Nega Daudau Lalonai Idia Gini Goada Audia

Hagahaga gabuna be reana gabu namona lasi emu ruma oi haginia totona, bona bema unai hagahaga be ororo ataiai ia noho reana unai gabu ia auka momokani. Herevana unai gabu ena toana ia dika, to ororo gabudia dekenai idia tubu au haida be unai hagahaga nadi gabudia dekenai idia kamokau auka, bona keru bada negadia bona medu lasi siahu negadia lalonai idia gini goada.

NEGA momo, unai au goadadia be palaka gabudia dekenai idia noho au badadia bamona idia bada lasi. Edia gabana be mai gudugudu momo bona idia gageva bona idia tubu namonamo lasi. Idia be keru negadia bona medu lasi negadia bona tano bada lasi gabudia dekenai idia tubu dainai, edia rigi idia makohia bona edia toana be idia haidaua.

Tanobada ena auka momokani gabudia dekenai idia noho dainai, reana oi laloa unai bamona au be do idia mauri daudau lasi. To, nega daudau lalonai idia mauri. Haida idia gwau, bristlecone pine auna ta ladana Methuselah, California ena White Mountains dekenai ia tubu mita 3,000 auna, ena mauri lagani be 4,700. The Guinness Book of Records 1997 ia gwau, unai be tanobada dekenai ia mauri daudau auna. Unai idaunegai audia ia stadilaia tauna, Edmund Schulman, ia gwau: “Toana be bristlecone pine auna . . . be ena noho aukana dainai ia roho mauri. White Mountains dekenai idia noho daudau [pine audia] ibounai be mita 3,000 ataiai, nadi kavakava idia noho tano kaukau gabuna dekenai, idia davaria.” Schulman ia davaria danu, nega daudau herea lalonai idia noho pine audia ma haida danu be unai bamona gabu dikadia dekenai idia tubu.

Ena be edia noho be auka, to unai gini goada audia be inai gau namodia rua amo heduru idia abia. Tubutubu gaudia ma haida be momo lasi gabuna dekenai idia noho dainai, au badadia ia hadikaia diba gauna badana, uda gabua karana, ese idia ia hadikaia lasi. Bona edia ramudia be nadi idia dogoatao auka dainai, tano mareremarere sibona ese idia ia kokia diba.

Baibel ai Dirava ena abidadama hesiai taudia be au bamona idia gwauraia. (Salamo 1:​1-3; Ieremia 17:​7, 8) Idia danu ese edia noho daladia idauidau dainai, hekwakwanai idia davaria diba. Dagedage, gorere, eiava ogogami ese edia abidadama idia tohoa diba, bona bema lagani momo ai unai hedibagani idia davaria edia abidadama idia tohoa bada. To edia Havaraia Tauna, hekwakwanai idia hanai audia ia karaia tauna, ese ia idia tomadiho henia taudia ia hagoadadia idia do ia durua. Baibel ese idia haheauka taudia ia gwauhamata henia, ia gwau: “Umui do ia haginia goada, bona emui abidadama do ia hagoadaia.”​—⁠1 Petero 5:​9, 10.

Baibel lalonai Greek herevana nega momo idia hahanaia “haheauka” ena anina be, ‘ena gabu ai ia gini, ena gaukara ia karaia noho, eiava hesiku lasi.’ Ororo gabudiai idia noho audia hegeregerena, ramuna namodia be mai anina bada gini goada totona. Keristani taudia idia gini goada totona edia ramuna be Iesu Keriso dekenai idia hadihoa be namo. Paulo ia gwau: “Unai dainai, Lohiabada Keriso Iesu umui abia dae hegeregerena, ia ida umui raka tamona noho, ia lalonai emui ramuna umui hadihoa bona sibona umui haginia noho bona abidadama dekenai umui marere lasi, umui idia hadibaia vadaeni bamona, tanikiu karana lalonai abidadama amo umui honu momokani.”​—⁠Kolose 2:​6, 7, NW.

Paulo ia lalo-parara lauma dalanai iseda ramuna idia goada be namo. Paulo be “ginigini ta” dainai ia hekwarahi, bona ena hesiai gaukara ibounai lalonai dagedage dikadia ia haheaukalaia. (2 Korinto 11:​23-27; 12:⁠7) To ia davaria Dirava ena goada dainai ia gaukara noho diba. Ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.”​—⁠Filipi 4:​13, NW.

Paulo ena haheitalai ese ia hahedinaraia hegeregerena, Keristani taudia be nega namodia sibona lalonai mai kwalimu ida idia haheauka lasi. Ororo gabudiai idia tubu audia ese lagani handred momo lalonai mai kwalimu ida noho aukana lalonai idia gini goada hegeregerena, ita be iseda gabu ai ita gini diba, bema iseda ramuna be Keriso dekenai ita hadihoa bona Dirava ese ia henia siahu dekenai ita tabekau. Danu, bema ita haheauka ela bona dokona, ita be mai eda helaro, Baibel ena gwauhamata ma ta ia guguru negana do ita itaia, ia gwau: “Au edia mauri dinadia be momo hegeregerena, lauegu bese taudia edia mauri dinadia be unai bamona.”​—⁠Isaia 65:22; Mataio 24:13.