Toreisi Lou Helarona be mai Ena Siahu
“Ia dainai gau ibounai lau negea vadaeni. . . . Lauegu ura bada be Keriso, bona iena toreisi lou siahuna do lau diba.”—FILIPI 3:8-10.
1, 2. (a) Lagani momo gunanai, edena dala ai pasto ta ese toreisi lou ia herevalaia? (b) Toreisi lou be edena bamona do ia vara?
LAGANI 1890 murinai, magasin ta ese Brooklyn, New York, U.S.A. dekenai pasto ta ena haroro hereva idauna ta ia gwauraia. Unai tau ia gwau toreisi lou ena anina be ta ena tauanina ena turia bona hidio ibounai, herevana lahi eiava aksiden ese ia hadikaia, uda sisia ta ese ia ania eiava tano hanamoa gauna ai ia lao, be do idia hebou lou bona idia mauri lou. Unai haroro tauna ia laloa hora 24 dinana ta lalonai, mase taudia bilioni momo edia imana, aena, ima kwakikwaki, turia, bona kopina ese hodahoda do idia hadiburaia. Unai kahadia be edia tauanina tamona ena kahana ma haida do idia tahua. Bena edia souli be guba bona hel amo do idia mai bona unai toreisi lou tauanidia lalonai do idia noho.
2 Toreisi lou lalonai tauanina gunana ena kahana maragidia ibounai do idia hebou lou be aonega herevana lasi, bona taunimanima be mai edia mase diba lasi soulina ta lasi. (Hadibaia Tauna 9:5, 10; Esekiela 18:4, NW ) Toreisi lou havaraia Diravana, Iehova, dekenai tauanina gunana ai idia noho gau maragidia ibounai ia haboua lou karana be anina lasi. Ia ese toreisi lou do idia abia taudia dekenai tauanina matamata ia henia diba. Iehova ese iena Natuna, Iesu Keriso, dekenai siahu ia henia mase taudia do ia hatorea isi lou, bena do idia mauri diba ela bona hanaihanai. (Ioane 5:26) Unai dainai Iesu ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.” (Ioane 11:25, 26) Unai helaro ese iseda kudouna ia hamoalea! Ia ese ita ia hagoadaia bena Iehova ena kamonai Witnes taudia bamona hahetoho bona mase ita haheaukalaia diba.
3. Dahaka dainai Paulo ese toreisi lou ia hamomokania be namo?
3 Toreisi lou bona taunimanima be mai edia mase diba lasi soulina—Greek aonega tauna Plato ese ia goadalaia lalohadaina—ita hakapua diba lasi. Unai dainai, aposetolo Paulo ese Atena ena Areo Ororona dekenai ladana bada Greek taudia ia haroro henia lalonai, Iesu ia herevalaia, bona ia gwau Dirava ese ia hatorea isi lou neganai, dahaka ia vara? Unai sivarai ia gwau: “Mase dekena amo toreisi lou hereva idia kamonai neganai, haida ese Paulo idia kirikirilaia.” (Kara 17:29-34) Iesu Keriso ia toreisi lou murinai idia itaia taudia momo be idia do mauri noho bona, ena be haida ese idia kirikirilaidia, to idia hamomokania Iesu be mase amo ia toreisi lou. To Korinto kongregesen lalonai idia noho hadibaia koikoi taudia ese toreisi lou idia dadaraia. Unai dainai Paulo ese 1 Korinto karoa 15 lalonai mai ena goada ida unai Keristani hahediba herevana ia hamomokania. Ena hereva ita stadilaia namonamo karana ese ia hahedinaraia goevagoeva toreisi lou helarona be helaro korikorina mai ena siahu.
