Basileia Haroro Ripoti

Lauma Dalanai Ena Dabu Gaudia Ia Abia

CYPRUS be motumotu ta, Meditereinien Davara ena notist kahana ai. Baibel negadia, Cyprus (Kupro) ena kopa bona au namodia dainai taunimanima momo be ia idia diba. Paulo bona Banaba be edia misinari loaloa ginigunana lalonai, unuseniai Basileia sivarai namona idia harorolaia. (Kara 13:​4-12) Hari inai negai, Cyprus taudia momo edia mauri lalonai sivarai namona be anina namona ia havaraia noho. Lucas, mauri lagani 40 bamona tauna, dekenai unai be momokani. Ia gwau:

“Mai edia natudia 7 ruma besena ai lau vara, ai be boromakau naria gabuna ta dekenai ai noho. Lau maragi negana amo, duahiduahi karana lau ura henia bada. Lau ura henia bada bukana be buka maragina ta, ia lalonai be Keristani Greek Revarevadia. Egu mauri lagani be 10 neganai, turadia haida bona lau be Baibel stadi grup maragina ta ai karaia. To ai karaia daudau lasi, badina hanua dekenai idia noho taunimanima badadia idia gwau ai be dubu ena hereva dadaraia taudia.

“Gabeai, United States lalonai sikuli dekenai lau lao neganai, lau ese taunimanima mai edia tomadiho idauidau momo lau hedavari henia. Unai ese egu ura lauma gaudia dekenai ia habadaia lou. Lau be dina momo iunivesiti ena laiberi dekenai lau noho, tomadiho idauidau lau stadilaia totona. Dubu haida lau vadivadi henia danu, bona ena be lau hekwarahi, to lauma dalanai egu dabu gaudia lau davaria lasi.

“Sikuli lau haorea murinai, Cyprus dekenai lau giroa lou bona medikol laboratori ta ena dairekta gaukara lau abia. Iehova ena Witnes tau burukana ta, ladana Antonis, be egu gaukara gabuna dekenai lau ia vadivadi henia. To, Greek Otodoks Dubu taudia ese ena vadivadi karana idia itaia.

“Nega sisina murinai, tomadiho stadilaia tauna ta be lau ia vadivadi henia bona ia ura lau ese Iehova ena Witnes taudia lau hereva henia lasi. Badina lau maragi negana amo lau idia hadibaia Greek Otodoks Dubu be hereva momokani ia abia, ena hereva lau abia dae bona Antonis ida emai herevahereva karana lau hadokoa bona tomadiho stadilaia tauna ida Baibel ai herevalaia matamaia. Cyprus dekenai, tomadiho rumadia momo lau vadivadi henia danu. Greece ena not kahana dekenai lau loaloa bona Athos Ororona lau vadivadi henia, Otodoks Keristani oreana lalonai idia laloa ia be ororo helagana ta. To, egu Baibel henanadai edia haere lau davaria lasi.

“Bena Dirava lau guriguri henia bona lau noia lau do ia durua hereva momokani lau davaria totona. Daudau lasi murinai, Antonis be lauegu gaukara gabuna dekenai lau ia vadivadi henia lou, bona lau laloa unai be lauegu guriguri ena haere. Unai dainai tomadiho stadilaia tauna lau vadivadi henia lou lasi bona Antonis ida Baibel lau stadilaia matamaia. Goada lau abia noho, bona October 1997 ai, egu gwauhamata Iehova dekenai be ranu bapatisona amo lau hahedinaraia.

“Matamanai, egu adavana bona emai natudia kekeni badadia rua, unai neganai edia mauri lagani be 14 bona 10, ese lau idia dagedage henia. To egu kara namona dainai, egu adavana ia laloa Kingdom Hall dekenai hebou ta do ia lao henia. Witnes taudia ese idia hahedinaraia hebogahisi bona ia idia laloa bada dainai ia hoa bada. Ia hoalaia gauna badana be Baibel idia gaukaralaia. Unai dainai, egu adavana bona kekeni badadia rua be Iehova ena Witnes taudia amo Baibel stadi idia abia dae. Lagani 1999 ai, “Dirava Ena Peroveta Herevana” Distrik Hebouhebouna dekenai, idia toi be bapatiso idia abia neganai, egu moale mani oi laloa!

“Oibe, hereva momokani lau tahua bona lau davaria. Hari egu ruma bese ibounai, egu adavana bona natudia hani, be mai lalo-tamona ida Iehova ena tomadiho goevana lalonai idia noho.”