Edena Bamona ta Ena Kwalimu Oi Dibaia?

DIKSENARI ta ia gwau kwalimu ena anina be “taga habadaia, lalo-namo abia, eiava ladana bada abia.” Unai hereva ena anina ibounai be unai, a? Taga, lalo-namo, eiava ladana bada abia karana sibona amo ta ena kwalimu oi diba, a? Oi do haere lasi neganai, mani inai oi laloa: Iesu Keriso ena mauri ibounai lalonai kohu bada ia abia lasi. Taunimanima momo ese idia lalo-namo henia lasi; bona iena nega lalonai idia noho taunimanima ese edia dala idia tohotohoa taudia ese idia matauraia lasi. To, Iesu be kwalimu tauna ta. Dahaka dainai?

Tanobada ai ia noho neganai, “Dirava dekenai [Iesu] be gau momo ia henia.” (Luka 12:21) Iena toreisi lou murinai, Dirava ese “hairai bona matauraia” amo ia hanamoa bada. Iehova ese iena Natuna “ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia.” (Heberu 2:9; Filipi 2:⁠9) Iesu ena mauri dalana ese Iehova ena kudouna ia hamoalea. (Aonega Herevadia 27:11) Ena tanobada maurina ia kwalimulaia badina ia mai ena badina ia hagugurua. Iesu ese Iehova ena ura ia karaia bona Iena ladana ia hanamoa. Unai dainai, Dirava ese Iesu be taga bada, lalo-namo, bona ladana bada amo ia hanamoa, unai hahenamo be diba bada tauna, politikol tauna, eiava ladana bada spot gadara tauna ese ia abia gauna ia hereaia momokani. Momokani tanobada dekenai Iesu be kwalimu tauna hereadaena.

Keristani tama sina idia lalo-parara, bema edia natudia ese Keriso ena aena gabudia ai idia raka, Iesu bamona Dirava dekenai gau momo idia henia, hari inai negai hahenamo momo do idia abia bona vaira neganai hahenamo momo herea do idia moalelaia. Matamata tauna ta ese Keriso ena aena gabudia ai ia raka namonamo dalana ta be lasi, to Iesu ia karaia gaukarana ia karaia​​—⁠bema ia hegeregere ful-taim haroro gaukara ia karaia.

To, tano haida dekenai, idia badinaia dalana badana be matamata taudia ese ful-taim haroro gaukara do idia karaia lasi. Matamata tauna ta be ena sikuli ia haorea neganai, reana do ia laloa ful-taim moni gaukara do ia abia, ia headava, bona gabu ta dekenai ia noho. Nega haida, unai bamona mauri dalana amo idia mai matamata taudia idia laloa ful-taim hesiai gaukara lalonai idia vareai lasi. (Aonega Herevadia 3:​27) Dahaka dainai? Momo ese idia doria dainai, unai gabu ai idia badinaia kastom karana idia badinaia. Robert dekenai be unai bamona ia vara.a

Kastom Bona Lalona Ena Mamina Ia Idau Neganai

Robert ia tubu neganai ia be Iehova ena Witnes tauna ta. Iena matamata negana lalonai, iena kara bona ia abia hidi turadia be namo lasi. Iena sinana be ia dainai ia lalo-hekwarahi matamaia. Unai dainai, ia ese painia tauna ta, Iehova ena Witnes taudia edia ful-taim haroro gaukara tauna ta, ia noia Robert do ia hagoadaia. Robert ese gabeai ia vara gauna ia kikilaia.

“Unai painia tadikaka ese lau ia ura durua karana lau laloa bada momokani. Ena haheitalai namona dainai, lau ura maoromaoro sikuli lau rakatania neganai painia gaukara do lau karaia. To, unai negai egu sinana be ma ia lalo-hekwarahi bada​​—⁠to ma badina idauna ta dainai. Aiemai kastom dekenai kekeni ta ese sikuli ia haorea bona maoromaoro painia gaukara ia karaia be kerere lasi, to mero be moni gaukara namona ta do ia abia guna, bena gabeai painia gaukara do ia lalohadailaia diba.

“Gaukara ta lau dibaia bona sibona egu bisinesi lau hamatamaia. Daudau lasi murinai lau be bisinesi lau goadalaia bada, to hebou bona haroro be lau lao henia loulou kava sibona. Lauegu lalona ena mamina ese lau ia gwadaia​​—⁠lau diba Iehova ena hesiai gaukara lau karaia badabada diba. To, haida idia ura lau karaia gaudia rakatania totona be mai ena hekwarahi bada, to lau moale badina unai lau rakatania. Hari lau headava vadaeni, bona idia hanaia lagani rua lalodia egu adavana ida painia gaukara ai karaia. Vanegai, lau idia abia hidi kongregesen dekenai hesiai tauna ai lau lao. Hari mai momokani ida lau gwau diba, Iehova ena hesiai gaukara lau karaia namonamo mai egu kudouna bona goada ibounai ida dainai, moale bada ena mamina lau abia.”

Inai magasin ese matamata taudia ia hagoadaia loulou, ima gaukara ta idia dibaia eiava mai anina bada gaukarana ta dekenai iena diba habadaia totona​​—⁠bema hegeregere sikuli dekenai idia do noho lalonai. Dahaka totona? Taga idia habadaia totona, a? Lasi. Badina badana be, unai amo taunimanima badadia ai idia lao neganai tauanina dalanai sibona do idia durua namonamo diba bona edia goada hegeregerena ful-taim hesiai gaukara ai Iehova idia hesiai henia diba totona. To, nega momo ia vara gauna be, matamata taudia ese moni gaukara idia tahua momo dainai, hesiai gaukara ena anina idia laloa maragi. Haida be ful-taim hesiai gaukara idia laloa lasi. Dahaka dainai?

Robert ena hereva amo unai gauna ita lalo-pararalaia. Robert ese ena gaukara ia dibaia neganai, maoromaoro bisinesi ta ia hamatamaia. Daudau lasi murinai, ena be mai ena goada ida unai gaukara ia karaia loulou, to anina namona ia havaraia lasi. Iena tahua gauna be moni bada do ia abia. To, Keristani kongregesen lalonai eiava murimurinai idia noho taudia ta be unai tahua gauna ia davaria vadaeni, a? Namona be Keristani taudia idia hekwarahi moni dalanai edia maduna idia huaia totona, mai edia goada ida edia maduna moni dalanai idia hagugurua; to namona be idia lalo-parara danu hari inai daradara negai, haida sibona idia gwau moni dalanai idia hegeregere vadaeni. Unai dainai Iesu ena gwauhamata herevana Mataio 6:​33 dekenai be Keristani taudia ia hagoadaia momokani.

Robert ia moale, badina iena lalona ia hadaia iena kudouna ena ura do ia badinaia, to iena kastom ese ia gwauraia hegeregerena ia karaia lasi. Hari inai negai, ia ese ful-taim hesiai gaukara ia moalelaia noho. Oibe, ful-taim haroro gaukara be mai anina bada gaukarana. Robert ese maino ia abia badina Iehova ia hesiai henia, guna ia gwau hegeregerena, ‘mai ena goada ibounai ida.’

Oiemu Diba Oi Gaukaralaia Namonamo

Iehova ena Witnes taudia huanai mai edia diba bada taudia momo idia noho. Haida be edia darana idia gaukaralaia namonamo diba taudia; haida be imana gaukara idauidau idia karaia namonamo diba. Unai hahenamo iboudiai be Iehova ena amo idia mai, ia be ‘taunimanima ibounai dekenai mauri bona laga bona gau ibounai ia henia’ Diravana. (Kara 17:25) Bema mauri be lasi, unai hahenamo iboudiai be anina lasi.

