King Ena Haheitalai Tohotohoa

“King ese Dirava ena Taravatu . . . do ia torea hanai, buka ta dekenai. Inai buka be ia dekenai do ia noho, bona ia ese iena mauri dinadia ibounai lalonai do ia duahia.”​​—DEUTERONOMI 17:​18, 19.

1. Keristani tauna ta be reana ia ura daika bamona ia lao?

REANA oi sibona be king o kwini ta ida oi hahegeregerea lasi. Baibel idia stadilaia kamonai Keristani taudia idia laloa lasi, King namodia hegeregere Davida, Iosaia, Hesekaia, bona Iehosapata bamona be mai siahu ida do idia lohia, ani? To, mai anina bada dalana ta ai oi be idia bamona oi lao diba bona oi lao be namo. Edena dala ai? Bona dahaka dainai oi ura unai dala ai idia bamona oi lao be namo?

2, 3. Iehova ese tanobada king ta ia do abia hidi lasi neganai, dahaka Ia diba vadaeni, bona unai bamona king ta ese dahaka do ia karaia be namo?

² Mose ena nega lalonai, Dirava ese Israela taudia totona tanobada ai king ta ia do abia hidi lasi neganai, Ia diba vadaeni Iena taunimanima be do idia ura king ta idia abia. Unai dainai iena lauma helaga amo Mose ia hasiahua hadibaia hereva namodia be Taravatu gwauhamatana lalonai ia torea. Unai be King ia abia hadibaia herevadia, ia idia hakaua totona.

³ Dirava ia gwau: “Lohiabada, emui Dirava, ese umui dekenai do ia henia tano lalonai do umui ginidae . . . neganai do umui ura emui king ta do umui haginia, umui emui tano kahirakahira idia noho besedia be mai edia king bamona. Lohiabada, emui Dirava ese ia abia hidi tauna sibona be emui king do umui halaoa. . . . Iena basileia dekenai king dagi ia abia neganai, king ese Dirava ena Taravatu bona hadibaia hereva . . . do ia torea hanai, buka ta dekenai. . . . Inai buka be ia dekenai do ia noho, bona ia ese iena mauri dinadia ibounai lalonai do ia duahia. Unai dekena amo, king be Lohiabada matauraia kara dekenai do ia manada, bona buka ena taravatu bona oda ibounai do ia kamonai henia, bona karaia momokani.”​—Deuteronomi 17:​14-19.

4. Dirava ena hakaua herevadia king taudia totona be dahaka?

⁴ Oibe, Iehova ese iena taunimanima totona do ia abia hidi king be emu Baibel ai idia noho herevadia edia kopi ta be ia sibona totona ia torea be namo. Bena dina ta ta ai do ia duahia, bona unai do ia karaia loulou. Ena laloatao karana hanamoa totona unai ia karaia lasi. Unai be stadi karana, bona unai be mai ena badina namona. Iehova ena lalo-namo ia abia king ese unai bamona stadi karana ia goadalaia be namo, kudou-maorona ia abia bona dogoatao totona. Danu, unai Dirava ena lauma amo idia vara herevadia ia stadilaia be namo, unai amo ia kwalimu aonega king ai do ia lao diba.​—2 King Taudia 22:​8-​13; Aonega Herevadia 1:​1-4.

