Mauri Hanaihanai Ia Lao Henia Dalana Tamona
“Dala be lau, hereva momokani be lau, mauri danu lau.”—IOANE 14:6.
1, 2. Iesu ese mauri hanaihanai lao henia dalana be dahaka ida ia hahegeregerea, bona unai haheitalai ena anina be dahaka?
IESU ena Hereva Badana Ororo dekenai ia henia neganai, ia ese mauri hanaihanai lao henia dalana be tau ta ese geiti ta lalonai ia vareai dalana ta ida ia hahegeregerea. Oi itaia, Iesu ese ia hahedinaraia unai mauri lao henia dalana be ia haraga lasi. Ia gwau: “Iduara maragina dekenai do umui raka vareai. Badina be [mase dekenai] ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai. To mauri [hanaihanai] gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.”—Mataio 7:13, 14.
2 Unai haheitalai ena anina oi lalo-pararalaia, a? Ia hahedinaraia mauri hanaihanai ia lao henia dalana be tamona, bona ita gaukara goadagoada be namo unai dala ita rakatania lasi totona, ani? Vadaeni, mauri hanaihanai ia lao henia dala tamona be dahaka?
Iesu Keriso Ena Gaukara
3, 4. (a) Baibel ese Iesu ena gaukara ita ia hamauria totona be edena bamona ia gwauraia? (b) Dirava ese taunimanima be mauri hanaihanai idia abia diba herevana be edena negai ia hahedinaraia?
3 Ia hedinarai goevagoeva, unai dala dekenai Iesu be mai anina bada gaukarana ia karaia, iena aposetolo Petero ia hereva hegeregerena: “Hamauria be Iesu sibona ese ia henia diba taunimanima dekenai. Badina be tanobada ibounai lalonai, ladana idauna ta Dirava ese ia henia lasi [to Iesu sibona ena], ita do ia hamauria totona.” (Kara 4:12) Unai hegeregerena, aposetolo Paulo ia gwau: “Dirava ena harihari gauna davana lasi be mauri hanaihanai, Iesu Keriso iseda Lohiabada lalonai.” (Roma 6:23) Iesu sibona ese ia hahedinaraia mauri lao henia dalana be ia sibona amo, badina ia gwau: “Dala be lau, hereva momokani be lau, mauri danu lau.”—Ioane 14:6.
4 Unai dainai Iesu ena gaukara unai mauri hanaihanai dalana kehoa totona ita abia dae be gau badana. Vadaeni, namona be ena dagi o gaukara ita tahua namonamo. Adamu ia kara dika murinai, oi diba edena negai Iehova Dirava ese taunimanima be mauri hanaihanai do idia abia lou herevana ia hahedinaraia, a? Maoromaoro Adamu ia kara dika negana murinai. Namona be hari ita tahua, nega ginigunana ai Iesu Keriso be taunimanima edia Hamauria Tauna ai do ia lao dalana be edena bamona idia gwauraia.
Gwauhamata Garana
5. Heva ia koia gaigaina ena toana korikorina be edena bamona ita dibaia diba?
5 Iehova Dirava ese ia gwauhamatalaia Hahemauri Tauna be laulau dalanai ia gwauraia hedinarai. Iehova ese unai “gaigai,” Heva ia hereva henia bona ia veria Dirava ese ia taravatua au huahuana ia ania gaigaina, ia hahemaoro henia neganai, unai ia karaia. (Genese 3:1-5) Momokani, unai gaigai be gaigai korikorina lasi. Ia be mai ena siahu aneru ta, Baibel ese ia gwauraia “idaunegai gaigaina, bona iena ladana be Diabolo bona Satani.” (Apokalupo 12:9) Satani ese unai animal ena uduna ia gaukaralaia, Heva ena lalona ia veria totona. Unai dainai, Satani ia hahemaoro henia neganai, Dirava ese ia hamaoroa: “Bona lau ese badu oi bona hahine ihuanai do lau atoa bona oiemu garana bona iena garana ihuanai. Ia [hahine ena garana] ese emu kwarana do ia haberoa bona oi ese iena aena geduna do oi haberoa.”—Genese 3:15, NW.
