Dirava ida Ita Raka—Kara Ginigunadia
“Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”—IAMESI 4:8.
1, 2. Dahaka dainai oi gwau diba Iehova ena hesiai gaukara ita karaia be hahenamo bada hereana?
INAI tau be lagani momo lalodiai dibura rumana dekenai hisihisi ia ania. Bena idia hamaoroa unai tano ena lohia tauna vairanai do ia hedinarai. Kara idauidau idia vara haraga. Vadaeni, unai dibura tauna be tanobada dekenai siahu bada herea pavapavana totona ia gaukara. Unai dibura tauna gunana be dagi badana ia abia bona idia matauraia bada. Iosepa—guna seini amo ena aena idia guia tauna—be hari king ida ia raka!—Genese 41:14, 39-43; Salamo 105:17, 18.
2 Hari inai negai, taunimanima be mai edia dala Aigupito edia Farao ia hereaia momokani tauna ta ena hesiai gaukara idia karaia totona. Tanobada bona guba edia Atai Herea Lohiana be ita ibounai ia boiria iena hesiai gaukarana ita karaia totona. Unai bamona ita karaia bona Iehova, siahu ibounai Diravana, ida iseda hetura karana ita hanamoa momokani be hahenamo bada hereana! Baibel lalonai, siahu bona hairai bada herea, maino, bona kara manada amo iena toana bona kara idia herevalaia. (Esekiela 1:26-28; Apokalupo 4:1-3) Iena kara ibounai lalonai lalokau ia noho. (1 Ioane 4:8) Ia koikoi diba lasi. (Numera 23:19) Bona Iehova be ia idia badinaia taudia do ia rakatania lasi. (Salamo 18:25) Iena kara maoromaoro taravatudia ita badinaia karana amo, moale bona mauri mai anina ita davaria diba, bona iseda helaro be do ita mauri hanaihanai. (Ioane 17:3) Tanobada ena lohia ma ta be unai bamona hahenamo ia henia diba lasi.
3. Edena dala ai Noa be ‘Dirava danu ia raka’?
3 Idaunegai, bese kwarana tauna Noa be ena lalona ia hadaia Dirava ena ura bona palani hegeregerena do ia noho. Baibel ese ia herevalaia, ia gwau: “Noa be kara namo tauna, ia tamona sibona dekenai Dirava ia moale. Ia be Dirava danu ia [raka], turana hegeregere.” (Genese 6:10) Momokani, Noa be Iehova ida ia raka korikori lasi, badina be tau ta ese “Dirava ia itaia lasi.” (Ioane 1:18) Lasi, to Noa be Dirava ida ia raka ena anina be Dirava ese ia hamaoroa karadia ia karaia. Noa ese Iehova ena ura karaia totona ena mauri ia henia dainai, Siahu Ibounai Diravana ida ia hetura namo herea. Noa hegeregerena, hari inai negai, taunimanima milioni momo be Iehova ena sisiba bona hakaua hereva hegeregerena idia noho, unai dala amo ‘Dirava danu idia raka.’ Ta ese unai dala be edena bamona ia badinaia matamaia diba?
Diba Maoromaoro be mai Anina Bada
4. Iehova ese ena orea taudia be edena bamona ia hadibaia?
4 Iehova ida ita raka totona, gau ginigunana be ia ita diba. Peroveta tauna Isaia ia gwau: “Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororona be ia ese, ororo ibounai do ia hereaia. Bese ibounai ese ia dekenai do idia haboua lao. Bona edia taunimanima do idia gwau, ‘Umui mai, Lohiabada ena ororo dekenai do ita daekau, Israela ena Dirava ena Dubu Helaga dekenai do ita lao. Ia ese iena kara ita dekenai do ia hadibaia, bona ita ese unai Dirava ena dala dekenai do ita raka. Badina be Lohiabada ena hadibaia hereva, be Ierusalema dekena amo ia mai noho. Siona dekena amo Lohiabada ese, iena bese taudia dekenai ia hereva henia noho.’ ” (Isaia 2:2, 3) Oibe, mai abidadama ida ita gwau diba, Iehova ese iena dala ai idia ura idia raka taudia do ia hadibaia. Iehova ese ena Hereva, Baibel, ia henia bona ita ia durua ita lalo-pararalaia totona. Ia karaia dalana ta be “hesiai tauna mai ena kamonai, bona mai ena kara maoromaoro” ia gaukaralaia. (Mataio 24:45-47) Iehova ese “hesiai tauna mai ena kamonai” ia gaukaralaia, Baibel bukadia, Keristani heboudia, bona davana lasi Baibel stadi gaukarana amo, lauma dalanai hakaua sisiba namodia ia henia totona. Dirava ese ena lauma helaga amo ena orea taudia ia durua danu, iena Hereva idia lalo-pararalaia totona.—1 Korinto 2:10-16.
5. Dahaka dainai Baibel ena hereva momokani be dava bada gauna?
5 Ena be moni amo Baibel ena hereva momokani ita hoia lasi, to ia be dava bada gauna. Dirava ena Hereva ita stadilaia neganai, Dirava ena sivarai—iena ladana, iena kara, iena ura, bona taunimanima ia kara henidia dalana—ita diba. Bona mauri lalonai inai henanadai badadia edia haere ita dibaia danu: Dahaka dainai ita noho? Dahaka dainai Dirava ese hisihisi ia koua lasi? Vaira neganai dahaka do ia vara? Dahaka dainai ita buruka bona ita mase? Mase murinai maurina ta ia noho, a? Danu, ita diba Dirava ena ura ita dekenai be dahaka, anina be, edena bamona do ita raka iena lalona ita hamoalea totona. Ita lalo-parara iena taravatu be metau lasi bona bema ita badinadia namonamo, edia namo be bada herea. Bema Dirava ena hakaua dalana be lasi, unai gaudia do ita lalo-pararalaia diba lasi.
6. Baibel amo diba maoromaoro ita abia dainai, edena dala ita badinaia diba?
6 Baibel ena hereva momokani be mai ena siahu bona ita ia veria eda mauri lalonai gau haida do ita haidaua totona. (Heberu 4:12) Baibel amo diba ita do abia lasi neganai, ita be “inai tanobada ena kara dika dalana” dekenai ita raka sibona. (Efeso 2:2) To Dirava ena Hereva ena diba maoromaoro ese ita dekenai dala idauna ta ia hahedinaraia, unai amo ita be ‘Iehova ena ura hegeregerena do ita raka, bona nega ibounai ita ese ia do ita hamoalea.’ (Kolose 1:10) Tanobada bona guba ibounai dekenai hairai momokani Tauna, Iehova, ida ita raka karadia ginigunadia ita karaia be moale bada ia havaraia!—Luka 11:28.
Mai Anina Bada Karadia Rua—Gwauhamata Bona Bapatiso
7. Dirava ena Hereva ita stadilaia neganai, edena hereva momokanina taunimanima edia lohia karana dekenai ia hedinarai?
7 Baibel dekenai iseda lalo-parara ia bada ia lao neganai, Dirava ena Hereva ena lauma diarina lalonai taunimanima edia kara bona iseda mauri dalana ita laloa namonamo. Mai anina bada hereva momokanina ta ia hedinarai goevagoeva. Unai hereva momokani be idaunegai peroveta tauna Ieremia ese ia torea, ia gwau: “Lohiabada e, lau diba taunimanima edia mauri dalana be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Taunimanima—ita ibounai—be Dirava ese ia hakaua be gau badana.
8. (a) Dahaka ese taunimanima ia veria Dirava dekenai gwauhamata idia karaia totona? (b) Keristani gwauhamata ena anina be dahaka?
