Gilead Sikuli ese Misinari Taudia Ia Siaia Lao “Tanobada Ena Kahana Ibounai”
LAGANI 100 mai kahana vadaeni, Watchtower Bible School of Gilead ese misinari taudia ia siaia noho. September 11, 1999 ai, Gilead ena klas 107 taudia ese edia kosi idia haorea. Unai stiuden taudia ibounai 48 be tano 11 amo idia mai, bona idia siaia tano idauidau 24 dekenai hesiai gaukarana do idia karaia. Idia ese misinari taudia tausen haida, guba dekenai Iesu ia do daekau lasi neganai ia gwauraia hereva dokona ena anina idia hagugurua noho taudia, do idia bamoa. Ia gwau iena hahediba taudia be “[iena] ladana do [idia] gwauraia hedinarai . . . ia lao bona tanobada ena kahana ibounai.”—Kara 1:8.
Kosi haorea program, Watchtower Educational Center, Patterson, New York dekenai, idia karaia be moale negana unai gabu mai hairaina dekenai. Varavara, turadia, bona vadivadi taudia idia noho dainai, kosi idia haorea taudia idia moale bada. Idia hebou taudia ibounai, Brooklyn bona Wallkill rumadia ai reidio bona vidio amo idia itaia bona kamonai taudia danu, be 4,992.
Mai Abidadama ida Iehova Bona Dekena Taudia Umui Hesiai Henidia Noho
Carey Barber, Hakaua Oreana tauna ta bona kosi haorea program ena seamani ese inai hereva “Daika be Iehova Ena Kahana Ai?,” amo program ia kehoa. Ia hahedinaraia Mose ena nega ai, Israela taudia dekenai unai henanadai ia vara. Kosi idia haorea taudia bona idia mai taudia idia hadibaia lou, Israela taudia be Iehova ena kahana ai idia gini lasi dainai, tano gagaena dekenai idia momo ese edia mauri idia haboioa. Kaivakuku tomadiho henia karana dekenai idia moru murinai, “idia helai helai diho, idia aniani, bona uaina idia inua. Vadaeni idia toreisi, idia gadara mai lebulebu danu.” (Esodo 32:1-29) Unai kara dekenai Iesu be Keristani taudia ia sisiba henidia, ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina.”—Luka 21:34-36.
Hereva ia henia tauna ma ta, Gene Smalley, Toretore Dipatmen amo, ese kosi idia haorea taudia ia nanadaidia, ia gwau: “Do Oi Hamomokania Oi be Paregorik ta, A?” Ia hahedinaraia Greek herevana pa·re·go·riʹa amo English gado dekenai hisihisi hamaragia muramura ta ena ladana idia gwauraia. To, Kolose 4:11 dekenai, aposetolo Paulo ese unai Greek herevana ia gaukaralaia, ia danu idia gaukara taudia ia kikilaidia totona. New World Translation lalonai, unai hereva idia hahanaia “hagoadaia heduru gauna ta.”
Kosi idia haorea misinari taudia be idia siaidia lao gabuna ai hari nega ena hisihisi hamaragia muramura bamona bema mai manau ida tadikaka bona taihu hagoadaia taudia ai idia lao bona edia misinari tadikaka ida idia gaukara hebou bona idia lalokau heheni.
Bena, Daniel Sydlik, Hakaua Oreana ena memba tauna ta, ese hereva ta ia henia, ena ladana be “Taravatu Hereadaena Umui Badinaia.” Ia hahedinaraia Mataio 7:12 dekenai, Iesu ena hakaua hereva hereadaena, “gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai,” ena anina be ma haida hadikaia karana ita dadaraia sibona lasi, to idia totona kara namodia ita karaia danu.
