Elda Taudia—Haida Umui Hadibaia Maduna Idia Huaia Totona

TANOBADA ibounai Iehova ena Witnes taudia edia kongregesen lalonai, naria gaukarana idia karaia diba taudia idia abia haraga be namo. Unai ia vara ena badina toi idia noho.

Gau ginigunana be, Iehova be ena gwauhamata “ladana maragi momokani tauna mai ena famili, be bese badana mai goadana danu do idia lao” gwauhamatana, ia hagugurua noho. (Isaia 60:22) Ena hebogahisi karana amo, idia hanaia lagani toi lalodiai hahediba taudia matamatadia kahirakahira milioni ta be idia bapatiso, Iehova ena Witnes taudia ai idia lao. Maduna idia huaia taudia idia noho be namo, unai bapatiso matamata taudia idia durua lo Keristani taudia ai idia lao totona.​—⁠Heberu 6:⁠1.

Gau iharuana be, lagani momo lalonai elda gaukara idia karaia taudia haida be buruka o gorere dainai kongregesen lalonai edia gaukara ena maduna idia hamaragia.

Gau ihatoina be, Keristani elda goadadia momo be hari Hospital Liaison Committee, Regional Building Committee, eiava Assembly Hall Committee gaukara idia karaia. Nega haida edia kongregesen ena maduna haida idia rakatania be namo, ma maduna haida idia huaia namonamo diba.

Edena bamona idia hegeregere taudia ma haida idia abia diba? Hadibaia be gau badana. Baibel ese Keristani naria taudia ia hagoadaia “abidadama goada taudia” do idia hadibaia, “vadaeni idia ese ma taunimanima haida dekenai unai hereva do idia gwauraia lou.” (2 Timoteo 2:⁠2) Inai hereva “hadibaia” ena anina be, hadibaia unai amo ia hegeregere, eiava ia diba momo. Elda taudia ese idia hegeregere taudia idia hadibaia diba karana ita laloa.

Iehova Ena Haheitalai Umui Badinaia

Iesu Keriso be momokani ena gaukara dekenai ia hegeregere bona ia diba momo​—⁠bona unai ita hoalaia lasi! Ia be Iehova Dirava ese ia hadibaia. Dahaka gaudia dainai unai hadibaia program ese namo ia havaraia? Ioane 5:20 dekenai, Iesu ese gau toi ia herevalaia: “Tamana ese iena Natuna [1] ia lalokau henia, bona iena kara ibounai [2] ia hedinarai henia ia dekenai, bona [3] inai hari kara do idia hereaia karadia danu ma do ia hedinarai henia.” Unai gau ta ta ita tahua namonamo neganai hadibaia karana dekenai lalo-parara do ita abia.

Iesu ena hereva ginigunana mani ita itaia, ia gwau: “Tamana ese iena Natuna ia lalokau henia.” Matamana negana amo, Iehova bona ena Natuna huanai hetura karana namona ia noho. Aonega Herevadia 8:30 ese unai hetura karana ena anina ia hahedinaraia: “Unai neganai lau [Iesu] be Dirava [Iehova] ena badibadinai lau noho, gaukara karaia tauna bamona. Dina ibounai Dirava be lau dekenai ia moale, bona lau be iena vairana dekenai, lau moale noho nega ibounai.” Iesu ena lalona dekenai ia diba goevagoeva Iehova ia “moale” ia dekenai. Bona Iesu be Tamana ena badinai ia ida ia gaukara neganai ia abia moalena ia hunia lasi. Keristani elda taudia bona idia hadibaia noho taudia huanai, unai bamona hetura namonamo karana ia noho be namo herea!

Iesu ese ia herevalaia gauna iharuana be ena Tamana ese “iena kara ibounai ia hedinarai henia ia dekenai.” Unai hereva be Aonega Herevadia 8:30 ena hereva ia hamomokania, guba bona tanobada gaudia havaraia negana lalonai, Iesu ‘be Dirava ena badibadinai ia noho.’ (Genese 1:⁠26) Elda taudia ese unai haheitalai namona idia tohotohoa diba bema hesiai taudia ida idia gaukara hebou bona dala namona ai edia gaukara idia karaia totona idia hadibadia. To, idia abia hidi hesiai taudia matamatadia sibona ese unai treinini idia abia lasi. Abidadama tadikakadia lagani momo lalonai elda gaukara idia ura abia to idia abia hidi lasi taudia be edena bamona? (1 Timoteo 3:⁠1) Elda taudia ese unai bamona taudia dekenai sisiba maorona idia henia be namo, unai amo do idia diba edena gaudia do idia hanamoa.

