Keriso Ena Hakaua Siahuna be Gau Korikorina Oi Dekenai, A?
“Bona umui be ‘Hakaua Taudia’ do idia gwauraia lasi, badina be emui Hakaua Tauna be tamona sibona, Keriso inai.”—MATAIO 23:10.
1. Daika sibona be Keristani taudia momokanidia edia Hakaua Tauna?
UNAI be Tuesday, Nisan 11. Dina toi murinai Iesu Keriso do idia hamasea. Dubu dekenai unai be ena vadivadi ginigabena. Unai dina ai, Iesu be idia haboua taudia hutuma bona iena hahediba taudia dekenai mai anina bada hadibaia herevana ta ia gwauraia. Ia gwau: “To taunimanima ese umui do idia gwauraia lasi ‘Hadibaia Tauna.’ Badina be umui emui Hadibaia Tauna be tamona sibona, bona umui ibounai be tadikaka. Bona tanobada dekenai tau ta do umui gwauraia lasi emui ‘Tamana,’ badina be emui Tamana be tamona sibona, ia be guba dekenai ia noho. Bona umui be ‘Hakaua Taudia’ do idia gwauraia lasi, badina be emui Hakaua Tauna be tamona sibona, Keriso inai.” (Mataio 23:8-10) Ia hedinarai goevagoeva, Iesu Keriso be Keristani taudia momokanidia edia Hakaua Tauna.
2, 3. Iehova ita kamonai henia bona ia ese ia abia hidi Hakaua Tauna ita abia dae ese edena bamona iseda mauri ia hanamoa?
2 Iesu ena hakaua siahuna be iseda mauri lalonai ita abia dae neganai, namo bada do ita davaria! Iehova Dirava ese unai Hakaua Tauna ena mai ia perovetalaia neganai, peroveta tauna Isaia amo ia gwau: “Umui ranu mase taudia e, umui mai, ranu ia noho inai! Umui moni lasi taudia e, umui mai, koni umui hoia, bona ania. Umui mai, uaina bona rata umui hoia. Ena davana be lasi momokani! . . . Lau dekenai do umui kamonai. . . . Unai neganai aniani namo herea momokani do umui moalelaia. . . . Lau ese Davida lau abia hidi, bona gunalaia tauna, bona bese idauidau edia lohia lau halaoa. Bona Davida dekena amo, egu siahu badana bese idauidau dekenai lau hedinaraia.”—Isaia 55:1-4.
3 Isaia ese ranu gaudia—ranu, rata, bona uaina—be laulau dalanai ia gaukaralaia, unai amo ia hahedinaraia iseda mauri lalonai namo do ita abia bema Iehova ita kamonai henia bona ita dekenai ia henia Hakaua Tauna ita badinaia. Ita eda mamina ia hanamoa. Ia be hegeregere dina siahuna ai ranu keruma ita inua bamona. Hereva momokani bona kara maoromaoro ena ranu mase ia koua. Rata ese beibi ia hagoadaia bona ia durua idia tubu totona, unai hegeregerena “lauma ena rata goevagoeva” ese ita ia hagoadaia bona lauma dalanai iseda hetura karana Dirava ida ia hanamoa. (1 Petero 2:1-3) Bona moale negadia ai uaina ese moale ia havaraia, ani? Unai hegeregerena, Dirava momokanina tomadiho henia bona ia abia hidi Hakaua Tauna ena aena gabudia dekenai ita raka ese “moale bada” ia havaraia. (Deuteronomi 16:15) Unai dainai, ita ibounai—matamata bona buruka, tatau bona hahine—ese ita hahedinaraia Keriso ena hakaua siahuna be gau korikorina ita dekenai. To, edena dala ai iseda mauri lalonai ita hahedinaraia, Mesia be iseda Hakaua Tauna?