8 Unai mai anina bada hereva momokanina ita lalo-pararalaia ese iseda lalona ia hamarerea Iehova ena hakaua dalana ita tahua totona. Bona Dirava lalokau henia karana ese ita ia veria ia dekenai iseda mauri ita gwauhamatalaia totona. Dirava gwauhamata henia karana ena anina be guriguri amo ia ita hereva henia bona ita gwauhamata, iseda mauri do ita gaukaralaia iena hesiai gaukara ita karaia totona bona mai abidadama ida iena dala ai ita raka totona. Unai bamona ita karaia neganai, Iesu ena haheitalai ita tohotohoa. Iehova dekenai sibona ena mauri ia henia neganai, ena lalona ia hadaia goada Dirava ena ura do ia karaia.—Heberu 10:7.
9. Dahaka dainai taunimanima ta ta be Iehova dekenai edia mauri idia gwauhamatalaia?
9 Iehova Dirava ese tau ta ia doria eiava ia hagaria lasi Ia dekenai ena mauri ia gwauhamatalaia totona. (2 Korinto 9:7 itaia.) Danu, Dirava ia laloa lasi ta ese Ia dekenai ena mauri do ia gwauhamatalaia badina nega kwadogi sibona lalonai hemami idauna ta ia abia. Ta ia do bapatiso lasi neganai, namona be ia be hahediba tauna ta vadaeni, bona unai ena anina be diba ia abia totona mai ena ura bada ida ia gaukara goada. (Mataio 28:19, 20) Paulo ese idia bapatiso vadaeni taudia ia noia namona be ‘edia tauanina do idia henia, boubou gauna mai mauri bona mai helaga, Dirava ese ia moalelaia gauna; edia hesiai gaukara helagana, mai edia darana ida idia karaia gaukarana, be unai.’ (Roma 12:1, NW) Iseda darana be unai bamona ita gaukaralaia karana amo Iehova Dirava dekenai iseda gwauhamata ita karaia. Unai kara ena anina ita dibaia bona ita laloa namonamo murinai, mai eda ura bona mai eda moale ida Dirava dekenai eda mauri ita gwauhamatalaia.—Salamo 110:3.
10. Gwauhamata karana be edena dala ai bapatiso danu ita hakapua diba?
10 Ita ta ta sibona ita noho negana ai, guriguri amo Dirava ita hereva henia bona ita hamaoroa iseda lalona ita hadaia iena dala ai do ita raka murinai, kara iharuana ita karaia. Iseda gwauhamata be taunimanima vairanai ita hahedinaraia, ranu lalonai ita bapatiso karana amo. Unai kara amo taunimanima ita hamaoroa ita be Dirava ena ura karaia totona ita gwauhamata vadaeni. Tanobada dekenai Iesu ena hesiai gaukara ia matamaia neganai, Ioane ese ia bapatisoa, unai amo do ita tohotohoa karana ta ia hahedinaraia. (Mataio 3:13-17) Gabeai, Iesu ese ia murinai idia raka taudia ia hagania, hahediba taudia halaoa gaukarana idia karaia bona unai taudia idia bapatisoa. Unai dainai, Iehova ida idia ura idia raka taudia dekenai gwauhamata bona bapatiso be kara badadia.
11, 12. (a) Edena dala ai bapatiso be headava ida ita hahegeregerea diba? (b) Iseda hetura karana Iehova ida bona tau ta mai ena hahine ida edia hetura karana be edena bamona ita hahegeregerea diba?
11 Iesu Keriso ena hahediba tauna, gwauhamata bona bapatiso tauna ta, ai ita lao be headava karana bamona. Tano momo ai, headava dinana ia do mai lasi neganai, kara haida idia vara. Tau bona hahine idia hedavari, idia diba heheni, bena idia lalokau heheni. Unai murinai maoheni idia karaia. Headava idia karaia neganai, taunimanima edia vairanai idia sibona edia huanai idia abia hidi gauna—do idia headava bona headava tau bona ena hahine hegeregerena do idia noho hebou—idia hahedinaraia. Headava dinana ese taunimanima ibounai vairanai ia hahedinaraia unai turana karana idauna ia matamaia. Unai dina be edia headava maurina ia hamatamaia dinana. Unai hegeregerena, bapatiso be Iehova dekenai ta ena mauri ia gwauhamatalaia bona ia ida ia raka hebou maurina ia hamatamaia toana.