King ta Bamona Diba Oi Tahua

5. King Davida ese edena Baibel kahadia ia torea hanai bona duahia diba, bona unai dekenai ena hemami be edena bamona?

⁵ Dahaka oi laloa, Davida be Israela ena king ai ia lao neganai, dahaka ia karaia be namo? Toana be ia ese Baibel ena buka ginigunadia faiv (Genese, Esodo, Levitiko, Numera, bona Deuteronomi) edia kopi ta ia torea. Davida ese ia sibona totona Taravatu ena kopi ta ia torea neganai, ena matana bona ena imana ia gaukaralaia bona unai ena anina ena lalona bona kudouna dekenai be bada. Toana be Mose ese Iobu bona Salamo 90 bona 91 ia torea danu. Davida ese unai buka edia kopi ia karaia danu, a? Reana. Danu, unai nega ai Iosua, Gunalaia Taudia, bona Ruta edia buka idia noho vadaeni. Unai dainai oi itaia King Davida ese Baibel ena kahana sisina bada ia duahia bona lalohadailaia diba. Bona oi abia dae diba ia be unai bamona ia karaia, badina Dirava ena Taravatu ia gwauraia neganai unai ia hedinarai, hari Salamo 19:​7-​11 ai unai hereva ia noho.

6. Edena bamona ita diba Iesu be ena tubuna Davida bamona Buka Helaga ia ura henia?

⁶ Davida Badana​​—Iesu, Davida ena Natuna​—ese unai bamona ia karaia danu. Iesu ena kara be pura ta ta ai dubu dekenai ia lao. Unuseniai ia kamonai, Baibel siridia idia duahia bona idia gwauraia hedinarai. Ma danu, nega haida Iesu be taunimanima vairanai Dirava ena Hereva ia duahia badabada bona ena anina ia gwauraia hedinarai. (Luka 4:​16-​21) Haraga oi itaia diba ia be Baibel ia diba namonamo. Evanelia sivaraidia oi duahia bona do oi itaia Iesu ese inai bamona hereva, “Buka helaga dekenai ia torea,” be nega momo ia gaukaralaia eiava dala ma haida amo Baibel ena siri haida ia gwauraia. Hegeregere, Mataio ese ia torea bamona, Iesu ese Haroro Herevana Badana lalonai, nega 21 Heberu Revarevadia ena hereva ia gwauraia lou.​​—Mataio 4:​4-​10; 7:​29; 11:10; 21:13; 26:​24, 31; Ioane 6:​31, 45; 8:​17.

7. Edena dala ai Iesu be tomadiho gunalaia taudia amo ia idau?

⁷ Iesu ese Salamo 1:​1-3 ena sisiba ia badinaia: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . Ma inai taudia ese, Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai. Edia gaukara ibounai be ena anina ia vara, bona mai edia kwalimu danu.” Iesu be ena nega ai idia noho tomadiho gunalaia taudia amo ia idau, idia ese “Mose ena taravatu anina idia gwauraia” to “Lohiabada ena Taravatu” idia badinaia lasi!​​—Mataio 23:​2-4.

8. Iuda tomadiho gunalaia taudia ese Baibel idia duahia bona stadilaia, to dahaka dainai namo ta idia davaria lasi?

⁸ To siri ta dainai haida idia daradara diba, badina reana idia duahia neganai idia laloa Iesu ese Baibel stadi karana ia hagoadaia lasi. Ioane 5:​39, 40 ai, Iesu ese iena nega ai idia noho taudia haida dekenai ia gwau: “Umui ese Buka Helaga dekenai umui tahua, badina be umui laloa inai hereva lalonai mauri hanaihanai do umui davaria. To gauna be, inai hereva ese lau idia gwauraia noho! To umui be umui ura lasi lau dekenai do umui mai, mauri abia totona.” Unai hereva amo Iesu ese ena hereva idia kamonai Iuda taudia edia lalona ia hagoadaia lasi Baibel stadi idia rakatania totona. To, ia hahedinaraia idia ese mai momokani ida Baibel idia stadilaia lasi bona edia laloa dalana be maoro lasi. Idia diba Buka Helaga ese mauri hanaihanai dekenai idia do ia hakaua lao diba, to idia stadilaia noho Buka Helaga ena hereva ese Mesia tauna, Iesu, dekenai idia ia hakaua lao danu be namo. To, ia idia abia dae lasi. Edia stadi karana amo namo idia abia lasi, badina mai momokani ida idia karaia lasi, diba maorona idia abia lasi.​—Deuteronomi 18:15; Luka 11:52; Ioane 7:​47, 48.