6, 7. (a) “Garana” ia havaraia hahinena be daika? (b) Unai gwauhamata Garana be daika, bona dahaka ia karaia?
6 Unai “hahine,” Satani ese ia tuari henia o ia inai henia hahinena, be daika? Apokalupo karoa 12 ese “idaunegai gaigaina” ia hahedinaraia hegeregerena, Satani ese ia inai henia hahinena ia hahedinaraia danu. Mani oi itaia, siri 1 dekenai ia gwau “iena dabua be dina, bona hua be iena aena henunai ia noho, bona hisiu 12 ese iena kwarana idia hagegea.” Unai hahine ese Dirava ena guba oreana, ena abidadama anerudia, ia laulaulaia, bona ia havaraia “mero” be Dirava ena Basileia, King Iesu Keriso ese ia lohiaia Basileiana, ia laulaulaia.—Apokalupo 12:1-5.
7 Vadaeni, Genese 3:15 ese ia herevalaia garana, o hahine ena natuna, Satani ena “kwarana” do ia haberoa bona ia hamasea tauna be daika? Ia be Dirava ese guba amo ia siaia tauna, rami-hebou kekenina dekena amo hoa dalanai ia vara tauna unai. Oibe, unai tau be Iesu. (Mataio 1:18-23; Ioane 6:38) Apokalupo karoa 12 ese ia hahedinaraia unai Garana, Iesu Keriso, be ia toreisi lou bona guba dekenai ia lohia neganai, ia ese Satani hamorua karana do ia biagua, bena Apokalupo 12:10 ia hereva hegeregerena, “harihari iseda Dirava ena [“basileia,” NW] ia ginidae vadaeni. Harihari iena Keriso ese iena siahu ia hedinaraia vadaeni.”
8. (a) Dirava ese dahaka gau matamatana ia haginia iena ura ia hagugurua totona? (b) Daidia be Dirava ena gavamani matamatana lalonai do idia lohia?
8 Unai Basileia, Iesu Keriso ena imana dekenai, be Dirava ese ia hegaegaelaia gauna matamatana. Iena ura be taunimanima be tanobada dekenai mauri hanaihanai do idia moalelaia, bona unai Basileia amo ena ura do ia hagugurua. Satani ia gwau-edeede murinai, maoromaoro Iehova ese kara dika ibounai do ia hanamoa dalana ia haginia, iena Basileia gavamani matamatana unai. Iesu be tanobada ai ia noho neganai, ia hahedinaraia unai gavamani lalonai ia sibona do ia lohia lasi. (Luka 22:28-30) Dirava ese tanobada taudia ma haida do ia abia hidi, idia be Iesu danu guba dekenai do idia noho bona do idia lohia hebou, unai amo hahine ena garana ena kahana iharuana ai do idia lao. (Galatia 3:16, 29) Baibel lalonai Iesu ida do idia lohia taudia—iboudiai be tanobada ena kara dika taudia amo ia abidia hidi—edia namba ia gwauraia, idia be 144,000.—Apokalupo 14:1-3.
9. (a) Dahaka dainai Iesu be tanobada dekenai ia hedinarai be mai anina bada? (b) Iesu be edena dala ai Diabolo ena gaukara ia haorea?
9 To unai Basileia ia do lohia matamaia lasi neganai, gau badana be unai Garana ena kahana badana, Iesu Keriso, be tanobada dekenai do ia hedinarai. Dahaka dainai? Badina Iehova Dirava ese ia abia hidi “Satani ena kara dika do ia haorea [eiava, hanamoa] momokani totona.” (1 Ioane 3:8) Satani ena gaukara ta be Adamu ena lalona ia veria do ia kara dika totona, bona unai ese kara dika bona mase ia mailaia Adamu ena bese taudia ibounai dekenai. (Roma 5:12) Iesu ese Diabolo ena gaukara ia haorea o ia hanamoa dalana be Iena mauri Ia henia mauri davalaia gauna bamona. Unai amo ia ese taunimanima be kara dika bona mase amo ia ruhaia bona mauri hanaihanai abia dalana ia kehoa.—Mataio 20:28; Roma 3:24; Efeso 1:7.