12 Dala ma ta ai mani ita hahegeregerea. Edia headava dinana murinai, tau bona ena hahine edia lalokau do ia bada bona ia goada be namo. Idia ruaosi idia hetura namonamo totona, namona be headava taudia ruaosi be sibona edia ura dadaraia dalana ai idia gaukara goada edia headava idia hanamoa bona hagoadaia totona. Ena be Dirava ida headava ta ita karaia lasi, to ita bapatiso murinai, namona be ita gaukara goada Iehova ida eda hetura karana ita hagoadaia totona. Iseda hekwarahi ia itaia bona ia laloa bada dainai ita kahirakahira dekenai ia mai. Hahediba tauna Iamesi ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”—Iamesi 4:8.
Iesu Ena Aena Gabudia Dekenai Ita Raka Noho
13. Dirava ida ita raka noho lalonai, daika ena haheitalai ita tohotohoa be namo?
13 Iehova ida ita raka totona, namona be Iesu Keriso ena haheitalai ita badinaia namonamo. Aposetolo Petero ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Petero 2:21) Iesu be goevadae tauna bona ita be goevadae lasi taudia dainai, iena haheitalai ita tohotohoa goevagoeva diba lasi. To, Iehova ia ura ita karaia diba hegeregerena do ita karaia. Mani Iesu ena mauri bona ena haroro gaukara lalonai ia karaia karadia ima ita laloa, gwauhamata Keristani taudia ese do idia tohotohoa karadia unai.
14. Dirava ena Hereva ita dibaia ena anina be dahaka?
14 Iesu be Dirava ena Hereva ia diba maoromaoro bona ia diba goevagoeva. Iesu ena haroro gaukarana lalonai, nega momo Heberu Revarevadia edia hereva ia gwauraia lou. (Luka 4:4, 8) Momokani, unai nega lalonai idia noho tomadiho gunalaia taudia dikadia danu be Baibel ena hereva idia gwauraia lou. (Mataio 22:23, 24) To edia idau be Iesu ia lalo-parara unai Baibel siridia edia anina be dahaka, bona iena mauri lalonai ia badinaia. Taravatu ena hereva ia diba sibona lasi, to ena anina korikorina danu ia diba. Keriso ena haheitalai ita tohotohoa lalonai, namona be ita hekwarahi Dirava ena Hereva ita lalo-pararalaia bona ena anina korikorina ita diba totona. Unai bamona ita karaia neganai, ita be Dirava ese ia lalo-namo henia gaukara taudia ai ita lao diba, bona ‘hereva momokani do ita hadibaia maoromaoro’ diba.—2 Timoteo 2:15.
15. Dirava herevalaia karana dekenai, Iesu ena haheitalai be edena bamona?
15 Iesu Keriso be ma haida dekenai iena guba Tamana ia herevalaia. Iesu ena diba Dirava ena Hereva dekenai be ia sibona ese ia dogoatao lasi. Iena inai taudia danu ese ia idia gwauraia “Hadibaia tauna,” badina be ia lao gabudia ibounai dekenai Iehova bona Iena ura ia herevalaia. (Mataio 12:38) Iesu be dubu helaga ai, tomadiho rumadia ai, hanua lalodiai, bona hanua murimuridiai taunimanima ia haroro henia. (Mareko 1:39; Luka 8:1; Ioane 18:20) Hebogahisi dalana ai taunimanima ia hadibaia, bona ia durua taudia ia lalokau henidia. (Mataio 4:23) Iesu ena haheitalai idia tohotohoa taudia danu be gabu momo bona dala momo idia davaria, ma haida dekenai Iehova Dirava bona iena ura namo hereana idia hadibaia totona.