Iesu Ena Toreisi Lou Idia Hamomokania Gaudia
4. Paulo ia gwau ia toreisi lou tauna Iesu idia itaia taudia be daika daika?
4 Paulo ese ena hereva ia hamatamaia dalana mani oi itaia. (1 Korinto 15:1-11) Bema Korinto taudia be abidadama kava taudia ai idia lao lasi, hahemauri ena sivarai namona do idia dogoatao goadagoada. Keriso be iseda kara dika dainai ia mase, idia guria, bona Iehova ese ia hatorea isi lou. Momokani, ia toreisi lou tauna Iesu be Kepa (Petero) dekenai ia hedinarai, bena “aposetolo taudia 12 ese idia itaia.” (Ioane 20:19-23) Taunimanima 500 bamona ese ia idia itaia, reana unai neganai ia haganidia: “Bese ibounai be diba tahua taudia do umui halaoa.” (Mataio 28:19, 20) Iamesi danu ese ia itaia, kamonai aposetolo taudia ibounai hegeregerena. (Kara 1:6-11) Damaseko kahirakahira, Iesu be Saulo dekenai ia hedinarai, hegeregere ia be ‘ia vara haraga mero’ bamona—lauma maurina dekenai toreisi lou ia abia vadaeni bamona. (Kara 9:1-9) Korinto taudia be abidadama taudia ai idia lao badina Paulo ese ia haroro henidia bona sivarai namona idia abia dae.
5. Korinto Ginigunana 15:12-19 dekenai, Paulo ena hereva dalana be edena bamona?
5 Paulo ia hereva dalana mani oi itaia. (1 Korinto 15:12-19) Idia itaia taudia ese Keriso ena toreisi lou idia harorolaia dainai, edena bamona haida idia gwau diba toreisi lou be lasi? Bema Iesu be mase amo ia toreisi lou lasi, iseda haroro bona abidadama be anina lasi, bona ita be koikoi taudia badina ita gwau Dirava ese Keriso ia hatorea isi lou. Bema mase taudia idia toreisi lou lasi, ‘kara dika lalonai ita do noho,’ bona Keriso dainai idia mase taudia idia boio momokani. Danu, “bema inai tanobada mauri sibona lalonai Keriso ena namo ita naria noho neganai, madi ita be taunimanima ibounai edia huanai ogogami herea.”
6. (a) Paulo be dahaka ia gwau Iesu ena toreisi lou ia hamomokania totona? (b) Iseda inai tauna ginigabena be dahaka, bona edena dala ai do ia ore?
6 Paulo ese Iesu ena toreisi lou ia hamomokania. (1 Korinto 15:20-28) Keriso be toreisi lou taudia ia “gunalaia” dainai, ma haida be toreisi lou do idia abia danu. Mase be tau ta, Adamu, ena kamonai lasi karana amo ia vara hegeregerena, toreisi lou be tau ta—Iesu—amo. Ia idia badinaia taudia be iena noho negana lalonai do idia toreisi lou. Keriso ese Dirava ena lohia siahuna idia dadaraia “gunalaia taudia ibounai, lohia taudia ibounai, bona siahu taudia ibounai do ia haorea” bona King bamona do ia lohia ela bona Iehova ese ena inai taudia ibounai be ena aena henunai do ia atoa. Iseda inai tauna ginigabena—Adamu amo ita abia “mase”—danu be Iesu ena boubou gauna dainai do ia haorea. Bena Keriso ese Iena Dirava bona Tamana dekenai Basileia do ia henia, bona sibona be “Dirava ena henunai do ia atoa, Oibe, Dirava, gau ibounai Keriso henunai ia atoa Diravana, be unai neganai gau ibounai edia biaguna momokani do ia lao.”
Mase Totona Bapatiso Idia Abia, A?
7. Daidia be “bapatiso idia abia [idia be] mase taudia totona,” bona unai ena anina idia dekenai be dahaka?
7 Toreisi lou idia dadaraia taudia ia henanadai henia: “Badina dahaka haida ese bapatiso idia abia mase taudia totona?” (1 Korinto 15:29) Paulo ia laloa lasi mauri taudia be mase taudia totona bapatiso do idia abia, badina be Iesu ena hahediba taudia ta ta ese diba idia abia, idia abidadama, bena bapatiso do idia abia be gau badana. (Mataio 28:19, 20; Kara 2:41) Horoa Keristani taudia ese “bapatiso idia abia [idia be] mase taudia totona,” anina be mase bona toreisi lou dekenai idia ia hakaua mauri dalana idia badinaia. Dirava ena lauma ese idia lalonai guba helarona ia atoa vareai neganai unai bapatiso ia matamaia, bona guba dekenai mase diba lasi maurina dekenai toreisi lou idia abia neganai ia ore.—Roma 6:3-5; 8:16, 17; 1 Korinto 6:14.
