Lauma Dalanai Kudou Gorerena Oi Reaia Diba

Tanobada ena gadara helulu tauna hereadaena ta, ena spot ia dibaia namonamo bona iena tauanina ia goada herea tauna, be ia treinini noho lalonai ia moru bena ia mase. Unai gadara helulu tauna ena ladana be Sergei Grinkov, nega rua Olympic golo medolo ia abia ice skating tauna ta, bona ena gadara dalana ia namo momokani ia lao matamaia lalonai ia doko​​—⁠iena mauri lagani be 28 sibona. Madi, unai be dika bada! Dahaka ese iena mase ia havaraia? Kudou gorerena (o heart attack). Idia gwau, iena mase idia hoalaia badina gau ta ese ia hahedinaraia lasi ia be mai ena kudou gorerena. To, gorere tahua taudia idia davaria, iena kudou ia bada bona iena kudou idia lao henia rara varovarodia idia koua momokani.

REANA toana be ta ia diba lasi negana ai kudou gorerena ia vara haraga, to doketa taudia idia gwau unai ia vara momo lasi. Hereva momokani be, nega momo taunimanima be unai gorere do ia vara ena toa idauidau bona unai gorere ia havaraia gaudia, hegeregere laga-tuna, tauanina habadaia, bona kemena ia hisihisi be idia laloa lasi. Unai dainai, ena be unai kudou gorerena idia abia taudia be unai gorere ia vara negana lalonai idia mase lasi, to momo be edia mauri ibounai lalonai edia tauanina ena kahana ta ia dika.

Hari, doketa taudia momo idia laloa kudou gorerena ia vara lasi totona, gau badana be ta ese ena aniani bona mauri dalana ia biagua namonamo bona doketa ese ia sekea loulou be namo.a Bema ta ese unai bamona ia karaia bona mai ena ura ida gau haida ia haidaua, unai ese ia do ia durua kudou gorerena ia havaraia dika idauidau do ia reaia.

To iseda kudou dekenai mai anina gauna ma ta ita laloa bada be namo. Baibel ese ita ia sisiba henia, ia gwau: “Gau badana momokani, oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.” (Aonega Herevadia 4:23) Oibe, unai siri ese ta ena kudouna lauma dalanai ia herevalaia. Iseda kudouna ita naria namonamo totona ita biagua karana be gau badana, to unai ia hereaia gauna be inai, bema ita ura lauma dalanai mase idia havaraia diba goreredia amo iseda kudouna ita naria namonamo, namona be ita gimaia.

Kudou Gorerena Ia Havaraia Gaudia Idauidau

Kudou gorerena bamona, lauma dalanai kudou gorerena koua dalana namona ta be unai gorere ena badina idauidau oi diba be namo, bena dala oi tahua unai gaudia oi koudia toho. Namona be kudou​​—⁠korikorina bona ia laulaulaia gauna​​—⁠ena gorere ia havaraia gau badadia haida ita tahua.

Aniani. Momo idia diba vadaeni tauanina ia hagoadaia lasi aniani dikadia, ena be edia mamina be namo, to unai ese tauanina ia durua sisina eiava namo ia havaraia lasi. Tauanina ia hagoadaia lasi aniani dikadia bamona, lalona ia hagoadaia lasi gau dikadia be oi abia diba bona mamina ia hanamoa urana oi habadaia diba, to unai ese lauma dalanai gorere ia havaraia. Niusi halasia oreadia be lalo-ani dalanai lebulebu, drag, dagedage, bona meamea karadia idia herevalaia gaudia momo idia hahedinaraia toho. Ta ese ena lalona be unai bamona gaudia amo ia ubua neganai, lauma dalanai iena kudouna do ia hamasea. Dirava ena Hereva ena sisiba be inai: “Tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​​—⁠1 Ioane 2:​16, 17.

Tauanina ia hagoadaia lasi aniani dikadia ia ania momo tauna ese aniani namodia, hegeregere au huahua bona uma anianidia, ia ura lasi. Unai hegeregerena, inai tanobada ena moale havaraia gaudia dikadia amo iena lalona bona kudouna ia ubua loulou tauna ese lauma aniani namona bona aukana do ia ura henia lasi. Nega sisina lalonai, reana Dirava ena Hereva ena “rata” sibona do ia inua bamona. (Heberu 5:13) To nega ia lao noho lalonai, lauma dalanai lo tauna ai ia lao lasi dainai, Keristani kongregesen bona haroro gaukarana lalonai iena maduna do ia huaia diba lasi. (Mataio 24:14; 28:19; Heberu 10:​24, 25) Unai bamona taudia haida edia goada lauma dalanai ia maragi ia lao ela bona idia be haroro gaukara idia karaia lasi Witnes taudia ai idia lao!