Matamata Taudia e, Umui “Tubu Daekau Noho, mai Aonega Danu”
4. (a) Iesu ena mauri lagani be 12 neganai, Pasova totona Ierusalema ia vadivadi henia bona dahaka ia vara? (b) Iesu ena mauri lagani be 12 neganai, iena diba be edena bamona?
4 Iseda Hakaua Tauna ese matamata taudia dekenai ia hahedinaraia haheitalai mani oi laloa. Ena be Iesu ena maragi negana ena sivarai momo ita diba lasi, to sivarai ta amo gau haida ita diba. Iesu ena mauri lagani be 12 neganai, iena tama sina ese ia idia hakaua lao Ierusalema dekenai, lagani ta ta ai idia karaia Pasova totona. Unai negai, ia be haida ida Baibel idia herevalaia goadagoada, bona iena ruma bese taudia ese ia idia rakatania. Dina toi murinai, ena tama sina, Iosepa bona Maria, ese mai lalo-hekwarahi ida dubu lalonai ia idia davaria, ia be “hadibaia taudia edia huanai ia helai, edia hereva ia kamonai, bona ia henanadaia danu, idia dekenai.” Ma danu, “iena hereva idia kamonai taudia ibounai be iena diba bona iena haere dekenai idia hoa bada.” Mani oi laloa, Iesu ena mauri lagani be 12 sibona, ia be lauma dalanai lalona veria henanadai sibona ia henia lasi, to aonega haeredia ia henia danu! Ita daradara lasi, iena tama sina ese ia idia hadibaia namonamo.—Luka 2:41-50.
5. Edena dala ai matamata taudia ese ruma bese ena Baibel stadi idia laloa diba?
5 Reana oi be mero eiava kekeni matamata ta. Bema emu tama sina be Dirava idia badinaia taudia, toana be emui ruma dekenai hanaihanai ruma bese Baibel stadi umui karaia. Unai ruma bese stadi be edena bamona oi laloa? Mani inai bamona henanadai oi lalodia: ‘Mai egu kudouna ibounai ida egu ruma bese lalonai Baibel stadi dalana lau durua, a? Unai dala lau badinaia, bona hadikaia karadia lau karaia lasi, a?’ (Filipi 3:16) ‘Stadi lalonai haere lau henia momo, a? Bema maoro, ai stadilaia gauna lau henanadailaia bona ai badinaia diba daladia lau gwauraia, a? Lauma dalanai lau goada lau lao lalonai, “tau badadia” ese idia ania “aniani korikorina” abia urana lau habadaia noho, a?’—Heberu 5:13, 14.
6, 7. Dina ta ta ai Baibel duahia karana ese edena bamona matamata taudia ia durua bada diba?
6 Dina ta ta ena Baibel duahiduahi sediual danu be mai anina bada. Salamo torea tauna ese ane ia abia, ia gwau: “Inai bamona taudia be idia moale momokani: Idia ese kara dika taudia edia sisiba, . . . idia abia dae lasi. . . . Inai taudia ese, Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai.” (Salamo 1:1, 2) Mose ena gabu ia abia tauna, Iosua, ese ‘Taravatu Buka be nega ibounai lalonai ia duahia. Dina bona hanuaboi ai.’ Unai dainai mai ena aonega ida ia kara bona Dirava ese ia henia gaukarana dekenai ia kwalimu. (Iosua 1:8) Iseda Hakaua Tauna, Iesu Keriso, ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mataio 4:4) Bema dina ibounai tauanina durua aniani ita abia, namona be hanaihanai lauma aniani danu ita abia!