16. Iesu ena hetura karana Iehova idia tomadiho henia taudia ma haida ida be edena bamona?
16 Iesu be Iehova idia tomadiho henia taudia ida ia hetura namonamo. Nega ta ai Iesu be taunimanima hutuma ia hereva henidia lalonai, iena sinana bona ena abidadama lasi tadikaka korikoridia idia mai ia idia hereva henia totona. Baibel ena sivarai ia gwau: “Tau ta ese ia hamaoroa, ia gwau, ‘Oiemu sinana bona oiemu tadina be unai, murimuri dekenai idia gini noho, oi dekenai idia hereva gwauraia.’ To Iesu ia haere, ia gwau, ‘Lauegu sinana bona lauegu tadina be daika?’ Vadaeni iena diba tahua taudia dekenai imana ia duduia, ia gwau, ‘Lauegu sinana bona lauegu tadina be inai. Badina be lauegu Tamana, guba dekenai ia noho, ena ura idia karaia taudia, idia sibona be lauegu tadina, bona lauegu taihuna bona lauegu sinana.’ ” (Mataio 12:47-50) Ita gwau lasi unai ena anina be Iesu ese ena ruma bese taudia ia dadaraia, badina gabeai idia vara karadia ese idia hahedinaraia ia dadaraidia lasi. (Ioane 19:25-27) To, unai sivarai ese Iesu ena lalokau ena abidadama tadikaka dekenai ia hahedinaraia badabada. Unai hegeregerena, hari inai negai, Dirava ida idia raka taudia be Iehova ena hesiai taudia ma haida edia hebamo idia ura henia bona edia lalokau idia dekenai ia bada ia lao.—1 Petero 4:8.
17. Iesu ena lalohadai iena guba Tamana ena ura karaia dekenai be edena bamona, bona unai ena anina ita dekenai be dahaka?
17 Iesu be Dirava ena ura ia karaia amo, ia hahedinaraia iena guba Tamana ia lalokau henia. Gau iboudiai dekenai Iesu ese Iehova ia kamonai henia. Ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Keriso be ma ia gwau: “[Dirava ena] ura be nega ibounai lau karaia.” (Ioane 8:29) Iesu ese ena guba Tamana ia lalokau henia bada herea dainai, ‘ia manau momokani bona Dirava ia kamonai henia ela bona ia mase, oibe, satauro dekenai ia mase.’ (Filipi 2:8) Unai dainai, Iehova ese Iesu ia hanamoa, bona ia abia isi siahu bona hemataurai dagi bada iharuana, Iehova sibona ena henunai, ia henia. (Filipi 2:9-11) Iesu hegeregerena, Dirava ena hahegani ita badinaia bona ena ura ita karaia amo, iseda lalokau Dirava dekenai ita hahedinaraia.—1 Ioane 5:3.
18. Edena dala ai guriguri karana dekenai Iesu ese haheitalai namona ia hahedinaraia?
18 Iesu be guriguri momo tauna. Ena bapatiso negana ai ia guriguri. (Luka 3:21) Iena aposetolo taudia 12 ia do abia hidi lasi neganai, unai hanuaboi ibounai lalonai ia guriguri. (Luka 6:12, 13) Iesu be ena hahediba taudia dekenai guriguri dalana ia hadibaia. (Luka 11:1-4) Ia do mase lasi hanuaboina ai, ena hahediba taudia dainai bona idia ida ia guriguri. (Ioane 17:1-26) Guriguri be mai anina bada karana ta Iesu ena mauri lalonai, bona namona be iseda mauri lalonai unai be mai anina bada gauna danu, badina ita be iena murinai ita raka taudia. Guriguri amo Guba bona Tanobada edia Lohia Badana ita hereva henia be hahenamo badana! Danu, Iehova ese guriguri ia haere henidia, badina Ioane ia gwau: “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai. Bona ita diba iseda noinoi ibounai ia kamonai dainai, ita diba danu ita noia gaudia do ita abia.”—1 Ioane 5:14, 15.
