Dirava ese Guriguri Ia Haerelaidia

Korenelio be Dirava ena lalo-namo abia totona hanaihanai mai ena kudouna ibounai ida ia guriguri tauna. Danu, ena ami ofesa dagina ia gaukaralaia namonamo. Baibel ese ia hahedinaraia, ogogami taudia dekenai “harihari gaudia momo ia henia.”​—⁠Kara 10:​1, 2.

UNAI nega ai, Keristani kongregesen taudia be abidadama Iuda taudia, Iuda tomadiho idia abia dae taudia, bona Samaria taudia. Korenelio be kopina utua lasi Idau Bese tauna ta bona Keristani kongregesen ia bamoa lasi. Unai ena anina be ia guriguri kava, a? Lasi. Iehova ese Korenelio bona mai guriguri ida ia karaia karadia ia itaia.​​—⁠Kara 10:⁠4.

Aneru edia heduru amo, Korenelio be Keristani kongregesen taudia ia davaria. (Kara 10:​30-​33) Unai dainai, ia bona ena ruma bese taudia be Keristani kongregesen lalonai idia abia vareai kopina utua lasi Idau Bese taudia ginigunadia. Iehova Dirava ia laloa Korenelio ena sivarai be mai anina bada dainai Baibel lalonai idia torea. Ita daradara lasi, ia ese ena mauri lalonai gau momo ia haidaua Dirava ena taravatu hegeregerena ia mauri totona. (Isaia 2:​2-4; Ioane 17:16) Korenelio ena sivarai be hagoadaia gauna badana ta hari inai negai Dirava ena lalo-namo idia tahua bese idauidau taudia dekenai. Mani haheitalai haida ita laloa.

Hari Inai Negai Idia Vara Haheitalai

India dekenai hahine matamatana ese heduru ia abia be gau badana. Ena mauri lagani be 21 neganai ia headava bona ena natudia be rua. To ena natuna iharuana ia vara murinai, ena adavana ia mase. Karaharaga, ena mauri lagani be 24 neganai, ia be vabu mai ena hua rua natuna kekenina bona hua 22 natuna merona. Unai dainai ita hoa lasi heduru ia abia be namo! Edeseniai heduru do ia tahua be namo? Hanuaboi ta lalonai, ia lalo-metau bada dainai, ia guriguri, ia gwau: “Guba Tamana e, mani emu kara emu Hereva amo lau oi hagoadaia.”

Bena dabai, tau ta ese ia vadivadi henia. Ia be Iehova ena Witnes tauna ta. Unai dina ai, unai tauna ena ruma-ta-ruma-ta gaukarana be ia auka badina momo ese edia iduara idia kehoa lasi. Mai hesiku bona lalo-manoka ida ia ura ena ruma dekenai ia giroa, to mamina ia abia namona be ruma tamona sibona do ia karaia guna. Unai ruma dekenai unai vabu matamatana ia davaria. Unai vabu ese ia dae bona Baibel ia herevalaia buka ta ia abia. Unai hahine ese unai buka ia duahia bona unai Witnes tauna danu ia herevahereva karana amo heduru bada ia abia. Ia ese Dirava ena gwauhamata mase taudia do ia hatoreaisi lou bona Dirava ena Basileia ese kahirakahira tanobada be paradaiso ai do ia halaoa ia dibaia. To mai anina bada gauna be, ia ese Dirava momokani, Iehova, iena guriguri ia haerelaia tauna, ia dibaia bona lalokau henia matamaia.

Nora, George ena siti, South Africa dekenai ia noho, ese hua ta ia atoa ful-taim hesiai gaukara do ia karaia totona. Ia do hamatamaia lasi neganai, Iehova dekenai ia guriguri goadagoada do ia durua Baibel stadi ia ura tauna ta do ia davaria totona. Do ia karaia teritori dekenai be guna Nora dekenai ia badu tauna ta ena ruma ia noho danu. Mai gari lasi ida, Nora be unai ruma dekenai ia lao lou. Ia hoa, badina unai ruma ia noholaia tauna matamatana ta ia davaria, iena ladana be Noleen. Danu, Noleen bona ena sinana ese Dirava idia noia do ia durudia Baibel idia lalo-pararalaia totona. Nora ia gwau: “Idia dekenai Baibel stadi lau herevalaia neganai, idia moale bada.” Noleen bona ena sinana be lauma dalanai idia tubu haraga. Daudau lasi murinai, idia ruaosi be Nora idia bamoa lauma hanamoa gaukarana dekenai.

