Hahemauri Dalana Ia Noho, A?
Lagani 1900 murina laganidia idia gwauraia taunimanima edia rara bubua negana badana. Raskol karadia, tuari, idau bese inai henia karadia, drag ania karadia, koikoi, bona dagedage karadia be idia hanaia laganidia 30 bamona lalonai idia karaia momo. Gorere, buruka, bona mase idia havaraia hisihisi oi laloa danu. Ita ibounai ita ura hari inai negai tanobada ai idia noho hekwakwanai badadia amo ita siri, ani? Vaira negana ita laloa neganai, hahemauri dalana ia noho, a?
LAGANI 2,000 bamona gunanai, aposetolo Ioane ese ia abia nihina mani oi laloa. Ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:3, 4) Danu, peroveta tauna Isaia ia gwau: “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore. Ia ese danu iena bese taudia edia hemarai, be tanobada ena kahana ibounai dekena amo do ia kokia, badina be Lohiabada be inai bamona ia hereva vadaeni.”—Isaia 25:8.
Dirava ena gwauhamata do ia hagugurua ena anina mani oi laloa! Taunimanima be dagedage bona ala-ala karadia, hisihisi bona lalo-metau idia havaraia karadia amo do ia ruhaia. Gorere, buruka bona mase danu do ita davaria lasi! Dirava ena Hereva, Baibel, ese mauri hanaihanai goevadaena tanobada dekenai ia gwauhamatalaia. (Luka 23:43; Ioane 17:3) Bona idia ura taudia ibounai ese unai do idia abia diba. “Dirava ia ura taunimanima ibounai ese mauri do idia davaria, bona hereva momokani do idia diba.”—1 Timoteo 2:3, 4.
To, Dirava ena gwauhamata amo namo ita davaria totona, Iesu Keriso ena hamauria gaukarana ita lalo-pararalaia bona ia ita abidadama henia be namo. Iesu ia gwau: “Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Unai gauna dekenai, aposetolo Petero ese Iesu Keriso ena mai anina bada gaukarana ia herevalaia neganai, ia gwau: “Hamauria be Iesu sibona ese ia henia diba taunimanima dekenai. Badina be tanobada ibounai lalonai, ladana idauna ta Dirava ese ia henia lasi, ita do ia hamauria totona.” (Kara 4:12) Aposetolo Paulo bona ia bamoa tauna Sila ese lalo-momokani tauna ta idia hagoadaia: “Lohiabada Iesu oi abidadama henia, bona hamauria do oi abia, oi bona oiemu ruma bese taudia danu.”—Kara 16:30, 31.
Oibe, Iesu Keriso be “mauri ia havaraia Tauna,” bona ia sibona amo hahemauri ita abia diba. (Kara 3:15) To edena dala ai tau tamona be mai anina bada, hahemauri ita abia totona? Iena hamauria gaukarana ita lalo-pararalaia karana ese iseda helaro hahemauri dalana dekenai do ia hagoadaia.
[Picture Credit Lines on page 2]
Rau 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo