Duahia Taudia Edia Henanadai
Roma 12:19 ai, aposetolo Paulo ese inai hereva, “Lauegu lalokau taudia e, dika ena davana do umui henia lasi, davana henia be, Dirava sibona,” ia gwauraia neganai, anina be ia gwau Keristani taudia do idia badu lasi, a?
Lasi. Aposetolo Paulo be unai siri lalonai Dirava ena badu ia herevalaia. Momokani, ita gwau lasi Keristani taudia idia badu eiava idia badu lasi be herevana. Baibel ese ita ia sisiba henia goevagoeva ita badu be namo lasi. Namona be Dirava ena sisiba haida ita laloa.
“Do oi badu lasi, do oi dagedage lasi. Do oi laloa hekwarahi o laloa badu lasi, badina unai bamona laloa ese kara dika ia havaraia noho.” (Salamo 37:8) “Iena tadikakana do ia badu henia tauna be dohore kota biaguna ese do ia kota henia.” (Mataio 5:22) “Tauanina ena kara be ita ibounai ita diba. Karadia be inai: Heudahanai, kara mirodia, matabodaga, kaivakuku tomadiho henia kara, meamea, heai, mama, badu.” (Galatia 5:19, 20) “Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa.” (Efeso 4:31) “Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.” (Iamesi 1:19) Ma danu, Aonega Herevadia bukana be nega momo sisiba ia henia kerere maragidia bona taunimanima edia kerere dainai iseda badu do ita koua eiava ita badu momo lasi.—Aonega Herevadia 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Roma 12:19 badinai siri ma haida edia hereva be unai sisiba hegeregeredia. Paulo ia gwau namona be iseda lalokau be koikoi gauna lasi, ita idia dagedage henia taudia ita hanamodia, do ita laloa ma haida be mai edia namo, kara dika ena davana ita haloua lasi, bona taunimanima iboudiai ida maino ai ita noho. Bena ita ia hagoadaia: “Lauegu lalokau taudia e, dika ena davana do umui henia lasi, davana henia be, Dirava sibona. Badina be Buka Helaga ia gwau: ‘Lohiabada ia gwau, “Dika ena davana be lau sibona ese do lau karaia.” ’ ”— Roma 12:9, 14, 16-19.
Oibe, namo lasi badu dainai dika ena davana ita henia. Idia vara gaudia bona hahemaoro maoromaoro karana dekenai iseda lalohadai be goevadae lasi. Bema badu dainai dika ena davana ita haloua, nega momo do ita kerere. Unai be Dirava ena Inai Tauna Badana, Diabolo, ena ura badinaia karana. Paulo be ma siri ta ai ia gwau: “Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea. Satani ena dala do umui kehoa lasi.”—Efeso 4:26, 27.
Dala namona, aonega dalana, be Dirava ita naria ia ese dika ena davana henia negana bona daika ese do ia abia ia gwauraia. Ia karaia diba badina idia vara momokani gaudia ibounai ia diba, bona ia ese ia karaia panisi be iena hahemaoro goevadaena do ia hahedinaraia. Ita itaia diba unai be Paulo ena hereva ena anina Roma 12:19 dekenai, badina ia be Deuteronomi 32:35, 41 ia herevalaia, bona unai hereva haida be inai: “Lohiabada ese dika ena davana do ia henia.” (Heberu 10:30 itaia.) Unai dainai, ena be Greek Baibel lalonai “Dirava ena” be ia noho lasi, to hari inai negai Baibel idia hahanaia taudia momo be Roma 12:19 dekenai “Dirava ena” idia torea, unai amo Baibel momo idia gwau “Dirava ese dika davana ia henia be namo” (The Contemporary English Version); “Dirava ena badu oi koua lasi” (American Standard Version); “Dirava ia ura neganai panisi ia henia” (The New Testament in Modern English); “Dirava ese dika davana ia henia be namo.”—The New English Bible.
Hereva momokani idia inai henia taudia be ita idia hadikaia eiava ita idia dagedage henia neganai danu, ita be Mose ia kamonai herevana dekenai ita tabekau diba, unai ese Iehova Dirava ia herevalaia, ia gwau: “Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga. Taunimanima momo herea dekenai lau bogahisihisi henia noho, bona kara dika, bona kara kerere idauidau lau gwauatao noho. To kerere momokani taudia do lau panisia.”—Esodo 34:6, 7.