Iehova Ena Orea ida Ita Raka Noho
“Inai maino Diravana ese gau namodia ibounai umui dekenai do ia henia, . . . vadaeni umui ese iena ura do umui karaia.”—HEBERU 13:20, 21.
1. Tanobada dekenai idia noho taudia edia namba be hida, bona tomadiho idauidau edia namba be hida?
LAGANI 1999 ai, tanobada taudia edia namba ia daekau lao bilioni 6 dekenai! The World Almanac ese ia hahedinaraia unai namba lalonai, 1,165,000,000 be Muslim taudia; 1,030,000,000 be Katolik taudia; 762,000,000 be Hindu taudia; 354,000,000 be Buddhist taudia; 316,000,000 be Protestan taudia; bona 214,000,000 be Otodoks taudia.
2. Hari inai negai, tomadiho ita herevalaia neganai dahaka ita gwau diba?
2 Hari inai negai, tomadiho idauidau edia hapararaia karana bona daradara havaraia karana dainai, unai taunimanima milioni momo ibounai be Dirava ena ura hegeregerena idia kara, a? Lasi, badina “Dirava be ia ura lasi hereva kava bona heai, ia be maino Diravana.” (1 Korinto 14:33) To, Iehova ena hesiai taudia edia tanobada hegegemadai tadikaka oreana be edena bamona? (1 Petero 2:17) Tahua namonamo karana ia hamomokania ‘maino Diravana ese gau namodia ibounai idia dekenai ia henia, vadaeni idia ese iena ura idia karaia diba.’—Heberu 13:20, 21.
3. Pentekoste 33 C.E. ai, Ierusalema lalonai dahaka ia vara, bona dahaka dainai?
3 Momokani, Iehova ena Witnes taudia idia bamoa taudia ese Dirava ena lalo-namo idia abia eiava lasi ita diba totona, edia namba be mai anina lasi; Dirava ese namba badadia ia laloa lasi. Israela taudia be “bese badana” lasi, to Dirava ese idia ia abia hidi. Momokani, bese ibounai edia huanai idia be “maragi herea.” (Deuteronomi 7:7) To Israela taudia edia abidadama lasi karana dainai, Pentekoste 33 C.E. ai, Iehova ese idia ia rakatania bona Iesu Keriso murinai idia raka taudia edia kongregesen matamata ia lalo-namo henia matamaia. Iehova ena lauma helaga amo ia horodia bona mai edia goada ida ma haida dekenai idia lao, Dirava bona Keriso edia sivarai momokanina idia harorolaia totona.—Kara 2:41, 42.
Ia Bada Ia Lao Noho
4. Dahaka dainai oi gwau diba Keristani kongregesen ginigunana be unai negai ia bada ia lao noho?
4 Aposetolo taudia edia negai, Keristani kongregesen ia bada ia lao noho, teritori matamatadia idia kehoa, taunimanima be hahediba taudia ai idia halaoa, bona Dirava ena ura dekenai edia lalo-parara ia bada ia lao. Keristani taudia ginigunadia be Dirava ena lauma amo idia vara revarevadia ese idia halasia lauma diarina ai idia raka noho. Aposetolo taudia bona ma haida edia vadivadi ese idia hagoadadia dainai, edia haroro gaukara idia karaia guguru. Keristani Greek Revarevadia lalonai edia sivarai idia noho.—Kara 10:21, 22; 13:46, 47; 2 Timoteo 1:13; 4:5; Heberu 6:1-3; 2 Petero 3:17, 18.
5. Dahaka dainai Dirava ena orea be ia bada ia lao noho, bona dahaka dainai ia ida ita raka noho be namo?
5 Idaunegai Keristani taudia bamona, hari inai negai Iehova ena Witnes taudia be orea maragina amo idia tubu. (Sekaraia 4:8-10) Lagani 1870 bamona amo ema bona hari, ia hedinaraia goevagoeva Dirava ena lauma be ena orea lalonai ia noho. Taunimanima edia siahu dekenai ita tabekau lasi, to lauma helaga ena hakaua dalana ita badinaia dainai, iseda lalo-parara Baibel bona Dirava ena ura dekenai ita habadaia noho. (Sekaraia 4:6) Hari ita be “nega ena dokona” dekenai ita noho, unai dainai Iehova ena orea, ia heau noho oreana, ida ita raka noho be gau badana. (2 Timoteo 3:1-5) Unai bamona ita karaia neganai, iseda helaro do ia goada noho bona inai tanobada ena oromana dikana ia do ore lasi negana lalonai, Dirava ia haginia vadaeni Basileia harorolaia gaukara ena kahana ta do ita karaia diba.—Mataio 24:3-14.