Guriguri ena siahu ia hahedinaraia haheitalai ta be South Africa ena siti Johannesburg dekenai idia noho tau ta bona ena adavana edia haheitalai. Lagani 1996 ena Saturday hanuaboi ta ai, Dennis bona Carol edia headava be kahirakahira ia doko. Idia laloa heduru gauna orena be do idia guriguri, unai idia karaia loulou ela bona hanuaboi momokani ai. Bena daba 11:00 ai, Iehova ena Witnes taudia rua be edia iduara dekenai idia pidipidi. Dennis ese iduara ia kehoa bona ia hamaorodia do idia naria ena adavana ia boiria guna. Bena Dennis ese Carol ia hamaoroa bema unai Witnes taudia idia abia dae, reana do idia ura lasi ruma idia rakatania. Carol ese Dennis ia hadibaia idia be heduru totona idia noinoi bona ia gwau reana unai be Dirava ena haere edia guriguri dekenai. Unai dainai Witnes taudia idia abia dae, bona Diba ese Mauri Dekenai Ita ia Hakaua Lao bukana amo Baibel stadi idia hamatamaia. Dennis bona Carol ese idia dibaia gaudia dainai idia moale bada. Unai adorahi ai, idia be unai gabu ai Iehova ena Witnes taudia edia Kingdom Hall dekenai idia lao edia hebou ginigunana idia abia totona. Baibel amo idia abia dibana idia badinaia dainai, Dennis bona Carol ese edia headava ena hekwakwanai hanaia dalana idia davaria. Hari idia bapatiso vadaeni bona mai moale danu Iehova idia hanamoa bona hanaihanai edia dekena taudia dekenai edia abidadama Baibel dekenai idia hahedinaraia.

Bema Oi Mamia Oi be Hegeregere Lasi Oi Guriguri Totona be Edena Bamona?

Lalo-momokani taudia haida be reana edia mauri dikana dainai do idia mamia idia hegeregere lasi do idia guriguri. Iesu Keriso ese unai bamona tauna ta ena sivarai ia gwauraia, ia be idia dadaraia takisi moni gogoa tauna. Dubu ena ariara lalonai ia vareai neganai, unai tauna ia mamia ia be hegeregere lasi hanaihanai guriguri idia karaia gabuna ai do ia gini bona ia guriguri. “Idau gabu dekenai ia gini, . . . iena kemena ia botaia, ia gwau, ‘Dirava e, lau be dika tauna, oi bogahisihisi lau dekenai.’ ” (Luka 18:13) Iesu ena sivarai ese ia hahedinaraia, unai tauna ena guriguri dainai haere namona ia abia. Unai ese ia hahedinaraia Iehova Dirava be momokani mai ena hebogahisi bona ia ura laloa-momokani helalo-kerehai taudia ia durua.

Mani South Africa tau matamatana ladana Paul oi laloa. Ia mero neganai, ena sinana danu Keristani heboudia dekenai ia lao. To ia be haisikuli ai neganai, ia ese Dirava ena dala idia badinaia lasi matamata taudia ia bamoa. Sikuli ia rakatania murinai, South Africa ena apartheid gavamani gunana ena ami lalonai ia vareai. Bena, ia laloa lasi neganai, ena turana kekenina ese edia hetura karana ia hamakohia. Unai anina lasi maurina ese Paul ena lalona ia hametaua bada. Ia laloa lou bona ia gwau: “Hanuaboi ta, lau ese Iehova lau guriguri henia lau ia durua totona, ena be lagani momo lalonai mai egu momokani ida Dirava lau hereva henia lasi.”

Ia guriguri bena daudau lasi murinai, ena sinana ese ia boiria lagani ta ta ai Iesu ena mase laloatao hebouna dekenai ia lao totona. (Luka 22:19) Paul ia hoa ena sinana be unai bamona ia karaia dainai, badina iena kara be dika bona Baibel ia laloa lasi. “Lau laloa unai boiria karana be Iehova ena haere egu guriguri dekenai bona lau mamia unai dainai lau ese egu kara lau haidaua be namo.” Unai nega ai, Paul be Keristani hebou ibounai dekenai ia lao matamaia. Hua hani lalonai Baibel ia stadilaia murinai, ia hegeregere bapatiso do ia abia. Danu, ena stadi ensinia gaukara do ia karaia totona be ia hadokoa bona ful-taim haroro gaukara ia karaia. Hari, Paul be moale tauna, ena mauri gunana dainai ia lalo-metau lasi. Idia hanaia lagani 11 lalonai, South Africa ai Watch Tower Society ena brens opesi dekenai ia gaukara.

Momokani, Iehova Dirava be mai ena hebogahisi ida guriguri ia haerelaidia bona “Dirava idia tahua taudia ibounai, be davana namona Dirava ese do ia henidia.” (Heberu 11:⁠6) Nega sisina murinai, Iehova ena dina badana do ia ginidae bona kara dika ibounai do ia haorea. To hari inai negai, Iehova ese ena taunimanima edia guriguri, idia ia hagoadaia bona hakaua totona, ia haerelaidia noho idia ese mai lalo-goada danu taunimanima hamauria haroro gaukarana idia karaia noho lalonai. Unai dainai, taunimanima milioni momo bese idauidau amo be Keristani kongregesen lalonai idia vareai bona Baibel ena diba, mauri hanaihanai dekenai ita ia hakaua lao dibana, idia abia.​​—⁠Ioane 17:⁠3.

[Picture on page 5]

Korenelio be mai ena kudouna ibounai ida ia guriguri dainai aposetolo Petero ese ia vadivadi henia

[Picture on page 6]

Hekwakwanai negadiai guriguri ese momo ia durua

[Picture on page 7]

Baibel ita lalo-pararalaia totona ita guriguri be namo

Headava taudia idia guriguri diba edia headava ia goada totona