Kara Namodia Oi Karaia Noho, Oi Hesiku Lasi

“Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.”​—⁠GALATIA 6:⁠9.

1, 2. (a) Dahaka dainai Dirava ita hesiai henia totona ita haheauka be gau badana? (b) Edena dala ai Aberamo ese haheauka ia hahedinaraia, bona dahaka dainai unai ia karaia diba?

ITA Iehova ena Witnes taudia ese mai moale ida Dirava ena ura ita karaia. Bona hahediba tauna ena “huaia auna” ita abia dae dainai laga-ani ita abia. (Mataio 11:29) To, Keriso ida Iehova ita hesiai henia be nega haida ia auka. Aposetolo Paulo ese Keristani taudia ia hagoadaia neganai unai ia hahedinaraia, ia gwau: “Metau lalonai do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia.” (Heberu 10:36) Haheauka be mai anina bada badina Dirava ita hesiai henia neganai hekwakwanai ita davaria danu.

² Aberahamo ena mauri ese unai gauna ia hamomokania. Nega momo ena abia hidi gaudia bona noho daladia be auka. Hahegani ia abia Uru ena mauri namona do ia rakatania be matamana sibona. Daudau lasi murinai hitolo ia vara, ena dekena taudia ese idia inai henia, ena adavana ia haboioa gwauraia, ena bese taudia haida ese idia badu henia, bona tuari ena dika ia mamia. Bona hahetoho badadia be do vairai. To Aberahamo ese kara namodia ia karaia noho, ia hesiku lasi. Unai be kara idauna, badina ia dekenai Dirava ena Hereva ibounai ia noho lasi, ita dekenai ia noho bamona. To ita daradara lasi, ia ese peroveta herevana ginigunana ia diba, Dirava ia gwau: “Bona lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:​15, NW ) Unai Garana be Aberahamo amo do ia vara dainai, Satani ese ia inai henia bada. Ita daradara lasi, Aberahamo ese unai ia diba dainai, ia davaria hahetoho be mai moale ida ia haheaukalaia diba.

3. (a) Dahaka dainai hari inai negai Iehova ena taunimanima idia diba hahetoho do idia davaria? (b) Edena dala ai Galatia 6:9 ese ita ia hagoadaia?

³ Namona be hari inai negai Iehova ena taunimanima idia diba hahetoho do idia davaria. (1 Petero 1:​6, 7) Momokani, Apokalupo 12:17 amo ita diba Satani ese horoa orena taudia “ia tuari henia.” “Mamoe idaudia” taudia ese horoa taudia idia bamoa dainai, Satani ese idia danu ia badu henia. (Ioane 10:16) Keristani taudia ese edia haroro gaukara lalonai sibona dagedage karadia idia davaria lasi, to sibona edia mauri lalonai hekwakwanai idia davaria danu. Paulo ese ita ia hagoadaia: “Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.” (Galatia 6:⁠9) Oibe, ena be Satani ia ura bada iseda abidadama ia hadikaia, to namona be ia ita dadaraia bona abidadama dekenai ita gini goada. (1 Petero 5:​8, 9) Iseda kamonai karana amo dahaka do ia vara? Iamesi 1:​2, 3 ia gwau: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho.”

Ia Tuari Henia

4. Edena dala ai Satani ese tuari amo Dirava ena taunimanima edia badinaia karana ia hadikaia toho?

⁴ Aberahamo ena mauri ese hari inai negai Keristani tauna ia davaria diba “dibagani idauidau” ia hahedinaraia. Hegeregere, Sinara taudia be tano dekenai idia vareai neganai ia tuari henidia. (Genese 14:​11-16) Unai dainai ita hoa lasi, Satani ese dagedage karadia amo ita ia tuari henia noho. Tanobada Tuarina Iharuana ia ore murinai, tano momo ese Iehova ena Witnes taudia edia Keristani hadibaia gaukarana idia taravatua. Lagani 2001 Yearbook of Jehovah’s Witnesses ese Angola dekenai Keristani taudia ese edia inai taudia edia hahisia karadia idia haheaukalaia ena sivarai ia hahedinaraia. Unai tanodia lalonai, iseda tadikaka ese Iehova idia abidadama henia dainai, mai goada ida idia gaukara noho! Idia ese hahisia karadia eiava gwau-edeede karadia idia karaia lasi, to haroro gaukara idia karaia goadagoada noho.​—⁠Mataio 24:⁠14.