Unai dainai, Iehova ena hesiai gaukara lalonai iseda mauri ita gaukaralaia be maoro. Mai ena diba bada matamata tauna ta be unai bamona ia karaia. Ia be Keristani taudia ginigunadia edia nega ai ia noho. Ia be ladana bada ruma bese ta amo ia mai, iena matamata negana lalonai ia be momo idia diba hanuana Taso, Kilikia dekenai, ia noho. Ena be Iuda dekenai ia vara, to iena tamana amo Roma tauna ai ia lao maorona ia abia. Unai dainai, ia be gau momo dekenai maoro ia abia bona hahenamo momo ia abia. Ia bada neganai, ia be unai negai ia noho “profesa” badana​​—⁠Gamaliela​​—⁠ida Taravatu ia stadilaia. Toana be gabeai, ‘taga bada, lalo-namo, bona lada bada’ ia abia diba.​​—⁠Kara 21:39; 22:​3, 27, 28.

Unai tau matamatana be daika? Guna iena ladana be Saulo. To Saulo be Keristani tauna ai ia lao bona gabeai idia gwauraia aposetolo Paulo. Ena ura ginigunana ia atoa siri bona iena mauri ibounai lalonai Keristani tauna bamona Iehova ena hesiai gaukara ia karaia. Paulo be loea tauna ena ladana ia abia lasi, to ia be sivarai namona harorolaia goadagoada tauna idia gwauraia. Kahirakahira lagani 30 misinari gaukara ia karaia murinai, Paulo ese ena turadia Filipi dekenai revareva ta ia siaia. Unai revareva lalonai ia ese guna Keristani tauna ai ia do lao lasi neganai ia karaia diba gaudia haida ia gwauraia hedinarai, bena ia gwau: “[Iesu Keriso] dainai gau ibounai lau negea vadaeni. Lau laloa idia be momoru, Keriso do lau abia momokani totona.” (Filipi 3:⁠8) Lasi, Paulo ese ena mauri ia gaukaralaia dalana ia lalohisihisilaia lasi!

To, Paulo ese Gamaliela amo ia abia hadibaia dalana be edena bamona? Unai ia gaukaralaia, a? Oibe! Nega haida, ‘sivarai namona ena momokani ia gwauraia neganai,’ unai diba ia gaukaralaia. To, Paulo ena gaukara badana be sivarai namona ia harorolaia​​—⁠guna ia abia sikulina lalonai idia hadibaia diba lasi gauna.​​—⁠Filipi 1:7; Kara 26:​24, 25.

Hari inai negai danu, haida be edia hahenamo bona diba bona edia edukeisen idia gaukaralaia Basileia ena gaukara habadaia totona. Hegeregere, Amy be bisinesi bona taravatu ena univesiti kwalimu pepadia ia abia. Nega ta, ia be loea oreana ta dekenai davana bada moni gaukarana ia karaia, to hari ia be Watch Tower Society ena brens opesi dekenai davana lasi volantia gaukara ia karaia. Amy ese hari ena mauri be inai bamona ia kikilaia: “Lau diba lau ese mauri lalonai mai anina bada gauna lau abia hidi. . . . Lau ura lasi univesiti ai sikuli hebou taudia ta ena gabuna do lau abia. Lau abia hidi dala lau moalelaia. Lauegu dabu gaudia bona lau ura gaudia ibounai lau abia vadaeni​​—⁠moale ia havaraia maurina bona gaukarana.”

Amy ese ia abia hidi gauna dainai, lalo-maino, hemami namona, bona Iehova ena hahenamo ia abia. Momokani, Keristani tama sina idia ura edia natudia idia moale!

Keristani Haroro Gaukara Lalonai Ita Kwalimu

Oibe, Keristani haroro gaukara ena kwalimu ita lalo-pararalaia be gau badana. Haroro gaukara dekenai nega namona ita abia, Baibel bukadia ita hariharilaia eiava ruma taudia ida Baibel ita herevalaia neganai, ita mamia ita kwalimu vadaeni. To, bema kamonai tauna ta ita davaria lasi, reana ita gwau diba iseda nega ita halusia kava. To, namona be ita laloatao, kwalimu ena anina ta be “lalo-namo abia.” Daika ena lalo-namo ita ura abia? Oibe, Iehova ena lalo-namo. Herevana taunimanima ese iseda hereva idia kamonai eiava lasi, to unai lalo-namo ita abia diba. Iesu ese unai gauna dekenai mai anina bada gauna ta ena hahediba taudia ia hadibadia.