Hegeregere, reana hesiai tauna ta ena kara be momokani, ia leiti lasi, bona ena gaukara ia lalodia bada. Reana ia be hadibaia tauna namona ta. Reana dala momo ai kongregesen lalonai gaukara namona ia karaia. To, reana ia lalo-parara lasi ena Keristani tadikakadia ia kara henia neganai ia kara auka. Namona be elda taudia ese mai aonega ida manau karana idia hahedinaraia. (Iamesi 3:13) Elda ese hesiai tauna ia hereva henia, ena hekwakwanai ia hahedinaraia, haheitalai haida ia hahedinaraia, bona ia hanamoa gaudia totona heduru herevadia ia henia be kara namona, ani? Bema elda tauna be ‘gado namo ai ia hereva,’ ena hereva do ia kamonai henia. (Kolose 4:⁠6) Momokani, hesiai tauna ese ena lalona ia kehoa bona ia abia sisibana ia abia dae karana amo elda tauna ena gaukara do ia namo.​—⁠Salamo 141:⁠5.

Kongregesen haida lalonai, elda taudia be hesiai taudia dekenai treinini namona idia henia noho. Hegeregere, gorere taudia bona buruka taudia idia vadivadi henia neganai, idia hegeregere hesiai taudia ida idia lao. Unai amo hesiai taudia be mamoe naria gaukarana dekenai diba do idia abia. Momokani, hesiai tauna ese gau momo ia karaia diba lauma dalanai ia tubu noho totona.​—⁠Henunai ia noho maua ladana “Hesiai Taudia ese Idia Karaia Diba Gauna” itaia.

Iesu ena treinini ia durua bada gauna ihatoina be Iehova ese ia hadibaia lalonai vaira negana ia laloa danu. Iesu ese ena Tamana ia herevalaia neganai ia gwau Natuna dekenai “inai hari kara do idia hereaia karadia” do ia hahedinaraia. Iesu be tanobada ai ia noho neganai ia dibaia gaudia ese ia durua, gabeai ia abia gaukaradia ai do ia hahedinaraia kara namodia ia habadaia totona. (Heberu 4:15; 5:​8, 9) Hegeregere, Iesu be kahirakahira gaukara badana do ia abia​—⁠hari idia mase taudia bilioni momo do ia hatoreaisi lou bona hahemaoro henia!​—⁠Ioane 5:​21, 22.

Hesiai taudia idia hadibadia neganai, namona be elda taudia ese vaira negana do idia laloa. Ena be toana be elda taudia bona hesiai taudia be hegeregere hari idia noho maduna idia huaia totona, to bema kongregesen matamata ta idia haginia neganai do idia hegeregere noho, a? Bema kongregesen haida idia haginia neganai be edena bamona? Ia hanaia lagani toi lalonai, tanobada hegegemadai lalonai kongregesen 6,000 bona ma haida idia noho. Elda bona hesiai taudia momo idia abia be namo unai kongregesen matamatadia idia naria totona!

Elda taudia e, umui hadibaia taudia ida hetura karana namona umui habadaia amo Iehova ena haheitalai umui tohotohoa noho, a? Edia gaukara idia huaia namonamo dalana umui hadibadia noho, a? Vaira negana umui laloa danu, a? Iehova ena haheitalai Iesu ia hadibaia dalana dekenai umui badinaia neganai, momo ese hahenamo bada do idia abia.

Haida Dekenai Gaukara Henia Totona Gari Lasi

Gaukara badadia momo idia abia elda taudia mai edia diba be nega haida idia ura lasi ma haida dekenai maduna idia henia. Reana guna haida dekenai idia henia toho, to anina namona ia vara lasi. Unai dainai inai bamona lalohadai idia abia, ‘Bema oi ura gaukara ta ia namo, oi sibona ese oi karaia be namo.’ To unai lalohadai be Iehova ena ura, Baibel dekenai ia hedinarai bamona, diba bada lasi tatau be diba bada tatau amo diba idia abia herevana ida ia hegeregere, a?​—⁠2 Timoteo 2:⁠2.

