‘Diba Ia Ura Abia Ena Mamina Kudouna Bona Lalona Ai’

“Hereva amo egu moale lau gwauraia diba lasi, Is There a Creator Who Cares About You? bukana lau duahia noho lalonai, ia bada ia lao noho. Ia ese ta lalonai diba ma haida abia urana​—lasi, diba do ia abia be namo ena mamina​—ia havaraia. Tanikiu bada, badina egu kudouna bona lalona ai diba lau ura abia ena mamina umui hamatamaia.”

UNAI be North Carolina, U.S.A. ai ia noho Iehova ena Witness hahinena ta ena lalohadai. Ia herevalaia bukana be Watch Tower Society ese lagani 1998/99 “Dirava Ia Gwauraia Mauri Dalana” Distrik Hebouheboudia dekenai idia halasia. Ena be reana unai buka ena kopi ta oi do abia lasi, to ma haida edia lalohadai mani oi itaia.

San Diego, California, U.S.A. ai idia karaia hebouhebou dekenai tau ta be ena kopi ia abia bena dina haida murinai, ia gwau: “Lau itaia inai buka ese abidadama ia hagoadaia bada. Ia ese egu kudouna ia veria Iehova ese ia havaraia gaudia lau laloa bada totona. Hari rau 98 lau duahia noho, bona buka ibounai do lau haorea dinana lau ura henia lasi, badina lau moalelaia bada!”

Orient hahinena ta ia gwau: “Hebouhebou dekenai hereva ia henia tauna ia gwau inai buka be ‘idau momokani,’ bona unai ese inai buka ena hereva ia gwauraia namo herea. Ena namo ta be ia ese duahia tauna ia doria lasi Dirava ia noho lalohadaina ia abia dae totona, to hereva momokanidia ia hahedinaraia.”

Unai hereva momokanidia haida be saiens taudia ese iunives, mauri, bona ita lalonai idia davaria gaudia. Momo ese unai idia laloa bada. California dekenai hahine ta ia gwau: “Inai buka maragina ena anina lau dekenai be hereva amo lau gwauraia diba lasi. Egu duahiduahi lau hadokoa diba lasi, badina rau ta ta ese iunives bona mauri lalonai idia davaria gaudia matamatadia idia herevalaia. Ia amo gau momo herea lau diba! Lau ese inai buka maragina lau laloa bada bona lau ese taunimanima momo dekenai do lau hahedinaraia toho.”

Momo idia moale, badina unai buka ese hereva haida amo Baibel ena sivarai ia gwauraia, bona unai amo Havaraia Tauna ena kara ia hahedinaraia. Momo idia gwau: “Buka ena dokona kahana ai Baibel ena sivarai ia hahedinaraia herevana be guna lau duahia gaudia amo hereva hereadaena ta.” New York, U.S.A. ai idia karaia hebouhebou murinai, hahine ma ta ia gwau: “Umui printaia bukadia ibounai huanai, hari umui halasia bukana ese egu lalona ia veria momokani. Saiens taudia ese idia davaria gaudia, Havaraia Tauna ia noho idia hamomokania gaudia unai, lau moalelaia bada. Baibel ena sivarai ia hahedinaraia herevana kwadogina be ia hegeregere hereva badadia edia anina hahedinaraia totona bona ta ena ura ia habadaia buka ia duahia noho totona.”

Ita Lalo-Pararalaia Diba Saiens Gaudia

Toana be karoa ginigunadia ese idia hahedinaraia saiens gaudia ita lalo-pararalaia be auka, to haida edia lalohadai be inai bamona.

Canada tauna ta ia gwau: “Diba abia bukadia idia torea taudia ese edia hereva badadia amo iseda lalona idia veria toho, to idia amo inai buka ia idau momokani. Emui diba be bada herea, badina fisiks, kemistri, DNA, kromosome, bona gau ma haida be auka lasi dalanai umui hahedinaraia diba. Bema lagani gunadia lalonai lau stadilaia iunivesiti bukadia be umui ese umui toredia be namo herea!”