5. Edena dala ai sikuli dekenai Keristani matamata taudia idia dagedage henia diba?

⁵ To, reana dagedage karadia lalonai hahisia karadia idia karaia lasi. Gabeai Aberahamo ese natuna memero rua ia abia​—⁠Isamaela bona Isako. Genese 21:​8-12 ese ita ia hadibaia, dina ta ai Isamaela “be Isako danu idia gadara noho.” Paulo ese Galatia taudia ia tore henia neganai, ia hahedinaraia unai be natudia edia gadara sibona lasi, badina ia gwau Isamaela ese Isako ia dagedage henia! (Galatia 4:29) Unai dainai, ita gwau diba sikuli turadia ese ita idia kirikirilaia bona eda inai taudia ese ita idia hereva dika henia be dagedage karadia. Matamata Keristani tauna Ryan ese ena klas turadia edia dagedage karadia ia laloatao, ia gwau: “Sikuli dekenai bona sikuli amo basi ai guia miniti 15 edia toana be hora momo, badina lau idia hereva dika henia. Pepa pinia gaudia be kuku dekenai lahi atoa gaudia amo idia hasiahua bona egu kopina idia gabua.” Unai kara dikadia edia badina be dahaka? “Tiokratik dalanai lau idia hadibaia dainai sikuli ena matamata taudia amo lau idau.” To, Ryan ena tama sina ese idia durua dainai, mai kamonai ida ia haheauka diba. Matamata taudia e, emu turadia ese umui idia kirikirilaia dainai umui lalo-manoka, a? Namona be, umui hesiku lasi! Mai kamonai ida umui haheauka dainai, Iesu ena hereva be umui dekenai do ia guguru, ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo.”​—⁠Mataio 5:⁠11.

Dina Ta Ta Edia Lalo-Hekwarahi Gaudia

6. Dahaka gaudia ese hari inai negai Keristani taudia edia hetura karana idia hadikaia diba?

⁶ Hari ita davaria hahetoho momo be dina ta ta ai idia vara lalo-hekwarahi gaudia. Aberahamo be iena bona ena tadikaka ena natuna mero Lota ena boromakau naria taudia huanai ia vara heai dainai ia lalo-hekwarahi danu. (Genese 13:​5-7) Hari inai negai danu, taunimanima edia kara idauidau bona anina lasi mama karadia ese hetura karadia bona kongregesen ena maino idia hadikaia diba. “Mama bona sibona habadaia kara idia noho neganai maino be lasi, bona kara dikadia ibounai danu idia noho.” (Iamesi 3:16) Aberahamo bamona ita hesiku lasi to hekokoroku ita rakatania bona maino ita karaia, bona ma haida edia namo ita tahua be gau badana!​—⁠1 Korinto 13:5; Iamesi 3:⁠17.

7. (a) Bema ta ese Keristani tadikaka ta ena kara dainai ia lalohisihisi, dahaka ia karaia be namo? (b) Edena dala ai Aberahamo ena kara be haheitalai namona, eda hetura karana ma haida ida ia namo noho totona?

⁷ Reana maino ita karaia be auka, bema ita laloa iseda tadikaka ese dala maorona ai ita ia kara henia lasi. Aonega Herevadia 12:18 ia gwau: “Ia hereva haraga tauna ena hereva, be tuari kaia ia gwadaia noho bamona.” Ena be ta ia ura lasi, to ia gwauraia haraga herevadia amo lalohisihisi bada idia havaraia diba. Bona unai lalohisihisi ia bada herea, bema ita idia gwauraia dika eiava udu mauri herevana lalonai ita idia herevalaia. (Salamo 6:​6, 7) To namo lasi Keristani tauna be lalohisihisi dainai do ia hesiku! Bema oi dekenai unai bamona ia vara, namona be dala namona ai oiemu lalohisihisi ia havaraia tauna oi hereva henia bona unai gauna oi hamaoromaoroa toho. (Mataio 5:​23, 24; Efeso 4:26) Namona be oi ura ena kara oi gwauatao. (Kolose 3:13) Eda badu ita rakatania neganai, dala ita kehoa sibona eda hemami bona iseda hetura karana eda tadikaka ida ia namo ia lao totona. Aberahamo ese Lota dekenai ia mamia diba badu ia dogoatao lasi. Oibe, Aberahamo be Lota bona ena ruma bese taudia hamauria totona ia lao haraga!​—⁠Genese 14:​12-16.