9. Aposetolo taudia bona peroveta taudia gunadia ese dahaka haheitalai namona idia hahedinaraia?

⁹ To Iesu ena hahediba taudia bona aposetolo taudia be idau! Idia ese ta ‘dekenai aonega bona hahemauri ia henia Buka Helaga’ idia stadilaia. (2 Timoteo 3:15) Unai kara dekenai idia be peroveta taudia gunadia bamona, “idia ese . . . anina idia tahua goadagoada, bona . . . idia henanadai momo.” Unai peroveta taudia edia tahua karana be hua haida eiava lagani ta ai idia karaia goadagoada stadi karana kwadogina sibona lasi. Aposetolo Petero ia gwau, Keriso bona taunimanima do ia hamauria gaukarana amo do idia vara gau namodia “idia stadilaia noho.” Petero ena revareva ginigunana ai, ia ese nega 34 Baibel bukadia 10 edia hereva ia gwauraia lou.​​—1 Petero 1:​10, 11; NW.

10. Dahaka dainai ita ta ta ese Baibel stadi ita ura henia be namo?

¹⁰ Ia hedinarai goevagoeva, Dirava ena Hereva stadilaia namonamo karana be idaunegai Israela ena king taudia idia abia gaukara badana. Iesu ese unai kara ia badinaia danu. Bona Dirava ena Hereva stadilaia karana be Keriso ida guba dekenai do idia lohia hebou taudia edia maduna danu. (Luka 22:​28-​30; Roma 8:​17; 2 Timoteo 2:​12; Apokalupo 5:​10; 20:6) Hari inai negai, Basileia ena lohia henunai tanobada ai do idia ura noho taudia ibounai ese unai king taudia edia haheitalai idia tohotohoa danu be namo.​​—Mataio 25:​34, 46.

Gaukara ta Oi Bona King Taudia Totona

11. (a) Keristani taudia edia stadi karana dekenai dahaka ia vara diba? (b) Dahaka henanadai be ita sibona dekenai ita henia be namo?

¹¹ Mai goada bona momokani ida ita hereva diba Keristani taudia momokanidia ta ta ese Baibel idia tahua be namo. Unai be Iehova ena Witnes taudia ida Baibel oi stadilaia matamaia neganai oi karaia karana sibona lasi. Namona be ita ta ta ese iseda lalona ita hadaia, aposetolo Paulo ena nega ai idia noho taudia haida bamona ita karaia lasi, idia ese sibona edia stadi karana idia rakatania. “Dirava ena hereva, diba hamatamaia gaudia,” hegeregere “Keriso ena hadibaia hereva,” idia dibaia. To, idia ese edia stadi karana idia karaia noho lasi, unai dainai “hereva badadia” idia diba lo taudia ai idia lao lasi. (Heberu 5:12–​6:3) Unai hegeregerena ita ese sibona ita nanadaia diba: ‘Herevana lagani momo Keristani kongregesen lalonai lau noho eiava vanegai sibona lau vareai, Dirava ena Hereva stadilaia karana be edena bamona lau laloa? Paulo ia guriguri iena nega ai idia noho Keristani taudia ese edia “diba maorona Dirava dekenai [idia] habadaia noho” totona. Lau hahedinaraia lauegu ura danu be unai bamona, a?’​​—Kolose 1:​9, 10, NW.

12. Dahaka dainai Dirava ena Hereva moalelaia noho karana be mai anina bada?

¹² Stadi namonamo karana oi haginia totona, gau badana be Dirava ena Hereva moalelaia karana oi habadaia. Salamo 119:​14-​16 ese ia hahedinaraia, hanaihanai Dirava ena Hereva laloa namonamo karana amo, oi ese unai hereva do oi moalelaia. Danu, unai be momokani, herevana lagani hida oi be Keristani tauna vadaeni. Unai lalohadai habadaia totona Timoteo ena haheitalai mani oi laloa. Ena be unai Keristani elda tauna be “Keriso Iesu ena tuari tauna namona ta” vadaeni, to Paulo ese ia hagoadaia do ia gaukara goada ‘hereva momokani do ia hadibaia maoromaoro’ totona. (2 Timoteo 2:​3, 15; 1 Timoteo 4:​15) Ia hedinarai goevagoeva, oi “gaukara goada” totona do oi stadi namonamo noho be namo.