Fisiks ia stadilaia iunivesiti profesa ta ia gwau: “[Ia] ese ia herevalaia gaudia ia hahedinaraia goevagoeva bona hereva aukadia amo ia mogea lasi. Buka be duahia tauna dekenai badina namodia ia herevalaia bona saiens taudia badadia edia hereva ia gwauraia. Herevana ta be saiens tauna eiava lasi, to bema iunives bona mauri edia matamana idia ura idia diba, unai buka ‘do idia duahia be gau badana.’ ”

Sista edia kosi ta ia karaia hahine matamatana ta ia gwau: “Karoa 4 lau kehoa bona klas dekenai ai gaukaralaia bukana ena hereva ta lau duahia neganai, lau hoa bada! Emai profesa tauna dekenai unai buka lau henia bona lau gwau lau diba ena hereva do ia moalelaia. Lau ese ia dekenai rau 54, harana ia herevalaia kahana, lau hahedinaraia. Ia sibona ena lalona ai ia duahia bona ia gwau, ‘Inai lau ura henia! Do lau duahia!’ ”

Belgium dekenai palamen ena memba ta ia gwau: “Lau laloa bada bona egu lalona idia veria gaudia be saiens herevadia, idia hahedinaraia hari inai negai saiens taudia idia davaria gaudia ese Dirava tamona ia noho lalohadaina Baibel dekenai idia hakoikoia lasi, to idia hamomokania. Unai be lalohadai namo hereana.”

Havaraia Tauna Dibaia Namonamo

Unai buka ese tano momo dekenai taunimanima ia durua, Dirava idia diba namonamo bona ia kahirakahira idia lao totona. Fukuoka City, Japan ai, unai buka ia duahia hahine ta ia gwau: “Unai ena toana be nega ginigunana Iehova idia hahedinaraia goevagoeva. Unai buka ese egu lalona ia veria momokani. Hari dala idauna ai Iehova lau diba, guna unai bamona dala ai ia lau laloa lasi.” El Salvador tauna ta ia gwau: “Umui hahedinaraia goevagoeva Dirava ena hebogahisi, kara namo, bona lalokau be bada herea bona ia badu haraga lasi. Momokani, unai diba be gau badana, ia bona ena Natuna kahirakahira ita lao totona. Inai be Iehova ena hemami bona ena Natuna, Iesu, be tanobada dekenai ia abia hemami ia hahedinaraia bukana ginigunana.” Bona Zambia dekenai unai buka ia duahia tauna ta ia gwau: “Hari lau ese dala idauna ai Iehova lau laloa.”

Ita hoa lasi, Iehova ena Witness taudia ese Is There a Creator Who Cares About You? bukana be ma haida dekenai idia ura bada idia hariharilaia. Hahine ta ia gwau: “Karoa 10 [Bema Havaraia Tauna ese Ita Ia Laloa, Dahaka Dainai Hisihisi Ia Bada?] lau haorea gwauraia neganai, lau sibona dekenai lau gwau, ‘Inai buka be mai anina bada Japan taudia dekenai!’ Lau ura unai karoa ena hereva lau laloatao namonamo bona haroro gaukara lalonai do lau gaukaralaia goadagoada.” Hahine ma ta be dubu ta dekenai ia tubu kekenina ta ida Baibel ia stadilaia, ena tamana be unai dubu ena pris tauna ta. “Havaraia Tauna ia noho lalohadaina ia abia dae be auka. Inai buka ena hereva ese duahia tauna ia doria lasi, to hereva momokanidia ia hahedinaraia namonamo dainai, lau laloa Buddist taudia danu be do idia ura idia duahia. Inai buka dainai Iehova ena lalokau ita mamia badabada.”

England amo inai hereva ia mai: “Hari sibona Creator bukana lau duahia ore bona maoromaoro lau ura duahia lou matamaia. Ia be buka namo hereana! Ta ese ia duahia neganai Iehova do ia lalokau henia. Egu dekena hahine dekenai ta lau henia bona karoa rua ia duahia murinai ia gwau, ‘Lau rakatania diba lasi, ena hereva ese egu lalona ia veria.’ Lau diba momokani inai buka ese taunimanima do ia durua, iseda Havaraia Tauna Badana idia diba bona idia lalokau henia totona.”

Maryland, U.S.A. ai, tau ta ia gwau: “Ia ese lauma dalanai lau ia hagoadaia bada momokani! Lau ura egu gaukara ai lau davaria bisinesi taudia iboudiai dekenai kopi ta do lau henia. Nega haida unai bamona bisi taudia mai edia diba bada dekenai lau haroro matamaia be auka. Inai buka lalonai hamatamaia hereva namodia, lalona veria herevadia, do lau davaria.”

Ia hedinarai goevagoeva, Is There a Creator Who Cares About You? bukana ese tanobada hegegemadai taunimanima ia durua.

[Picture Credit Line on page 25]

Cover photo above, Eagle Nebula: J. Hester and P. Scowen (AZ State Univ.), NASA