7 Ena mauri laganina be 13 kekenina, Nicole, ese lauma dalanai ia abia be namo gauna ia dibaia neganai, dina ta ta ai Baibel ia duahia matamaia.a Hari ena mauri lagani be 16 bona Baibel ibounai ia duahia haorea vadaeni bona hari, Baibel be nega iharuana ma ia duahia noho. Ia karaia dalana be ia auka lasi. Ia gwau, “Egu lalona lau hadaia dina ta ai karoa tamona lau duahia.” Dina ta ta ai ia karaia Baibel duahiduahi ese edena bamona ia durua? Ia gwau: “Hari inai negai, lalona veria gaudia be momo. Dina ta ta ai, sikuli bona ma gabu haida ai egu abidadama idia tohoa gaudia lau davaria. Dina ta ta ai Baibel duahia karana ese lau ia durua dainai, Baibel ena taravatu bona hakaua herevadia lau laloa lou haraga, bona unai ese lau ia hagoadaia lau davaria hahetoho lau dadaraidia totona. Unai dainai, mamina lau abia lau be Iehova bona Iesu kahirakahira.”
8. Vaia, Iesu ena kara ta dubu dekenai be dahaka, bona edena dala ai matamata taudia ese ia idia tohotohoa diba?
8 Vaia, Iesu ena kara be dubu lalonai idia karaia Baibel duahiduahi ia kamonai bona ia karaia. (Luka 4:16; Kara 15:21) Matamata taudia ese unai haheitalai idia tohotohoa bona hanaihanai Keristani heboudia, Baibel idia duahia bona stadilaia gabuna dekenai idia lao be namo herea! Ena mauri lagani be 14 merona, Richard, ese unai bamona heboudia dainai ena tanikiu herevana ia gwauraia neganai, ia gwau: “Lau dekenai kongregesen heboudia be mai anina bada. Unuseniai hanaihanai lau idia hadibaia edena kara be namo bona edena be dika, edena be kara maoro bona edena be kara gageva, edena be Keriso ena kara bamona bona edena be lasi. Dala aukana amo—hisihisi lau mamia karana amo—unai ibounai do lau dibaia be anina lasi.” Oibe, “Lohiabada ena hadibaia hereva be momokani vadaeni. Idia ese aonega lasi taudia dekenai, aonega idia henia.” (Salamo 19:7) Nicole danu ese ena lalona ia hadaia, wiki ta ta ai kongregesen ena hebou ibounai ima do ia lao henidia. Danu, ia ese hora rua eiava toi ia atoa unai gaudia ia hegaegaelaia totona.—Efeso 5:15, 16.
9. Edena dala ai matamata taudia be do idia “tubu daekau noho, mai aonega danu”?
9 Ta ena matamata negana be nega namona, ‘Dirava momokani tamona bona Iesu Keriso ia diba’ totona. (Ioane 17:3) Reana matamata taudia haida oi diba, edia nega bada herea be komik bukadia, televisen, vidio gadara, eiava Internet dekenai idia haorea. Idia oi tohotohoa be badina lasi bema oi ese iseda Hakaua Tauna ena haheitalai goevadaena oi tohotohoa diba, ani? Ia maragi neganai, Iehova amo diba ia abia karana ia moalelaia. Unai dainai dahaka ia vara? Iesu be lauma gaudia ia ura henia bada dainai, “ia tubu daekau noho, mai aonega danu.” (Luka 2:52) Oi danu be unai bamona oi karaia diba.
‘Ta Ta Do Umui Matauraia’
10. Dahaka ese ruma bese maurina do ia durua, maino bona moale ia havaraia totona?
10 Emu ruma be maino bona moale gabuna eiava heiriheiri bona badu gabuna ai ia lao diba. (Aonega Herevadia 21:19; 26:21) Keriso ena hakaua siahuna ita abia dae ese ruma bese lalonai maino bona moale do ia habadaia. Momokani, Iesu ena haheitalai be ruma bese taudia ese idia badinaia be namo. Baibel ia gwau: “Keriso umui matauraia dainai, umui ibounai ta ta dekenai do umui matauraia. Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona. Bona Keriso be ekalesia ena Hamauria Tauna, ekalesia be iena tauanina. . . . Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:21-25) Aposetolo Paulo be Kolose kongregesen dekenai ia gwau: “Memero, kekeni e, nega ibounai emui tamana bona sinana do umui kamonai henia, badina inai kara be Dirava ia ura henia.”—Kolose 3:18-20.