13. (a) Reana edena dala ai Baibel stadi negana oi habadaia diba? (b) Dahaka gaudia haida oi haidaua diba, stadi negana oi habadaia totona?

¹³ Stadi namonamo karana haginia dalana ta be, hanaihanai nega oi atoa Baibel oi stadilaia totona. Unai oi karaia noho, a? Herevana emu haere momokanina be dahaka, to oi laloa sibona emu stadi dekenai oi atoa negana oi habadaia karana amo, namo do oi abia, a? Reana oi laloa, ‘Edena bamona nega lau abia diba unai lau karaia totona?’ Haida be daba momokani idia toreisi, bona unai amo Baibel stadi negana idia habadaia. Reana miniti 15 ai Baibel idia duahia eiava sibona edia stadi totona idia palania gauna ta idia karaia. Eiava reana wiki ena sediual oi haidaua sisina diba, a? Hegeregere, bema emu kara be dina ibounai niuspepa oi duahia eiava adorahi ai televisen dekenai niusi oi itaia, ia hegeregere bema wiki ta lalonai dina tamona ai unai oi karaia lasi, a? Unai nega oi gaukaralaia diba Baibel stadi karana habadaia totona. Bema unai niusi itaia eiava duahia dekenai oi atoa miniti 30 bamona be dina ta ai emu stadi karaia totona oi atoa, lagani ta lalonai emu stadi negana be hora 25 bamona amo oi habadaia. Unai hora 25 amo emu Baibel duahiduahi eiava stadi negana oi habadaia karana ese do ia havaraia namo mani oi laloa! Dala namona ma ta be inai: Wiki vaira lalonai, dina ta ta edia dokona ai unai dina lalonai oi karaia gaukara mani oi tahua namonamo. Oi itaia bema gau ta oi reaia diba eiava ena nega oi hamaragia diba, Baibel duahiduahi eiava stadi negana oi habadaia totona.​​—Efeso 5:​15, 16.

14, 15. (a) Dahaka dainai sibona eda stadi ita karaia neganai, tahua gaudia ita atoa be gau badana? (b) Baibel duahia karana dekenai, ita atoa diba tahua gaudia haida be dahaka?

¹⁴ Dahaka ese oi ia durua diba stadi oi hekwarahilaia lasi, to oi moalelaia totona? Tahua gaudia. Stadi karana dekenai dahaka tahua gaudia namodia oi atoa diba? Momo dekenai, edia tahua gauna ginigunana be idia ura Baibel ibounai idia duahia haorea. Reana ema bona hari, nega haida Baibel ena kahana haida oi duahia bona unai amo namo oi davaria vadaeni. Hari emu lalona oi hadaia diba, Baibel ibounai oi duahia haorea totona, a? Unai oi karaia totona, reana emu tahua gauna ginigunana be Evanelia Bukadia foa oi duahia, bona unai murinai emu tahua gauna iharuana oi atoa, hegeregere Keristani Greek Revarevadia oredia oi duahia haorea. Unai duahiduahi amo moale bona namo oi davaria murinai, reana emu tahua gauna ma ta be Mose ia torea bukadia bona histori bukadia ela bona Eseta do oi duahia. Unai oi hagugurua neganai, do oi itaia Baibel ibounai oi duahia haorea diba. Keristani taihuna ai ia lao neganai ena mauri lagani be 65 hahinena ta ese Baibel ia duahia matamaia dinana bona ia haorea dinana be ena Baibel ena lalona kahana dekenai ia torea. Hari, Baibel be nega faiv ia duahia vadaeni! (Deuteronomi 32:​45-​47) Kompiuta ta eiava ia printaia pepa amo ia duahia lasi, to iena imana dekenai ia noho Baibel ia gaukaralaia.