6, 7. Iehova ena orea ia heau noho daladia toi, do ita laloa gaudia, be dahaka?
6 Ita huanai idia noho taudia haida be lagani 1920 ia lao lagani 1950 lalonai Iehova ena orea idia bamoa matamaia. Unai lagani gunadia lalonai, daika ese inai orea ena tubu bona ia bada ia lao karana ema bona hari ia laloa diba? Hari inai nega ena histori lalonai idia vara gaudia badadia mani oi laloa! Iehova ese tiokratik dalanai ia haginia oreana amo ia karaia gaudia ibounai ita laloa neganai, lauma dalanai ita ia hanamoa.
7 Idaunegai tauna Davida ese Iehova ena gaukara ia laloa neganai, ia hoa bada. Ia gwau: “Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.” (Salamo 40:5) Ita ibounai ese unai bamona mamina ita abia, badina hari inai negai Iehova ena kara namodia, idia dainai ia ita hanamoa gaudia, be momo herea dainai ibounai ita gwauraia diba lasi. To, namona be Iehova ena orea ia heau noho daladia toi ita laloa: (1) ia bada ia lao lauma diarina ia halasia, (2) haroro gaukara ia hanamoa bona ia habadaia, bona (3) nega korikori ai orea ena heau dalana ia haidaua.
Lauma Diarina Dainai Ita Moale
8. Aonega Herevadia 4:18 hegeregerena, lauma diarina ia noho dainai Basileia ita laloa neganai dahaka ita itaia?
8 Bema ia bada ia lao lauma diarina ita laloa, Aonega Herevadia 4:18 ena hereva be momokani. Ia gwau: “To kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.” Ita moale bada herea ia bada ia lao lauma diarina ita abia dainai! Lagani 1919 Cedar Point, Ohio, distrik hebouhebouna ai, Dirava ena Basileia idia hahedinaraia goevagoeva. Iehova ese ena Basileia ia gaukaralaia ena ladana hahelagaia bona ena lohia siahuna ena maoro hamomokania totona. Momokani, lauma diarina dainai ita itaia Baibel lalonai Genese amo ela bona Apokalupo dekenai, ia hahedinaraia Iehova ena ura be iena Natuna ia lohiaia Basileia amo iena ladana do ia hahelagaia. Unai be kara maoromaoro idia ura henia taudia ibounai edia helaro ena badina badana.—Mataio 12:18, 21.
9, 10. Lagani 1920 murinai, Basileia bona idia tuari heheni oreadia rua dekenai dahaka lalo-parara ita abia, bona edena dala ai ita ia durua?
9 Lagani 1922 Cedar Point hebouhebouna ai, hereva henia tauna badana, J. F. Rutherford, ese Dirava ena taunimanima ia hagoadaia, ia gwau “umui haroro, haroro, haroro; Pavapava bona iena basileia umui harorolaia.” The Watch Tower, March 1, 1925, gauna lalonai idia printaia hereva “Bese ta Ia Vara,” ese lauma dalanai tadikaka edia diba, lagani 1914 ai Dirava ena Basileia ia gini idia perovetalaia herevadia dekenai, ia habadaia. Lagani 1920 murinai danu, idia lalo-parara idia inai heheni orea rua idia noho—Iehova ena, bona Satani ena. Idia tuari heheni noho, bona bema ita ura do ia kwalimu oreana dekenai ita noho, Iehova ena orea ida do ita raka noho be namo.
10 Unai lauma diarina be edena bamona ita ia durua? Dirava ena Basileia bona ena King Iesu Keriso be tanobada ena lasi dainai, ita danu be tanobada ena lasi be gau badana. Inai tanobada amo ita gini siri karana amo ita hahedinaraia hereva momokani ena kahana ai ita gini. (Ioane 17:16; 18:37) Inai tanobada dikana ena hekwakwanai badadia ita itaia neganai, ita moale badina ita be Satani ena orea taudia lasi! Bona Iehova ena orea lalonai hahenamo badana be lauma dalanai noho namona ita abia!
11. Lagani 1931 ai, Dirava ena taunimanima ese Baibel amo edena ladana idia abia?
11 Lagani 1931 Columbus, Ohio, hebouhebouna ai, Isaia 43:10-12 ena anina korikorina idia hahedinaraia. Bible Student taudia ese inai ladana, Iehova ena Witnes taudia, idia abia dae. Dirava ena ladana ita hahedinaraia, unai amo ma haida ese iena ladana do idia boiboilaia diba bona do idia mauri be iseda hahenamo badana!—Salamo 83:18; Roma 10:13.