11. Edena dala ai tau ia hahedinaraia Keriso ena hakaua siahuna be gau korikorina ia dekenai?
11 Unai sisiba badinaia karana ena anina be tau ese ruma bese ia hakaua, ena adavana ese ia durua bona badinaia, bona natudia ese edia tama sina idia kamonai henia. To, taunimanima edia kwara dagina be moale ia havaraia, bema idia gaukaralaia namonamo. Aonega tauna ese ena kwara dagina gaukaralaia dalana ia dibaia be namo, bona unai ia karaia bema iena Kwarana bona Hakaua Tauna, Keriso Iesu, ia tohotohoa. (1 Korinto 11:3) Ena be gabeai Iesu be ‘ekalesia ena kwarana ai ia lao,’ to tanobada dekenai ia mai neganai, “ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai.” (Efeso 1:22; Mataio 20:28) Unai hegeregerena, Keristani tauna ese sibona ena namo totona iena kwara dagina ia gaukaralaia lasi, to iena adavana bona natudia—oibe, ena ruma bese taudia ibounai—edia namo totona ia gaukaralaia. (1 Korinto 13:4, 5) Iena kwarana tauna, Iesu Keriso, ese Dirava ena kara ia hahedinaraia hegeregerena do ia tohotohoa. Namona be ia be Iesu bamona, ia dagedage lasi bona ia manau. (Mataio 11:28-30) Ia kerere neganai inai hereva “lau sori” eiava “oi be maoro” ia gwauraia be auka lasi. Unai bamona tauna ena haheitalai namona dainai, iena hahine be iena “durua tauna” bona ena bamona ai do ia lao, ia amo diba ia abia bona idia gaukara hebou.—Genese 2:20; Malaki 2:14.
12. Dahaka ese hahine do ia durua kwara dagina ia badinaia totona?
12 Hahine danu ese ena tau do ia matauraia. To bema ia be tanobada taudia edia kara ia abia dae, unai ese ena lalohadai, kwara dagina matauraia karana dekenai do ia hamanokaia diba, bena ena tau do ia matauraia lasi. Baibel ia gwau lasi tau ese hahine do ia biagua auka, to ia gwau hahine ese edia tatau idia matauraia be namo. (Efeso 5:24) Baibel ia gwau danu tau eiava tama be mai ena maduna, bona bema Baibel ena sisiba ia badinaia, unai ese ruma bese lalonai maino bona noho namo do ia havaraia.—Filipi 2:5.
13. Tama sina kamonai henia karana dekenai, Iesu ese natudia dekenai dahaka haheitalai ia hahedinaraia?
13 Natudia ese edia tama sina idia kamonai henia be namo. Unai dala dekenai, Iesu ese haheitalai namona ia hahedinaraia. Iesu ena mauri lagani be 12 neganai, Ierusalema dekenai idia rakatania bona dina toi ia noho, bena unai dubu dekenai ia vara gauna murinai, “ia be [ena tama sina] danu Nasareta dekenai idia lao, bona ia kamonai henia idia dekenai.” (Luka 2:51) Natudia ese tama sina idia kamonai henia neganai ruma bese lalonai maino bona noho namo ia vara. Ruma bese taudia ibounai be Keriso ena hakaua siahuna henunai idia noho neganai, ruma bese do ia moale.
14, 15. Ruma ai hekwakwanai ta ia vara neganai, dahaka ese ita ia durua ita kwalimu totona? Haheitalai ta gwauraia.