Aposetolo Paulo ia bamona loaloa tauna ta, Ioane Mareko, be Pamupulia ai ena gaukara ia rakatania bona ena gabu dekenai ia giroa neganai, Paulo ia lalo-hisihisi. (Kara 15:​38, 39) To, unai hametaua gauna ese Paulo ena lalona ia hamanokaia lasi bona haida hadibaia karana ia hadokoa lasi. Tadikaka matamata ta, Timoteo, ia abia hidi bona misinari gaukara ai ia hadibaia.a (Kara 16:​1-3) Berea dekenai misinari taudia ese dagedage bada herea idia davaria dainai, Paulo ia hegeregere lasi unuseniai ia noho. Unai dainai unai kongregesen matamata be Sila, lauma dalanai ia goada tadikakana, bona Timoteo dekenai ia rakatania idia naria totona. (Kara 17:​13-15) Ita daradara lasi Timoteo be Sila amo gau momo ia dibaia. Gabeai, Timoteo ia hegeregere maduna ma haida ia abia neganai, Paulo ese ia siaia Tesalonika dekenai, unuseniai ia noho kongregesen hagoadaia totona.​—⁠1 Tesalonika 3:​1-3.

Paulo bona Timoteo edia turana karana be bisinesi karana bamona lasi. Idia huanai hetura karana namo hereana ia noho. Korinto taudia ia tore henia neganai, Paulo ia palani unuseniai do ia siaia tauna, Timoteo, ia gwauraia, “lauegu lalokau merona, mai ena kara momokani danu, Keriso ena mauri dalana lalonai.” Ma ia gwau: “[Timoteo] ese lauegu gaukara bona lauegu kara Iesu Keriso ena mauri matamata lalonai, be umui dekenai do ia hadibaia.” (1 Korinto 4:17) Timoteo be Paulo amo ia abia treinini ese ia durua, ia hegeregere ena gaukara ia huaia totona. Idia matamata tadikaka momo be gabeai hesiai taudia, elda taudia, o loaloa naria taudia namodia ai idia lao, badina Paulo ese Timoteo dekenai ia karaia bamona, idia laloa bada elda taudia amo idia abia treinini ese ia durudia.

Elda Taudia e, ma Haida Hadibaia!

Ia hedinarai goevagoeva, Isaia 60:22 ena peroveta herevana be hari ia guguru. Iehova be “maragi momokani tauna mai ena famili, be bese badana mai goadana” ai ia halaoa noho. Unai bese ia ‘goada’ noho totona, gaukara ia heau namonamo be namo. Elda taudia e, edia mauri idia gwauhamatalaia bona idia hegeregere tatau dekenai treinini ma haida henia daladia umui laloa be namo, ani? Namona be hesiai taudia ta ta idia diba dahaka gaudia do idia hanamoa idia goada noho totona. Bona umui bapatiso vadaeni tadikaka e, umui idia durua bona laloa bada karana umui gaukaralaia namonamo. Aonega, diba, bona gaukara manadalaia karana oi habadaia daladia ibounai oi gaukaralaia namonamo. Iehova ese momokani unai bamona lalokau heduruna ena program do ia hanamoa.​—⁠Isaia 61:⁠5.

[Footnote]

[Box on page 30]

Hesiai Taudia ese Idia Karaia Diba Gauna

Elda taudia ese hesiai taudia idia hadibaia noho lalonai, hesiai taudia ese gau momo idia karaia diba lauma dalanai idia tubu noho totona.

​—⁠Namona be hesiai taudia ese edia gaukara idia laloa bada bona idia karaia goadagoada be namo. Stadi namonamo karana idia habadaia danu be namo. To, goada noho dalana badana be stadi bona dibaia gaudia badinaia karana amo.

​—⁠Bema hesiai tauna ta ia hegaegae Keristani hebou dekenai hereva ta ia henia totona, namona be ia manada elda ta ia nanadaia heduru hereva haida ia henia edena bamona unai hereva do ia henia diba.

​—⁠Hesiai tauna ese elda tauna ia noia diba Baibel hereva ta ia henia dalana ia itaia namonamo bona ia hanamoa diba sisibana ia henia totona.

Namona be hesiai taudia ese elda taudia dekenai sisiba idia tahua, idia abia dae, bona idia badinaia be namo. Unai dala amo, ‘taunimanima ibounai ese edia goada do idia itaia, ia bada lao noho.’​—⁠1 Timoteo 4:15.