8. Keristani taudia be dahaka idia diba momokani, herevana Satani bona ena hesiai taudia ese idia hamasedia?
8 Paulo ena hereva ese ia hahedinaraia, toreisi lou helarona ese Keristani taudia ia hagoadaia bena ena be Basileia harorolaia gaukarana dainai hora ta ta dika idia davaria diba bona dina ta ta idia mase diba, to idia haheauka. (1 Korinto 15:30, 31) Idia diba bema Satani bona ena hesiai taudia ese idia hamasedia badina Iehova ese idia ia koua lasi, Iehova ese idia ia hatorea isi lou diba. Dirava sibona ese edia souli, eiava mauri, be Gehena, mase hanaihanai ia laulaulaia gauna, dekenai ia hadikaia diba.—Luka 12:5, NW.
Ita Naria Namonamo be Namo
9. Bema ita ura iseda mauri lalonai toreisi lou helarona ese ita ia durua, dahaka ita dadaraia be namo?
9 Toreisi lou helarona ese Paulo ia durua. Reana Efeso dekena ia noho neganai, iena inai taudia ese steidiam dekenai idia negea, uda sisia ida ia heatu totona. (1 Korinto 15:32) Bema unai ia vara momokani, Daniela bamona, laiona edia uduna amo Dirava ese ia hamauria. (Daniela 6:16-22; Heberu 11:32, 33) Paulo ese toreisi lou helarona ia abia dainai, ena lalohadai be Isaia ena negai hereva momokani idia negea Iuda taudia edia hegeregerena lasi. Idia gwau: “Do ita aniani bona inuinu, badina be kerukeru do ita mase.” (Isaia 22:13) Namona be unai bamona lalohadai dikana ita dadaraia, bema ita ura iseda mauri lalonai toreisi lou helarona ese ita ia durua, Paulo ia durua bamona. Paulo ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Momokani, unai hakaua herevana be mai ena anina mauri ena gau idauidau dekenai.
10. Edena dala ai iseda toreisi lou helarona do ia mauri noho?
10 Paulo ese toreisi lou idia daradaralaia taudia dekenai ia gwau: “Umui emui laloa kavakava umui hadokoa, bona emui kara dika daladia umui rakatania. Umui kamonai. Umui haida be Dirava umui diba lasi. Inai bamona lau hereva, do umui hemarai totona.” (1 Korinto 15:34) Hari inai “dokona negana” lalonai, namona be Dirava bona Keriso dekenai ita abia diba maorona hegeregerena ita kara. (Daniela 12:4; Ioane 17:3) Unai kara amo iseda toreisi lou helarona do ia mauri noho.
Toreisi Lou Taudia be Edena Bamona Tauanina Do Idia Abia?
11. Edena haheitalai amo Paulo ese horoa Keristani taudia edia toreisi lou ia herevalaia?
11 Paulo ese henanadai haida ia haerelaia danu. (1 Korinto 15:35-41) Reana ta ia ura toreisi lou dekenai daradara ia havaraia dainai, do ia henanadai: “Mase taudia be edena bamona do idia toreisi? Edia tauanina be do edena bamona?” Paulo ese ia hahedinaraia hegeregerena, tano dekenai ita hadoa uhe be ia mase guna bena tubu matamata gauna ai ia lao. Unai hegeregerena, Dirava ese lauma amo ia havaraia lou tauna do ia mase. Tubutubu gauna matamatana be uhe amo ia toreisi hegeregerena, toreisi lou ia abia Keristani horoa tauna ena tauanina be tanobada tauanina amo ia idau. Ena be ena mauri oromana be ia do mase lasi negana bamona, to ia toreisi lou neganai ia be lauma tauna matamatana bona guba dekenai ia mauri diba lauma tauanina ia abia. Danu, tanobada dekenai toreisi lou idia abia taudia be tanobada tauanina do idia abia.