14 Herevana ruma bese lalonai metau ia vara, to idia kwalimu dalana badana be Iesu idia tohotohoa bona ena hakaua herevadia idia badinaia. Hegeregere, ena mauri lagani 35 tauna Jerry ese Lana, kekeni matamata ta ena sinana, ia adavaia neganai, hekwakwanai ia vara. Jerry ia gwau: “Ruma bese ena kwarana namona ai lau lao totona, ruma bese ma haida lalonai namo ia havaraia Baibel ena hakaua herevadia lau badinaia danu be namo. To lau davaria mai egu aonega bona laloa kehoa ida lau gaukaralaidia be namo.” Ena adavana ena natuna ese ia badu henia bada badina ia laloa Jerry be ia bona ena sinana edia hetura karana ia hadikaia bona ia badu henia momokani. Jerry be laloa kehoa ia abia be namo, unai lalohadai ese unai kekeni ia gwauraia hereva bona kara ia biagua ia itaia totona. Edena bamona unai hekwakwanai ia hanamoa? Jerry ia gwau: “Lau bona Lana ai lalo-tamona nega sisina lalonai Lana ese ena natuna sisiba henia karana do ia karaia, bona lau be ena natuna ida egu hetura karana lau hanamoa. Gabeai, unai dala ese anina namona ia havaraia.”
15 Ruma bese lalonai hekwakwanai ia vara neganai, lalo-parara dainai ruma bese taudia ese gau haida idia karaia bona idia gwauraia ena badina do ita dibaia. Ita aonega danu be namo Dirava ena hakaua herevadia ita badinaia namonamo totona. Hegeregere, rara gorerena ia abia hahinena ese Iesu ia dogoatao ena badina ia lalo-pararalaia goevagoeva, bona mai ena aonega bona hebogahisi ida unai hahine ia kara henia. (Levitiko 15:25-27; Mareko 5:30-34) Iseda Hakaua Tauna be lalo-parara bona aonega tauna. (Aonega Herevadia 8:12) Do ita moale bema ia hegeregerena ita kara.
‘Basileia Do Ita Tahua Guna’
16. Namona be iseda mauri lalonai dahaka ita atoa guna, bona edena dala ai Iesu ese iena haheitalai amo unai ia hahedinaraia?
16 Iesu ia hahedinaraia goevagoeva iena hakaua siahuna idia abia dae taudia ese edia mauri lalonai dahaka idia atoa guna be namo. Ia gwau: “Dirava ena Basileia bona iena kara maoromaoro do umui tahua guna.” (Mataio 6:33) Bona iena haheitalai amo, unai ita karaia dalana be ita dekenai ia hahedinaraia. Iesu ena bapatiso murinai, dina 40 ia aniani lasi, ia laloa dobu, bona ia guriguri, to unai dina 40 ena dokona ai hedibagani ta ia davaria. Satani Diabolo ese Iesu dekenai “tanobada ena basileia ibounai” ia lohiaia siahuna ia henia toho. Bema Iesu ese Diabolo ia henia gauna ia abia dae, do ia abia mauri dalana mani oi laloa! To, Keriso ese ena Tamana ena ura karaia karana ia laloa bada. Ia diba danu, unai bamona mauri Satani ena tanobada dekenai be kwadogi. Ia ese maoromaoro Diabolo ia henia toho gauna ia dadaraia, ia gwau: “Buka Helaga lalonai ia torea, ia gwau, ‘Lohiabada oiemu Dirava do oi tomadiho henia, ia sibona dekenai hesiai gaukara do ia karaia.’ ” Bona nega sisina murinai, Iesu “ia haroro hamatamaia, ia gwau, ‘Emui lalona umui giroa, badina Guba Basileia be kahirakahira ia mai vadaeni.’ ” (Mataio 4:2, 8-10, 17) Inai tanobada dekenai Keriso ena mauri dinadia oredia ibounai lalonai, Dirava ena Basileia ia harorolaia.