19. (a) Edena kara, Iesu ese ia hahedinaraia karadia, do ita tohotohoa be namo? (b) Iesu ena mauri dalana bona ena haroro gaukarana ita stadilaia ese edena dala ai ita do idia durua?
19 Iesu Keriso ena mauri bona ena haroro gaukara tanobada dekenai ita laloa namonamo neganai, gau momo herea do ita dibaia! Ia hahedinaraia kara namodia mani oi laloa: lalokau, hebogahisi, kara namo, lalo-goada, laloa maoromaoro, laloa namonamo, manau, gari lasi, bona sibona ena ura dadaraia karana. Iesu ena sivarai ma haida ita diba noho neganai, iena murinai idia raka abidadama taudia ai do ita lao urana danu ia bada ia lao. Danu, Iesu ita diba karana be Iehova kahirakahira dekenai ita ia hakaua lao. Oibe, Iesu be ena guba Tamana ena toana ia hahedinaraia goevagoeva tauna. Ia be Iehova ida ia hetura namo herea dainai, ia gwau diba: “Lau ia itaia tauna ese egu Tamana danu ia itaia.”—Ioane 14:9.
Dirava Oi Abidadama Henia Oi Ia Hagoadaia Noho Totona
20. Iehova ida ita raka lalonai, edena dala ai lalo-goada ita abia diba?
20 Natu maragidia idia raka matamaia neganai, edia raka karana ia goada lasi. Edena dala ai mai edia lalo-goada ida unai raka dalana idia dibaia? Idia karaia loulou bona idia hesiku lasi karana amo. Momokani, Iehova ida idia raka taudia be idia hekwarahi, mai lalo-goada ida idia raka goada totona. Unai ena anina danu be edia nega idia gaukaralaia bona idia hesiku lasi. Paulo ese inai hereva ia torea neganai, ia hahedinaraia Dirava ida ita raka lalonai ita hesiku lasi be mai anina bada, ia gwau: “Aiemai varavara taudia e, edena bamona do umui mauri Dirava hamoalea totona dalana, be umui dekenai ai hadibaia vadaeni. Oibe, bona inai mauri dalana umui badinaia noho. To hari Iesu ena ladana dainai, umui ai noia goadagoada, taunimanima edia vairanai, inai bamona mauri namona kara do umui habadaia.”—1 Tesalonika 4:1.
21. Iehova ida ita raka lalonai, dahaka hahenamo ita moalelaia diba?
21 Bema mai eda lalona ibounai ida Dirava ita badinaia momokani, ita do ia durua ia ida ita raka noho totona. (Isaia 40:29-31) Ia ese ia ida idia raka taudia dekenai ia henia hahenamo idauidau be inai tanobada ese ia henia toho gaudia ta ida ita hahegeregerea diba lasi. Ia ese ‘iseda namo habadaia dalana be ita dekenai ia hadibaia noho. Iseda raka dalana namona dekenai ita ia hakaua noho. Iena oda hereva bema ita kamonai henia neganai, iseda noho be do ia namo, mai maino danu, sinavai hegeregerena, bona iseda kara maoromaoro be goada, davara ena hurehure bamona.’ (Isaia 48:17, 18) Dirava ida ita raka totona ita ia boiria herevana bema ita abia dae bona mai eda kamonai ida ita badinaia, ia ida maino ai ita noho diba ela bona hanaihanai.
Edena Bamona Do Oi Haere?
◻ Dahaka dainai Dirava momokanina ida ita raka be hahenamo ta?
◻ Dahaka dainai Iehova ida ita raka karana lalonai stadi, gwauhamata, bona bapatiso be kara ginigunadia?
◻ Edena dala ai Iesu ena aena gabudia ai ita raka diba?
◻ Edena bamona ita diba Iehova ida ita raka lalonai ia ese ita do ia hagoadaia noho?
[Pictures on page 13]
Dirava ida ita raka karana lalonai, stadi, gwauhamata, bona bapatiso be kara ginigunadia