12. “Guba taudia edia tauanina” bona “tanobada taudia edia tauanina” edia anina be dahaka?
12 Paulo ia hereva bamona, taunimanima edia hidio be idau bona animal edia hidio be idau. Animal idauidau edia hidio danu be idauidau. (Genese 1:20-25) “Guba [lauma] taudia edia tauanina” ena hairai be idau bona “tanobada taudia edia tauanina” ena be idau. Dina, hua, bona hisiu edia hairai be idauidau danu. To idia toreisi lou horoa taudia edia hairai be bada herea momokani.
13. Korinto Ginigunana 15:42-44 ena hereva hegeregerena, dahaka idia hadoa bona dahaka ia toreisi?
13 Paulo ese gau idauidau edia idau ia herevalaia murinai, ia gwau: “Mase taudia edia toreisi lou danu be unai bamona.” (1 Korinto 15:42-44) Ia gwau: “Tauanina ita guria neganai ia be bodaga diba gauna, to ia toreisi lou neganai ia be bodaga diba lasi gauna.” Unuseniai reana Paulo ese horoa taudia be orea ta bamona ia herevalaia. Mase dekenai bodaga gauna bamona idia guria, to ia toreisi lou neganai ia be bodaga diba lasi gauna, kara dika amo ia goeva gauna. Ena be tanobada ese ia matauraidia lasi, to guba dekenai idia toreisi bona Keriso ida hairai idia abia. (Kara 5:41; Kolose 3:4) Mase dekenai “tanobada gauna” idia guria bona toreisi lou neganai, ia be “lauma anina gauna.” Dirava ese ena lauma amo ia havaraia lou Keristani taudia dekenai unai bamona ia vara diba dainai, ita diba momokani ma haida be tanobada dekenai toreisi lou idia abia diba.
14. Edena dala ai Paulo ese Adamu bona Keriso edia idau ia herevalaia?
14 Paulo ese Adamu bona Keriso edia idau ia herevalaia. (1 Korinto 15:45-49) Adamu, tau ginigunana, be “taunimanima edia mauri ia abia.” (Genese 2:7) “Adamu dokona”—Iesu—“be mauri hanaihanai ia henia Laumana.” Ia ese ena mauri ia henia mauri davalaia boubouna bamona, ena murinai idia raka horoa taudia totona guna. (Mareko 10:45) Taunimanima bamona idia noho neganai, ‘tano kahuna dekena amo ia mai tauna ena toana idia abia,’ to toreisi lou idia abia neganai Adamu dokona bamona idia noho. Momokani, kamonai taudia ibounai, tanobada dekenai toreisi lou do idia abia taudia danu, ese Iesu ena boubou gauna amo namo do idia abia.—1 Ioane 2:1, 2.
15. Dahaka dainai horoa Keristani taudia be tanobada tauanina dekenai idia toreisi lasi, bona Iesu ena noho negana lalonai edena bamona idia toreisi?
15 Horoa Keristani taudia idia mase neganai, tanobada tauanina dekenai idia toreisi lasi. (1 Korinto 15:50-53) Ia bodaga diba tauanina bona rara be bodaga diba lasi maurina bona guba Basileiana ia abia diba lasi. Horoa taudia haida be nega daudau mase dekenai idia mahuta lasi. Iesu ena noho negana lalonai mai edia kamonai ida edia tanobada maurina idia haorea neganai, ‘Dirava ese idia ibounai do ia senisia, karaharaga momokani, matana hakapua haraga ena nega bamona.’ Maoromaoro lauma maurina, ia bodaga diba lasi mauri mai hairaina, idia abia. Dokonai, guba dekenai do idia noho Keriso ena “headava matamata hahinena” edia namba be 144,000.—Apokalupo 14:1; 19:7-9; 21:9; 1 Tesalonika 4:15-17.
Mase Ia Kwalimu Lasi!
