Dahaka Dainai Kara Namo Ita Habadaia be Namo?

IENA mauri lagani be 50 bamona Japan tauna ta, iena ladana be Kunihito, be vanegai sibona United States dekenai ia lao ia noho totona.a Ia lao bena wiki haida murinai, iena gaukara dagina ia hadikaia diba hekwakwanai ta ia vara. Kunihito ia gwau: “Gunalaia tauna ese lau ia nanadaia bema maduna ta do lau huaia diba, bona lau diba vadaeni lau karaia diba. To, lau tubu daekau neganai lau idia hadibaia manau karana be kara namona ta, unai dainai lau gwau: ‘Lau diba lasi bema lau karaia diba, to mai egu goada ibounai ida do lau karaia toho.’ Egu America gunalaia tauna dekenai toana be lau be diba lasi tauna bona lau daradara bema lau karaia diba, eiava. Unai lau dibaia neganai, lau diba gau haida lau haidaua be namo.”

Maria ia noho New York City dekenai, bona ia be koledi ta ena stiuden namona ta. Mai moale ida stiuden taudia ma haida ia durua. Nega haida Juan, stiuden tauna ma ta, be Maria ena heduru ia noia. To ia ese Maria ia ura henia danu bona iena lalona ia veria toho. Ena be Maria ia ura kara goeva ia badinaia noho, to gabeai Juan ena lalo-ani herevadia ia kamonaia bona sihari kava karana idia karaia.

Hari inai kastom idauidau momo bona kara gageva tanobadana lalonai kara namo ita hahedinaraia be auka. Unai dainai badina be dahaka kara namo ita habadaia be namo? Badina be kara namo ese Dirava ia hamoalea, bona ita momo ita ura iena lalo-namo ita abia.

Dirava ena Hereva, Baibel, ese idia duahia taudia ia hamaoroa namona be kara namo idia habadaia. Hegeregere, aposetolo Paulo ia gwau: “Inai bamona karadia sibona do umui laloa: Kara namodia, taunimanima edia ladana idia hanamoa karadia.” (Filipi 4:⁠8) Bona aposetolo Petero ese ita ia hagoadaia namona be ‘abidadama sibona lasi, to kara namodia ita karaia danu.’ (2 Petero 1:⁠5) To kara namo be dahaka? Klasrum ta dekenai ita hadibaia diba, a? Edena dala ai ita habadaia diba?

[Footnote]