Mauri Davalaia Boubouna ese Ia Karaia Gaudia
10. Iesu bona Adamu be edena bamona idia hegeregere?
10 Dirava ese Iesu ena mauri be guba amo ia kokia bona hahine ta ena bogana lalonai ia atoa dainai, ia vara neganai ia be tau goevadaena, Adamu ena kara dika ia abia lasi. Tanobada dekenai ia mauri hanaihanai diba. Unai hegeregerena, Dirava ese Adamu ia havaraia neganai ia be tau goevadaena, bona tanobada dekenai ia mauri hanaihanai diba. Aposetolo Paulo ese unai taudia rua idia hegeregere dalana ia laloa, inai ia torea neganai: “ ‘Tau ginigunana, Adamu, be Dirava ese ia karaia, taunimanima edia mauri ia abia.’ To Adamu dokona [Iesu Keriso], gabeai ia mai Tauna be mauri hanaihanai ia henia Laumana. Adamu ginigunana be tano kahuna dekena amo Dirava ese ia karaia, bona ia be tanobada dekena amo. To Adamu iharuana be guba dekena amo ia mai.”—1 Korinto 15:45, 47.
11. (a) Adamu bona Iesu edia kara ese dahaka idia havaraia taunimanima dekenai? (b) Iesu ena boubou gauna be edena bamona ita laloa be namo?
11 Unai tatau rua—tanobada ibounai lalonai idia ruaosi sibona be goevadae taudia—idia hegeregere dalana be Baibel ese ia herevalaia, ia gwau Iesu be “iena mauri ia henia, taunimanima ibounai [“edia mauri davana korikorina ia henia,” NW] totona.” (1 Timoteo 2:6) Iesu ena mauri davana be daika ena mauri davana hegeregerena? Adamu ena hegeregerena, ia do goevadae neganai! Adamu ginigunana ena kara dika dainai taunimanima ibounai dekenai mase ia mailaia. “Adamu dokona” ena boubou ese kara dika bona mase amo ita ia ruhaia dalana ia henia, unai amo ita mauri hanaihanai diba. Iesu ena boubou be dava bada gauna! Aposetolo Petero ia gwau: “Umui ia hamauria ena davana be do idia dika ore gaudia, hegeregere siliva o golo, a? Lasi momokani.” To, Petero be ma ia gwau: “Umui ia hamauria gauna be Keriso ena rarana. Inai rara be davana bada herea gauna. Keriso be mamoe natuna goevagoeva momokani hegeregerena, ia be maka dikana ta lasi, bona toto ta lasi.”—1 Petero 1:18, 19.
12. Baibel ese mase ena hahemaoro herevana haorea karana be edena bamona ia gwauraia?
12 Baibel ese taunimanima iboudiai do idia mase hahemaoro herevana haorea dalana ia herevalaia namo herea, ia gwau: “Tau tamona [Adamu] ena kara dika ese taunimanima ibounai ia hadikaia. Unai bamona danu, tau tamona ena kara maoromaoro [Iesu ese Dirava ia badinaia hanaihanai ela bona ia mase] ese taunimanima ibounai edia kerere davana ia kokia, vadaeni mauri idia abia. Bona tau tamona [Adamu] ese Dirava ia kamonai henia lasi dainai, taunimanima momo be kara dika taudia idia halaoa, unai bamona danu, tau tamona [Iesu] ena kamonai dainai, taunimanima momo be do idia maoromaoro Dirava ena vairanai.”—Roma 5:18, 19.