12. Lagani 1935 ai, hutuma bada herea oreana ena anina dekenai, edena lauma diarina idia abia?
12 Lagani 1930 do lasi neganai, Dirava ena taunimanima momo be vaira negana idia laloa neganai, idia totona edena helaro ia noho idia daradaralaia. Haida be guba maurina idia laloa, to Baibel ia gwauraia tanobada paradaisona be edia lalona ia veria danu. Lagani 1935 Washington, D.C., hebouhebouna ai idia diba Apokalupo karoa 7 ia herevalaia taunimanima hutuma, eiava hutuma bada herea, be tanobada dekenai do idia mauri helarona idia abia taudia. Unai nega amo, hutuma bada herea haboua gaukarana idia karaia noho bona idia haharagaia. Ita moale badina ita dekenai hutuma bada herea oreana be hehuni herevana lasi, ani? Taunimanima momo herea be bese idauidau, iduhu idauidau, bona gado idauidau amo idia haboua noho dainai, ita ura iseda raka ita haharagaia, Iehova ena orea ida ita raka noho totona.
13. Lagani 1941 St. Louis hebouhebouna ai, edena hepapahuahu badana idia gwauraia hedinarai?
13 Lagani 1941 St. Louis, Missouri, hebouhebouna dekenai, taunimanima ibounai idia laloa be namo hepapahuahu badana idia gwauraia hedinarai. Unai be tanobada bona guba biagua, o ena lohia siahuna ena hepapahuahu. Unai hepapahuahu be kahirakahira do idia hamaoromaoroa, bona unai do ia karaia dinana badana mai garina be ia mai noho! Lagani 1941 ai, kara maoromaoro badinaia karana idia herevalaia momo danu, bona unai kara amo ita ta ta be Dirava ena lohia siahuna ita abia dae eiava lasi do ita hahedinaraia diba.
14. Lagani 1950 intenesenel hebouhebouna ai, Isaia 32:1, 2 ia gwauraia lohia taudia dekenai dahaka idia dibaia?
14 Lagani 1950 intenesenel hebouhebouna New York City dekenai, Isaia 32:1, 2 ese ia gwauraia lohia taudia idia hahedinaraia goevagoeva. Tadikaka Frederick Franz ese unai ia herevalaia bona ia gwau unai tanobada matamatana ena lohia taudia be ita huanai idia noho neganai, kamonai taudia idia hoa. Unai hebouhebou bona ma haida ai, nega momo unai bamona lauma diarina idia halasia. (Salamo 97:11) Dirava ita tanikiu henia badina iseda dala “ena diari be ia bada lao noho”!
Iseda Haroro Gaukara Ita Habadaia Noho
15, 16. (a) Lagani 1920 ia lao lagani 1940 ai, edena dala ai iseda haroro gaukara ita habadaia? (b) Vanegai laganidia lalonai, edena buka ese iseda Keristani haroro gaukara idia durua bada?
15 Iehova ena orea ia heau noho dalana iharuana be iseda gaukara badana—Basileia harorolaia bona hahediba taudia halaoa gaukarana—ia heau noho. (Mataio 28:19, 20; Mareko 13:10) Unai gaukara hagugurua totona, iseda orea ese iseda hesiai gaukara habadaia karana be hanaihanai ia gwauraia. Lagani 1922 ai, Keristani taudia ibounai ia hagoadaia haroro gaukara idia karaia totona. Namona be idia diba idia ta ta edia maduna be edia diari idia hahedinaraia bona unai amo hereva momokani harorolaia ena kahana ta idia karaia. (Mataio 5:14-16) Lagani 1927 ai, Sunday idia abia hidi bona idia gwau ia be edia haroro gaukara dinana. Bena February 1940 ai, nega momo Witnes taudia ese The Watchtower bona Consolation (hari idia gwauraia Awake!) be bisinesi gabudia edia dala dekenai idia hariharilaia.
16 Lagani 1937 ai, Model Study buklet idia halasia bona ia hahedinaraia Baibel ena hereva momokani do idia hadibaia totona, lou henia idia karaia be gau badana. Unai lagani ena murina laganidia ai, Baibel stadi karana idia herevalaia momo. Lagani 1946 ai “Let God Be True” bukana bona lagani 1968 ai Mauri Ia lao Henia Hereva Momokanina bukana idia halasia neganai, unai bamona hesiai gaukara idia durua bada. Harihari, ita ese Diba ese Mauri Dekenai Ita Ia Hakaua Lao bukana ita gaukaralaia. Unai bamona buka stadilaia karana ese Baibel ena badina herevadia do ia hahedinaraia bona hahediba taudia halaoa gaukarana ia durua bada.