Tauanina ena toana ia koikoi diba karana be dika gauna ma ta. Keristani maduna huaia kava karana ese reana lauma dalanai kudouna ena dika ia hunia diba, ia manoka badina ta ese moni ura henia herevadia o matabodaga karadia, dagedage, eiava meamea karadia idia hahedinaraia moale karadia ia tahua hehuni. Reana toana be unai bamona lauma aniani kererena be ta ena goada lauma dalanai ia haidaua momokani lasi, to lauma dalanai iseda kudouna do ia hadikaia diba, tauanina dalanai aniani dikana ese rara varovarodia ia ha-aukaia bona kudouna ia hadikaia dalana hegeregerena. Iesu ia sisiba, ura kereredia be ta ena kudou lalonai idia vareai gwauraia neganai ia koudia be gau badana. Ia gwau: “Bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Mataio 5:28) Oibe, lauma dalanai, aniani dikana ania noho karana ese kudou gorerena ia havaraia diba. To namona be ma gau haida ita laloa.

Eksasais. Momo idia diba, helai momo bona eksasais lasi karana ese kudou gorerena ia havaraia diba. Unai hegeregerena, lauma dalanai, helai momo bona eksasais lasi karana ese dika bada ia havaraia diba danu. Hegeregere, reana ta be Keristani haroro gaukara ia karaia sisina, to ia ura lasi ia moalelaia gaudia ia reaia, ia ura lasi ia hekwarahi ‘gaukara namona ia karaia, hereva momokani ia hadibaia maoromaoro, bona Dirava ena vairanai ia hemarai lasi’ tauna ai do ia lao totona. (2 Timoteo 2:15) Eiava reana ta be Keristani hebou haida ia lao henidia, to ia hekwarahi bada lasi ia hegaegae bona haere ia henia totona. Reana lauma dalanai tahua gauna ta ia atoa lasi eiava lauma gaudia ia ura bada lasi eiava ia moalelaia bada lasi. Lauma dalanai ia eksasais momo lasi dainai guna ia abia abidadama goadana ia manoka ia lao, bona reana do ia mase momokani. (Iamesi 2:26) Aposetolo Paulo be Heberu Keristani taudia ia torea henia neganai unai dika ia herevalaia; toana be idia haida be lauma dalana ai idia helai momo bona eksasais lasi bamona. Unai kara ese edia noho lauma dalanai ia hadikaia diba dainai, ia sisiba henidia karana ita laloa. “Tadikaka e, umui naria namonamo, umui ta be mauri Diravana amo ia raka siri dainai ia lalonai kudouna dikana mai ena abidadama lasi be metairametaira do ia vara garina. Hari inai negai be Dirava ese ia herevalaia, ‘hari dina.’ Inai ‘hari dina’ ia do noho dainai, umui ta ta dekenai durua hereva do umui henia, emui lalona hagoadaia totona. Dina ibounai inai bamona do umui karaia, umui ta be kara dika ese ia koia garina, bona unai tau ese iena lalona be Dirava dekena amo do ia koua garina.”​​—⁠Heberu 3:​12, 13; NW.

Lalo-hekwarahi. Kudou gorerena ia havaraia gauna badana ma ta be lalo-hekwarahi bada karana. Unai hegeregerena, lalo-hekwarahi, o ‘mauri ena laloa metau momo gaudia’ ese lauma dalanai kudouna ia hamasea haraga diba, idia dainai reana ta ese Dirava hesiai henia karana do ia hadokoa momokani. Inai kara dekenai, Iesu ena sisiba be nega korikori ai ia henia: “Do umui naria namonamo, aniani bona kekero muramura bona tanobada ena laloa metau momo gaudia ese umui lalona do idia guia garina, vadaeni Lohiabada ena Dina do ia mai haraga, umui hegaegae lasi garina.” (Luka 21:​34, 35) Bema nega daudau lalonai hehuni dalanai ita karaia kara dikana ta ita lalo-hisihisilaia, lalo-hekwarahi ese iseda kudouna do ia hadikaia danu. King Davida ese unai bamona lalo-hekwarahi dikana ena hisihisi ia mamia, inai ia gwauraia neganai: “Egu kara dika dainai egu tauanina ibounai ia gorere noho. Egu kerere bada ese, egu kwarana idia koua vadaeni, abata ese taunimanima ia koua bamona. Egu kerere ena metau be bada herea, lau huaia diba lasi.”​​—⁠Salamo 38:​3, 4.