Unai kara idia kwalimulaia totona, gau toi be mai anina bada: itaia namonamo matana, hebogahisi kudouna, bona heduru imana. Hereva dokonai, ia gwau: “Bema ita ura heduru ita henia, karaharaga heduru ita henia be namo. Namona be dala ita tahua ita ura haida ese ita dekenai do idia karaia karadia be idia dekenai do ita karaia totona.” Unai be mai anina tano ma haida dekenai do idia lao misinari taudia dekenai, idia be taunimanima do idia durua Keristani dala momokanina idia badinaia totona.
Hadibaia Taudia ese Sisiba Namona Idia Henia
Karl Adams, Gilead sikuli ena hahediba tauna, ese kosi idia haorea misinari taudia ia hagoadadia do idia “Tubu Noho” totona. Edena dala idauidau ai? Ginigunana be diba bona idia gaukaralaia namonamo dalana ai idia tubu noho. Gilead dekenai, stiuden taudia be Baibel sivarai edia anina bona badina idauidau tahua namonamo dalana idia dibaia. Idia hagoadaia unai sivarai ta ta edia anina edia mauri lalonai do idia laloa totona. Idia hagoadaia unai bamona do idia karaia noho.
Tadikaka Adams ia gwau: “Iharuana be inai, lalokau ai umui tubu noho. Lalokau be gau ta bamona, bema ita ubua, do ia tubu daekau. Bema ita laloa lasi, do ia mase diba.” (Filipi 1:9) Hari, idia be misinari taudia dainai, namona be noho daladia idauidau dekenai lalokau ai idia tubu be namo. Bona ihatoina be inai: “Iseda Lohiabada bona Hamauria Tauna Iesu Keriso ena hariharibada, bona iena diba, bona laloa diari lalonai do umui tubu daekau noho.” (2 Petero 3:18) Hereva ia henia tauna, ia gwau: “Unai be Iehova ese ena natuna amo ia hahedinaraia hariharibada karana namo hereana. Unai hariharibada gauna laloa bada karana ita habadaia noho neganai, Dirava ena ura bona ita ia henia gaukarana ita karaia urana do ia tubu.”
Mark Noumair, Gilead sikuli ena hahediba tauna ma ta, ese ia henia herevana ena sinado be “Mai Lalokau Danu Oi Abia Dae, Bena Oi Haheauka Diba.” Ia gwau: “Misinari mauri ai nega aukadia be mai lalokau danu oi abia dae, bena do oi haheauka diba. Iehova ese ia lalokau henia taudia sibona ia matahakani henidia. Herevana oi laloa sisiba oi abia be mai ena badina namona lasi, gau maragidia ibounai dekenai oi abia, eiava ia maoro lasi, to Iehova oi lalokau henia bona emu hetura karana ia danu oi laloa dainai, unai sisiba oi do abia dae.”
Tadikaka Noumair ese ia hahedinaraia misinari gaukarana ena anina be gaukara idauidau do idia karaia. “To lalokau amo unai gaukara oi karaia lasi neganai, do oi lalo-hekwarahi. Bema lalokau be lasi, ruma gaukara—hegeregere aniani nadua, aniani hoia, huahua hagoevaia, ranu hasiahua—be do oi moalelaia lasi. Namona be sibona dekenai oi henanadai, ‘Dahaka dainai inai gaukara lau karaia?’ Oibe, bema oi gwau, ‘Lau hekwarahi dainai, egu misinari tadikaka idia gorere lasi bona idia moale,’ bena unai gaukara do oi karaia namonamo.” Hereva dokona ai, ia gwau: “Herevana matahakani oi abia, emu misinari maduna idauidau oi hagugurua, eiava lalohisihisi oi hamaoromaoroa toho, lalokau amo oi karaia neganai, oi abia gaukarana do oi karaia noho. ‘Lalokau be do ia noho hanaihanai doko lasi.’ ”—1 Korinto 13:8.
Gabeai, Wallace Liverance, Gilead sikuli ena hahediba tauna ma ta, be haheitalai haida ia hahedinaraia, idia amo stiuden taudia edia ekspiriens, kongregesen taudia danu idia gaukara hebou lalonai idia moalelaia gaudia idia hahedinaraia. Ruma-ta-ruma-ta gaukarana sibona idia karaia lasi, to misinari sikuli lalonai idia abia dibana idia gaukaralaia motuka atoa gabudia, dabua huria gabudia, trein naria gabudia, bona gabu ma haida dekenai taunimanima idia tahua.