17. Edena dala ai ita hahedinaraia iseda mauri lalonai Basileia gaudia ita atoa guna?
17 Namona be iseda Hakaua Tauna ita tohotohoa, namo lasi Satani ena tanobada ese ita ia veria iseda mauri lalonai moni bada gaukarana be iseda tahua gauna badana ai ita halaoa. (Mareko 1:17-21) Tanobada gaukaradia ese ita idia guia dainai Basileia gaudia be iseda mauri lalonai ita atoa guna lasi be kavakava! Iesu ese ita dekenai Basileia harorolaia bona hahediba taudia halaoa gaukara ia henia. (Mataio 24:14; 28:19, 20) Oibe, ita be mai iseda maduna ruma bese ita naria eiava ma maduna haida totona, to ita moale adorahi negadia bona Saturday bona Sunday ita gaukaralaia iseda Keristani maduna, haroro bona hadibaia gaukarana ita karaia totona, ani? Bona lagani 2001 ena hesiai laganina lalonai, taunimanima 780,000 ese ful-taim hesiai gaukara, eiava painia gaukara, idia karaia be hagoadaia gauna!
18. Dahaka ese ita ia durua haroro gaukara lalonai moale ita davaria totona?
18 Evanelia sivaraidia ese idia hahedinaraia Iesu be gaukara tauna bona ia be mai ena hebogahisi. Ia kahirakahira idia noho taudia ese lauma dalanai heduru idia abia be namo ia diba neganai, idia dekenai ia hebogahisi bona mai ena ura ida ia durudia. (Mareko 6:31-34) Bema ma haida ita lalokau henia bona mai momokani ida ita ura durudia dainai ita karaia, iseda hesiai gaukara do ita moalelaia. To edena dala ai unai bamona ura ita abia diba? Tau matamatana ta ladana Jayson ia gwau: “Egu mauri lagani be 20 ia do abia lasi neganai, haroro gaukara lau moalelaia lasi.” Dahaka ese ia durua unai gaukara ia ura henia totona? Jayson ia gwau: “Egu ruma bese lalonai Saturday daba ibounai be haroro gaukara totona. Unai be ia namo lau dekenai badina haroro gaukara totona nega momo lau lao neganai, ia havaraia namo lau itaia bona lau moalelaia bada.” Namona be ita danu ese hanaihanai haroro gaukara ita karaia goadagoada.
19. Keriso ena hakaua siahuna dainai namona be iseda lalona ita hadaia dahaka ita karaia totona?
19 Keriso ena hakaua siahuna abia dae karana be hagoadaia gauna bona anina namona ia havaraia. Unai bamona ita karaia neganai, ta ena matamata negana ai ena diba bona aonega do ia tubu daekau. Ruma bese be maino bona moale ai do ia noho, bona haroro gaukara ese moale do ia havaraia. Momokani, namona be iseda lalona ita hadaia iseda dina ta ta maurina bona ita abia hidi gaudia lalodiai do ita hahedinaraia Keriso ena hakaua siahuna be gau korikorina ita dekenai. (Kolose 3:23, 24) Iesu Keriso be ma dala ta amo—Keristani kongregesen amo—ena hakaua siahuna ia hahedinaraia. Hereva gabena ese do ia hahedinaraia edena bamona unai dala amo namo ita davaria diba.
[Footnote]
a Ladana haida ai haidaua.
Oi Laloatao, A?
• Edena dala ai Dirava ese ia abia hidi Hakaua Tauna badinaia karana ese ita ia durua?
• Matamata taudia ese edena bamona idia hahedinaraia diba idia ura Iesu ena hakaua siahuna idia badinaia?
• Keriso ena hakaua siahuna idia badinaia ruma besedia ese dahaka namo idia davaria?
• Edena dala ai iseda haroro gaukara ese ia hahedinaraia Keriso ena hakaua siahuna be gau korikorina ita dekenai?
[Pictures on page 9]
Ta ena matamata negana be nega namona Dirava bona ia abia hidi Hakaua Tauna idia diba totona
[Picture on page 10]
Keriso ena hakaua siahuna badinaia karana ese ruma bese lalonai moale ia havaraia
[Pictures on page 12]
Iesu ese Basileia ia tahua guna. Unai bamona oi karaia, a?