Orea Ena Heau Daladia Haida Idia Haidaua
17. Isaia 60:17 ena hereva hegeregerena, Iehova ena orea be edena dala ai ia heau noho?
17 Iehova ena orea ia heau noho dalana ihatoina be ena heau daladia haida idia haidaua. Isaia 60:17 ena hereva hegeregerena, Iehova ena gwauhamata be inai: “Lau ese auri laboralabora do lau mailaia lasi, to golo be oi dekenai do lau mailaia. Lau ese auri bona au do lau mailaia lasi, to siliva bona auri laboralabora, be oi dekenai do lau mailaia. Nadi do lau mailaia lasi, to auri. Oiemu biaguna taudia ese, oi do idia hisihisi henia lou lasi. Lau ese idia do lau hanamoa, vadaeni mai maoromaoro bona maino danu oi do idia biagua noho.” Unai peroveta hereva hegeregerena, kara haida idia karaia Basileia harorolaia gaukara bona mamoe naria gaukara idia biagudia namonamo totona.
18, 19. Idia ore vadaeni laganidia ai, iseda orea ese edena bamona gaudia ia haidaua?
18 Lagani 1919 ai, haroro gaukara idia ura idia karaia kongregesen ta ta ai, hesiai gaukara ia gunalaia tauna ta idia abia hidi. Unai ese iseda haroro gaukara ia durua bada. Lagani 1932 ai, elda bona diakono edia dagi abia totona vouti karana idia hadokoa, bona unai bamona demokratik daladia idia rakatania matamaia. Mai anina gauna ma ta be lagani 1938 ai ia vara, kongregesen ena hesiai taudia ibounai be tiokratik dalanai idia abia hidi matamaia, guna Keristani kongregesen ginigunana ese ia karaia bamona. (Kara 14:23; 1 Timoteo 4:14) Lagani 1972 ai, naria taudia bona hesiai taudia idia abia hidi, idaunegai Keristani taudia ese idia karaia hegeregerena. Bona tau tamona ese kongregesen naria gaukarana ia karaia lasi, to Filipi 1:1 bona Baibel siri ma haida edia hereva ese idia hahedinaraia, Baibel ena hereva hegeregerena naria taudia ai idia lao taudia be elda oreana ta lalonai idia noho.—Kara 20:28; Efeso 4:11, 12.
19 Lagani 1975 ai, dala idia karaia Iehova ena Witnes taudia edia Hakaua Oreana edia komiti ese Dirava ena tanobada ibounai oreana ena gaukara idauidau idia gunalaia totona. Brens komiti idia abia hidi, edia teritori ena gaukara do idia gunalaia totona. Unai murinai, Watch Tower Society edia hedikwota bona brens idauidau dekenai gaukara idauidau idia haidaua, mai anina gaudia idia naria namonamo totona. (Filipi 1:9, 10, NW ) Keriso henunai idia gaukara mamoe naria taudia mai edia maduna be haroro gaukara idia gunalaia, kongregesen lalonai idia hadibaia, bona dala maorona ai Dirava ena mamoe oreana idia naria.—1 Timoteo 4:16; Heberu 13:7, 17; 1 Petero 5:2, 3.
Iesu Ena Gunalaia Siahuna
20. Iehova ena orea ida ita raka noho ena anina be Iesu ena dagi be edena bamona ita laloa?
20 Iehova ena orea, ia heau noho oreana, ida ita raka noho ena anina be Dirava ese Iesu Keriso dekenai ia henia dagi, “ekalesia ena kwarana,” ita abia dae. (Efeso 5:22, 23) Namona be Isaia 55:4 (NW ) ena hereva ita laloa danu, ita ia hamaoroa: ‘Lau, Iehova ese ia lau abia hidi, bona gunalaia tauna, bona bese idauidau edia lohia lau halaoa. Bona ia dekena amo, egu siahu badana bese idauidau dekenai lau hedinaraia.’ Iesu be gunalaia karana ia diba namonamo. Danu, iena mamoe bona edia kara ia diba. Momokani, ia ese Asia Minor ena kongregesen 7 ia itaia neganai, nega ima ia gwau: “Oiemu kara lau diba.” (Apokalupo 2:2, 19; 3:1, 8, 15) Iesu be iseda dabu gaudia ia diba, iena Tamana Iehova bamona. Iesu ese guriguri dalana ia do gwauraia lasi neganai, ia gwau: ‘Tamana guba dekenai ia noho, do umui noinoi henia lasi neganai, umui ura gaudia ia diba vadaeni.’—Mataio 6:8-13.