Sibona Ita Havaraia Hahetoho

8. (a) Edena dala ai Keristani taudia ese ‘lalohisihisi momo amo edia mauri idia hadikaia’ diba? (b) Dahaka dainai Aberahamo ese tauanina gaudia ia laloa maoromaoro diba?

⁸ Oibe, hahetoho haida be ita sibona ita havaraia. Hegeregere, Iesu ese ena murinai idia raka taudia ia hagania: “Tanobada dekenai kohu do umui haboua lasi, iniseni be manumanu ese dabua idia ania ore, bona raraka ese auri ia hadikaia, iniseni danu henaoa taudia ese ruma idia makohia bona gau idia henaoa.” (Mataio 6:19) To, tadikaka haida ese ‘lalohisihisi momo amo edia mauri idia hadikaia,’ badina Basileia gaudia idia atoa guna lasi to kohu tahua karadia idia atoa guna. (1 Timoteo 6:​9, 10) Aberahamo be mai ena ura ida tauanina gaudia namodia ia rakatania, Dirava ia hamoalea totona. “Aberahamo ese Dirava ia abidadama henia dainai, Dirava ese ia gwauhamata do ia henia tano dekenai, idau bese tauna bamona ia noho. Ia be palai ruma lalonai ia noho, Isako bona Iakobo danu. Idia ruaosi danu ese unai gwauhamata be Dirava dekena amo idia abia. Nega ibounai Aberahamo ese hanua badana ta totona ia naria noho, mai abidadama danu. Unai hanua be mai ena nadi badina aukana, bona mai goadana. Unai hanua be Dirava sibona ese iena palani hegeregerena ia karaia, bona ia haginia danu.” (Heberu 11:​9, 10) Aberahamo ese vaira negana ai do ia vara “hanua,” Dirava ena gavamani unai, ia abidadama henia bona unai ese ia durua, kohu dekenai ena abidadama ia atoa lasi. Aonega dalana be ita ese unai bamona ita karaia danu, ani?

9, 10. (a) Edena dala ai ladana bada tahua karana ese hahetoho ia havaraia diba? (b) Edena dala ai tadikaka ta ese hari ena kara amo ia hahedinaraia diba ‘ia maragi’?

⁹ Gau ma ta mani oi laloa. Baibel ese hakaua herevana goadana ta ia henia, ia gwau: “Bema tau ta sibona inai bamona ia laloa, ‘Lau be namo,’ to momokani ia be namo lasi neganai, ia be sibona ia koia.” (Galatia 6:⁠3) Danu, Paulo ese ita ia hagoadaia, ‘sibona eda ladana ita habadaia bona ita hekokoroku lasi. To ita manau bona ita laloa, “Haida be idia namo herea, to lau be namo lasi.” ’ (Filipi 2:⁠3) Taunimanima haida ese unai sisiba idia badinaia lasi dainai, sibona dekenai hahetoho idia havaraia. Idia ura ladana bada idia abia to “kara namona” idia ura henia lasi dainai, kongregesen gaukarana ta idia abia lasi neganai idia lalo-manoka bona idia badu.​—⁠1 Timoteo 3:⁠1.

¹⁰ Aberahamo ena kara be haheitalai namona badina ‘ia laloa lasi ia be bada momokani.’ (Roma 12:⁠3) Aberahamo ese Melekisedeka ida ia hedavari neganai, ia laloa lasi Dirava ena lalo-namo ia abia dainai Melekisedeka ia hereaia. To, hahelaga tauna Melekisedeka ena dagi badana ia abia dae bona ia dekenai ena kohu ena kahana 10 amo kahana ta ia henia. (Heberu 7:​4-7) Unai hegeregerena, namona be hari inai negai Keristani taudia be mai edia ura ida idia abia dae ‘idia maragi’ bona ma haida edia hanamoa idia tahua lasi. (Luka 9:48) Bema toana be kongregesen idia hakaua taudia ese oi dekenai gaukara ta idia henia lasi, namona be oi laloa namonamo edena dala ai emu kara eiava gaukara dalana oi hanamoa be namo. Oi abia lasi gaukara dainai oi badu lasi, to oi abia hahenamo​—⁠ma haida oi durua Iehova idia dibaia totona​—⁠be oi gaukaralaia namonamo. Oibe, “Dirava ena imana goadana henunai do [oi] manau, vadaeni iena nega namona lalonai ia ese [oi] do ia abia isi.”​—⁠1 Petero 5:⁠6.