16. Paulo bona peroveta taudia gunadia idia gwau Adamu amo ita abia mase dekenai dahaka do ia vara?
16 Paulo be mai ena moale ida ia gwau mase be do ia ore ela bona hanaihanai. (1 Korinto 15:54-57) Bodaga bona mase gauna be bodaga lasi bona mase lasi gauna ai ia lao neganai, inai hereva be do ia guguru: “Dirava ese mase ia haorea, Dirava ena kwalimu be ia momokani vadaeni! Mase e, oiemu kwalimu be edeseni? Mase e, oiemu hisihisi ena siahu be edeseni?” (Isaia 25:8; Hosea 13:14) Mase ena hisihisi ia havaraia gauna be kara dika, bona kara dika ena goada be Taravatu, badina ia ese kara dika taudia dekenai ia gwauraia hahemaoro be mase. To Iesu ena boubou gauna bona toreisi lou dainai, kara dika tauna Adamu amo ita abia mase be do ia kwalimu lasi.—Roma 5:12; 6:23.
17. Edena dala ai 1 Korinto 15:58 ena hereva be mai anina hari inai negai?
17 Paulo ia gwau: “Unai dainai, lauegu varavara taudia e, egu lalokau, do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.” (1 Korinto 15:58) Unai hereva be mai anina hari inai negai idia noho horoa orena taudia dekenai bona Iesu ena “mamoe idaudia” dekenai, herevana inai dina gabediai lalonai do idia mase. (Ioane 10:16) Basileia harorolaia gaukarana lalonai idia hekwarahi be hekwarahi kava lasi, badina toreisi lou do idia abia. Vadaeni, ita be Iehova ena hesiai taudia dainai, namona be Lohiabada ena gaukara lalonai do ita bisi noho, bona mai moale ida inai hereva do ita boiboilaia dinana ita naria noho: “Mase e, oiemu kwalimu be edeseni?”
Toreisi Lou Helarona Ia Guguru!
18. Paulo ena helaro toreisi lou dekenai ia goada, a?
18 Paulo ena hereva 1 Korinto karoa 15 lalonai ese ia hahedinaraia toreisi lou helarona be mai ena siahu iena mauri lalonai. Ia diba momokani Iesu be mase amo ia toreisi lou bona ma haida danu be taunimanima edia guri gabuna amo do ia ruhaia. Oiemu abidadama be unai bamona ia goada, a? Paulo ia laloa sibona ena ura gaudia be “momoru” bona “gau ibounai ia negea vadaeni,” ‘Keriso bona iena toreisi lou siahuna do ia diba’ totona. Aposetolo Paulo ia ura Keriso ia mase bamona do ia mase, badina unai amo ia vara guna “toreisi lou” do ia abia diba. Unai be “toreisi lou ginigunana” idia gwauraia danu, bona Iesu murinai idia raka horoa taudia 144,000 be unai do idia abia. Oibe, do idia toreisi lou bona lauma maurina guba dekenai do idia abia, to “mase taudia oredia” be tanobada dekenai do idia toreisi lou.—Filipi 3:8-11; Apokalupo 7:4; 20:5, 6.
19, 20. (a) Baibel ese ia herevalaia taudia haida tanobada dekenai do idia toreisi lou be daika daika? (b) Daika ena toreisi lou oi naria noho?
19 Mai edia kamonai ida idia mase horoa taudia dekenai toreisi lou be ia guguru vadaeni gauna namo hereana. (Roma 8:18; 1 Tesalonika 4:15-18; Apokalupo 2:10) ‘Hisihisi bada herea’ amo idia roho mauri taudia ese tanobada dekenai toreisi lou helarona ia guguru karana do idia itaia, unai neganai ‘davara, mase, bona mase taudia edia gabu ese idia lalonai idia koua noho taudia idia henia lou.’ (Apokalupo 7:9, 13, 14; 20:13) Tanobada dekenai do idia toreisi lou taudia ta be Iobu, guna iena natuna memero 7 bona natuna kekeni 3 edia mase ia lalohisihisilaia. Idia ia welkam henia lou diba neganai ena moale mani oi laloa—bona idia be do idia moale dikadika badina idia ese ma tadina memero 7 bona kekeni 3 mai edia hairai idia abia!—Iobu 1:1, 2, 18, 19; 42:12-15.
