara dekenai kahirakahira ia mase neganai, aneru ese ia hagoadaia ia gwau dika do ia davaria lasi to Roma dekenai do ia ginidae.​—Kara 27:​13-​24.

Hari inai negai idia noho Iehova Dirava ena hesiai taudia idia diba momokani, matana amo ita itaia diba lasi Dirava ena aneru oreadia idia noho bona taunimanima idia durua diba, Elisaia bona ena hesiai tauna idia durua hegeregerena. (2 King Taudia 6:​15-​17) Momokani, “Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.”​—Salamo 34:7; 91:11.

Aneru ese Idia Mailaia Sivaraina

Aneru ese Iehova Dirava idia hesiai henia taudia edia namo idia laloa bada, bona danu, dala idia karaia taunimanima ese Dirava bona ena ura do idia diba totona. Aposetolo Ioane ia gwau: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada.’ ”—Apokalupo 14:6, 7.

Oi ura unai “noho hanaihanai Sivarai Namona” oi dibaia, a? Bema oi ura, Iehova ena Witness taudia mani oi noia. Mai edia moale ida oi do idia hadibaia.

[Pictures on page 7]

Guba ataiai ia roho aneruna ese noho hanaihanai Sivarai Namona ia gwauraia hedinarai. Oi ura unai sivarai oi dibaia, a?