Idia Manada Misinari Taudia ese Hagoadaia Hereva Idia Henia
Misinari taudia matamatadia be idau tano dekenai idia lao neganai, idia lalo-hekwarahi be namo, a? Unai idau tano dekenai edia hesiai gaukara ena hekwarahi idauidau idia haheaukalaia diba, a? Brens opesi be dahaka heduru do ia henia, unai misinari matamatadia ese edia gaukara do idia karaia namonamo totona? Unai henanadai bona henanadai ma haida edia haere abia totona, Steven Lett, Haroro Naria Dipatmen amo, bona David Splane, Toretore Dipatmen amo, ese Watchtower Educational Center dekenai brens sikuli idia lao henia tadikaka idia henanadai henia. Unai tadikaka be Spain, Hong Kong, Liberia, Benin, Madagascar, Brazil, bona Japan edia brens komiti taudia.
Unai Iehova ena lo hesiai taudia, idia momo be lagani momo misinari gaukara idia karaia taudia, ese kosi idia haorea taudia bona edia tama sina bona varavara idia hagoadaia momokani. Idia sibona bona edia misinari tadikaka idia diba gaudia amo idia hahedinaraia hekwakwanai bona lalo-metau idia hanaia diba. Do idia davaria hekwakwanai be reana ia bada, to Raimo Kuokkanen, Madagascar dekenai misinari gaukara ia karaia tauna, ia gwau, “to do umui hanaia diba, bona Society ese ita idia durua danu.” Östen Gustavsson, hari Brazil dekenai ia gaukara noho tauna, ia gwau: “Ai sibona ese gaukara ai abia hidi lasi, ai dekenai idia henia. Unai dainai emai lalona ai hadaia do ai hekwarahi, unuseniai ai gaukara noho totona.” James Linton, Japan dekenai hesiai gaukara ia karaia tauna, ia gwau, “unuseniai misinari gaukara idia karaia noho tadikakadia idia noho” dainai unai ese ena lalona ia hagoadaia momokani. Misinari gaukara be moale gaukarana bona Iehova badinaia bona ena mamoe naria gaukarana hagugurua dalana namona.
Lauma Dalanai Ta Do Ia Hamasea Gorerena Dadaraia
Hakaua Oreana tauna ma ta, Theodore Jaracz, lagani 1946 ai Gilead ena klas namba 7 ia haorea tauna ta, ese hereva dokona ia henia, ena ladana be “Lauma Dalanai Ita Mauri Noho Ena Hekwarahi.” Tanobada ena kahana idauidau dekenai dagedage kara dikadia idia vara noho ia hahedinaraia murinai, ia gwau momokani, taunimanima dekenai dika bada hereadia idia vara noho.
Tadikaka Jaracz be Salamo 91 ena hereva ia gwauraia neganai, ia hahedinaraia taunimanima milioni momo be “gorere dikadia” bona “dika badadia” ese lauma dalanai ia hagoreredia bona ia hamasedia danu. Diabolo bona ena tanobada dikana be gorere bamona herevadia, taunimanima edia aonega bona kohu tahua kara amo idia halasia gaudia, idia gaukaralaia taunimanima be lauma dalana ai idia hamanokaia bona hamasea totona, to Iehova be ita ia hamaoroa “ataiai Momokani Lohiabada dekenai ia lao” tauna be unai gorere do ia davaria lasi.—Salamo 91:1-7.