20 Aberahamo bona Sara, Isako bona Rebeka—bona taunimanima ma momo, “peroveta taudia ibounai” danu—be tanobada dekenai do idia toreisi lou be hahenamo badana! (Luka 13:28) Unai peroveta taudia ta be Daniela, ia abia gwauhamata be Mesia ena lohia negana lalonai do ia toreisi lou. Lagani 2,500 bamona lalonai, Daniela be guri dekenai ia laga-ani, to toreisi lou ena siahu dainai, nega sisina murinai ‘do ia toreisi bona ena gaukara davana namona do ia abia,’ bona ia be ‘tanobada ibounai dekenai lohia taudia ta ai do ia lao.’ (Daniela 12:13; Salamo 45:16) Do oi moale bada, badina oi ese unai idaunegai kamonai taudia sibona lasi, to oiemu tamana, sinana, natuna mero, natuna kekeni, eiava iseda inai tauna mase ese ia abia oho lalokau taudia ma haida oi welkam henia lou diba!
21. Dahaka dainai ita naria lasi be namo to ma haida dekenai kara namo ita karaia?
21 Reana iseda turadia bona lalokau taudia haida be lagani momo herea lalonai Dirava idia hesiai henia bona hari idia buruka vadaeni. Reana edia mauri laganidia be momo dainai mauri ena hekwakwanai idia hanaia be auka. Hari ita karaia diba hegeregerena idia ita durua be lalokau karana korikorina! Bena, bema idia mase, ita be idia ita durua dainai heduru henia lasi ena lalohisihisi do ita abia lasi. (Hadibaia Tauna 9:11; 12:1-7; 1 Timoteo 5:3, 8) Ita diba momokani Iehova ese ma haida dekenai ita karaia kara namodia do ia laloaboio lasi, herevana edia mauri lagani eiava edia noho dalana be edena bamona. Paulo ia gwau: “Dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.”—Galatia 6:10; Heberu 6:10.
22. Hari amo ela bona toreisi lou helarona do ia guguru negana, namona be dahaka ita karaia?
22 Iehova be “iseda Tamana, bona bogahisihisi bona durua ibounai ia henia Diravana.” (2 Korinto 1:3, 4) Iena Hereva ese ita ia hagoadaia bona ita ia durua, toreisi lou helarona mai ena siahu amo ma haida ita hagoadaia totona. Hari amo ela bona tanobada dekenai unai helaro do ia guguru bona mase taudia idia mauri lou do ita itaia negana lalonai, namona be Paulo bamona ita noho, ia ese toreisi lou ia abidadama henia. Bona namona be Iesu ita tohotohoa namonamo, iena helaro Dirava ena toreisi lou siahuna dekenai be ia guguru danu. Nega sisina murinai, mase guria gabu dekenai idia noho taudia be Keriso ena gado do idia kamonai bona do idia toreisi. Namona be unai ese ita ia hagoadaia bona hamoalea. To gau badana be, Iehova ita tanikiu henia, badina iseda Lohiabada Iesu Keriso amo mase halusia dalana ia kehoa!
Oiemu Haere be Dahaka?
• Paulo ia gwau Iesu ia toreisi lou murinai idia itaia taudia be daika daika?
• Iseda inai tauna ginigabena be dahaka, bona edena dala ai do ia ore?
• Horoa Keristani taudia idia mase neganai, dahaka idia guria bona dahaka ia toreisi?
• Baibel ese ia herevalaia taudia tanobada dekenai idia toreisi lou neganai, oi ura daika do oi hedavari henia?
[Picture on page 16]
Aposetolo Paulo ese mai ena goada ida toreisi lou ia hamomokania
[Pictures on page 20]
Iobu, iena ruma bese, bona ma momo edia toreisi lou ese moale bada do ia havaraia!