Nega Vaira Hereadaena
13. Dahaka dainai momo idia ura lasi idia mauri hanaihanai?
13 Dirava ia henia gauna ese ita ia hamoalea bada be namo! Oi moale ia ese Hamauria Tauna ta ia henia dainai, a? America ena siti badana ta ena niuspepa ese tahua gaukara ta ia karaia bona inai henanadai, “Bema oi laloa oi mauri hanaihanai diba, unai ese oi ia hamoalea, a?” be taunimanima dekenai idia gwauraia neganai, idia haere taudia 67.4 pesen idia gwau, “Lasi.” Dahaka dainai idia gwau idia ura lasi idia mauri hanaihanai? Badina hari tanobada maurina idia laloa neganai, hekwakwanai momo idia laloa. Hahine ta ia gwau: “Reana, egu mauri lagani be 200 neganai, egu toana be do ia dika momokani bona lau ura lasi unai lau laloa.”
14. Dahaka dainai mauri hanaihanai do ita moalelaia momokani?
14 To, Baibel be taunimanima idia gorere, idia buruka idia lao, bona gau dikadia momo idia vara tanobadana ai mauri hanaihanai do ita abia ia herevalaia lasi. Lasi, badina Dirava ena Basileia ia lohia tauna, Iesu, ese Satani ia havaraia hekwakwanai ibounai do ia haorea. Baibel ena hereva hegeregerena, Dirava ena Basileia ese inai tanobada ena dagedage gavamani iboudiai “do ia hamakohia, bona haorea momokani.” (Daniela 2:44) Unai neganai, Iesu ese ia murinai idia raka taudia ia hadibaia gurigurina hegeregerena, Dirava ena “ura” be “tanobada dekenai do ia karaia, guba dekenai ia karaia bamona.” (Mataio 6:9, 10, Today’s English Version) Dirava ena tanobada matamata lalonai, dika ibounai be tanobada amo ia kokia murinai, Iesu ena mauri davalaia boubouna ena namo do ita abia badabada. Oibe, idia hegeregere taudia ibounai be gorere lasi, goevadae taudia ai do idia lao!
15, 16. Dirava ena tanobada matamatana lalonai mauri be edena bamona?
15 Iehova ena tanobada matamatana lalonai idia noho taudia dekenai inai Baibel herevana do ia momokani: “Tau ena tauanina, be do ia matamata lou, eregabe tauna bamona, bona iena uhau ena goada dinadia be ia davaria lou.” (Iobu 33:25) Baibel ena gwauhamata ma ta do ia guguru danu. “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada [ida] do idia boiboi.”—Isaia 35:5, 6.
16 Mani oi laloa: Herevana iseda mauri laganidia be 80, 800, eiava unai ia hanaia iseda tauanina do idia goada noho. Baibel ese ia gwauhamatalaia hegeregerena: “Idia noho taudia ta ese do ia gwau lasi, ‘Lau be gorere.’ ” Unai neganai inai gwauhamata do ia guguru danu: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Isaia 33:24; Apokalupo 21:3, 4.
17. Dirava ena tanobada matamatana lalonai taunimanima be dahaka do idia karaia diba?
17 Unai tanobada matamatana lalonai, iseda harana namona be iseda Havaraia Tauna ese ia havaraia hegeregerena do ita gaukaralaia diba, gau idauidau do ita dibaia diba karana be do ia doko lasi. Ita karaia diba gaudia namodia mani oi laloa! Goevadae lasi taudia ese tanobada dekenai ita itaia gaudia—cellular phones, saun gaudia, dina gaudia, pager, kompiuta, peleini, oibe, gau momo edia ladana oi gwauraia diba—be tanobada lalonai idia noho gaudia amo idia havaraia. Unai gaudia ibounai be gabu idauna ta amo idia abia gaudia amo idia karaia lasi. Tanobada Paradaisona lalonai ia doko lasi maurina do ita noholaia dainai, ita havaraia diba gaudia idauidau edia dokona be lasi!—Isaia 65:21-25.