Oi Itaia Lasi Gaudia Oi Abidadama Henia

11, 12. (a) Dahaka dainai kongregesen taudia haida ese karaharaga lalohadaina idia haboioa diba? (b) Edena dala ai Aberahamo ese kara namona ia hahedinaraia bona iena mauri ibounai lalonai Dirava ena gwauhamata ia abidadama henidia?

¹¹ Reana hahetoho ma ta be, inai tanobada dikana ena dokona be ia mai haraga lasi. Petero Iharuana 3:12 (NW ) hegeregerena, namona be Keristani taudia ese ‘Iehova ena dina ena ginidae idia naria bona laloa noho.’ To, momo ese lagani momo, haida ese lagani 20, 30, eiava 40, unai “dina” idia naria vadaeni. Unai dainai, reana haida idia lalo-manoka bona karaharaga lalohadaina idia haboioa.

¹² Vadaeni, Aberahamo ena haheitalai oi laloa lou. Iena mauri ibounai lalonai Dirava ena gwauhamata ia abidadama henidia, ena be idia ibounai be ena mauri lalonai do idia guguru lasi. Momokani, ia mauri lalonai ena natuna Isako ia tubu bona tau badana ai ia lao. To lagani handred momo do idia lao ela bona Aberahamo ena tubudia be “hisiu bamona bona kone dekenai idia noho miri bamona.” (Genese 22:17) Aberahamo ia lalohisihisi eiava ia lalo-manoka lasi. Unai dainai aposetolo Paulo ese Aberahamo bona iduhu kwarana taudia ma haida ia herevalaia neganai, ia gwau: “Edia abidadama lalonai, inai tau gunadia ibounai idia mase. Dirava ena gwauhamata ena anina idia do davaria lasi. To daudau herea dekena amo, unai gwauhamata gaudia idia itaia, bona idia moale bada, idia gwau, ‘Ai be gabu idau taudia bamona inai tano dekenai ai noho. Ai be inai tanobada dekenai do ai noho daudau lasi.’ ”​—⁠Heberu 11:⁠13.

13. (a) Edena dala ai hari inai negai Keristani taudia idia hahedinaraia idia be inai tanobada ‘dekenai do idia noho daudau lasi’ taudia bamona? (b) Dahaka dainai Iehova ese inai tanobada dikana ena dokona ia mailaia?

¹³ Bema Aberahamo ese ena mauri lalonai nega “daudau herea” dekenai do idia guguru gwauhamata ia laloa bada diba, hari inai negai, unai gaudia edia guguru negana ia kahirakahira momokani negana ai, ita laloa bada diba danu, ani! Namona be Aberahamo bamona, sibona eda namo tahua mauri dalana ita badinaia lasi, to ita laloa Satani ena tanobada ‘dekenai do ita noho daudau lasi.’ To momokani, iseda ura gauna be “gau ibounai edia dokona ena nega” be kahirakahira sibona lasi to hari. (1 Petero 4:⁠7) Reana gorere dainai hisihisi ita abia. Eiava moni ena hekwarahi ese ita ia hametaua. To, namona be ita laloatao, Iehova ese noho dalana aukana amo ita ia hamauria totona dokona ia mailaia sibona lasi, to ena ladana ia hahelagaia totona. (Esekiela 36:23; Mataio 6:​9, 10) Dokona be do ia mai, reana ita abia hidi negana ai lasi, to Iehova ena ura ia guguru namonamo diba neganai.

14. Edena dala ai hari inai negai Keristani taudia ese Dirava ena haheauka amo namo idia abia?

¹⁴ Mani oi laloatao danu, Iehova “ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:⁠9) Mani oi itaia, Dirava be “umui totona ia haheauka noho”​—⁠anina be Keristani kongregesen taudia totona. Ia hedinarai, ita haida be nega ita abia be namo, iseda kara ita haidaua bona “mai goevagoeva bona kerere lasi danu Dirava ena vairanai” ita noho totona. (2 Petero 3:14) Vadaeni, Dirava ese unai bamona ia haheauka dainai ita moale be namo, ani?

Ena be Hekwakwanai Ita Davaria to Ita Moale

15. Edena dala ai Iesu ese hahetoho lalodiai ia moale noho diba, bona hari inai negai Keristani taudia ese iena kara idia tohotohoa neganai dahaka namo idia abia?