¹⁵ Baibel ibounai idia duahia haorea vadaeni taudia haida ese dala ma haida idia tahua edia stadi karana amo anina namona idia abia totona. Dala ta be, Baibel ena buka ta oi do duahia lasi neganai, oi stadilaia totona gau haida oi abia hidi. “All Scripture Is Inspired of God and Beneficial” bona Insight on the Scriptures bukadia amo, ta ese Baibel bukadia ta ta edia histori, edia sitaelo, bona idia havaraia namo dekenai diba namona do ia abia diba.a

16. Edena bamona Baibel stadi karana ita dadaraia be namo?

¹⁶ Stadi oi karaia neganai, namona be Baibel idia diba bada taudia momo bamona oi karaia lasi. Edia nega bada idia haorea siri edia hereva idia tahua namonamo totona, hegeregere Baibel be taunimanima amo ia mai bukana ta bamona. Idia haida ese idia laloa edena bamona duahia taudia totona buka ta ta idia torea eiava buka idia torea ena badina bona torea taudia edia lalohadai idia dibaia toho. Unai bamona lalohadai dainai, Baibel bukadia edia anina bada idia hamaragia bona idia laloa unai buka be histori bukadia eiava tomadiho daladia idia idau idia lao daladia idia hahedinaraia bukadia sibona. Diba bada taudia ma haida ese Baibel ena hereva ta ta iboudiai stadilaia karana idia karaia badabada. Hereva ta be edeseni amo ia mai idia stadilaia momo bona Heberu bona Greek herevadia edia anina idia gwauraia, to Dirava ena hereva ena anina idia laloa lasi. Oi laloa unai bamona stadi karana ese ta ena kara ia hanamoa abidadama goadana ia havaraia, a?​—1 Tesalonika 2:​13.

17. Dahaka dainai ita laloa Baibel ena sivarai be taunimanima ibounai totona?

¹⁷ Unai diba bada taudia edia lalohadai be maoro, a? Baibel bukadia ta ta be mai ena hereva badana tamona sibona eiava unai buka be taunimanima haida sibona totona be momokani, a? (1 Korinto 1:​19-​21) Hereva momokani be inai: Dirava ena Hereva ena buka iboudiai be mai edia namo bada mauri lagani bona mauri dala idauidau taudia ibounai totona. Ena be buka ta be guna tau tamona dekenai idia torea, hegeregere Timoteo eiava Tito dekenai, eiava orea ta, reana Galatia eiava Filipi taudia dekenai, to ita ibounai ese unai buka ibounai ita stadilaia diba bona ita stadilaia be namo. Idia be mai anina bada ita ibounai dekenai, bona buka ta ese gau momo ia herevalaia diba bona duahia taudia idauidau momo ia durua diba. Momokani, Baibel ena sivarai be taunimanima ibounai totona, unai dainai ita lalo-parara diba dahaka dainai tanobada dekenai idia noho taudia edia gado idauidau dekenai idia hahanaia.​​—Roma 15:4.

Oi Bona Ma Haida Dekenai Namo Ia Havaraia

18. Dirava ena Hereva oi duahia lalonai, dahaka oi lalohadailaia be namo?

¹⁸ Baibel oi stadilaia neganai, namo bada do oi davaria bema Baibel ena hereva oi lalo-pararalaia toho bona bema oi stadilaia herevadia edia anina be idia ta ta dekenai oi davaria toho. (Aonega Herevadia 2:​3-5; 4:7) Dirava ese ena Hereva lalonai ia hahedinaraia gaudia be iena ura ida idia hegeregere. Unai dainai oi duahiduahi lalonai, unai hereva bona sisiba be Dirava ena ura ida oi hahegeregerea. Reana oi laloa diba edena bamona kara ta, lalohadai ta, eiava peroveta herevana ta be Iehova ena ura ida ia hegeregere. Oi sibona oi nanadaia: ‘Inai hereva ese lau ia hadibaia Iehova be edena bamona Diravana? Dirava ese ena Basileia amo ena ura do ia karaia karana be edena bamona ia hahedinaraia?’ Reana oi laloa danu: ‘Edena bamona inai hereva lau gaukaralaia diba? Baibel amo ma haida lau hadibaia eiava sisiba henia neganai, inai hereva lau gaukaralaia diba, a?’​​—Iosua 1:8.