21. Keristani kongregesen lalonai, edena dala ai Iesu ena gunalaia siahuna ia hedinarai?
21 Iesu ena gunalaia siahuna be edena bamona ia hedinarai? Dala ta be “harihari gaudia taunimanima dekenai,” Keristani naria taudia unai, amo ia hedinarai. (Efeso 4:8) Apokalupo 1:16 ia hahedinaraia horoa naria taudia be Keriso ena imana idibana dekenai, iena siahu henunai idia noho. Hari inai negai, Iesu ese elda taudia ia hakaua, herevana unai tatau ese guba eiava tanobada helarona idia abia. Hereva gunana ai ai hahedinaraia vadaeni hegeregerena, lauma helaga ese Baibel lalonai naria taudia edia taravatu hegeregerena idia ia abia hidi. (1 Timoteo 3:1-7; Tito 1:5-9) Aposetolo taudia edia negai, Ierusalema dekenai idia noho tatau badadia haida amo hakaua oreana idia karaia, bona idia ese kongregesen ibounai bona Basileia harorolaia gaukarana idia naria. Hari inai negai Iehova ena orea ese unai bamona oromana idia badinaia danu.
Ia ida Raka Noho!
22. Hakaua Oreana ese edena heduru ia henia?
22 “Hesiai tauna mai ena kamonai, bona mai ena kara maoromaoro” ese Basileia ena tanobada gaudia idia naria, bona Iehova ena Witnes taudia edia Hakaua Oreana be iena ladana ai idia gaukara. (Mataio 24:45-47) Hakaua Oreana ia laloa bada gauna be Keristani kongregesen dekenai Baibel idia hadibaia bona ena hakaua herevadia idia henia noho. (Kara 6:1-6) Edia tomadiho tamona taudia dekenai gau dikadia idia vara kava neganai, Hakaua Oreana ese gaukara oreana ta o ma haida ia noia heduru gaudia idia henia bona ruma bona Kingdom Hall hanamoa gaukara idia karaia. Bema taunimanima ese Keristani taudia haida idia kara dika henia eiava idia dagedage henia, kara ta idia karaia lauma dalanai idia do idia hagoadaia totona. Bona “nega dikadia” ai, idia hekwarahi bada haroro gaukara do ia heau noho totona.—2 Timoteo 4:1, 2.
23, 24. Herevana dahaka ia vara Iehova ena taunimanima dekenai, ia ese dahaka ia henia noho, bona iseda lalona ita hadaia dahaka do ita karaia totona be namo?
23 Herevana dahaka ia vara Iehova ena taunimanima dekenai, ia ese lauma aniani bona hakaua herevadia ia henia noho. Danu, Dirava ese maduna idia abia tadikaka dekenai laloa kehoa bona lalo-parara ia henia, tiokratik orea ena heau dalana do ia hanamoa bona hamaoromaoroa totona idia gini hegaegae. (Deuteronomi 34:9; Efeso 1:16, 17) Iseda hahediba taudia halaoa gaukarana bona iseda tanobada hegegemadai haroro gaukarana ibounai do ita hagugurua totona, Iehova ese ita abia be namo gaudia do ia henia.—2 Timoteo 4:5.
24 Ita diba momokani Iehova ese iena abidadama taudia do ia rakatania lasi; do ia mai “hisihisi badana” amo idia do ia hamauria. (Apokalupo 7:9-14, NW; Salamo 94:14; 2 Petero 2:9) Ita dekenai badina momo herea idia noho dainai, ita abia abidadama do ita dogoatao auka ela bona dokona. (Heberu 3:14) Unai dainai, namona be iseda lalona ita hadaia Iehova ena orea ida do ita raka noho.
Edena Bamona Do Oi Haere?
• Dahaka dainai ita gwau diba Iehova ena orea ia heau noho?
• Edena gaudia idia hamomokania Dirava ena taunimanima ese ia bada ia lao lauma diarina idia moalelaia?
• Keristani haroro gaukara dekenai, edena gaudia ita hanamoa?
• Nega korikori ai, Iehova ena hesiai taudia ese edena gaudia edia orea lalonai idia haidaua?
[Picture on page 17]
Davida bamona, Iehova ena gaukara ibounai ita gwauraia diba lasi
[Picture on page 18]
Dirava ena seri ese edena namo idia abia, orea ena naria daladia haida idia haidaua dainai