Idia laloa edia kudouna ia goada momokani. Kudou gorerena idia abia taudia momo be guna idia diba momokani edia tauanina ia goada dainai kudou gorerena do idia abia lasi. Nega momo, idia laloa doketa dekenai idia lao edia tauanina ena namo ia sekea totona be herevana bona idia hevasehalaia, idia laloa unai be anina lasi. Unai hegeregerena, reana haida idia laloa nega sisina daudau idia be Keristani taudia dainai, idia dekenai gau dikana ta do ia vara lasi. Reana lauma dalanai ma ta ese idia ia sekea karana idia dadaraia eiava sibodia idia sekea lasi, ela bona dika bada ia vara. Ta ia laloa ia goada momokani karana dekenai aposetolo Paulo ena sisiba namona ita laloa be namo: “Tau ta bema ia laloa ia gini goada, namona be ia naria namonamo, do ia moru garina.” Aonega dalana be inai: Namona be ita laloaboio lasi ita be goevadae lasi taudia, bona hanaihanai lauma dalanai sibona eda namo ita sekea.​​—⁠1 Korinto 10:12; Aonega Herevadia 28:⁠14.

Kudou Gorerena Do Ia Vara Ena Toa Idauidau Dadaraia Lasi

Mai badina namona ida, Baibel ese lauma dalanai iseda kudouna ia herevalaia momo. Ieremia 17:​9, 10 ai ia gwau: “Taunimanima edia kudouna be mai koikoi bada, bona mai dika rohoroho danu. Daika ese kudouna ena dala ia diba? Lau Lohiabada ese taunimanima edia kudoudia lau tahua noho, bona edia lalodia danu lau tohoa noho. Taunimanima ta ta edia dala, edia dala lau itaia noho. Bona idia ta ta edia kara anina danu lau tahua noho, idia ta ta dekenai, edia davana korikori do lau henidia totona.” Iehova ese iseda kudouna ia tahua sibona lasi, to danu mai ena lalokau ida dala ia karaia sibona eda kudouna ita tahua totona.

“Hesiai tauna mai ena kamonai, bona mai ena kara maoromaoro” ena amo heduru herevadia be nega korikori ai ita abia. (Mataio 24:45) Hegeregere, iseda kudouna ese ita ia koia diba dalana badana ta be, tanobada ena lalohadai dikadia ita abia matamaia karana. Idia be oi abia diba lasi to oi ura henia kava gaudia, lalohadai kava gaudia, anina lasi gaudia lalohadailaia karana. Idia be dika bada idia havaraia diba bema idia amo lalohadai mirodia idia mai. Unai dainai ita dadaraidia momokani be gau badana. Bema Iesu bamona ita ese taravatu utua karana ita inai henia, iseda kudouna do ita gimaia bena tanobada ena lalohadai dikadia do ita laloa lasi.​​—⁠Heberu 1:​8, 9.

Danu, Keristani kongregesen lalonai mai edia lalokau elda taudia ese ita idia durua. Ena be ma haida edia heduru ita laloa bada, to lauma dalanai iseda kudouna naria karana be ita ta ta iseda maduna. Namona be ita ta ta ese ‘hereva ibounai do ita laloa namonamo’ bona ‘ita sibona eda kara ita tahua,  . . . ita be abidadama korikori taudia o lasi.’​​—⁠1 Tesalonika 5:​21; 2 Korinto 13:⁠5.

Kudouna Gimaia

Baibel ena hakaua herevana, “bema tau ta aniani uhena ia hadoa, vadaeni unai bamona aniani sibona do ia abia,” be mai anina lauma dalanai iseda kudouna dekenai danu. (Galatia 6:⁠7) Reana toana be karaharaga lauma dalanai ta ese dika ia davaria, nega momo unai ia vara ena badina be nega daudau lalonai lauma dalanai ena goada ia hadikaia gauna ta be hehuni dalanai ia karaia, hegeregere, matabodaga laulaudia eiava sivaraidia ia itaia, kohu ia laloa momo, eiava ladana bada eiava siahu ia tahua goadagoada.