18. Dirava ena tanobada matamatana lalonai, dahaka dainai mauri do ita hesikulaia lasi?
18 Bona iseda mauri do ita hesikulaia lasi. Ena be nega tausen tausen momo ita aniani vadaeni, to aniani negana ma ta ita naria mai eda moale ida, ani? Ita goevadae neganai, Paradaiso tanobadana ai idia tubu aniani mai edia mamina namona do ita moalelaia bada diba. (Isaia 25:6) Bona tanobada ena animal idauidau momo do ita naria bona dina ia diho negana ai ia hedinarai hairai namo hereana, ororo, sinavai, bona koura, edia hairai do ita moalelaia ela bona hanaihanai. Momokani, Dirava ena tanobada matamatana lalonai, iseda mauri do ita hesikulaia diba lasi!—Salamo 145:16, NW.
Dirava Ia Ura Gaudia Ita Karaia
19. Dahaka dainai ita abia dae Dirava ena harihari gauna, mauri, ita abia totona, kara haida do ita karaia be maoro?
19 Oi laloa Dirava ena harihari gauna badana, mauri hanaihanai paradaiso lalonai, do oi abia kava diba, a? Oi laloa Dirava ia ura kara haida do ita karaia be maoro, a? Oibe, unai be maoro. Dirava ese unai harihari gauna ia henia kava lasi ita dekenai. Ita dekenai ia henia, to namona be kara ta ita karaia ita abia totona. Ena anina be do ita hekwarahi. Reana, taga tauna matamatana ese Iesu dekenai ia henia henanadai do oi laloa danu, ia gwau: “Dahaka kara namona do lau karaia, mauri hanaihanai abia totona?” Eiava Filipi dibura naria tauna ta be aposetolo Paulo dekenai ia gwauraia henanadai hegeregerena do oi gwau: “Dahaka lau karaia Dirava ese lau do ia hamauria totona?”—Mataio 19:16; Kara 16:30.
20. Mauri hanaihanai ita abia totona, mai anina bada kara ta be dahaka?
20 Iesu ena hanuaboi ginigabena ai ena guba Tamana ia guriguri henia lalonai, kara ta ia gwauraia: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Iehova, mauri hanaihanai dalana ia karaia tauna, bona Iesu Keriso, ita totona ia mase tauna, ita dibaia be kara maorodia, ani? To, unai diba sibona ita abia be hegeregere lasi, kara ma haida ita karaia be namo.
21. Edena bamona ita hahedinaraia ita be abidadama karana ita hahedinaraia noho?
21 Baibel be inai ia gwauraia danu: “Dirava ena Natuna ia abidadama henia tauna ese mauri hanaihanai do ia abia.” Bena ia gwau: “Iena Natuna ia kamonai henia lasi tauna be mauri do ia itaia lasi, badina Dirava ena badu be iena latanai do ia noho.” (Ioane 3:36) Oi hahedinaraia diba oi be Natuna oi abidadama henia, bema oiemu mauri lalonai kara haida oi haidaua bona Dirava ena ura hegeregerena oi noho. Guna oi karaia kara kereredia do oi dadaraia bona Dirava idia hamoalea karadia do oi karaia. Aposetolo Petero ese ia gwauraia hahegani herevana do oi badinaia, ia gwau: “Inai dainai umui emui lalona umui giroa, bona Dirava ese emui kara dika do ia kokia. Gabeai Lohiabada ese goada matamata do ia henia umui dekenai.”—Kara 3:19.
22. Iesu ena aena gabudia dekenai ita raka ena anina be edena kara do ita karaia?
22 Namona be ita laloaboio lasi Iesu ita abidadama henia karana sibona amo mauri hanaihanai do ita moalelaia diba. (Ioane 6:40; 14:6) Iesu ena ‘aena gabudia dekenai do ita raka’ karana amo ita hahedinaraia ia ita abidadama henia. (1 Petero 2:21) Iesu murinai ita raka ena anina be dahaka? Iesu be Dirava dekenai ia guriguri neganai, ia gwau: “Dirava e, lau inai, oiemu ura gauna do lau karaia.” (Heberu 10:7) Iesu oi tohotohoa be gau badana. Anina be oi gwau Dirava ena ura do oi karaia bona oiemu mauri oi gwauhamatalaia Iehova dekenai. Unai murinai, namona be unai gwauhamata oi hamomokania bapatiso amo; Iesu danu be sibona ia lao bapatiso ia abia totona. (Luka 3:21, 22) Unai bamona oi karaia be kara maorona. Aposetolo Paulo ia gwau ‘Keriso ena lalokau ese ita ia biagua.’ (2 Korinto 5:14, 15) Edena dala ai? Lalokau ese Iesu ia doria dainai, ita totona iena mauri ia henia. Namona be unai ese ita ia doria ia ita abidadama henia totona, ani? Oibe, unai ese ita ia veria bena Iesu ese ma haida ia durua totona sibona ia henia haheitalaina do ita tohotohoa. Keriso ia mauri, Dirava ena ura ia karaia totona; ita danu be unai ita karaia, ita sibona eda ura karaia totona ita mauri noho lasi.
23. (a) Mauri idia abia taudia be dahaka lalonai idia vareai be namo? (b) Keristani kongregesen lalonai idia noho taudia be dahaka idia karaia be namo?
23 Unai be kara ginigabena lasi. Baibel be Pentekoste 33 C.E. ai taunimanima 3,000 idia bapatiso ia herevalaia neganai, ia gwau “idia vareai.” Dahaka lalonai idia vareai? Luka ia gwau: “Nega ibounai idia haboua noho, aposetolo edia hadibaia herevadia idia kamonai totona, bona turana idia karaia.” (Kara 2:41, 42) Oibe, idia lao Baibel idia stadilaia hebou bona hebamo namona idia abia, bona unai amo Keristani kongregesen ena kahana ai idia lao. Keristani taudia ginigunadia be hebou dekenai idia lao lauma dalanai hahediba idia abia totona. (Heberu 10:25) Hari inai negai, Iehova ena Witness taudia be unai idia karaia danu, bona idia ura oi idia hagoadaia idia ida unai hebou dekenai do oi lao.
24. “Mauri korikori” be dahaka, bona edena bamona bona edena negai do ia vara?
24 Hari, taunimanima milioni momo ese unai dala, mauri ia lao henia dalana maragina, idia badinaia. Unai dala maragina ita badinaia noho be mai ena hekwarahi! (Mataio 7:13, 14) Paulo ese unai ia hahedinaraia, inai hagoadaia herevana amo: “Abidadama ena hekwarahi namona oi hekwarahilaia, mauri hanaihanai oi dogoatao auka masemase, unai totona oi idia boiria.” Unai hekwarahi be mai anina bada ‘mauri korikorina do oi abia momokani’ totona. (1 Timoteo 6:12, 19, NW) Unai mauri korikorina be hari ita mamia maurina lasi, badina inai mauri lalonai Adamu ena kara dika dainai, hisihisi bona lalohisihisi ita davaria. To, unai mauri be Dirava ena tanobada matamatana lalonai do ia vara gauna. Kahirakahira unai do ia vara inai tanobada ena oromana dikana ia ore murinai, bena Iehova Dirava bona ena Natuna idia lalokau henidia taudia be Keriso ena mauri davalaia boubouna ena namo do idia abia. Namona be ita ibounai ese mauri—“mauri korikori”—mauri hanaihanai Dirava ena tanobada matamatana mai hairaina lalonai, do ita abia hidi.
Edena Bamona Do Oi Haere?
◻ Genese 3:15 ese ia gwauraia gaigaina, hahinena, bona garana be daika daika?
◻ Iesu be edena dala ai Adamu ida ia hegeregere, bona mauri davalaia boubouna ese edena dala ia kehoa?
◻ Dirava ena tanobada matamatana lalonai, oi ura dahaka oi karaia unai amo do oi moale bada?
◻ Dirava ena tanobada matamatana lalonai do ita noho totona, edena kara ita karaia be namo?
[Picture on page 10]
Matamata bona buruka taudia dekenai, Iesu be mauri hanaihanai lao henia dalana tamona
[Picture on page 11]
Dirava ena nega korikori ai, buruka taudia do idia matamata lou