Iesu ese Basileia harorolaia taudia 70 ia siaia karana be oi laloatao, “ia ese do ia lao hanuadia bona gabudia ibounai dekenai be idia ese do idia lao hedinarai guna.” (Luka 10:⁠1) Taoni bona hanua dekenai do idia haroro bona Iesu ese do ia bamoa lasi. Idia dekenai unai be gaukara matamatana. Unai dainai, Iesu ese ia hadibadia namonamo guna bena ia siaidia. “Maino tauna ta” idia davaria neganai, ia dekenai Basileia ena sivarai ibounai do idia harorolaia. To, idia dadaraidia neganai, do idia lao to idia badu lasi. Iesu ia gwau edia hereva idia kamonai henia lasi taudia be Iehova idia dadaraia.​​—⁠Luka 10:​4-7, 16.

Unai hahediba taudia 70 ese edia haroro gaukarana idia hagugurua neganai, Iesu dekenai idia giroa “mai moale danu, idia gwau: ‘Lohiabada e, lauma dikadia ese aiemai hereva idia kamonai, oiemu ladana dainai.’ ” (Luka 10:17) Reana unai goevadae lasi taudia dekenai lauma dikadia mai edia siahu idia lulua be moale gauna momokani! To, Iesu ese ena hahediba taudia mai edia ura bada ia sisiba henidia, ia gwau: “Lauma dikadia ese umui dekenai idia kamonai henia, be do umui moalelaia lasi, to inai sibona mo do umui moalelaia: Umui emui ladana be guba dekenai ia torea vadaeni.” (Luka 10:20) Reana unai hahediba taudia 70 be nega ibounai lauma dikadia lulua siahuna do idia abia lasi, eiava nega ibounai haroro gaukara dekenai taunimanima be do idia kamonai lasi. To bema idia abidadama noho, nega ibounai idia ese Iehova ena lalo-namo do idia abia.

Ful-Taim Hesiai Gaukara Idia Karaia Taudia Oi Lalodia Bada, A?

Nega ta, tau matamata ta ese Keristani elda ta ia hamaoroa, ia gwau: “Haisikuli do lau rakatania neganai, moni gaukara ta do lau tahua. Bema moni gaukara ta lau davaria lasi, vadaeni ful-taim hesiai gaukara do lau laloa.” To, painia gaukara idia karaia taudia momo edia lalohadai be unai bamona lasi. Painia gaukara idia karaia totona, haida ese davana bada moni gaukara idia rakatania. Haida be edukeisen namona idia dadaraia. Aposetolo Paulo bamona, gau momo idia dadaraia, to Paulo, Robert, bona Amy, bamona idia abia hidi gauna dainai idia moale. Edia diba amo Iehova, edia gau namodia ibounai ia abia be namo tauna, idia hanamoa karana idia laloa bada.

Badina idauidau dainai, Iehova ena abidadama Witnes taudia momo be idia hegeregere lasi idia painia totona. Reana Baibel ese ia gwauraia maduna idauidau idia huaia dainai. To, bema ‘edia lalona ibounai, edia lauma ibounai, bona edia kudouna ibounai’ amo Dirava idia hesiai henia, Iehova be idia dekenai ia moale bada. (Mataio 22:37) Ena be painia gaukara idia karaia diba lasi, to idia diba painia gaukara idia karaia taudia be gaukara namona idia karaia.

Aposetolo Paulo ia gwau: “Inai tanobada taudia edia kara bamona do umui karaia lasi.” (Roma 12:⁠2) Paulo ena sisiba bamona, namona be dala ita kehoa lasi inai tanobada ena kastom eiava taravatu ese iseda lalohadai ia biagua totona. Herevana oi painia eiava lasi, to namona be emu mauri lalonai Iehova ena hesiai gaukara oi laloa bada. Do oi kwalimu bema Iehova ena lalo-namo oi abia.

[Footnote]

[Picture on page 19]

Namo lasi mai eda goada ibounai ida gaukara ta ita karaia loulou, to anina namona ia havaraia lasi