Unai dainai, ta ese ena kudouna ia gimaia totona, gau badana be lauma dalanai ia ania gaudia ia naria namonamo. Dirava ena Hereva be aniani bamona oi ania neganai, emu lalona bona emu kudouna do ia hagoadaia. Lalona ia hagoadaia lasi gau dikadia be oi abia haraga bona tauanina ena ura ia habadaia diba, to unai ese kudouna do ia hadikaia dainai ita dadaraia be namo. Salamo torea tauna ese medikol dalanai haheitalai namona ta ia henia: “Inai taudia edia kudoudia be auka [“digara bamona,” NW ], bona mai edia lalona kehoa [“hemami,” NW ] lasi.”​—⁠Salamo 119:⁠70.

Bema nega daudau lalonai hehuni ai kerere ta oi karaia noho, namona be idia oi haorea toho, namo lasi lauma dalanai emu rara varovarodia idia koua garina. Bema oi dekenai inai tanobada ena toana ia namo ia lao matamaia bona oi laloa ia henia diba gaudia amo moale bada oi davaria diba, Paulo ia henia aonega sisibana oi laloa dobu be namo. Ia gwau: “Varavara taudia e, lauegu hereva ena anina be inai: Nega be kwadogi. Unai dainai inai nega kwadogina ia noho lalonai, . . . tanobada ena gau namodia idia abia noho taudia be do idia noho, inai gaudia be anina lasi bamona. Badina be inai tanobada, hari ia noho toana bamona, be kahirakahira do ia ore.” (1 Korinto 7:​29-​31) Bona, bema kohu momo tahua urana ese emu lalona ia veria matamaia, Iobu ena hereva oi laloa be namo, ia gwau: “Lau ese golo dekenai lau abidadama henia lasi, inai bamona lau karaia lasi momokani, badina unai be kara dika bada, ena davana be mase. Inai kara ese Siahu Ibounai Dirava ia hadikaia noho.”​​—⁠Iobu 31:​24, 28; Salamo 62:10; 1 Timoteo 6:​9, 10.

Baibel ena sisiba laloa momo lasi karana ena dika be Baibel ese ia sisibalaia: “Bema nega momo oi do idia sisiba henia, to oi ese sisiba oi abia dae lasi momokani, unai neganai dika do oi davaria haraga, bona unai dika dekena amo, hanamoa lou dala be lasi momokani.” (Aonega Herevadia 29:⁠1) Lauma dalanai iseda kudouna ita naria namonamo neganai, gau momo amo iseda mauri ita hametaua lasi dainai moale bona lalo-maino do ita abia. Gunaguna ema bona hari, unai be Keristani tomadiho momokanina ese ia gwauraia dalana namona. Dirava ena lauma ese aposetolo Paulo ia hasiahua dainai, ia gwau: “To momokani, Dirava ia badinaia tauna ese kohu momokani do ia davaria. Oibe, ia davaria, badina unai tau be mai ena kohu namona, gauna be, iena lalona be namo. Badina be gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.”​​—⁠1 Timoteo 6:​6-8.

Oibe, Dirava badinaia dalana ai ita sibona ita tereini bona eksasais ita karaia neganai, lauma dalana ai iseda kudouna do ia namo bona do ia goada. Iseda lauma aniani ita naria namonamo amo inai tanobada ena lalohadai bona dala dikadia ese lauma dalanai ita do ia hadikaia lasi. Gau badana be Iehova ese ena orea amo ia henia gaudia iboudiai ita abia dae noho, idia amo hanaihanai lauma dalanai iseda kudouna ita sekea lou lou diba. Unai ita karaia namonamo neganai, unai ese ita do ia durua bada, lauma dalanai kudou gorerena amo ia vara gau dikadia do ita reaia.

[Footnote]

[Blurb on page 10]

LAUMA ANIANI DIKANA ESE LAUMA DALANAI KUDOUNA DO IA HADIKAIA DIBA, ANIANI DIKANA ESE RARA VAROVARODIA IA HA-AUKAIA BONA KUDOUNA IA HADIKAIA DIBA BAMONA

[Blurb on page 10]

LAUMA DALANAI HELAI MOMO BONA EKSASAIS LASI KARADIA ESE DIKA BADA IA HAVARAIA DIBA

[Blurb on page 11]

“MAURI ENA LALO-METAU MOMO GAUDIA” ESE LAUMA DALANAI KUDOUNA IA HAMASEA DIBA

[Picture on page 11]

Lauma dalanai ita naria namonamo lasi neganai hisihisi badadia ita davaria diba

[Pictures on page 13]

Lauma dalanai kara namodia habadaia karana ese kudouna do ia gimaia

[Picture Credit Line on page 9]

AP Photo/David Longstreath