¹⁵ Aberahamo ena mauri ese hari inai negai Keristani taudia dekenai gau momo ia hadibaia. Ia ese abidadama sibona lasi, to haheauka, aonega, gari lasi, bona sibona ena namo tahua lasi lalokauna ia hahedinaraia. Iena mauri lalonai Iehova tomadiho henia karana ia atoa guna. To namona be ita laloatao, ita tohotohoa diba haheitalai hereadaena be Iesu Keriso ena kara. Ia danu ese hahetoho momo ia davaria, to idia ibounai lalonai ia moale noho. Dahaka dainai? Badina vaira negana ai do ia davaria gaudia ia laloa noho. (Heberu 12:​2, 3) Unai dainai Paulo ia guriguri: “Vadaeni haheauka bona goada ia henia Diravana ese dala ia kehoa Keriso Iesu ena darana hegeregerena umui abia totona.” (Roma 15:​5, NW ) Laloa dalana maorona dainai, Satani ese ia havaraia hekwakwanai ita davaria neganai danu, ita moale noho.

16. Toana be iseda hekwakwanai idia bada herea neganai dahaka ita karaia diba?

¹⁶ Toana be hekwakwanai idia bada herea neganai, oi laloaboio lasi, Iehova ese Aberahamo ia lalokau henia hegeregerena, oi danu ia lalokau henia. Ia ura do oi kwalimu. (Filipi 1:⁠6) Iehova oi abidadama henia momokani, bona oi abia dae ‘ia ese oi do ia naria, emu goada ia hanaia hedibagani ese oi do ia pidia garina. Bona hedibagani ia mai neganai, dala do ia kehoa, unai hedibagani dekena amo oi kwalimu totona.’ (1 Korinto 10:13) Dina ta ta ai Dirava ena Hereva duahia karana oi manadalaia. (Salamo 1:⁠2) Oi guriguri hanaihanai, Iehova oi noia oi haheauka totona oi do ia durua. (Filipi 4:⁠6) Ia ese ‘lauma helaga be idia noinoi taudia dekenai do ia henia.’ (Luka 11:13) Iehova ese lauma dalanai oi goada noho totona ia henia gaudia, hegeregere Baibel idia herevalaia buka bona magasin, oi gaukaralaia. Danu, tadikaka oreana ena heduru oi tahua. (1 Petero 2:17) Mai kamonai ida Keristani hebou oi lao henidia noho, badina oi haheauka totona goada be unuseniai oi abia. (Heberu 10:​24, 25) Namona be oi moale, badina oi diba emu haheauka karana dainai Dirava ese oi do ia lalo-namo henia bona mai abidadama ida oi raka neganai ia oi hamoalea!​—⁠Aonega Herevadia 27:11; Roma 5:​3-5.

17. Dahaka dainai Keristani taudia idia daradoko lasi?

¹⁷ Dirava ese Aberahamo ia lalokau henia iena “turana” bamona. (Iamesi 2:23) To, Aberahamo ena mauri lalonai hahetoho bona hekwakwanai badadia ia davaria. Unai dainai, Keristani taudia idia diba hari “nega ena dokona dekenai” hahetoho idia davaria danu. Momokani, Baibel ese ita ia hadibaia “kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:​1, 13) To namo lasi oi daradoko, namona be oi diba hari ita davaria hekwakwanai ese idia hamomokania Satani ena tanobada dikana ena dokona be kahirakahira. To Iesu ese ita ia hamaoroa “do ia haheauka lao ela bona dokona tauna be do ia mauri.” (Mataio 10:22) Unai dainai, ‘kara namodia oi karaia be namo, oi hesiku lasi!’ Aberahamo ena kara oi tohotohoa bona ‘abidadama bona haheauka taudia do idia abia davana namona’ do oi abia danu.​—⁠Heberu 6:⁠12.

Inai Oi Dibaia, A?

• Dahaka dainai hari inai negai Iehova ena taunimanima idia diba hahetoho bona hekwakwanai badadia do idia davaridia?

• Reana edena daladia ai Satani ese ita ia tuari henia?

• Edena dala ai Keristani taudia huanai idia vara hepapahuahu idia hamaoromaoroa diba?

• Edena dala ai hekokoroku bona sibona laloa bada karadia ese hahetoho idia havaradia?

• Edena dala ai Aberahamo ese kara namona ia haheitalaia bona Dirava ena gwauhamata idia guguru negana ia naria noho?

[Picture on page 26]

Matamata Keristani taudia momo be edia turadia ese idia kirikirilaia karana amo dagedage idia davaria

[Picture on page 29]

Aberahamo ena negai Dirava ena gwauhamata edia guguru negana be do “daudau herea,” to ena mauri lalonai idia be mai anina bada