19. Oi dibaia gaudia be ma haida dekenai oi herevalaia neganai, daidia ese namo do idia abia? Gwauraia hedinarai.

¹⁹ Ma haida oi laloa karana be dala ta amo namo ia havaraia danu. Baibel oi duahia bona stadilaia neganai, gau matamatadia do oi dibaia bona gau haida dekenai emu lalo-parara oi habadaia. Namona be oi dibaia gaudia be emu ruma bese bona ma haida ida oi herevalaia. Bema nega maorodia ai bona mai hemataurai ida unai oi karaia, unai bamona herevahereva ese namo do ia havaraia. Oi dibaia gaudia eiava oi moalelaia gaudia be mai momokani bona ura bada ida oi herevalaia neganai, ma haida ese unai gaudia do idia laloa bada. To danu, unai amo namo bada do oi abia. Edena dala ai? Diba bada taudia idia gwau, tau ta ese ia dibaia gaudia be do ia laloatao daudau bema unai gaudia ia dibaia murinai maoromaoro ia gaukaralaia eiava ia herevalaia loulou, hegeregere ma haida dekenai ia gwauraia.b

20. Dahaka dainai Baibel oi duahia loulou be namo?

²⁰ Nega ta ta ai Baibel buka ta oi duahia neganai, hereva matamatadia haida do oi dibaia. Do oi hoa badina guna oi duahia neganai oi laloa momo lasi herevadia be hari do oi laloa bada. Unai herevadia dekenai oi emu lalo-parara oi habadaia. Unai ese ia hahedinaraia Baibel bukadia be taunimanima ese idia havaraia lasi, to idia be dava bada gaudia bamona, oi stadilaia loulou bona namo oi davaria totona. Mani oi laloatao, king taudia, Davida bamona taudia, ese edia “mauri dinadia ibounai lalonai” unai bukadia do idia duahia.

21. Dirava ena Hereva stadilaia karana oi habadaia neganai, dahaka namo do oi davaria?

²¹ Oibe, Baibel stadilaia namonamo totona nega idia atoa taudia ese namo bada do idia abia. Lauma dalanai dava bada gaudia bona aonega do idia abia. Edia hetura karana Dirava ida do idia habadaia. Idia be mai anina bada ruma bese dekenai, Keristani kongregesen lalonai idia noho tadikaka bona taihu dekenai, bona gabeai Iehova do idia tomadiho henia taudia dekenai danu.​​—Roma 10:​9-​14; 1 Timoteo 4:​16.

[Footnotes]

Oi Laloatao, A?

• Israela ena king taudia ese dahaka idia karaia be namo?

• Baibel stadilaia karana dekenai Iesu bona aposetolo taudia ese dahaka haheitalai namona idia hahedinaraia?

• Dahaka gaudia haida oi haidaua diba, sibona emu stadi negana oi habadaia totona?

• Dahaka laloa dalana ai Dirava ena Hereva oi stadilaia be namo?

[Box on page 13]

“Iseda Imana Dekenai”

“Bema ita ura . . . Baibel ena konkodens ta ita itaia, Internet dekenai ita itaia be dala namona. To bema ita ura Baibel ita duahia, stadilaia, lalohadailaia, laloa dobu, namona be iseda imana dekenai ia noho, badina ena hereva be iseda lalona bona kudouna dekenai ita atoa vareai diba dalana tamona be unai sibona.”​​—Gertrude Himmelfarb, ia ritaea ladana bada profesa ta, City University, New York.