Jaracz ia gwau: “Gau badana be abidadama dekenai ita gorere lasi, gabu namona ai ita noho sibona. Ita ura lasi ita idia kirikirilaia taudia, lauma gaudia idia laloa lasi taudia bamona ita noho. Hari inai negai, unai be hekwakwanai badana. Unai hekwakwanai be ita, orea lalonai ita noho taudia ibounai, dekenai ia vara diba gauna. Oiemu misinari gaukara dekenai do ia vara diba danu.” (Iuda 18, 19) To, kosi idia haorea taudia idia hagoadaia, edia hesiai gaukara gabuna ai lauma dalanai do idia noho namonamo diba. Idia hagoadaia, iseda tadikaka edia haheauka karana Russia, Asia, bona Africa tanodia dekenai do idia laloa totona—herevana edia gaukara idia taravatua, idia inai henidia, idia kirikirilaia, Dirava ia noho lasi hereva koikoidia idia noho, bona hereva koikoi amo idia samanidia to idia haheauka. Bona nega momo, tauanina hekwakwanaidia idia vara, badina haida ese idia dagedage henidia bona durua gaudia dekenai idia dabu dainai.
Lauma dalanai manoka gauna ta ia vara neganai, “namona be unai hekwakwanai ia havaraia gauna oi tahua bona Dirava ena Hereva ena sisiba amo oi hamaoromaoroa.” Baibel amo haheitalai haida ia gwauraia. Iosua idia hagoadaia taravatu be dina ibounai do ia duahia loulou. (Iosua 1:8) Iosaia ena negai, taravatu bukana idia davaria neganai, Iehova ese unai badinaia karana ia hanamoa. (2 King Taudia 23:2, 3) Timoteo be ia mero maragi negana amo toretore helagadia ia dibaia. (2 Timoteo 3:14, 15) Berea taudia be kamonai namonamo taudia; idia be “namo,” badina be dina ibounai buka helaga idia tahua. (Kara 17:10, 11) Bona Iesu Keriso, haheitalai hereadaena, be Dirava ena Hereva ia diba bona ia gaukaralaia—Mataio 4:1-11.
Hereva dokonai, Tadikaka Jaracz ese misinari taudia matamatadia ia hagoadadia, ia gwau: “Hari, umui be hegeregere emui misinari gaukara do umui karaia totona. Bona umui be gabu daudau do umui lao, tanobada ena kahana idauidau do umui lao. Bema ita hekwarahi lauma dalanai ita mauri noho totona, vadaeni ita abia hidi gauna ita karaia totona gau ta ese ita do ia koua lasi. Umui be mai goada danu do umui haroro, haida umui durua emui abidadama idia tohotohoa totona, bona umui durua taudia dainai umui ida do ai guriguri, bena Iehova ese idia do ia hamauria, ita dekenai ia karaia bamona. Unai amo, taunimanima momo be lauma dalanai tanobada ibounai ia hadikaia gauna amo do idia roho mauri. Idia momo herea be ita do idia bamoa, Iehova ena ura do ita karaia hebou totona. Bona unai umui karaia lalonai ai ura Iehova ese umui do ia hanamoa.”
Seamani tauna ese tanobada ena kahana idauidau amo idia mai telegram ia duahia murinai, kosi idia haorea stiuden taudia ese edia kosi haorea pepana do idia abia negana ia ginidae. Bena stiuden taudia ese idia torea tanikiu revarevana ta idia duahia. Iehova bona ena orea idia hanamoa, unuseniai diba namona idia abia dainai bona “tanobada ena kahana ibounai” dekenai misinari gaukarana do idia karaia dainai!—Kara 1:8.
[Box on page 29]
Klas Taudia
Edia tano idauidau: 11
Idia lao henia tanodia idauidau: 24
Klas taudia iboudiai: 48
Tatau mai edia adavadia: 24
Edia mauri lagani edia averes: 34
Lagani hida hereva momokani lalonai, edia averes: 17
Lagani hida ful-taim hesiai gaukara idia karaia, edia averes: 12
[Picture on page 26]
Watchtower Bible School of Gilead Ena Klas Namba 107
Inai lista ai, laini edia namba be vairana kahana amo ia daekau murina kahana, bona edia ladadia be lauri kahana amo ela bona idiba kahana.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.